Ninyi ni Matawi

Hotuba kwa Watumishi wa Kikristo

Kila kitu kinategemea sisi wenyewe kuwa sawa ndani ya Kristo. Nikitaka matunda mazuri, sharti niwe na mti mzuri wa tofaa; na nikitunza afya ya mti wa tofaa, mti huo utanipa matofaa mazuri. Na ndivyo ilivyo kwa maisha yetu ya Kikristo na kazi yetu. Ikiwa maisha yetu pamoja na Kristo ni sawa, yote yatakuwa sawa. Yaweza kuwapo haja ya mafundisho na mashauri na msaada na mazoezi katika idara mbalimbali za kazi; yote hayo yana thamani. Lakini hatimaye, jambo la lazima kuliko yote ni kuwa na maisha kamili ndani ya Kristo—kwa maneno mengine, kuwa na Kristo ndani yetu, akitenda kazi kupitia sisi. Najua ni mengi kiasi gani yaliyopo mara nyingi ya kutusumbua, au ya kutuletea maswali ya wasiwasi; lakini Bwana ana baraka namna hii kwa kila mmoja wetu, na amani kamili na raha namna hii, na furaha na nguvu namna hii, ikiwa tu twaweza kuingia, na kutunzwa, katika hali iliyo sawa mbele yake.

Nitachukua andiko langu kutoka mfano wa Mzabibu na Matawi, katika Yohana 15:5: “Mimi ni mzabibu, ninyi ni matawi.” Hasa maneno haya: “Ninyi ni matawi.”

Ni jambo rahisi kiasi gani kuwa tawi, tawi la mti, au tawi la mzabibu! Tawi huchipuka kutoka mzabibu, au kutoka mti, na hapo hukaa na kukua, na kwa wakati wake, huzaa matunda. Halina wajibu wowote isipokuwa kupokea tu kutoka shinani na tawini utomvu na chakula. Na kama tu kwa Roho Mtakatifu tungeujua uhusiano wetu na Yesu Kristo, kazi yetu ingegeuka kuwa jambo lililong’aa zaidi na la kimbingu kuliko yote duniani. Badala ya kuwako kamwe uchovu wa nafsi au kuchoka, kazi yetu ingekuwa kama uzoefu mpya, ikituunganisha na Yesu kama vile hakuna kitu kingine kiwezavyo. Kwa maana, ole wetu! je, si kweli mara nyingi kwamba kazi yetu huingia kati yetu na Yesu? Upumbavu ulioje! Kazi ile ile anayopaswa kuifanya ndani yangu, nami kwa ajili yake, naipokea kwa namna ambayo hunitenga na Kristo. Watenda kazi wengi katika shamba la mizabibu wamelalamika kwamba wana kazi nyingi mno, wala hawana wakati wa ushirika wa karibu na Yesu, na kwamba kazi yao ya kawaida hudhoofisha shauku yao ya kuomba, na kwamba kuchangamana kwao kupita kiasi na watu hutia giza maisha ya rohoni. Wazo la kusikitisha, kwamba kuzaa matunda kunapaswa kulitenga tawi na mzabibu! Hilo lazima ni kwa sababu tumeitazama kazi yetu kama kitu kingine tofauti na tawi lizaalo matunda. Mungu na atuokoe na kila wazo la uongo kuhusu maisha ya Kikristo.

Sasa, mawazo machache tu kuhusu maisha haya ya baraka ya tawi.

Kutegemea Kabisa

Kwanza kabisa, ni maisha ya kutegemea kabisa. Tawi halina kitu; hutegemea mzabibu tu kwa kila kitu. Kutegemea kabisa ni mojawapo ya mawazo yaliyo mazito na ya thamani kupita yote. Mwanateolojia mkuu wa Kijerumani aliandika mabuku mawili makubwa miaka kadhaa iliyopita ili kuonyesha kwamba teolojia yote ya Calvin imefungwa katika kanuni ile moja ya kutegemea kabisa kwa Mungu; naye alikuwa sahihi. Mwandishi mwingine mkuu amesema kwamba kutegemea Mungu kabisa, kusikobadilika peke yake ndiyo asili ya dini ya malaika, nayo yapaswa kuwa hivyo kwa wanadamu pia. Mungu ni kila kitu kwa malaika, naye yu radhi kuwa kila kitu kwa Mkristo. Kama nikijifunza kila dakika ya siku kumtegemea Mungu, kila kitu kitakuwa sawa. Utapata maisha ya juu zaidi ukimtegemea Mungu kabisa.

Sasa, hapa twaliona jambo hili kwa mzabibu na matawi. Kila mzabibu uonao, au kila kishada cha zabibu kifikacho mezani pako, na kikukumbushe kwamba tawi hutegemea mzabibu kabisa. Mzabibu ndio unaopaswa kufanya kazi, na tawi hufurahia matunda yake.

Mzabibu unapaswa kufanya nini? Unapaswa kufanya kazi kubwa. Unapaswa kupeleka mizizi yake ndani ya udongo na kutafuta chini ya ardhi—mizizi mara nyingi hutanda mbali sana—ili kupata chakula, na kunywa unyevu. Weka aina fulani za mbolea pande fulani, nao mzabibu hupeleka mizizi yake huko, kisha katika mizizi yake au vitawi hugeuza unyevu na mbolea kuwa ule utomvu maalumu utakaozaa tunda lililobeba. Mzabibu hufanya kazi, na tawi lapaswa tu kupokea kutoka mzabibu ule utomvu, ambao hugeuzwa kuwa zabibu. Nimeambiwa kwamba huko Hampton Court, London, kuna mzabibu ambao wakati mwingine ulizaa vishada elfu kadhaa vya zabibu, nao watu walishangaa ukuaji wake mkubwa na wingi wa matunda yake. Baadaye ikagunduliwa sababu yake ilikuwa nini. Si mbali sana hutiririka Mto Thames, nao mzabibu ulikuwa umeinyoosha mizizi yake mamia ya mita chini ya ardhi, hata ukafika ukingoni mwa mto, na huko katika matope yote yenye rutuba ya sakafu ya mto ukapata chakula kingi, na kupata unyevu, na mizizi ikawa imevuta utomvu umbali huo wote juu na juu ndani ya mzabibu, na matokeo yake yakawa mavuno tele, mengi. Mzabibu ulikuwa na kazi ya kufanya, na matawi yalipaswa tu kuutegemea mzabibu, na kupokea kile ulichotoa.

Je, hilo ni kweli kihalisi kwa Bwana wangu Yesu? Je, yanipasa kufahamu kwamba ninapopaswa kufanya kazi, ninapopaswa kuhubiri mahubiri, au kuhutubia darasa la Biblia, au kwenda kuwatembelea maskini, wale waliopuuzwa, kwamba wajibu wote wa kazi upo kwa Kristo?

Hicho ndicho hasa Kristo anachotaka ukifahamu. Kristo anataka kwamba katika kazi yako yote, msingi wenyewe uwe ule utambuzi rahisi, uliobarikiwa: Kristo lazima ahudumie yote.

Naye huutimizaje uaminifu wa kutegemea huko? Hulifanya kwa kumshusha Roho Mtakatifu—si mara kwa mara tu kama zawadi ya pekee, kwani kumbuka uhusiano kati ya mzabibu na matawi ni wa namna ambayo kila saa, kila siku, bila kukoma uunganisho ulio hai hudumishwa. Utomvu hautiriki kwa muda, kisha kusimama, kisha kutiririka tena, bali toka dakika hadi dakika utomvu hutiririka kutoka mzabibu kwenda matawi. Na vivyo hivyo, Bwana wangu Yesu anataka nichukue nafasi ile iliyobarikiwa kama mtenda kazi, na asubuhi kwa asubuhi na siku kwa siku na saa kwa saa na hatua kwa hatua, katika kila kazi ninayopaswa kutoka kwenda kuifanya nikae tu mbele yake katika unyonge kamili wa yule asiyejua kitu, aliye si kitu, na asiyeweza kufanya kitu. Oh, watumishi wapendwa, jifunzeni neno hilo si kitu. Nyakati fulani mwaimba: “Oh, kuwa si kitu, si kitu”; lakini je, mmelisoma kweli neno hilo na kuomba kila siku, na kumwabudu Mungu, katika nuru yake? Je, mwaijua baraka ya neno hilo si kitu?

Kama mimi ni kitu, basi Mungu si kila kitu; lakini nikawapo si kitu, Mungu aweza kuwa vyote, na Mungu wa milele katika Kristo aweza kujidhihirisha kwa ukamilifu. Hayo ndiyo maisha ya juu zaidi. Twahitaji kuwa si kitu. Mtu fulani amesema vema kwamba maserafi na makerubi ni miali ya moto kwa sababu wanajua kuwa wao si kitu, nao humwacha Mungu aweke utimilifu wake na utukufu wake na mng’ao wake ndani yao. Oh, kuwa si kitu katika uhalisia wa ndani, na, kama mtenda kazi, jifunze jambo moja tu—kuwa maskini zaidi na mnyonge zaidi na dhaifu zaidi, ili Kristo apate kutenda yote ndani yako.

Watumishi, hili hapa somo lenu la kwanza: jifunzeni kuwa si kitu, jifunzeni kuwa wanyonge. Mtu aliye na kitu hategemei kabisa; bali mtu asiye na kitu hutegemea kabisa. Kutegemea Mungu kabisa ndiyo siri ya nguvu yote katika kazi. Tawi halina kitu ila kile linachopata kutoka mzabibu, nawe na mimi hatuwezi kuwa na kitu ila kile tunachopata kutoka Yesu.

Raha ya Ndani

Lakini pili, maisha ya tawi si maisha ya kutegemea kikamilifu tu, bali ya raha ya ndani.

Tawi lile dogo, kama lingeweza kufikiri, na kama lingeweza kuhisi, na kama lingeweza kusema—tawi lile lililoko mbali katika mzabibu wa Hampton Court, au katika baadhi ya ile mizabibu milioni tuliyo nayo Afrika Kusini, katika nchi yetu yenye jua—kama tungeweza kuwa na tawi dogo hapa leo litusemeshe, na kama tungeweza kusema: “Njoo, tawi la mzabibu, nataka kujifunza kwako jinsi niwezavyo kuwa tawi la kweli la Mzabibu ulio hai,” lingejibu nini? Tawi lile dogo lingenong’ona:

“Mwanadamu, nasikia kwamba wewe una hekima, nami najua kwamba waweza kufanya mambo mengi ya ajabu. Najua umepewa nguvu na hekima nyingi lakini nina somo moja kwako. Pamoja na haraka yako yote na juhudi yako yote katika kazi ya Kristo hufanikiwi kamwe. Jambo la kwanza uhitajilo ni kuja na kupumzika ndani ya Bwana wako Yesu. Hilo ndilo nifanyalo mimi. Tangu nilipochipuka kutoka mzabibu ule nimetumia miaka na miaka, na yote niliyoyafanya ni kupumzika tu ndani ya mzabibu. Wakati wa masika ulipofika sikuwa na wazo la wasiwasi wala shughuli. Mzabibu ukaanza kunimiminia utomvu wake, na kunipa chipukizi na jani. Na wakati wa kiangazi ulipofika sikuwa na shughuli, na katika joto kuu nikautumaini mzabibu kuleta unyevu ili kunidumisha nikiwa mbichi. Na wakati wa mavuno, mwenye shamba alipokuja kuchuma zabibu, sikuwa na shughuli. Kama palikuwa na jambo lolote katika zabibu lisilo jema, mwenye shamba hakulilaumu kamwe tawi, lawama sikuzote ilikuwa juu ya mzabibu. Na kama utapenda kuwa tawi la kweli la Kristo, Mzabibu ulio hai, pumzika tu juu yake. Mwache Kristo aubebe wajibu.”

Wasema: “Je, hilo halitanifanya mvivu?”

Nawaambia halitafanya hivyo. Hakuna anayejifunza kupumzika juu ya Kristo aliye hai awezaye kuwa mvivu, kwa maana kadiri unavyokaribiana zaidi na Kristo ndivyo utakavyojazwa zaidi Roho wa bidii yake na upendo wake. Lakini, oh, anza kufanya kazi katikati ya kutegemea kwako kikamilifu kwa kuongeza ile raha ya ndani. Mtu nyakati fulani hujaribu na kujaribu kumtegemea Kristo, lakini hujisumbua kuhusu kutegemea huku kabisa; hujaribu wala hawezi kukupata. Lakini na azame chini katika raha kamili kila siku.

Katika mkono wako hodari najilaza.

Ndivyo kazi itakavyofanyika;

Kwa maana ni nani awezaye kutenda kwa ajabu namna hii

Kama yeye Mwenyezi?

Mtumishi, chukua nafasi yako kila siku miguuni pa Yesu, katika amani na raha iliyobarikiwa itokayo katika ufahamu —

Sina shughuli, shughuli zangu ni zake!

Sina hofu, yeye hujali hofu zangu zote.

Njooni, watoto wa Mungu, na mfahamu kwamba ni Bwana Yesu atakaye kutenda kazi kupitia ninyi. Mnalalamika juu ya kukosa upendo wa moto. Utatoka kwa Yesu. Yeye atatia upendo wa kimungu moyoni mwako ambao kwa huo waweza kuwapenda watu. Hiyo ndiyo maana ya uhakika ule: “Pendo la Mungu limekwisha kumiminwa katika mioyo yetu kwa Roho Mtakatifu” (Warumi 5:5); na ya neno lile lingine: “Upendo wa Kristo watubidisha” (2 Wakorintho 5:14). Kristo aweza kukupa chemchemi ya upendo, hata usiweze kujizuia kuwapenda walio wanyonge kupita wote na wasio na shukrani kupita wote, au wale waliokuchosha hata sasa. Pumzika ndani ya Kristo, awezaye kutoa hekima na nguvu, nawe hujui jinsi raha hiyo mara nyingi itakavyodhihirika kuwa sehemu iliyo bora kabisa ya ujumbe wako. Wasihi watu nawe wabishana, nao hupata wazo: “Kuna mtu anabishana na kushindana nami.” Wao huhisi tu: “Hapa kuna watu wawili wanaoshughulikiana.” Lakini ukiiacha raha ya ndani ya Mungu ikushukie, ile raha katika Kristo Yesu, amani na raha na utakatifu wa Mbinguni, raha hiyo italeta baraka moyoni, hata zaidi ya maneno usemayo.

Kuzaa Matunda Mengi

Lakini tatu, tawi hufundisha somo la kuzaa matunda mengi.

Bwana Yesu Kristo alilirudia neno lile tunda mara nyingi katika mfano ule. Alinena, kwanza, juu ya tunda, kisha juu ya tunda zaidi, kisha juu ya matunda mengi. Naam, mmewekwa si kuzaa tunda tu, bali kuzaa matunda mengi. “Hivyo hutukuzwa Baba yangu, kwa vile mzaavyo matunda mengi” (Yohana 15:8). Kwanza kabisa, Kristo alisema: “Mimi ni mzabibu, na Baba yangu ndiye mkulima. Baba yangu ndiye mkulima aliye na uangalizi juu yangu na juu yako.” Yeye atakayeulinda uunganisho kati ya Kristo na matawi ni Mungu; na ni katika nguvu za Mungu kupitia Kristo ndipo tutakapozaa matunda.

Oh, Wakristo, mwajua ulimwengu huu unaangamia kwa kukosa watumishi. Nao haukosi watumishi zaidi tu—watumishi wanasema, wengine kwa bidii kuliko wengine: “Tunahitaji si watumishi zaidi tu, bali twahitaji watumishi wetu wawe na nguvu mpya, maisha tofauti; ili sisi watumishi tuweze kuleta baraka zaidi.” Watoto wa Mungu, nawasihi. Mwajua taabu mnayoichukua, tuseme, katika hali ya ugonjwa. Mnaye rafiki mpendwa aonekanaye kuwa hatarini kufa, wala hakuna kitu kiwezacho kumburudisha rafiki huyo kama zabibu chache, nazo hazipatikani msimu huo; lakini ni taabu iliyoje mtakayoichukua kupata zabibu zitakazokuwa chakula cha rafiki huyu anayekufa! Na, oh, wapo karibu nanyi watu ambao hawaendi kanisani kamwe, na wengi sana waendao kanisani, lakini hawamjui Kristo. Na hata hivyo zabibu za mbinguni, zabibu za Mzabibu wa mbinguni, hazipatikani kwa bei yoyote, ila mtoto wa Mungu azizaapo kutoka maisha yake ya ndani katika ushirika na Kristo. Isipokuwa watoto wa Mungu wamejaa utomvu wa Mzabibu wa mbinguni, isipokuwa wamejaa Roho Mtakatifu na upendo wa Yesu, hawawezi kuzaa wingi wa zabibu ya kweli ya mbinguni. Sote twakiri kuna kazi nyingi, mahubiri mengi na mafundisho na matembezi, mitambo mingi, juhudi nyingi za dhati za kila namna; lakini hakuna udhihirisho mwingi wa nguvu za Mungu ndani yake.

Ni nini kinachokosekana? Kinachokosekana ni uunganisho wa karibu kati ya mtumishi na Mzabibu wa mbinguni. Kristo, Mzabibu wa mbinguni, ana baraka ambazo angeziwaga juu ya makumi ya maelfu wanaoangamia. Kristo, Mzabibu wa mbinguni, ana nguvu ya kutoa zabibu za mbinguni. Lakini “Ninyi ni matawi,” nawe huwezi kuzaa tunda la mbinguni usipokuwa katika uunganisho wa karibu na Yesu Kristo.

Usichanganye kazi na tunda. Yaweza kuwapo kazi nyingi kwa ajili ya Kristo isiyo tunda la Mzabibu wa mbinguni. Usitafute kazi tu. Oh! jifunze swali hili la kuzaa tunda. Lamaanisha uhai wenyewe na nguvu yenyewe na roho yenyewe na upendo wenyewe ndani ya moyo wa Mwana wa Mungu—lamaanisha Mzabibu wa mbinguni mwenyewe akiingia moyoni mwako na wangu.

Mwajua kuna aina mbalimbali za zabibu, kila moja ina jina tofauti, na kila mzabibu hutoa hasa ile harufu ya pekee na maji ambayo humpa zabibu ladha na onjo lake maalumu. Vivyo hivyo, mna ndani ya moyo wa Kristo Yesu uhai, na upendo, na Roho, na baraka, na nguvu kwa ajili ya wanadamu, vilivyo vya mbinguni kabisa na vya kimungu, navyo vitashuka ndani ya mioyo yetu. Simama katika uunganisho wa karibu na Mzabibu wa mbinguni na useme:

“Bwana Yesu, si chochote kilicho pungufu ya utomvu utiririkao kupitia nafsi yako, si chochote kilicho pungufu ya Roho wa uzima wako wa kimungu ndicho tuombacho. Bwana Yesu, nakuomba uache Roho wako atiririke kupitia mimi katika kazi yangu yote kwa ajili yako.”

Nawaambia tena kwamba utomvu wa Mzabibu wa mbinguni si kitu kingine ila Roho Mtakatifu. Roho Mtakatifu ndiye uhai wa Mzabibu wa mbinguni, na kile upaswacho kupata kutoka Kristo si chochote kilicho pungufu ya mmiminiko mkuu wa Roho Mtakatifu. Waihitaji sana, wala hutaki kitu zaidi ya hicho. Kumbuka hilo. Usitazamie Kristo akupe kidogo cha nguvu hapa, na kidogo cha baraka pale, na kidogo cha msaada kule. Kama mzabibu ufanyavyo kazi yake kwa kutoa utomvu wake wa pekee kwa tawi, ndivyo mtazamie Kristo akutolee Roho wake Mtakatifu ndani ya moyo wako, ndipo utakapozaa matunda mengi. Na kama umeanza kuzaa tunda tu, nawe wausikiliza neno la Kristo katika mfano, “tunda zaidi,” “matunda mengi,” kumbuka kwamba ili uzae tunda zaidi wahitaji tu kupata Yesu zaidi katika maisha na moyo wako.

Sisi wahudumu wa Injili, jinsi tulivyo hatarini kuingia katika hali ya kazi, kazi, kazi! Nasi twaiombea, lakini ubichi na uchangamfu na furaha ya maisha ya mbinguni haviko sikuzote. Na tutafute kufahamu kwamba maisha ya tawi ni maisha ya matunda mengi, kwa sababu ni maisha yenye mizizi ndani ya Kristo, Mzabibu ulio hai, wa mbinguni.

Ushirika wa Karibu

Na nne, maisha ya tawi ni maisha ya ushirika wa karibu.

Na tuulize tena: Tawi lina la kufanya nini? Mwalijua neno lile la thamani, lisilokwisha, alilotumia Kristo: Kaeni. Maisha yako yapaswa kuwa maisha ya kukaa. Na kukaa huko kuwe namna gani? Kuwe kama tu tawi ndani ya mzabibu, likikaa kila dakika ya siku. Yapo matawi, katika ushirika wa karibu, katika ushirika usiokatika, na mzabibu, tangu Januari hadi Desemba. Na je, siwezi kuishi kila siku—ni jambo karibu la kutisha kwangu kwamba tuulize swali hili—je, siwezi kuishi katika ushirika wa kudumu na Mzabibu wa mbinguni?

Wasema: “Lakini nimeshughulishwa sana na mambo mengine.”

Waweza kuwa na kazi ngumu ya saa kumi kila siku, ambazo wakati wake akili yako yapaswa kushughulishwa na mambo ya wakati huu; Mungu ndiye aliyeamuru hivyo. Lakini kazi ya kukaa ni kazi ya moyo, si ya akili, kazi ya moyo ung’ang’aniao na kupumzika ndani ya Yesu, kazi ambayo ndani yake Roho Mtakatifu hutuunganisha na Kristo Yesu. Oh, amini kwamba ndani zaidi kuliko akili, ndani sana katika maisha ya moyoni, waweza kukaa ndani ya Kristo, hata kila dakika ulipo huru utambuzi utakuja:

“Yesu mbarikiwa, bado niko ndani yako.”

Ukijifunza kwa muda kuweka kando kazi nyingine na kuingia katika mgusano huu wa kudumu na Mzabibu wa mbinguni, utaona kwamba tunda litakuja.

Utumizi wa ushirika huu wa kudumu katika maisha yetu ni nini? Wamaanisha nini?

Wamaanisha ushirika wa karibu na Kristo katika maombi ya siri. Nina hakika wapo Wakristo wanaoyatamani maisha ya juu zaidi, na ambao nyakati fulani wamepata baraka kuu, na wakati mwingine wameona mmiminiko mkuu wa furaha ya mbinguni na mfuriko mkuu wa shangwe ya mbinguni; na hata hivyo baada ya muda umepita. Hawajafahamu kwamba ushirika wa karibu, wa binafsi, wa kweli na Kristo ni lazima kabisa kwa maisha ya kila siku. Tumia wakati kuwa peke yako na Kristo. Hakuna kitu Mbinguni wala duniani kiwezacho kukuweka huru na lazima hiyo, kama utakuwa Mkristo mwenye furaha na mtakatifu.

Oh! ni Wakristo wangapi waitazamao kama mzigo na kodi, na wajibu, na ugumu kuwa mara nyingi peke yao na Mungu! Hilo ndilo kizuizi kikuu kwa maisha yetu ya Kikristo kila mahali. Twahitaji ushirika mtulivu zaidi na Mungu, nami nawaambia kwa jina la Mzabibu wa mbinguni kwamba hamwezi kuwa matawi yenye afya, matawi ambayo ndani yake utomvu wa mbinguni waweza kutiririka, msipochukua wakati wa kutosha kwa ushirika na Mungu. Kama hamko radhi kuutoa wakati kwa kuwa peke yenu naye, na kumpa wakati kila siku atende ndani yenu, na kudumisha kifungo cha uunganisho kati yenu na yeye mwenyewe, hawezi kuwapa baraka ile ya ushirika wake usiokatika. Yesu Kristo anakuomba uishi katika ushirika wa karibu naye. Kila moyo na useme: “Ee, Kristo, ni hili nilitamanilo, ni hili nilichagualo.” Naye atakupa kwa furaha.

Kujisalimisha Kabisa

Na kisha hatimaye, maisha ya tawi ni maisha ya kujisalimisha kabisa.

Neno hili, kujisalimisha kabisa, ni neno kuu na zito, nami naamini hatuielewi maana yake. Lakini hata hivyo tawi lile dogo hulihubiri.

“Je, una jambo la kufanya, tawi dogo, zaidi ya kuzaa zabibu?”

“La, hakuna kitu.”

“Je, hufai kwa lolote?”

Hufai kwa lolote! Biblia husema kwamba kipande cha mzabibu hakiwezi hata kutumika kama kalamu; hakifai kwa lolote ila kuteketezwa.

“Na sasa, wafahamu nini, tawi dogo, kuhusu uhusiano wako na mzabibu?”

“Uhusiano wangu ni huu tu: nimejitoa kabisa kwa mzabibu, nao mzabibu waweza kunipa utomvu mwingi au mchache kama upendavyo. Hapa nipo kwa matakwa yake nao mzabibu waweza kunifanyia upendavyo.”

Oh, rafiki, twahitaji kujisalimisha huku kabisa kwa Bwana Yesu Kristo. Kadiri nizidivyo kunena, ndivyo nizidivyo kuhisi kwamba hili ni mojawapo ya mambo magumu kuliko yote kuyaweka wazi, na mojawapo ya mambo muhimu na ya lazima kuliko yote kuyaeleza—kujisalimisha huku kabisa ni nini. Mara nyingi ni jambo rahisi kwa mtu au watu kadhaa kutokea na kujitoa kwa Mungu kwa kujiweka wakfu kikamilifu, na kusema: “Bwana, ni shauku yangu kujitoa mwenyewe kabisa kwako.” Hilo lina thamani kubwa, na mara nyingi huleta baraka tele sana. Lakini swali moja nipaswalo kulitafakari kwa utulivu ni Nini maana ya kujisalimisha kabisa?

Lamaanisha kwamba, kama vile kihalisi Kristo alivyotolewa kabisa kwa Mungu, nami nimetolewa kabisa kwa Kristo. Je, hilo ni zito mno? Wengine hufikiri hivyo. Wengine hufikiri kwamba haliwezi kamwe kuwa hivyo; kwamba kama vile kikamilifu na kabisa Kristo alivyoyatoa maisha yake asifanye lolote ila kutafuta radhi ya Baba, na kumtegemea Baba kabisa na kikamilifu, nami nisifanye lolote ila kutafuta radhi ya Kristo. Lakini hilo ni kweli hasa. Kristo Yesu alikuja kupuliza Roho wake mwenyewe ndani yetu, ili kutufanya tupate furaha yetu iliyo kuu kabisa katika kuishi kwa ajili ya Mungu kikamilifu, kama vile alivyofanya yeye. Oh, ndugu wapendwa, kama ndivyo ilivyo, basi yanipasa kusema:

“Naam, kama ilivyo kweli kwa tawi lile dogo la mzabibu, ndivyo, kwa neema ya Mungu, ningependa iwe kweli kwangu. Ningeishi siku kwa siku ili Kristo aweze kunifanyia apendavyo.”

Ah! hapa huja kosa la kutisha lililo chini ya sehemu kubwa ya dini yetu wenyewe. Mtu hufikiri:

“Nina biashara yangu na wajibu wa jamaa, na mahusiano yangu kama raia, na haya yote siwezi kuyabadili. Na sasa kando ya haya yote napaswa kuingiza dini na utumishi wa Mungu, kama kitu kitakachonizuia na dhambi. Mungu anisaidie kuyatimiza majukumu yangu vema!”

Hili si sawa. Kristo alipokuja, alikuja na kumnunua mwenye dhambi kwa damu yake. Kama palikuwa na soko la watumwa hapa nami ningemnunua mtumwa, ningemchukua mtumwa huyo kwenda nyumbani kwangu kutoka mazingira yake ya zamani, naye angeishi nyumbani kwangu kama mali yangu binafsi, nami ningeweza kumwamuru mchana kutwa. Na kama angekuwa mtumwa mwaminifu, angeishi kama asiye na mapenzi wala manufaa yake mwenyewe, shughuli yake pekee ikiwa kuendeleza hali njema na heshima ya bwana wake. Na vivyo hivyo mimi, niliyenunuliwa kwa damu ya Kristo, nimenunuliwa niishi kila siku kwa wazo moja—Nawezaje kumpendeza Bwana wangu?

Oh, twayaona maisha ya Kikristo kuwa magumu sana kwa sababu twatafuta baraka ya Mungu hali tukiishi katika mapenzi yetu wenyewe. Tungependa kuishi maisha ya Kikristo kadiri ya kupenda kwetu wenyewe. Twafanya mipango yetu wenyewe na kuchagua kazi yetu wenyewe, kisha twamwomba Bwana Yesu aingie na kuangalia kwamba dhambi isitushinde mno, na kwamba tusipotoke mno; twamwomba aingie na kutupa baraka yake nyingi kadiri hii. Lakini uhusiano wetu na Yesu wapaswa kuwa wa namna ambayo tuko kabisa kwa matakwa yake, na kila siku twamjia kwa unyenyekevu na moja kwa moja na kusema:

“Bwana, je, kuna kitu chochote ndani yangu kisicho kulingana na mapenzi yako, kisichoamriwa na wewe, au kisichotolewa kabisa kwako?”

Oh, kama tungengoja na kungoja kwa saburi, nawaambia matokeo yangekuwa nini. Ungechipuka uhusiano kati yetu na Kristo ulio wa karibu na wa upole namna ambayo baadaye tungestaajabu jinsi hapo awali tulivyoweza kuishi na wazo: “Nimejisalimisha kwa Kristo.” Tungehisi jinsi mahusiano yetu naye yalivyokuwa mbali sana hapo awali, na kwamba yeye aweza, naam hufanya kweli, kuja na kutumiliki halisi, na kutoa ushirika usiokatika mchana kutwa. Tawi latuita kwenye kujisalimisha kabisa.

Sinenei sasa sana juu ya kuacha dhambi. Wako watu wanaohitaji hilo, watu wenye hasira kali, tabia mbaya, na dhambi halisi wazitendazo mara kwa mara, ambazo hawajazitoa kamwe katika kifua chenyewe cha Mwana-Kondoo wa Mungu. Nawasihi, kama ni matawi ya Mzabibu ulio hai, msizuie hata dhambi moja. Najua kuna magumu mengi sana kuhusu swali hili la utakatifu. Najua kwamba si wote wafikirio hasa vile vile kuhusu jambo hili. Hilo lingekuwa kwangu jambo lisilonisumbua sana kama ningeweza kuona kwamba wote wanatamani kwa unyofu kuwa huru na kila dhambi. Lakini nachelea kwamba pasipo kujua yamo mioyoni mara nyingi maafikiano na wazo kwamba hatuwezi kuwa bila dhambi, sharti tutende dhambi kidogo kila siku; hatuwezi kujizuia. Oh, laiti watu wangemlilia Mungu kweli: “Bwana, unilinde na dhambi!” Jitoe kabisa kwa Yesu, na umwombe akutendee kwa uwezo wake wote katika kukulinda na dhambi.

Kuna mengi katika kazi yetu, katika kanisa letu na mazingira yetu ambayo tuliyakuta ulimwenguni tulipozaliwa ndani yake, nayo yamekua pande zote zetu, nasi twafikiri kwamba yote ni sawa, hayawezi kubadilika. Hatumjii Bwana Yesu na kumwuliza kuhusu hilo. Oh! nawashauri, Wakristo, leteni kila kitu katika uhusiano na Yesu na semeni:

“Bwana, kila kitu katika maisha yangu chapaswa kuwa katika upatano ulio kamili kabisa na hali yangu kama tawi lako, Mzabibu mbarikiwa.”

Kujisalimisha kwako kwa Kristo na kuwe kabisa. Silielewi neno lile kujisalimisha kikamilifu; hupata maana mpya mara kwa mara; hupanuka mno mara kwa mara. Lakini nakushauri ulinene wazi: “Kujisalimisha kabisa kwako, Ee Kristo, ndicho nilichokichagua.” Naye Kristo atakuonyesha kile kisicho kulingana na nia yake, na kukuongoza mbele hadi baraka iliyo ya ndani zaidi na ya juu zaidi.

Kwa kuhitimisha, na nikusanye yote katika sentensi moja. Kristo Yesu alisema: “Mimi ni mzabibu, ninyi ni matawi.” Kwa maneno mengine: “Mimi, aliye hai niliyejitoa kwenu kikamilifu namna hii, ndimi Mzabibu. Huwezi kunitumaini kupita kiasi. Mimi ni Mtenda kazi Mwenyezi, niliyejaa uzima na nguvu za kimungu.” Ninyi ni matawi ya Bwana Yesu Kristo. Kama umo moyoni mwako utambuzi kwamba wewe si tawi lenye nguvu, lenye afya, lizaalo matunda, usiyeunganishwa kwa karibu na Yesu, usiyeishi ndani yake kama ipasavyo—basi msikilize akisema: “Mimi ni Mzabibu, nitakupokea, nitakuvuta kwangu, nitakubariki, nitakutia nguvu, nitakujaza Roho wangu. Mimi, Mzabibu, nimekutwaa uwe matawi yangu, nimejitoa kwako kabisa; watoto, jitoeni kwangu kabisa. Nimejisalimisha mwenyewe kama Mungu kwenu kabisa; nikawa mwanadamu na kufa kwa ajili yenu ili nipate kuwa wenu kabisa. Njooni mkajisalimishe kabisa muwe wangu.”

Jibu letu litakuwa nini? Oh, na liwe ombi kutoka vilindi vya moyo wetu, kwamba Kristo aliye hai amtwae kila mmoja wetu na kutuunganisha kwa karibu naye mwenyewe. Ombi letu na liwe kwamba yeye, Mzabibu ulio hai, atamuunganisha kila mmoja wetu naye mwenyewe kiasi kwamba tutakwenda zetu mioyo yetu ikiimba: “Yeye ni Mzabibu wangu, nami ni matawi yake—sitaki kitu zaidi—sasa ninao Mzabibu wa milele.” Kisha, upatapo kuwa peke yako naye, mwabudu na kumsujudia, msifu na kumtumaini, mpende na kuungoja upendo wake. “Wewe ndiwe Mzabibu wangu, nami ni tawi lako. Yatosha, nafsi yangu imeridhika.”

Utukufu kwa jina lake lililobarikiwa!