Kujisalimisha Kabisa

“Basi Ben-hadadi mfalme wa Shamu akakusanya jeshi lake lote pamoja; na wafalme thelathini na wawili walikuwa pamoja naye, na farasi, na magari; naye akakwea akauzingira Samaria, akapigana nayo. Akatuma wajumbe kwa Ahabu mfalme wa Israeli mjini, akamwambia, “Ben-hadadi asema hivi, Fedha yako na dhahabu yako ni yangu; na wake zako na watoto wako, hata walio wazuri zaidi, ni wangu. Naye mfalme wa Israeli akajibu, akasema, Bwana wangu, mfalme, kama unenavyo, mimi ni wako, na vyote nilivyo navyo” (1 Wafalme 20:1-4).

Alichokitaka Ben-hadadi kilikuwa kujisalimisha kabisa; na alichotoa Ahabu ndicho hasa kilichotakwa kwake—kujisalimisha kabisa. Nataka kuyatumia maneno haya: “Bwana wangu, mfalme, kama unenavyo, mimi ni wako, na vyote nilivyo navyo,” kama maneno ya kujisalimisha kabisa ambayo kwayo kila mtoto wa Mungu apasa kujitoa kwa Baba yake. Tumeyasikia hapo awali, lakini twahitaji kuyasikia kwa uhakika kabisa—sharti la baraka ya Mungu ni kujisalimisha kwa vyote kabisa mikononi mwake. Asifiwe Mungu! Kama mioyo yetu iko tayari kwa hilo, hakuna kikomo cha yale Mungu atakayotutendea, wala cha baraka atakazotumiminia.

Kujisalimisha kabisa—niwaeleze nilikoyapata maneno hayo. Niliyatumia mwenyewe mara nyingi, nanyi mmeyasikia mara zisizohesabika. Lakini huko Uskoti wakati mmoja nilikuwa katika kundi ambako tulikuwa tukizungumza juu ya hali ya Kanisa la Kristo, na uhitaji mkuu wa Kanisa na wa waaminio ni nini; na katika kundi letu alikuwako mtenda kazi mcha Mungu aliye na mengi ya kufanya katika kuwazoeza watenda kazi, nami nikamuuliza angesema uhitaji mkuu wa Kanisa ni nini, na ujumbe upasao kuhubiriwa. Akajibu kwa utulivu, na kwa unyofu, na kwa uthabiti:

“Kujisalimisha kabisa kwa Mungu ndilo jambo pekee.”

Maneno hayo yaligusa moyo wangu kama hayakuwahi kunigusa kamwe. Na mtu yule akaanza kueleza jinsi, katika watenda kazi aliokuwa nao, aonavyo kwamba wakiwa imara katika jambo hilo, hata wangekuwa wa nyuma, huwa tayari kufundishwa na kusaidiwa, nao siku zote hustawi; hali wengine ambao si imara humo mara nyingi hurudi nyuma na kuiacha kazi. Sharti la kupata baraka kamili ya Mungu ni kujisalimisha kabisa kwake.

Na sasa, natamani kwa neema ya Mungu kuwapa ujumbe huu—kwamba Mungu wenu aliye Mbinguni huyajibu maombi mliyoyaomba kwa ajili ya baraka juu yenu wenyewe na kwa ajili ya baraka juu ya wale walio kando yenu, kwa dai hili moja: Je, mko tayari kujisalimisha wenyewe kabisa mikononi mwake? Jibu letu litakuwa nini? Mungu anajua kuna mamia ya mioyo iliyokwisha kulisema, na kuna mamia zaidi wanaotamani kulisema lakini hawathubutu kufanya hivyo. Na kuna mioyo iliyolisema, lakini ikashindwa kwa aibu, ikajiona imehukumiwa kwa sababu haikupata siri ya nguvu ya kuishi maisha hayo. Mungu na awe na neno kwa wote!

Niseme, kwanza kabisa, kwamba Mungu hulidai kwetu.

Mungu Hutazamia Kujisalimisha Kwako

Naam, jambo hili lina msingi wake katika asili yenyewe ya Mungu. Mungu hawezi kufanya vinginevyo. Mungu ni nani? Yeye ni Chemchemi ya uzima, Chanzo pekee cha kuwako na cha nguvu na cha wema, na katika ulimwengu wote hakuna jema lo lote ila lile Mungu alitendalo. Mungu ameumba jua, na mwezi, na nyota, na maua, na miti, na majani; na je, havikujisalimisha vyote kabisa kwa Mungu? Je, havimwachi Mungu atende ndani yavyo apendavyo tu? Mungu aivikapo yungiyungi uzuri wake, je, haikujitoa, haikujisalimisha, haikukabidhiwa kwa Mungu apendezavyo katika kuufanya uzuri wake? Na watoto wa Mungu waliokombolewa, ee, waweza kufikiri kwamba Mungu aweza kutenda kazi yake ikiwa ni nusu au sehemu yao tu iliyojisalimisha? Mungu hawezi. Mungu ni uzima, na upendo, na baraka, na nguvu, na uzuri usio na mwisho, na Mungu hufurahia kujitoa mwenyewe kwa kila mtoto aliye tayari kumpokea; lakini ah! upungufu huu mmoja wa kujisalimisha kabisa ndicho kitu kinachomzuia Mungu. Na sasa yeye huja, na kama Mungu, hulidai.

Mnajua katika maisha ya kila siku kujisalimisha kabisa ni nini. Mnajua kwamba kila kitu ni lazima kitolewe kwa ajili ya kusudi lake maalum, dhahiri, na utumishi wake. Nina kalamu mfukoni mwangu, na kalamu ile imejisalimisha kabisa kwa kazi ile moja ya kuandika, na kalamu ile ni lazima ijisalimishe kabisa mkononi mwangu ikiwa nitaandika vyema kwayo. Mwingine akiishika kwa sehemu, siwezi kuandika vyema. Koti hili limetolewa kabisa kwangu ili kufunika mwili wangu. Jengo hili limetolewa kabisa kwa ibada za dini. Na sasa, je, mnatazamia kwamba katika utu wenu usiokufa, katika asili ya kimungu mliyoipokea kwa kuzaliwa upya, Mungu aweza kutenda kazi yake, kila siku na kila saa, msipojitoa kwake kabisa? Mungu hawezi. Hekalu la Sulemani lilijisalimisha kabisa kwa Mungu lilipowekwa wakfu kwake. Na kila mmoja wetu ni hekalu la Mungu, ambamo Mungu atakaa na kutenda kazi kwa nguvu kwa sharti moja—kujisalimisha kabisa kwake. Mungu hulidai, Mungu anastahili, na pasipo hilo Mungu hawezi kutenda kazi yake iliyobarikiwa ndani yetu.

Mungu halidai tu, bali Mungu atalitenda mwenyewe.

Mungu Hutimiza Kujisalimisha Kwako

Nina hakika kuna moyo mwingi usemao: “Ah, lakini kujisalimisha kabisa huko kwamaanisha mengi mno!” Mtu mmoja husema: “Ee, nimepitia dhiki na mateso mengi mno, na bado kuna sehemu kubwa ya maisha ya nafsi iliyosalia, wala sithubutu kukabiliana na kuyatoa yote, kwa maana najua kutaleta taabu na uchungu mwingi mno.”

Ole! ole! kwamba watoto wa Mungu wana mawazo kama hayo juu yake, mawazo makatili namna hiyo. Ee, naja kwenu na ujumbe, ewe uliyejaa hofu na wasiwasi. Mungu hakuombi utoe kujisalimisha kamili kwa nguvu zako, au kwa uwezo wa mapenzi yako; Mungu yu tayari kulitenda ndani yako. Je, hatusomi: “Kwa maana ndiye Mungu atendaye kazi ndani yenu, kutaka kwenu na kutenda kwenu, kwa kulitimiza kusudi lake jema” (Wafilipi 2:13)? Na hilo ndilo tupasalo kulitafuta—kuanguka kifudifudi mbele za Mungu, hata mioyo yetu ijifunze kuamini kwamba Mungu wa milele mwenyewe ataingia ili kutoa yaliyo mabaya, kushinda yaliyo maovu, na kutenda yampendezayo machoni pake palipobarikiwa. Mungu mwenyewe atalitenda ndani yako.

Watazameni watu wa Agano la Kale, kama Abrahamu. Je, mnadhani ilikuwa kwa bahati kwamba Mungu alimpata mtu yule, baba wa waaminio na Rafiki wa Mungu, na kwamba ni Abrahamu mwenyewe, mbali na Mungu, aliyekuwa na imani kama hiyo, na utii kama huo, na ujitoaji kama huo? Mnajua sivyo. Mungu alimwinua na kumtayarisha kuwa chombo kwa ajili ya utukufu wake.

Je, Mungu hakumwambia Farao: “Kwa sababu hiyo nimekuinua, ili nionyeshe nguvu zangu ndani yako” (Kutoka 9:16)?

Na kama Mungu alisema hivyo juu yake, je, Mungu hatasema hivyo zaidi sana juu ya kila mtoto wake?

Ee, nataka kuwatia moyo, nami nataka mtupe mbali kila hofu. Njooni na ile shauku dhaifu; na kama kuna hofu isemayo: “Ee, shauku yangu si imara vya kutosha, sipo tayari kwa kila litakalokuja, sijioni na ujasiri wa kutosha kusema naweza kushinda kila kitu”—nawasihi, jifunzeni kumjua na kumwamini Mungu wenu sasa. Semeni: “Mungu wangu, niko tayari wewe unifanye kuwa tayari.” Kama kuna kitu cho chote kinachokuzuia, au dhabihu yo yote uogopayo kuitoa, njoo kwa Mungu sasa, ukaone jinsi Mungu wako alivyo mwenye neema, wala usiogope kwamba atakuamuru kile asichokupa.

Mungu huja na kujitolea kutenda kujisalimisha huku kabisa ndani yako. Utafutaji huu wote, na njaa hii, na shauku hizi zilizo moyoni mwako, nakuambia ni mvuto wa sumaku ya kimungu, Kristo Yesu. Yeye aliishi maisha ya kujisalimisha kabisa, naye anakumiliki; anaishi moyoni mwako kwa Roho wake Mtakatifu. Umemzuia na kumzuia sana, lakini anatamani kukusaidia umshike kabisa. Naye huja na kukuvuta sasa kwa ujumbe wake na maneno yake. Je, hutakuja na kumwamini Mungu alitende ndani yako kujisalimisha huku kabisa kwake mwenyewe? Naam, Mungu na ahimidiwe, aweza kulitenda, naye atalitenda.

Mungu halidai tu na kulitenda, bali Mungu hulikubali tunapomletea.

Mungu Hukubali Kujisalimisha Kwako

Mungu hulitenda katika siri ya moyo wetu, Mungu hutuhimiza kwa nguvu iliyofichika ya Roho wake Mtakatifu tuje na kulinena wazi, nasi twapaswa kuleta na kumsalimishia kujisalimisha huko kabisa. Lakini kumbukeni, mjapo na kumletea Mungu kujisalimisha huko kabisa, huenda, kwa kadiri ya hisia zenu au utambuzi wenu, kikawa kitu chenye upungufu mkubwa, nanyi mwaweza kutia shaka na kusita na kusema:

“Je, ni kabisa?”

Lakini, ee, kumbukeni palikuwa na mtu wakati mmoja ambaye Kristo alikuwa amemwambia:

“Ukiweza kuamini, yote yawezekana kwake aaminiye” (Marko 9:23).

Na moyo wake ulikuwa na hofu, akapaza sauti:

“Ee Bwana, naamini; nisaidie kutokuamini kwangu” (Marko 9:24).

Hiyo ilikuwa imani iliyomshinda Ibilisi, na yule pepo mchafu akatolewa. Na ukija na kusema: “Bwana, najisalimisha kabisa kwa Mungu wangu,” hata ikiwa ni kwa moyo utetemao na kwa utambuzi: “Sihisi nguvu, sihisi azimio, sihisi uhakika,” kutafanikiwa. Usiogope, bali njoo kama ulivyo tu, na hata katikati ya kutetemeka kwako nguvu ya Roho Mtakatifu itatenda kazi.

Je, hujajifunza kamwe funzo hili kwamba Roho Mtakatifu hutenda kazi kwa nguvu kuu, hali kwa upande wa kibinadamu kila kitu huonekana dhaifu? Mtazameni Bwana Yesu Kristo katika Gethsemane. Twasoma kwamba yeye, “kwa Roho wa milele” (Waebrania 9:14), alijitoa mwenyewe dhabihu kwa Mungu. Roho Mwenyezi wa Mungu alikuwa akimwezesha kulitenda. Na hata hivyo, ni uchungu ulioje na hofu na huzuni kubwa iliyomjia, na jinsi alivyoomba! Kwa nje, huwezi kuona dalili yo yote ya nguvu kuu ya Roho, lakini Roho wa Mungu alikuwako. Na vivyo hivyo, ingawa u dhaifu na wapigana na watetemeka, katika imani juu ya kazi ya siri ya Roho wa Mungu usiogope, bali jisalimishe.

Na ujisalimishapo kabisa, na iwe katika imani kwamba Mungu sasa hulikubali. Hilo ndilo jambo kuu, na ndilo tukoselakoselako mara nyingi—kwamba waaminio wapaswa kushughulika hivyo na Mungu katika jambo hili la kujisalimisha. Nawasihi, shughulikeni na Mungu. Twataka kupata msaada, kila mmoja wetu, ili katika maisha yetu ya kila siku Mungu awe dhahiri zaidi kwetu, Mungu awe na mahali pake pastahilipo, na awe “yote katika yote.” Na ikiwa tutakuwa na hilo katika maisha yote, na tuanze sasa, na tugeuze macho kutoka kwetu wenyewe, na tumtazame Mungu. Kila mmoja na aamini—hali mimi, funza maskini juu ya nchi na mtoto wa Mungu atetemaye, niliyejaa mashindwa na dhambi na hofu, ninainama hapa, wala hakuna ajuaye lipitalo moyoni mwangu, na hali mimi kwa unyofu nasema, Ee Mungu, nayakubali masharti yako; nimeomba baraka juu yangu mwenyewe na juu ya wengine, nimeyakubali masharti yako ya kujisalimisha kabisa—hali moyo wako usemapo hivyo katika kimya kirefu, kumbuka yuko Mungu aliyepo ayatiaye maanani, na kuyaandika katika kitabu chake, na yuko Mungu aliyepo ambaye wakati ule ule hukumiliki. Waweza usilihisi, waweza usilitambue, lakini Mungu hukumiliki ukimwamini.

Mungu halidai tu, na kulitenda, na kulikubali nilipoleta, bali Mungu hulidumisha.

Mungu Hudumisha Kujisalimisha Kwako

Hiyo ndiyo shida kuu kwa wengi. Watu husema: “Mara nyingi nimechochewa katika mkutano, au katika kongamano, nami nimejiweka wakfu kwa Mungu, lakini kumepita. Najua huenda kukadumu juma moja au mwezi mmoja, lakini kunafifia na kwenda, na baada ya muda kwote kumekwisha.”

Lakini sikilizeni! Ni kwa sababu hamwamini haya ninayotaka kuwaambia sasa na kuwakumbusha. Mungu akiisha kuanza kazi ya kujisalimisha kabisa ndani yako, na Mungu akiisha kukubali kujisalimisha kwako, ndipo Mungu hujifunga mwenyewe kukitunza na kukilinda. Je, mtaamini hilo?

Katika jambo hili la kujisalimisha wako wawili: Mungu na mimi—mimi funza, Mungu Yehova wa milele na Mwenyezi. Ewe funza, je, utaogopa kujikabidhi kwa Mungu huyu mwenye nguvu sasa? Mungu yu tayari. Je, huamini kwamba aweza kukulinda daima, siku kwa siku, na dakika kwa dakika?

Dakika kwa dakika nalindwa katika upendo wake;

Dakika kwa dakika nina uzima utokao juu.

Kama Mungu huliacha jua likuangazie dakika kwa dakika, bila kukoma, je, Mungu hataacha uzima wake ukuangazie kila dakika? Na kwa nini hujaupata uzoefu huo? Kwa sababu hukumwamini Mungu kwa ajili yake, wala hukujisalimisha kabisa kwa Mungu katika kuamini huko.

Maisha ya kujisalimisha kabisa yana shida zake. Sikatai hilo. Naam, yana kitu kilicho zaidi sana ya shida: ni maisha ambayo kwa wanadamu hayawezekani kamwe. Lakini kwa neema ya Mungu, kwa nguvu za Mungu, kwa nguvu za Roho Mtakatifu akaaye ndani yetu, ni maisha ambayo tumekusudiwa, na maisha yanayowezekana kwetu, Mungu na asifiwe! Na tuamini kwamba Mungu atayadumisha.

Baadhi yenu mmeyasoma maneno ya yule mtakatifu mzee ambaye, katika sikukuu yake ya tisini ya kuzaliwa, alisimulia juu ya wema wote wa Mungu kwake—namaanisha George Muller. Alisema aliamini nini kuwa siri ya furaha yake, na ya baraka zote Mungu alizompa? Alisema aliamini kulikuwa na sababu mbili. Ya kwanza ni kwamba alikuwa amewezeshwa kwa neema kuidumisha dhamiri njema mbele za Mungu siku kwa siku; ya pili ni kwamba alikuwa mpenzi wa Neno la Mungu. Ah, naam, dhamiri njema ni utii kamili kwa Mungu siku kwa siku, na ushirika na Mungu kila siku katika Neno lake, na maombi—hayo ndiyo maisha ya kujisalimisha kabisa.

Maisha kama hayo yana pande mbili—kwa upande mmoja, kujisalimisha kabisa ili kutenda kile Mungu atakacho wewe ukifanye; kwa upande mwingine, kumwacha Mungu atende kile yeye atakacho kukitenda.

Kwanza, kutenda kile Mungu atakacho wewe ukitende.

Jitoeni wenyewe kabisa kwa mapenzi ya Mungu. Mnajua kitu fulani cha mapenzi hayo; si vya kutosha, mbali sana na yote. Lakini mwambieni Bwana Mungu kabisa: “Kwa neema yako natamani kuyatenda mapenzi yako katika kila jambo, kila dakika ya kila siku.” Semeni: “Bwana Mungu, lisiwepo neno ulimini mwangu ila kwa utukufu wako, wala msukumo wo wote wa hasira yangu ila kwa utukufu wako, wala shauku ya kupenda au kuchukia moyoni mwangu ila kwa utukufu wako, na kwa kadiri ya mapenzi yako yaliyobarikiwa.”

Mtu fulani husema: “Je, wafikiri hilo lawezekana?”

Nauliza, Mungu amekuahidi nini, na Mungu aweza kufanya nini ili kukijaza chombo kilichojisalimisha kabisa kwake? Ee, Mungu ataka kukubariki kwa namna ipitayo unavyotazamia. Tangu mwanzo, sikio halikusikia, wala jicho halikuona, mambo aliyowaandalia Mungu wale wamngojao (1 Wakorintho 2:9). Mungu ameandaa mambo yasiyosikiwa, baraka zilizo za ajabu kupita uwezavyo kuwaza, zilizo na nguvu kupita uwezavyo kufikiri. Ni baraka za kimungu. Ee, sema sasa:

“Najitoa kabisa kwa Mungu, kwa mapenzi yake, ili kutenda kile tu Mungu akitakacho.”

Ni Mungu atakayekuwezesha kutimiza kujisalimisha huko.

Na, kwa upande mwingine, njoo na useme: “Najitoa kabisa kwa Mungu, ili atende ndani yangu kutaka na kutenda kwa kulitimiza kusudi lake jema, kama alivyoahidi kufanya.”

Naam, Mungu aliye hai ataka kutenda kazi ndani ya watoto wake kwa namna tusiyoweza kuielewa, lakini ambayo Neno la Mungu limeifunua, naye ataka kutenda kazi ndani yetu kila dakika ya siku. Mungu yu tayari kuyadumisha maisha yetu. Ila tu kujisalimisha kwetu kabisa na kuwe kwa kumwamini kulivyo rahisi, na kwa moyo wa mtoto, na kusiko na kikomo.

Mungu Hubariki Ujisalimishapo

Kujisalimisha huku kabisa kwa Mungu kutabariki kwa ajabu.

Yale Ahabu aliyomwambia adui yake, Mfalme Ben-hadadi—“Bwana wangu, mfalme, kama unenavyo, mimi ni wako, na vyote nilivyo navyo”—je, hatutamwambia Mungu wetu na Baba yetu mpendao? Tukilisema, baraka ya Mungu itatujilia. Mungu ataka tutengwe na dunia; twaitwa kutoka katika dunia imchukiayo Mungu. Tokeni kwa ajili ya Mungu, na semeni: “Bwana, cho chote kwa ajili yako.” Ukilisema hilo kwa maombi, na kulinena hilo katika sikio la Mungu, atalikubali, naye atakufundisha maana yake.

Nasema tena, Mungu atakubariki. Umekuwa ukiomba baraka. Lakini kumbuka, ni lazima kuwe na kujisalimisha kabisa. Katika kila meza ya chai mnaliona hilo. Kwa nini chai humiminwa katika kikombe kile? Kwa sababu ni tupu, na kimetolewa kwa ajili ya chai. Lakini tia wino, au siki, au divai ndani yake, je, watamimina chai katika chombo hicho? Na je, Mungu aweza kukujaza, Mungu aweza kukubariki usipojisalimisha kabisa kwake? Hawezi. Na tuamini kwamba Mungu ana baraka za ajabu kwa ajili yetu, tukisimama tu kwa ajili ya Mungu, na kusema, hata kama ni kwa mapenzi yatetemayo, lakini kwa moyo uaminio:

“Ee Mungu, nayakubali madai yako. Mimi ni wako, na vyote nilivyo navyo. Kujisalimisha kabisa ndiko nafsi yangu ikutolekako kwako kwa neema ya kimungu.”

Waweza usiwe na hisia zenye nguvu na wazi za ukombozi kama ungependa kuwa nazo, lakini jinyenyekesheni mbele zake, na kukiri kwamba mmemhuzunisha Roho Mtakatifu kwa mapenzi yenu wenyewe, na kujiamini kwenu wenyewe, na juhudi zenu wenyewe. Inameni kwa unyenyekevu mbele zake katika kukiri hilo, na kumwomba auvunje moyo na kuwaleta mavumbini mbele zake. Kisha, mnapoinama mbele zake, kubalini tu mafundisho ya Mungu kwamba katika mwili wenu “hakikai kitu chema” (Warumi 7:18), na kwamba hakuna kitakachowasaidia ila uzima mwingine ambao ni lazima uingie ndani. Ni lazima muikane nafsi mara moja kwa yote. Kuikana nafsi ni lazima kila dakika kuwe nguvu ya maisha yenu, ndipo Kristo atakapoingia na kuwamiliki.

Petro alikombolewa lini? Badiliko lilitimizwa lini? Badiliko lilianza kwa Petro kulia, na Roho Mtakatifu akashuka na kuujaza moyo wake.

Mungu Baba hupenda kutupa nguvu ya Roho. Tunaye Roho wa Mungu akaaye ndani yetu. Twamjia Mungu tukikiri hilo, na kumsifu Mungu kwa ajili yake, na hata hivyo tukikiri jinsi tulivyomhuzunisha Roho. Ndipo twapiga magoti yetu kwa Baba ili tuombe atutie nguvu kwa uwezo wote kwa Roho wake katika utu wa ndani, na kwamba atujaze nguvu zake kuu. Na Roho amfunuapo Kristo kwetu, Kristo huja kukaa mioyoni mwetu milele, na maisha ya nafsi hutupwa nje.

Na tuiname mbele za Mungu kwa unyenyekevu, na katika unyenyekevu huo tukiri mbele zake hali ya Kanisa lote. Hakuna maneno yawezayo kueleza hali ya kusikitisha ya Kanisa la Kristo duniani. Ningetamani ningekuwa na maneno ya kunena niyahisiyo mara nyingine juu yake. Wafikirini tu Wakristo walio kando yenu. Sinenei Wakristo wa jina tu, wala wale wanaokiri Ukristo kwa midomo, bali nanena juu ya mamia na maelfu ya Wakristo wanyofu, wenye bidii, ambao hawaishi maisha yaliyo katika nguvu ya Mungu wala kwa utukufu wake. Nguvu kidogo mno, ujitoaji au ujiwekaji wakfu kidogo mno kwa Mungu, utambuzi mdogo mno wa ukweli kwamba Mkristo ni mtu aliyejisalimisha kabisa kwa mapenzi ya Mungu! Ee, twataka kukiri dhambi za watu wa Mungu walio kando yetu, na kujinyenyekesha wenyewe. Sisi ni viungo vya mwili ule wenye maradhi, na maradhi ya mwili yatatuzuia, na kutuvunja, tusipomjia Mungu, na katika kukiri kujitenga na ushirika na hali ya kidunia, na baridi kati yetu sisi kwa sisi, tusipojitoa wenyewe kuwa vya Mungu kabisa na kwa ukamilifu.

Ni kazi ya Kikristo kiasi gani inayofanywa katika roho ya mwili na katika nguvu ya nafsi! Ni kazi kiasi gani, siku kwa siku, ambamo nguvu ya kibinadamu—mapenzi yetu na mawazo yetu juu ya kazi—hudhihirishwa daima, ambamo mna kidogo tu cha kumngoja Mungu, na kutegemea nguvu ya Roho Mtakatifu! Na tukiri. Lakini tukiisha kukiri hali ya Kanisa na udhaifu na dhambi ya kazi ya Mungu kati yetu, na turudi kwetu wenyewe. Ni nani aliyeko atamaniye kweli kweli kuokolewa kutoka katika nguvu ya maisha ya nafsi, akiriye kweli kweli kwamba ni nguvu ya nafsi na ya mwili, aliye tayari kutupa yote miguuni pa Kristo? Kuna ukombozi.

Nilisikia habari za mmoja aliyekuwa Mkristo mwenye bidii, aliyenena juu ya wazo lile “katili” la kutengwa na mauti. Lakini hufikiri hivyo, sivyo? Tuseme nini juu ya kutengwa na mauti? Hivi: mauti ilikuwa njia ya utukufu kwa Kristo. Kwa furaha iliyowekwa mbele yake aliustahimili msalaba. Msalaba ulikuwa mahali pa kuzaliwa kwa utukufu wake wa milele. Je, wampenda Kristo? Je, watamani kuwa ndani ya Kristo, si kufanana naye tu? Mauti na iwe kwako kitu kinachotamanika kuliko vyote duniani—kufa kwa nafsi, na ushirika na Kristo. Kutengwa—je, wafikiri ni jambo gumu kuitwa uwe huru kabisa na dunia, na kwa kutengwa huko uunganishwe na Mungu na upendo wake, kwa kutengwa uwe tayari kwa kuishi na kuenenda na Mungu kila siku? Bila shaka mtu apaswa kusema:

“Cho chote kinilete katika kutengwa, katika mauti, kwa ajili ya maisha ya ushirika kamili na Mungu na Kristo.”

Njoo na uyatupe maisha haya ya nafsi na maisha ya mwili miguuni pa Yesu. Kisha mwamini. Msijitaabishe wenyewe kwa kujaribu kuelewa yote juu yake, bali njooni katika imani iliyo hai kwamba Kristo atakuja ndani yenu kwa nguvu ya mauti yake na nguvu ya uzima wake; ndipo Roho Mtakatifu atakapomleta Kristo mzima—Kristo aliyesulubiwa na aliyefufuka na aishiye katika utukufu—ndani ya moyo wenu.