Dibaji ya Mwandishi

Sikuandika kazi hii ndogo nikiwa na wazo lolote la kwamba ingetolewa kwa umma wa watu. Iliandaliwa kwa ajili ya kuwasaidia Wakristo wachache waliokuwa na hamu ya kumpenda Mungu kwa moyo wao wote. Lakini watu wengi sana wameniomba nakala zake, kwa sababu ya faida waliyoipata kutokana na kuisoma kwao, hata nimeombwa niichapishe.

Nimeiacha katika unyenyekevu wake wa asili. Sishutumu maoni ya mtu yeyote yule: kinyume chake, nayaheshimu yale yanayoshikiliwa na wengine, na kuyaweka yote niliyoyaandika chini ya uamuzi na karipio la watu wenye uzoefu na elimu. Naomba tu kwa wote kwamba hawatatosheka na kuchunguza upande wa nje tu, bali kwamba wataipenya nia ya mwandishi, ambayo ni kuwaongoza wengine WAMPENDE Mungu, na kumtumikia kwa furaha na mafanikio makubwa zaidi, kwa kuwawezesha kufanya hivyo kwa njia rahisi na nyepesi, inayowafaa wale wadogo wasioweza kufanya mambo ya ajabu, bali wanaotamani kweli kujitoa kwa Mungu.

Nawaomba wote watakaoisoma, waisome bila ubaguzi; nao watagundua, chini ya maneno ya kawaida, upako uliofichika, utakaowaongoza kutafuta furaha ambayo wote wanapaswa kutarajia kuimiliki.

Natumia neno wepesi, nikisema kwamba ukamilifu ni rahisi, kwa sababu ni rahisi kumpata Mungu, tunapomtafuta ndani yetu wenyewe. Laweza kunukuliwa fungu lile lisemalo, “Mtanitafuta, wala hamtaniona” (Yohana 7:34). Lakini jambo hili halipaswi kusababisha shida yoyote ile; kwa sababu Mungu yuleyule, asiyeweza kujipinga mwenyewe, amesema, “Atafutaye hupata” (Mathayo 7:8). Yeye amtafutaye Mungu, na bado hataki kuiacha dhambi, hatampata, kwa sababu anamtafuta pale ambapo hawezi kupatikana; kwa hiyo yaongezwa, “Mtakufa katika dhambi zenu.” Bali yeye anayetamani kwa dhati kuiacha dhambi, ili apate kumkaribia Mungu, atampata bila kukosa.

Watu wengi hudhania kwamba dini ni ya kutisha sana, na maombi ni ya ajabu mno, hata hawako tayari kujitahidi kuyafuata, wasitarajie kamwe kuyafikia. Lakini kama vile ugumu tuuonao katika jambo hutufanya tukate tamaa ya kufanikiwa ndani yake, na wakati huohuo huondoa hamu ya kulianza; na kama vile, jambo linapoonekana kuwa la kutamanika na rahisi kufikiwa, hujitoa kwalo kwa furaha, na kulifuatilia kwa ujasiri; nimelazimika kuufafanua ubora na wepesi wa njia hii.

Lo! kama tungeshawishika juu ya wema wa Mungu kwa viumbe vyake maskini, na juu ya shauku aliyo nayo ya kujidhihirisha mwenyewe kwao, tusingedhania vizuizi vingi namna hiyo, wala kukata tamaa kwa urahisi namna hiyo ya kupata baraka ambayo Yeye anatamani sana bila kikomo kutugawia sisi.

Na ikiwa hakumhurumia Mwanawe mwenyewe, bali alimtoa kwa ajili yetu sote, je, kuna kitu chochote awezacho kutunyima? Hakika hapana. Tunahitaji tu ujasiri kidogo na uvumilivu. Tunavyo vingi vya vyote viwili kwa ajili ya masilahi madogo ya kidunia, wala hatuna hata kidogo kwa ajili ya “kile kitu kimoja kinachohitajika.”

Kwa habari ya wale wanaoona ugumu kuamini kwamba ni rahisi kumpata Mungu kwa njia hii, wasiamini yote wanayoambiwa, bali afadhali wapate kuijaribu wenyewe, ili wapate kujiamulia wao wenyewe; nao watagundua kwamba nasema machache mno ukilinganisha na yale yaliyopo hasa.

Msomaji mpendwa, ichunguze kazi hii ndogo kwa moyo mnyofu na sahili, kwa unyenyekevu wa nia, bila kutaka kuikosoa, nawe utaiona ina faida kwako. Ipokee kwa roho ileile ambayo kwayo imetolewa, isiyokuwa nyingine ila shauku ya kwamba upate kuongozwa kujitoa kwa Mungu bila kujizuia. Nia yangu ni kwamba iwe njia ya kuwaongoza wanyofu na watoto kwa Baba yao, ampendaye uthabiti wao wa unyenyekevu, na ambaye kutokumwamini ni jambo linalomchukiza sana. Usitafute chochote ila upendo wa Mungu; uwe na shauku ya dhati ya wokovu wako, nawe hakika utaupata, ukifuata njia hii ndogo isiyo na mpangilio.

Sijidai hata kidogo kuinua hisia zangu juu ya zile za wengine, bali nasimulia tu yale yaliyokuwa uzoefu wangu mwenyewe na wa wengine pia, na faida niliyoipata katika namna hii sahili na ya asili ya kumwendea Mungu.

Ikiwa kitabu hiki hakizungumzii jambo lingine ila njia fupi na rahisi ya kuomba, ni kwa sababu, kwa kuwa kiliandikwa kwa ajili ya hilo tu, hakiwezi kunena juu ya mambo mengine. Ni hakika kwamba, kikisomwa kwa roho ambayo kwayo kiliandikwa, hakitapatikana ndani yake kitu chochote cha kuudhi akili. Wale watakaoyajaribu watakuwa na hakika zaidi ya kweli iliyomo ndani yake.

Ni Wewe, Ee Mtoto Mtakatifu Yesu, upendaye usahili na usafi wa moyo, na upatikanaye furaha yako katika wana wa wanadamu, yaani, pamoja na wale miongoni mwa watu walio tayari kuwa kama watoto wadogo;—ni Wewe, nasema, ipasaye kuipa thamani na maana kazi hii ndogo, ukiigandamiza moyoni, na kuwaongoza wale waisomao wakutafute ndani yao wenyewe, mahali utakapopumzika, ukipokea alama za upendo wao, na kuwapa ithibati za upendo wako.

Ni kazi yako, Ee Mtoto wa Kimungu! Ee Pendo lisiloumbwa! Ee Neno lililo kimya! kujifanya upendwe, uonjwe, na usikike. Waweza kuifanya; nami hata nathubutu kusema kwamba utaifanya, kwa njia ya kazi hii ndogo, iliyo yote kwako, yote yenye kutoka kwako, na yote kwa ajili yako.