Okwegatta n’Okussa Ekimu
Omutwe gw’Ekitabo

Essuula 3 · eddakiika 1 ez’okusoma · eddakiika 1 ez’okuwuliriza

Omutwe gw’Ekitabo

“Oluyimba lwa Sulemaani olusinga ennyimba zonna.”

Ekitabo kino kisaanidde ddala okuyitibwa Oluyimba olusinga Ennyimba Zonna! Tewali luyimba olulufaanana. Bwe lusomebwa mu ngeri entuufu, luleeta mu mutima essanyu erisukkulumye ku ssanyu ly’ebintu eby’ensi nga eggulu bwe liri waggulu w’ensi. Kyayogerwa bulungi nti luno luyimba ekisa kyokka kye kiyinza okuyigiriza, n’obumanyirivu bwokka bwe buyinza okuluyiga. OMULOKOZI waffe, bwe yali ayogera ku kwegatta kw’ettabi n’omuzabbibu, yayongerako nti, “Mbategeezezza ebyo mulyoke mujjule essanyu lyange. Era essanyu lyammwe liryoke lituukirire” (Yokaana 15:11). Era omuyigirizwa omwagalwa, bwe yali awandiika ku Oyo “eyaliwo okuva ku lubereberye,” “eyali ne KITAFFE, n’alabisibwa gye tuli,” tulyoke tugabane ku kussa ekimu kwe yalina, naye agamba nti, “Tubawandiikira ebintu bino essanyu lyammwe liryoke lituukirire.” Okwegatta ne KRISTO, n’okubeera mu KRISTO, kiki kye bitatuwa? Emirembe, emirembe egituukiridde; okuwummula, okuwummula okw’olubeerera; okuddibwamu kw’essaala zaffe zonna; okuwangula abalabe baffe bonna; obulamu obulongoofu era obutukuvu; okubala ebibala ebyeyongerayongera bulijjo. Ebyo byonna, byonna, bye bibala eby’essanyu eby’okubeera mu KRISTO. Okwongera obuziba ku kwegatta kuno, n’okufuula okubeera kuno okw’olubeerera, gwe mugaso ogw’omu bulamu bwa buli lunaku ogw’Ekitabo kino eky’omuwendo.

Ekyayita Ekiddako