Abantu ab’Endagaano

Ekijjulo ky’Okwagala “Yesu yaddira omugaati, bwe yamala okwebaza Katonda, n’agumenyaamenyamu n’agamba nti, ‘Guno mubiri gwange, oguweebwayo ku lwammwe. Mugutoole mulye!’”

(1 Abakkolinso 11:23-24). Bonna ne bakikola, era mu kukola bwe batyo, ne beeyunga ku Mubiri gwa Kristo.

“Era mu ngeri y’emu bwe baamala okulya, yaddira ekikompe n’agamba nti, ‘Ekikompe kino y’endagaano empya ekakasiddwa n’omusaayi gwange; mukolenga bwe mutyo buli lwe munaakinywangako okunzijukiranga’” (1 Abakkolinso 11:25-26). Kinneewuunyisa nti tewali n’omu ku abo abaaliwo eyamubuuza kye yali ategeeza bwe yayogera bw’atyo. Ndowooza nti bonna baali bategedde.

Endagaano ndagaano wakati w’abantu babiri. “Ggwe kola kino ku lwange, nange nnaakola kiri ku lwo!” Leero, abantu bwe bakola endagaano, kyetaagisa nnyo obukakafu okubaawo mu ngeri y’emikono egiteekebwa ku ndagaano ewandiikiddwa. Eky’ennaku, ekigambo ky’omusajja omwesigwa tekikyakkirizibwa. Mu biseera bya Yesu, endagaano zaakakasibwanga nga banywa ekyokunywa kimu. Tekyandibadde musaayi, ng’oluvannyuma bwe kyali mu Bannayindiya ab’omu Bukiikakkono bwa Amerika ne mu bika bya Afirika, wadde nga endagaano zonna ez’ennaku z’Endagaano Enkadde zaategeezebwanga okuyiwa omusaayi mu kutta ensolo eya ssaddaaka. Ddala, omuntu yagambibwanga nti ‘asala endagaano’ so si nti agikola.

Waliwo olugero olusanyusa olunyumizibwa ku Dr. Livingstone, omubaka w’Enjiri omukulu eyasooka okutuuka mu Afirika. Ye n’abakulembeze be n’abasitozi be, emirundi mingi baakwatibwanga abalwanyi ab’omu bika nga batambula mu ssemazinga omuddugavu.

Ku lumu, abaakwatibwa baaleetebwa mu maaso g’omwami omukambwe eyatandika okubanenya olw’okuyingirira ettaka lye. Bwe yali yeeyongera okusunguwala olw’okusirika kwa Livingstone, omu ku bakulembeze n’akutama eri omubaka w’Enjiri n’amukuutira ‘okusala endagaano.’ Livingstone yali tategedde kye yali asabibwa, naye mangu ago n’atya n’adda ennyuma bwe yalaba omuweereza we Omukristaayo n’omuvubuka eyalondebwa okuva mu kika ekyali kimulwanyisa, nga bakola ekyali gy’ali ekikolwa eky’obukaafiiri. Baasala akawundo akatono ku mikono gyabwe, ne bakuŋŋaanya omusaayi mu bbakuli, ne baguywa bombi!

Awo omwami n’asembera n’akwata ku muguwa Livingstone gwe yali akulembezaamu embuzi, ensulo y’amata ge yanyumirwanga ennyo. Livingstone yanakuwala, oluvannyuma n’awuniikirira, omwami bwe yamukwasa ekirabo mu ngalo ze – omuggo ogwaliko ekikomo ku ntikko, gwe yali asisinkanye nagwo abo abaali bayingiridde ettaka lye. Awo ne batwalibwa mu kasiisira gye baali basula, oluvannyuma lw’okuweebwa emmere abo abaali babakutte.

Oluvannyuma lw’ekiseera, ng’atambula mu kitundu kya Afirika ekirala, Livingstone yaddamu n’akwatibwa, n’aleetebwa mu maaso g’omwami omulala omukambwe. Naye ku mulundi guno, omwami yafukamira mu maaso g’omubaka w’Enjiri. Olwo lwe kwajja okutegeera. Omukulembeze omuvubuka bwe yali ‘asazze endagaano’ ku lwa Livingstone, n’agikakasa nga banywa omusaayi, waaliwo endagaano eyakolebwa wakati waabwe n’ekika, naddala wakati wa Livingstone n’omwami.

Ng’akabonero k’endagaano eyo, omwami yali awaddeyo omuggo gwe, akabonero ak’okwewaayo kwe n’obuwagizi bwe. Omwami owookubiri omukambwe yali ategedde omuggo, n’ategeera nti Livingstone yalina muganda we ow’omusaayi, era n’agondera obuyinza n’obufuzi obwo obwamusinga.

Yesu akoze endagaano ng’eyo naffe! Kaakano tusobola okutambula nga tugolokofu mu nsi eno emulemu, olw’obuyinza bwe! Tulina muganda waffe ow’omusaayi eyayiwa omusaayi gwe, n’anywa ekikompe okutuuka ku ntobo yaakyo eyakaawa ku lwaffe, era n’atuwa obuyinza obw’erinnya lye (Ebikolwa by’Abatume 3:16)!

Omulabe waffe, Setaani, n’abaweereza be, ekibi n’okufa, tebasaanira kutufuga (Abaruumi 6:14)!

Yesu bwe yayita abayigirizwa be okunywa ku ‘kikompe ky’endagaano,’ baamanya nga balaga okukkiriza kwabwe ku biragiro by’endagaano empya. Bwe kityo bwe kiri buli lwe tutoola obubonero ku mmeeza ya Mukama waffe. Bwe tulya omugaati, tulangirira nti ffe tuli mubiri gwa Kristo. Bwe tunywa ku kikompe, tuddamu okulagaana okuba abaweereza ba bannaffe, abaagalana, era abagondera Ekigambo kye.

Mu Ngeri Etasaanidde Mu bbaluwa ye eri Abakkolinso, Pawulo atukuutira okwegendereza nnyo bwe tutoola obubonero buno. Bwe tunywa ku kikompe kya Mukama waffe “nga tetusaanidde,” tuyinza okwenywera omusango, nga tetufaayo kutegeera makulu ga mubiri gwa Mukama waffe. “Mu mmwe kyemuvudde mubaamu abanafu n’abalwadde” (1 Abakkolinso 11:30).

Bwe mba nnina obukyayi mu mutima gwange eri munnange, oba nga simba nga omuweereza, omwagazi, oba nga sigondera, okutoola kwange omugaati n’ekikompe kwe bunnanfuusi. Nnemererwa okutegeera munnange nga ali omu nange mu Mubiri gwa Kristo. Kino kiyinza okuvaamu obunafu n’obulwadde okunjijira. Kino tekiva eri Mukama waffe – si ye asibula obulwadde, naye nnina we mpadde Setaani ekifo (2 Abakkolinso 2:11), era amanyi bulungi okukozesa ebifo ng’ebyo olw’okwegasa!

Okusabira Abalwadde Kaakano ntegedde Yakobo kye yali ategeeza bwe yawandiika nti, “Waliwo omulwadde mu mmwe? Kirungi atumye abakulembeze b’Ekkanisa, bamusabire, era bamusiige amafuta, nga bwe basaba Mukama amuwonye. Era okusaba kwabwe nga kuweereddwayo n’okukkiriza, kugenda kumuwonya, kubanga Mukama awonya. Singa obulwadde bwe bwava ku kibi kye yakola, Mukama agenda kumusonyiwa” (Yakobo 5:14-15).

Emirundi mingi nneebuuzanga lwaki abakulembeze b’Ekkanisa be baali bateekwa okwenyigira mu nsonga eno. Buli muntu teyandisobodde kusaba? Abakulembeze balina amaanyi mu kusaba agasinga ag’emikwano n’ab’omu maka abaagala? Kaakano sikyakkiriza nti okuyita abakulembeze kwekuusa ku maanyi gaabwe mu kusaba, wabula ku buyinza bwabwe. Olunyiriri luno luteekwa okugattibwa ku kulabula kwa Pawulo okwoogeddwako waggulu, kubanga zo zokka ennyiriri eziwa ensonga lwaki abakkiriza bayinza okulwala oba okunafuwa. Mazima ddala, naffe tuli mu kabi k’obuwuka, endwadde, n’obulwadde nga buli muntu yenna mu nsi, naye okulabula kwa Pawulo kuteekwa okwogerwako n’amaanyi eri abakkiriza.

Abakulembeze bwe bategeera nti obulwadde bw’omukkiriza buyinza okuba nga bukwatagana n’endowooza embi eri abalala mu Mubiri gwa Kristo, bateekwa okukozesa obuyinza bwabwe ng’abakulembeze mu Kkanisa, okulagira oyo okutabagana. Olwo lwe basobola okusaba, nga bamusiiga amafuta (akabonero k’omukisa n’obukuumi bw’Omwoyo Omutukuvu) mu linnya lya Mukama waffe. Omulwadde – oyo asingiddwa omusango – alizzibwawo era alisonyiyibwa.

Okusaba kwa Mukama waffe Bwe yamala okuyigiriza abayigirizwa be ebikulu ebiri ku mutima gwe, Mukama waffe n’ayimusa amaaso ge eri eggulu n’ayogera ne Kitaawe.

Kirungi omuntu okuwaayo ekiseera n’asoma Yokaana 17, awulire okukaaba kw’omutima gwa Yesu ekiro ekyakulembera okufa kwe. Ka ntambule nammwe mu bigambo bino eby’ekitalo, nga nzitowereza ku nsonga enkulu.

“Kitange, nnamazizza omulimu gwe wampa okukola… Nnyolese erinnya lyo (engeri zo) eri abasajja bano… era bakuumye ekigambo kyo. Mbasabira… kubanga babo. Si ba nsi, nga nange bwe siri wa nsi. Nga bwe wantuma mu nsi, nange bwe ntyo mbatumye mu nsi. Sisabira bano bokka wabula ne bonna abalinzikiriza olw’ekigambo kyabwe (mwe tuli nange nammwe). Balyoke bonna babeere omu… ensi eryoke ekkirize. Mbawadde ekitiibwa kyo… balyoke babeere omu… nga ffe bwe tuli Omu. Balyoke batuukirire mu bumu, ensi eryoke emanye nti ggwe wantuma era nti obaagala nga bw’onjagala… Mbamanyisizza erinnya lyo (engeri zo)… okwagala kw’onjagala kubeere mu bo, nange mbeere mu bo” (Yokaana 17).

Erinnya lya Katonda lyabikkulirwa Musa bwe baasisinkana ku Lusozi Sinaayi; kale nno, tuyinza okukakasa nti ye “Mukama Katonda alina ekisa n’okusaasira okungi, atasunguwala mangu, ajjudde obwesigwa n’okwagala okutaggwaawo, akuuma okwagala eri enkumi n’enkumi, asonyiwa ebisobyo byabwe, n’obujeemu bwabwe, n’ebibi byabwe” (Okuva 34:6-7).

Mazima ddala, Yesu yayoleka engeri zino ze zimu eri bonna be yasisinkana.

Akatabo ka Katonda ak’Enjiri Sisobola kuggya na lupapula lumu mu Bayibuli ne ndukozesa ng’akatabo k’Enjiri okukawa mukwano gwange atakkiriza. Nsobola okujuliza mu Yokaana 3 oba okugoberera “Ekkubo ery’Abaruumi” eribannyonnyola ekkubo ery’obulokozi. Nsobola okubawa “Amatendekero Ana” oba “Enteekateeka ya Katonda ey’Ekitalo ey’Obulokozi,” naye sisobola kuyuza lupapula lumu mu Bayibuli ne ndubawa ng’akatabo k’Enjiri.

Kyokka, nsobola okutoola essuula zonna, n’ebitabo byonna, okulaga omukkiriza ebikulu eri Katonda: ekkubo lye ery’obulokozi. Alangiridde nti abantu be bwe banaatambula mu bumu ng’abaweereza, ng’abaagalana, era mu kugondera, ensi erimanya era erikkiriza!

Ffe tuli katabo ke ak’Enjiri! Ekiseera kituuse okulongoosa ebikulu byaffe bituukagane n’ebikulu bye! Tuli ba bwangu okwogera bwe tuzuula obuyigiriza obw’obulimba mu bannaffe – ekiseera tekituuse okuba ab’obwangu bwe bumu okulwanyisa obulimba obuli mu nkola, nga tulaba okwesalaasalamu okungi mu bakkiriza, okwolekedde ensi bulungi?

“Ebitonde birindirira n’essuubi lingi ekiseera abaana ba Katonda lwe baliragibwa” (Abaruumi 8:19).