Ebisookerwako

Embaga y’Endagaano Lwali lunaku lwa bbugumu era nga lujjudde enfuufu, Peetero ne Yokaana, abayigirizwa ba Yesu, bwe baayingira ekibuga Yerusaalemi. Baali bazze okukwata Pesach, Embaga ey’Okuyitako, era mu kiseera ekyo kyennyini baali bagoberera omusajja eyali yeetisse ensuwa y’amazzi, eyali agenda okubatuusa mu kifo embaga gye yali eteekerwateekerwa.

Nga Mukama bwe yali abagambye, tekyabazibuwalira kuzuula oyo eyali agenda okubakulembera, kubanga okulaba omusajja ng’eyeetisse ensuwa y’amazzi kyali kitali kya bulijjo. Ogwo gwali mulimu abakazi gwe baakolanga.

Yabatwala mu nnyumba nnungi eya kalinnya bbiri, nnyini nnyumba n’abaaniriza n’essanyu. Bwe baamutegeeza ekyabaleeta, n’abayingiza mu kisenge ekinene ekyali kirongooseddwa ekya waggulu.

Tebaamala bbanga ddene nga bateekateeka emmeeza empanvu ntono, kubanga bombi baali bamanyi bulungi ebyetaagibwa ku mbaga. Ebbakuli ez’enva ezikaawa baazitegeka nga zeegattiddwa n’essowaani ez’amapula, kinamoni, n’almondi. Eccupa y’amazzi ag’omunnyo n’amagi amafumbe ne babissa okumpi n’ebibya by’envinnyo, era waaliwo n’emigaati mingi egitali mizimbulukuse, gye baayita “matzah.” Mu bwangu essaawa n’etuuka, Yesu n’ajja n’abayigirizwa abalala.

Waaliwo eddoboozi ery’essanyu n’emboozi ennyuvu bwe baayingira ekisenge ekya waggulu. Kino kyali kiseera kya kujaguza, ekiseera ekisinga okusanyusa mu mwaka gwonna eri Abayudaaya bonna; lwe baajjukizibwanga obwesigwa bwa Yakuwa obungi. Teyabanunula okuva mu buddu bwa Misiri emyaka mingi emabega? Yali tayinza kubanunula ne mu kunyigirizibwa okwa Baruumi okwaliwo mu kiseera ekyo?

Eri abayigirizwa ba Yesu, ekiseera kino kirabika kyali kya ssanyu n’okusingawo. Baali beebuuza oba olunaku lwali lusembedde mukama waabwe lw’ali yeeyoleka eri eggwanga nga ye Masiya eyali alindiriddwa ebbanga ddene, eyajja okubanunula nga bannabbi ab’edda bwe baalagula. Baawulira nga bali mu kiseera ekikulu ennyo mu byafaayo by’abantu baabwe. Mazima ddala, wiiki eyali eyise yali ya njawulo, era ebintu byali bituuka ku ntikko. Kyali kya lwatu nti abakulembeze b’eddiini baali banyeenyezebbwa nnyo, okuyigiriza kwa Yesu n’okwatibwako abantu bangi.

Nsobola okulowooza nti emboozi y’abayigirizwa yali yeetooloodde byonna ebyaliwo mu wiiki eyayita, nga beebuuza amakulu ge byalina. Nkakasa nti Peetero yali tasobola kulekera awo kwogera ku kuyingira okw’obuwanguzi mu Yerusaalemi ennaku ttaano ezaali ziyise, ekibiina ky’abantu bwe kyaliira engoye zaabwe ku luguudo olujjudde enfuufu ne bakwata amatabi g’enkindu okuwuuba, nga baleekaana nti, “Aweereddwa omukisa ajja mu linnya lya Mukama, Kabaka wa Isirayiri” (Yokaana 12:13).

Nsobola okumulowoozaako, ng’ayimusizza omutwe era ng’asitudde ekifuba, ng’akulembedde omwana gw’endogoyi mukama we kwe yali yeebagadde. Yokaana ne Yakobo, Abazeloti (abaana b’okubwatuka), bo balina okuba nga baasinga kwewuunya engeri mukama waabwe gye yavuunikamu emmeeza z’abawaanyisa ensimbi n’abagoba mu yeekaalu. “Walaba amaaso ga Kabona Asinga Obukulu? Mwaganda wange, yali asunguwadde nnyo!”

Bonna ne beesuula ne bagalamira ku mabbali g’emmeeza, nga bakyali mu ssanyu ery’okujaguza: kyali kiseera kya mbaga. Yesu yatunuulira n’essanyu mikwano gye nga bajaguza, naye yali amanyi ekintu ekyali kibabuze okutegeera: enkya yali agenda kufa.

Wandikoze ki singa omusawo wo akugamba nti osigazza kaseera katono okubeera mu bulamu? Mazima wandisabye omusawo omulala okukukebera! Ate singa n’oyo akakasa nti mu bwangu ojja kuva mu nsi eno, ne mu banno ab’enkalakkalira ne mikwano gyo? Mmanyi kye nandikoze. Nandimazeewo mangu emirimu gye ndiko, ne nteekateeka okubeera n’abo abasinga okuba ab’omuwendo gye ndi: mukyala wange, bawala baffe, n’amaka gaabwe.

Nandyagadde okubagamba nga bwe mbaagala ennyo era nga bwe mbeenyumiririzaamu. Nandibakubirizza okweyongera ne Yesu, nga bamuweereza era nga batambuza obulamu obutendereza ekitiibwa kye.

Nandibabuuzza oba waliwo ekintu kyonna kye nnina okubasabira ekisonyiwo, ebisago byonna, ebigambo byonna ebitali birungi oba obutassaayo mwoyo. Nandyagadde okukakasa ddala nti tewali kintu kyonna ekyandisigadde nga tekikoleddwa mu kunyweza enkolagana yaffe.

Sandifunye budde bungi kwogera ku bintu ebitalina makulu, ng’ebivudde mu mizannyo oba olugambo, ebitwala ebiseera byange bingi mu mbeera endala. Mazima ddala, kye nandikoze kyokka kwe kutunuulira ebisookerwako. Era ekiro ekyo, ku mbaga ey’Okuyitako, ekyo kye kintu Mukama kye yali agenda okukola n’abayigirizwa be — okutunuulira ebisookerwako!

Bye Yeetaaga Nga empisa bwe yali, bonna baali beeyambulemu engatto bwe baayingira ekisenge kino ekya waggulu. Ebigere byabwe byali bijjudde enfuufu, era omusenyu ogwali wakati mu bigere byabwe ne gubaleetera obutabeera bulungi.

Mu bwangu ne wawulikika okwemulugunya. Ebbakuli ez’amazzi zaali ku mmeeza okumpi n’oluggi era n’ettawulo zaaliwo, naye omuwala omuweereza eyalina omulimu ogw’okubanaaza ebigere okubawummuza yali ludda wa? Yandibadde wano bwe baatuuka!

Nsobola okulowooza nti alina okuba nga yali Peetero eyasooka okwogera mu lwatu ekyo bonna kye baali balowooza. Afaanana nnyo nange — bulijjo ayogera nga tannalowooza! “Omuwala ali ludda wa? Ebigere byange bimpiisa. Waliwo eyakola ensobi n’amwerabira okumugamba? Ani yateekateeka embaga eno? Ani ali ku kakiiko?” Ne wawulikika okwogera mu kaama okw’ensonyi ng’abalala bagezaako okumugamba asirike. Anti yali Mukama waffe yennyini eyali ateekateese byonna! Era talina nsobi z’akola; ne bwe tuba nga tetusobola kutegeera bigendererwa bye.

Yesu n’asituka ku mmeeza n’atambula ng’agenda eri ebbakuli ez’amazzi.

“Kirungi,” Peetero n’alowooza, “agenda kuyita omuwala.”

Yesu ne yeggyako omunagiro gwe, ne yeesiba ettawulo, n’asitula ebbakuli y’amazzi, n’akyuka… n’adda eri Peetero!

“Nedda,” Peetero n’alowooza, “agenda kunsaba nze okukikola!”

Mu kifo ky’ekyo, Yesu n’anaaza ebigere bya Peetero ebyali bijjudde enfuufu, n’oluvannyuma n’ebya bonna abalala, nga mw’otwalidde ne Yuda Isukalyoti eyali agenda okumulyamu olukwe n’aleeta okubonaabona kwe yali asuubira ekiro ekyo. Osobola okulowooza ku Mukama ng’atunuulira Yuda mu maaso ng’amunaaza ebigere? Yalaba ki mu maaso ago?

Okutya? Oba omusango? Yuda ye yalaba ki mu maaso ga mukama we? Neebuuza, yasobola okutunula? Okwagala okufaanana bwe kutyo!

Yesu n’azzaayo ebbakuli n’ettawulo mu kifo kyabyo okumpi n’oluggi, n’ayambala omunagiro gwe, n’akyukira abayigirizwa be.

“Mbalaze ekyokulabirako,” n’agamba, “mukolenga nga Nze bwe mbakoze” (Yokaana 13:1-20).

Ekisookerwako ekisooka mu kuba omuyigirizwa kwe kuba omuweereza. Mukama atulagira okuba abaweereza. Kyetaagisa nnyo bwe twagala okuba nga Ye, atajja kuweerezebwa wabula okuweereza (Matayo 20:28). Kye kigero ky’obukulu mu Bwakabaka obw’omu ggulu era kabonero ak’okujjula Omwoyo (Abaefeso 5:18,21).

Sirowooza nti Mukama yali ategeeza nti tumugoberere mu ngeri ey’okwennyini nga tunaazagana ebigere (wadde nga okukikola kwe kuweebwa omukisa omungi), wabula nti tusaana okunoonya okuwummuza bannaffe okuva mu nfuufu n’obucaafu obuva mu kutambula mu nsi eno. Tekisoboka kubeera mu nsi eno nga tolina bucaafu bwayo bukusiiga. Muntu ki asobola okusoma olupapula lw’amawulire, okulaba tterevizoni, oba okunyumya ne baliraanwa oba bakozi banne nga tabaddeko butwa bwayo? Olugambo n’okwemulugunya, ebiri bingi ne mu bakkiriza, mu bwangu bitunyaga essanyu ery’okutambulira mu kkubo ery’Ekikristaayo. Twetaaga ebigambo ebitunaaza, okuwummuzibwa n’okuzzibwamu amaanyi okuva mu bakkiriza bannaffe. Twetaaga okunaazibwa ebigere! Ekyo kye kigendererwa ky’okussekimu kw’Abakristaayo; naye emirundi mingi ‘obucaafu’ obusuulibwa mu bakkiriza buba bungi nga bwe buli mu b’ensi!

Si kwe kuyitibwa okuweerezagana mu Mubiri gwa Kristo kwokka, naye era tusoomoozebwa okuba abaweereza eri n’abo abandiyagadde okulyamu Mukama waffe olukwe nga si bagoberezi be.

Yesu yanaaza ebigere bya Yuda ng’amanyi byonna ebyali mu mutima gwe. Yalaba okubuusabuusa kwe n’obunyiivu bwe, yamanya enkwe ze n’obulimba bwe, naye n’atabuusabuusa kunaaza bigere bye.

Bwe yamaliriza omulimu guno, n’ayita bonna abandimutegedde nga ye mukama waabwe, okukola bwe batyo.

Okuba n’endowooza y’omuweereza si kyangu mu nsi yaffe eyeefaako yokka. Kyetaagisa obuwombeefu — okwemanya nga bw’oli ddala — n’okwekkiriza nga bw’oli. Bwe tweeraba nga tuli ‘mu Kristo,’ tetutiisibwatiisibwa abalala kye bayinza okutulowoozaako. Ani afaayo ku abalala kye bayinza okwogera nga tumanyi nti tusanyusa Mukama? Obwesige bwaffe buli mu Ye ne mu bisuubizo bye.

Yesu yamanya obutume bwe, gye yava, era gye yali adda (Yokaana 13:3). Obwesige buno bwe bwali omusingi gw’obuweereza bwe. Kitaawe yali amuwadde obuyinza, yali amutumye mu nsi, era yali agenda okumuddiza.

Ffe tulina obutume bwe bumu era n’ekifo kye kimu gye tugenda! Ensi eyinza okutuyita abanafu oba abatalina mugongo, ng’egezaako okukyusa endowooza yaffe ey’obuweereza okutuukiriza ebigendererwa byayo. Bajja kutwala ekkooti yo, ne bakuwaliriza okugenda nabo kilomita emu, ne bakufuula omuddu waabwe.

Yesu yatugamba nti, singa ekyo kibaawo, obawe n’essaati yo era otwalirengako n’eya kubiri! Bw’okola bw’otyo, oba weeggya mu buddu bwabwe, ne weefuula omuweereza ow’okweyagalira (Matayo 5:40-41).

Nga Yuda yaakava mu kisenge okugenda okukola omulimu gwe omubi, Yesu n’ayigiriza abayigirizwa be ekyetaagisa ekyokubiri. “Mbawa ekiragiro ekiggya: Mwagalanenga nga nze bwe mbaagala. Bwe munaayagalananga abantu bonna kwe banaategeereranga nti muli bayigirizwa bange” (Yokaana 13:34-35). Kirabike nti kino kiragiro, si kya kulondamu! Wali ogezezzaako okupima nga bw’akwagala? Ekyo kye kipimo kyokka ky’anaakozesa okupima nga bw’oyagala “bannaawo!”

Kyandibadde tekisoboka singa si lwa kisa kye n’Omwoyo Omutukuvu gw’atuwa abeera munda mu ffe.

“Okubeera waggulu n’abo be njagala, ai, ekyo kijja kuba kitiibwa! Okubeera wano wansi n’abo be mmanyi — kale, eyo mboozi ndala!”

(Omuwandiisi Tamanyiddwa).

Tuyinza obutaagalana, naye tulagirwa okwagalana! Ekyo kitegeeza nti tewabanga lugambo wadde okwogeragana ebibi mu bugenderevu, wabula okussaamu ekitiibwa, okukulembeza bannaffe, okwetikkiragana emigugu, n’ebirala bingi… Ekyetaagisa ekyokusatu ne kiteekebwa mu maaso g’abayigirizwa. “Kale obanga munjagala mugonderenga ebiragiro byange” (Yokaana 14:15). Atuyita okugondera ekigambo kye. Nnabbi ow’Endagaano Enkadde, Samwiri, yanenya Kabaka Sawulo eyali tagondera ng’agamba nti, “Mukama asanyukira nnyo ebiweebwayo ebyokebwa ne ssaddaaka, okusinga okugondera eddoboozi lya Mukama? Okugonda kusinga ssaddaaka, era n’okuwuliriza kusinga amasavu g’endiga ennume.

Kubanga obujeemu buli ng’ekibi eky’okusamira, era n’obukakanyavu buli ng’ekibi eky’okusinza bakatonda abalala. Kubanga ojeemedde ekigambo kya Mukama, naye akugaanye okuba kabaka” (1 Samwiri 15:22-23).

Olw’okuba Sawulo teyagondera kigambo kya Mukama Katonda, yafiirwa obwakabaka bwe n’obuyinza bwe. Yesu bwe yayogera eri ebibiina by’abantu, abaamuwulira ne bajjula okwewuunya kubanga yayogera nga nannyini buyinza obungi (Matayo 7:28-29).

Ffe abamutegeera nga Omulokozi tusaana era okukkiriza nti ye Mukama. By’ayogera birina obuyinza obusinga byonna.

Twetaaga okuba abeetegefu okuwulira n’okutegeera eddoboozi lye buli lunaku. Yagamba nti ffe, endiga ze, tusaana okutegeera eddoboozi lye. Okusingira ddala, tusaana okumuwulira ng’ayogera naffe okuyita mu Byawandiikibwa, ne tugondera by’agamba. Abakkiriza bonna basaana okuba abayizi b’Ekigambo ekyawandiikibwa, nga babeera mu kugondera ebiragiro byakyo.

Yesu by’ayagala eri abayigirizwa be bye bino: tuweerezagane, twagalane, era tugondere Ekigambo kye.

Ebisuubizo Bye Okwo nga kw’otadde ebyetaagisa ebisatu bye yateeka mu maaso g’abayigirizwa be, Yesu era yabasuubiza emikisa mingi. Yali agenda kukomawo n’abatwala gy’ali, ng’amaze okubateekerateekera ekifo “mu nnyumba ya Kitaawe” (Yokaana 14:2). Baali bagenda kukola emirimu egisinga egyo gye yakola, kubanga yali agenda kubaweereza Omubeezi omulala, era ng’addamu okusaba kwe baasaba ng’okwagala kwe bwe kuli. Baali bagenda kumanya omukisa ogw’okubeera mu Kristo, n’okulega ku kwagala kwa Kitaffe.

Omubeezi, Omwoyo Omutukuvu, yali agenda okujja okubeera munda mu bo era n’okubakulembera okubatuusa ku mazima n’okumanya okwagala kwa Katonda; yali agenda kubajjukiza byonna bye baayigirizibwa Yesu.

“Omutima gwammwe tegweraliikiriranga. Mukkiriza Katonda, era nange munzikirize” (Yokaana 14:1).

“Mbalekera emirembe, era mbawa emirembe gyange. Emirembe gye mbawa tegiringa egy’ensi. Omutima gwammwe tegweraliikiriranga, so temutyanga” (Yokaana 14:27).

“Mbategeezezza ebyo mulyoke mujjule essanyu lyange. Era essanyu lyammwe liryoke lituukirire” (Yokaana 15:11).

Yabasuubiza — era naffe — emirembe ensi gy’etayinza kuwa wadde okuggyawo, essanyu ery’ekigero eky’okujjula, n’obubeerawo obutali bulala wabula Omwoyo yennyini, atatulekenga so atatwabulirenga (Ekyamateeka Olwokubiri 31:6).

Wali obiraze mu kutambula kwo ne Mukama? Nze mazima ddala mbiraze, naye njagala n’okusingawo!

Okulega ku bisuubizo bino kwesigamye ku ffe okuba abaweereza, abaagalana, era abagondera Ekigambo kye.