Omubiri gwa Kristo

Omubiri Gumu “Noolwekyo nga bwe tuli omubiri ogumu mu Kristo, buli muntu kitundu ku mubiri ogumu ogwo” (Abaruumi 12:5).

Omutume Pawulo addira ensonga y’okusaba kwa Mukama waffe mu kisenge ekya waggulu, n’atuyigiriza nti enkolagana eyeetaagisa mu kuweererezaganya n’okwagalana esingira ddala okulabisibwa mu kyokulabirako ky’omubiri omulamu. Alaba Ekkanisa ng’Omubiri gwa Kristo omulamu, ogwateekebwawo Katonda. Si kibiina kyakolebwa bantu, wabula kitonde ekyakolebwa Katonda – ekintu ekiramu, era ekikulu ennyo. Kye kifo eky’okutendekerwamu n’okwegezesaamu okuweereza n’okwagala. Kye kiva okussekimu kw’Abakristaayo nga kukulu bwe kutyo.

John Donne, omukabona wa Kkanisa ya Angirikaani ow’omu kyasa eky’ekkumi n’omukaaga, yawandiika nti, “Tewali muntu ali kizinga ekyekka; buli muntu kitundu ku ssemazinga, kitundu ku nsi yonna. Ennyanja bw’etwala akatundu k’ettaka, Bulaaya ekendeera, nga bwe kityo singa olusozi olweyongobera mu nnyanja lutwalibwa, oba ennyumba ya mukwano gwo oba eyiyo ggwe: okufa kwa buli muntu kunkendeeza, kubanga nze ndi mu bantu; kale nno, toweerezanga muntu kubuuza ekide kye kivugira; kikuvugira ggwe.”

Ebirowoozo bye byandibadde bulungi ng’eby’omuntu ali mu Mubiri gwa Kristo, ategeera nti yeetaaga ebitundu ebirala byonna eby’omubiri ogwo.

Obusiraamu buyigiriza nti Mukamadi yayitibwa Katonda okumaliriza ekyo Yesu kye yalemwa okukola! Abasiraamu bakkiriza Yesu nga nnabbi omukulu, addirira Mukamadi yekka, naye bakkiriza nti yalemwa, kubanga teyasobola kufuula bantu bonna ggwanga limu. Obusiraamu buyita abantu ab’amawanga gonna okuba obumu ng’Abasiraamu. Balemereddwa okutegeera nti obumu Yesu bwe yajja okuleeta bwali bwa abo abali mu bwakabaka bwe, so si obw’ensi eno. Nga kya nnaku nnyo, mu bwakabaka obwo mulimu okwawukana okwolekedde bwe kutyo. Tekyewuunyisa nti Obusiraamu bukula mangu bwe butyo!

Bwe twakyuka, mu kuzaalibwa okupya, “ffenna twabatizibwa mu Mwoyo omu, ne tufuuka omubiri gumu” (1 Abakkolinso 12:13). Muno mwe muli Ababatisita, Abangirikaani, Abapentekoosite, n’ekibiina kyonna ky’olimu. Si nzikiriza z’ebibiina, wabula abantu kinnoomu abali mu bibiina ebyo byonna abamanyi Mukama waffe ng’Omulokozi waabwe ow’obuntu, era abamanyi nti ebibi byabwe bisonyiyiddwa olw’omulimu ogwamalirizibwa ku Kalvaali. Okubatizibwa mu Mubiri tekusaana kutabulwa n’okubatizibwa mu Mwoyo, abayigirizwa kwe baafuna ku lunaku lwa Pentekoote, era ne bangi okuva ku lunaku olwo. Okusooka kwe “kubatizibwa Omwoyo n’atuyingiza mu Mubiri,” ate okwokubiri kwe “kubatizibwa Mukama waffe Yesu n’atuyingiza mu Mwoyo” (Lukka 3:16). Tuteekwa okuba “mu Kristo” olw’okuweebwa obutuukirivu, ne Kristo ateekwa okuba “mu ffe” olw’okutukuzibwa.

Okujjula kw’Omwoyo Okwawukana okumu okukulu mu mubiri kuva ku njigiriza ez’enjawulo ezikwata ku kubatizibwa kuno okw’Omwoyo.

Ennimi bwe bujulirwa obusooka obw’okujjuzibwa bw’atyo? Bujulirwa n’akatono? Siyingira mu mpaka ezo, okuggyako okugamba nti, ka tube n’endowooza yonna gye tulina, tetusaana kufuula kutakkaanya kwaffe nsonga ya kwawukana; bwe tukola bwe tutyo mazima tetulaga bujulirwa bwa kujjula kwonna kw’Omwoyo Omutukuvu!

Ajja okutufuulira okubeerawo kwa Kristo, n’okwagala kwe, ekintu eky’amazima. Atukulembera mu mazima. Kinneewuunyisa nti, Pawulo bw’atukuutira nti “Omwoyo ajjulenga mu bulamu bwammwe” (Abaefeso 5:18), addako n’atuwa obujulirwa busatu obw’obulamu obujjudde bw’obutyo: 1. Empisa ey’okusinza, nga muzimbagana mu Zabbuli ne mu nnyimba, ne mu nnyimba ez’Omwoyo, nga muyimbira Mukama era nga mumuyimusiza amaloboozi mu mutima gwammwe (Abaefeso 5:19).

2. Empisa ey’okwebaza, nga bulijjo mwebaza Katonda Kitaffe olwa byonna, mu linnya lya Mukama waffe Yesu Kristo (Abaefeso 5:20).

3. Empisa ey’obuweereza, nga mutya Kristo, era nga muwuliragana (Abaefeso 5:21).

Tongamba nti oli Mukristaayo ajjudde Omwoyo, wabula ng’ebyo ebisatu birabika mu bulamu bwo!

Awo Pawulo n’ayongera mu bbaluwa ye eri Abaefeso, ng’alaga engeri obujulirwa buno obwokusatu gye bukolerwamu mu nkolagana zaffe nga: omwami n’omukazi we, abaana n’abazadde, n’abakozi ne bakama baabwe (Abaefeso 5:22-6:9).

Ekkanisa ey’Ekitundu Siri mu abo abalowooza nti enzikiriza z’ebibiina mu butuufu mbi. Nzikiriza nti Mukama waffe yateekawo ezisinga obungi okutusobozesa okukula ng’abakkiriza mu kibiina ky’abantu abasinga okutufaanana mu mpisa ne mu ndowooza; kyokka, ebibiina byaffe bwe bituleetera okwawukana ku abo abali mu Mubiri gwa Kristo abatakkiriziganya naffe ku ngeri z’okusinza, ku kutaputa Ebyawandiikibwa, ne ku ebyo bye tussaako essira, tuba mu kabi ak’okwereetera omusango. Tuyinza obutaagalana, naye tulagiddwa okwagalana!

Waliwo ebitundu bisatu ebikulu eby’Ebyawandiikibwa omutume mw’annyonnyolera okutegeera kwe ku Mubiri gwa Kristo.

1. Abaefeso 4:1-16 → Tukubirizibwa okutambula n’empisa ezisaanira obulamu bwe twayitirwa, nga tulaga obuwombeefu, obukkakkamu, okugumiikiriza, okwagala, era nga tunyiikira okukuuma obumu obw’Omwoyo mu kwegatta awamu okw’emirembe. Kubanga, alangirira nti, “OMUBIRI GULI GUMU” (Abaefeso 4:4). Ayongerayo n’awandiika ku bimu ku birabo eby’ekisa ebiweebwa Omubiri ogwo, mu lunyiriri olw’omusanvu. Ebyo bye birabo eby’obuweereza eby’abatume, bannabbi, ababuulizi b’enjiri, abasumba, n’abayigiriza, ebiweebwa “olw’okutendeka abantu ba Katonda… okutuuka ku kukula” (Abaefeso 4:13).

2. Abaruumi 12:1-8 → Tuddamu okukubirizibwa okwewaayo nga ssaddaaka ennamu, n’ebirowoozo ebiddiddwamu obuggya. Ebitundu byonna eby’Omubiri tebikola mulimu gwe gumu, naye ffenna twetaagagana. Ffenna tulina ebirabo eby’ekisa eby’enjawulo (Abaruumi 12:6) bye tuweererezaganya.

Kale nno, tuteekwa okukola bwe tuti: “Mube n’okwagala okutaliimu bukuusa. Mukyawenga ekibi, munywererenga ku kirungi, nga mwagalana mu kwagala okw’abooluganda, nga muwaŋŋana ekitiibwa” (Abaruumi 12:9-10).

3. 1 Abakkolinso 12-14 → Tetusobola kwawula ssuula 12 ne 14 ku ssuula eyo enkulu ey’okwagala, essuula 13! Essuula esooka eyogera ku njigiriza ez’Omubiri n’ebirabo (charismata) ebiweebwa Omubiri ogwo. Weetegereze nti ebirabo bino biweebwa omuntu kinnoomu, si lwa kwegasa yekka, wabula olw’okugasa Omubiri gwonna!

Awo Pawulo n’agaziya okuyigiriza kwe ku Mubiri, ng’alaga obusirusiru obuli mu kitundu ky’Omubiri okwogera nti tekyetaaga bitundu birala! Eriiso terisobola kugamba mukono nti, “Ggwe sikwetaaga,” oba omutwe okugamba ebigere nti, “Mmwe sibeetaaga” (1 Abakkolinso 12:21). Twetaagagana!

Ku nkomerero y’essuula eno, akuŋŋaanya wamu enkalala z’ebirabo eby’ekisa bye yawandiika mu Abaefeso ne mu Abaruumi, ng’alaga nga byonna biri mu lukalala lwe oluwanvu olw’ebirabo (charismata).

Ebirabo ng’ebyo tebirina mugaso munene wabula nga bikozesebwa n’okwagala (1 Abakkolinso 13), era mu ngeri entuufu ey’entegeka (1 Abakkolinso 14).

Okola omulimu gwo mu bujjuvu mu Mubiri gwa Kristo? Onywedde mu kkanisa ey’ekitundu, ng’oweereza abalala, ng’oyagala abalala, era ng’ogondera Ekigambo kye? Obuweereza bwo bwe buba obusinga ekkanisa ey’ekitundu obunene, oli mu nkolagana entuufu ne Katonda okulonda abakulembeze, era n’okuba omuvunaanyizibwa gye bali ng’omuntu ali mu kitundu ky’Omubiri ekyo kye kimu?

Abamu bayinza okwagala okuba omukono ogugolola, abalala eddoboozi eryogera eri ensi eno, naye nze emirundi mingi nneeraba nga siri kintu kya kitiibwa okusinga olugalo olunene olw’ekigere! Nga bwe nnali omusumba, emirundi mingi nnakolanga mu bifo ebirimu ekizikiza n’akawunya, nga mpulira nzitoowereddwa, nga nsala ensonga z’abantu (omusenyu ogwesibye wakati mu ngalo z’ebigere).

Kyokka, mpulira nga ndi wa mukisa bwe nsabibwa okuweereza, kubanga mfuna omukisa okuleeta obutebenkevu mu Mubiri. Mazima ddala, ogwo gwe mulimu omukulu ogw’olugalo olunene!