Okwanukula Kwaffe

Ekikulu eri Katonda, kye kikulu eri Setaani!

Kino tuyinza okukikakasa! Ebigendererwa byonna Katonda by’alina ku bantu, Setaani ajja kukola kyonna ky’asobola okuziyiza omulimu ogwo. Mukama bw’aba ayagala abakkiriza babeere mu bumu, omulabe afuba nnyo okuziyiza obumu obwo.

Bwe tusoma Baibuli, kirabika bulungi nti enkolagana y’emu ku bintu Katonda by’asinga okussa mu maaso. Yatutondera Ye, era n’atutondera buli omu munne. Okuva ku lupapula olusooka okutuuka ku lusembayo, Baibuli essa essira ku nkolagana: omuntu ne Katonda, n’omuntu ne munne.

Mu Olubereberye, Katonda yatonda omuntu mu kifaananyi kye — balyoke babeere bumu (1 Yokaana 1:3). Oluvannyuma n’atondera omusajja omukazi, kubanga “Si kirungi omuntu okuba yekka” (Olubereberye 2:18).

Oluvannyuma n’alonda omusajja omu, mu ye mwe mwandivudde eggwanga ery’enjawulo. Ne yeeyita, “Katonda wa Ibulayimu, owa Isaaka, era owa Yakobo,” n’afuuka Kitaabwe era bba w’ezzadde lyabwe.

Setaani yakola kyonna kye yasobola okumenya enkolagana eno — ng’aweereddwayo omukono omunene abantu bennyini! Manya nti ne leero akyafuba n’amaanyi ge gonna okuggya abantu ku Katonda, okusaasaanya amaka, n’okuzikiriza Abayudaaya.

Endagaano Enkadde ekomekkerezebwa n’ekisuubizo eky’ekitalo ekikwata ku nkolagana: “Alikomyawo omutima gwa bazadde eri abaana baabwe, n’omutima gw’abaana eri bazadde baabwe; nneme okukolimira ensi” (Malaki 4:6).

Essira Endagaano Empya ly’essa lye limu n’ery’Endagaano Enkadde, nga kwotadde obuvunaanyizibwa obulala eri abakkiriza obw’okubeera mu bumu, ng’omusingi gw’obujulirwa bwabwe.

Ebitundu ebinene eby’Endagaano Empya bissa essira ku mazima gano, ne bikomekkerezebwa n’okuyita okuli mu ssuula esembayo: “Omwoyo n’Omugole boogera nti, ‘Jjangu!’” (Okubikkulirwa 22:17). “Omugole,” nga bwe kiri ne “Omubiri,” kigambo kya nkolagana!

Ebiwundu Ebireeta Obulemu Mukama bw’aba ayagala okukuza omusajja oba omukazi afuuke omulwanyi ow’amaanyi asobola okulwanyisa ekibi, omulabe ajja kugezaako ‘okulemaza’ omuserikale oyo ne nga tannaba na kuyingira mu ggye ng’omutendekwa.

Setaani si wa magezi gonna, noolwekyo tamanyi biseera byo eby’omu maaso. So tabeera buli wamu, okumeggana naawe buli kaseera; kyava ateekwa okukozesa enkola ez’okulumba mu kyama mu lutalo, ng’abaserikale be — dayimooni — balasa nga tebamanyi oba banaakuba oba banaasubwa. Naye nti bakuba, kirabikira mu muwendo omunene ogw’abantu ababalibwa nga bava mu maka agatali malamu.

Abawi b’amagezi, ab’ensi n’Abakristaayo, bamala essaawa nnyingi nga bagezaako okuyigiriza abantu engeri y’okukwatamu ebiwundu byabwe — obulemu bwabwe. Basuubira okutuusa abalwadde baabwe mu kifo eky’okwekuuma, gye bayigira okukozesa obulungi ‘emiggo’ abawi b’amagezi gye babawa. Okugeza, ekigendererwa kya Alcoholics Anonymous kwe kuyamba abagoberezi baabwe okwekuuma obutanywa mwenge, mu kifo ky’okubatuusa ku kuwona.

Eky’ennaku, abawi b’amagezi Abakristaayo bangi baakwata enkola n’ebikozesebwa eby’ensi mu kukwata ku biwundu bino, nga batono nnyo abatuusa abantu baabwe mu kifo eky’okuwona Yesu kye yafunira ku musaalaba. “Ebiwundu bye, bye bituwonya” (Isaaya 53:5).

Enkwe za Setaani zifumita bangi abatalituuka na kuyingira mu ggye erimulwanyisa, kubanga tebalikkiriza bulokozi bwe baaweebwa mu Kristo. Naye omuntu bw’amanyibwa nti ali mu Mubiri gwa Kristo, olwo Setaani n’assa amaanyi ge gonna ku muntu oyo, naddala bw’atandika okumulumba.

Obuweereza obw’Okutabaganya Yesu yajja okuwangula amaanyi ga Setaani mu bulamu bw’abantu. Mu ye, enkolagana yaffe empya erina okweyoleka mu bumu bwaffe ng’abakkiriza: nga Omubiri gumu. Setaani talina maanyi ga kuzikiriza bumu buno oba nkolagana zino, naye olw’obutamanya, okutambulira mu mubiri, n’ebiwundu ebitawonye eby’emyoyo gyaffe, tumuwadde ebigo.

Kiki kye tuyinza okukola okulongoosa embeera eno? Mazima ddala, tusobola okusaba! Awatali buyambi na bulagirizi bwa Mwoyo Omutukuvu, tetuliiko kye tusobola kukola! Naye tulina okutegeera nti Kitaffe atera obutaddamu ssaala mu bitundu mw’atuweereddeyo obuyinza n’obuvunaanyizibwa. Obuvunaanyizibwa obw’okutabaganya abantu tebukyali bubwe, buli ku ffe. “Ebintu byonna biva eri Katonda eyatukomyawo gy’ali nga tuyita mu Kristo, era ne tuweebwa obuweereza obw’okutabaganya. Kubanga Katonda yali mu Kristo, ng’atabagana n’abantu, nga tababalira bibi byabwe, n’atuteresa ffe obubaka obw’okutabaganya” (2 Abakkolinso 5:18-19).

Tulina okukwata ku kwesittala kwaffe, tufube okutegeera ‘ebiwundu’ byaffe, era tukozese emisingi gya Baibuli okufuna okuwona, okuzzibwa obuggya, n’okutabagana. Bw’oba ng’ofumitiddwa, nsuubira nti ekitundu kino eky’ekitabo kijja kukuyamba okutuuka mu kifo eky’obulamu obutuukiridde mu Kristo, ng’omanyi nga Dawudi bwe yamanya, nti “Akomyawo emmeeme yange” (Zabbuli 23:3), era nti abo “Omwana b’afuula ab’eddembe, babeerera ddala ba ddembe” (Yokaana 8:36).

Endiga Eyeesittadde Mmwe abawi b’amagezi, abakadde b’ekkanisa, oba abasumba, mbakuutira nti buno bwe buweereza bwammwe. Ekitundu ky’Ebyawandiikibwa ekinsomooza ennyo nga ndi musumba era omuwi w’amagezi kiri mu Matayo 18. Essuula eno yonna ekwata ku kwesittala, okuzzibwa obuggya, okutabagana, n’okusonyiwa.

Ekinsomooza ennyo ye ngeri Matayo gy’awandiikamu olugero olw’omusumba n’endiga ekikumi, awagamba nti, “Omuntu bw’aba n’endiga ze ekikumi, emu n’emubulako, taleka ziri ekyenda mu omwenda ku lusozi n’agenda anoonya eri emu ebuze? Ddala ddala mbagamba nti, bw’agiraba agisanyukira nnyo okusinga ziri ekyenda mu omwenda ezitaabuze” (Matayo 18:12-14).

Eyava mu kisibo ndiga, si mbuzi. Mu Ndagaano Empya, abakkiriza batera okuyitibwa “endiga,” ate ekigambo “embuzi” kikozesebwa ku abo abatakkiriza.

Ekifaananyi kino kya mukkiriza eyeesittadde, n’afuluma mu kkanisa, oboolyawo ng’alina obutwa obutono obweteguse okusaasaanira ku buli anaawuliriza. Ffenna kino kitutuukako mu bibiina byaffe, era emirundi mingi tukemebwa okukuba mu ngalo nga tugamba nti, “Kirungi agenze! Yali musajja munakuwavu nnyo!” Mu kifo ky’ekyo, tukubirizibwa okugoberera endiga eyo, nga tufuba okugitegeera n’okugiweereza awatali kugisalira musango, nga twesiga nti Mukama ajja kuleeta okutabagana n’okuzzibwa obuggya. Singa tukikola, oboolyawo twandibadde n’abasajja ‘abanakuwavu’ abatono nnyo mu kkanisa yaffe!

Oluusi endiga eva ng’efumitiddwa ekiwundu ekinene. Nzijukira omuwala omu eyajja gye ndi, ng’alumizibbwa nnyo kubanga abakulembeze b’‘obuweereza’ bwe baali bamubonerezza, nga bafunye alipoota embi ezimukwatako; naye nga tewali n’omu ayagala kumubuulira alipoota ezo kye zaali zoogera. Nagenda okulaba abakulembeze be, omulamuzi we omukulu n’aŋŋamba nti baali “bamulese abonerere yekka mu ebyo bye yeereetedde, ayigire ekyokuyiga.” Nagamba omukulembeze oyo, eyali yeeyita omusumba, nti tetuweereddwa lukusa kukwata ndiga mu ngeri eyo.

“Endiga bw’ekwatibwa mu kisaka eky’amaggwa, nteekwa okwewalula ne nnyingira okugisumulula, ne bwe nnaasalibwako amaggwa era oboolyawo ne nnumwa endiga eno erumizibbwa. Olwo ne nfukamu amafuta n’omwenge, ne nsiba ebiwundu, ne ndyoka nteera endiga eddembe nga ngikuutira obutaddayo mu kisaka kya maggwa. Bwe mpulira okukaaba nate, ne ndaba endiga mu kisaka ekirala oluvannyuma lw’akaseera katono, nzira mu ngeri y’emu. Kino kigenda mu maaso n’okukuutira okulala era oboolyawo n’okukozesa omuguwa, naye siyinza n’akatono kuyimirira ebweru w’ekisaka, nnyweze olunwe nga ŋŋamba nti, ‘Kikusaanidde!

Bonerera wekka mu ebyo bye weereetedde!’ Omusumba Omukulu teyampa lukusa lwa ngeri eyo bwe yampita okuweereza ng’omusumba omubeezi!”

Omuwala oyo yagobebwa mu buweereza obwo, wadde nga nnali nnyonnyodde bulungi abakulembeze be nti alipoota ezaali zimulumiriza zaasinziira ku bulimba! Tekyewuunyisa nti yali afumitiddwa ekiwundu ekinene bw’ekyo era ng’alina okuweebwa obuwi bw’amagezi obw’ekikugu okumala ebbanga eddene!