Okulemererwa

Omutwe gw’essuula eno gwokka guyinza okwewuunyisa abamu. “Okulemererwa,” bajja kugamba; “twalowooza nti mu bulamu buno obw’okukkiriza temuli kulemererwa!” Kino nnyinza okukiddamu nti tekisaanidde kubaawo, era tekiteekwa kubaawo; naye mu butuufu, oluusi kubaawo. Era tulina okukwata ku bintu nga bwe biri ddala, so si ku ndowooza obulowooza. Tewali musomesa wa bulamu buno obw’omunda agamba nti tetuyinza kwonoona. Bakkaatiriza bukkaatiriza nti tetuwalirizibwa kwonoona. Kaakano tusobola okuwangula obutayosa. Era batono abeegaana nti, oluusi, bawanguddwako ebikemo.

Kya lwatu, bwe njogera ku kibi wano, ntegeeza ekibi omuntu ky’akola ng’amanyi era ng’ategeera. Sikwata ku bibi bye tukola mu butamanya.

Era sigenda kwogera ku kiyitibwa ekibi eky’obutonde bwaffe ekitayinza kwewalika. Byombi bibikkiddwako okutangirira, era tebitaataaganya kussa kimu kwaffe ne Katonda. Sirina kwagala wadde obusobozi okukubaganya ebirowoozo ku njigiriza ez’ekibi; ekyo nkirekera abayivu b’eby’eddiini. Nja kwogera ku ebyo byokka omukkiriza by’ayitamu. Njagala kitegeerekeke bulungi nti nja kwogera ku ebyo byokka bye tumanyi era bye tutegeera munda mu ffe. Kale, okutategeera bulungi ensonga eno ey’ekibi kye tumanyi kya kabi nnyo eri obulamu Obukristaayo obw’awaggulu. Omukkiriza eyeesiga nti ali ku kkubo ettukuvu ayinza okugwa mu kibi nga tamanyiriddeko. Olwo akemebwa okwabulira byonna, oba okukweka ekibi kye. Okusobola okutaasa enjigiriza ye, ayinza okukiyita “obunafu” n’agaana okuba omwesimbu.

Ekkubo lyonna ku ago abiri litta ddala okukula n’okweyongerayo kwonna okwa nnamaddala mu bulamu obw’obutukuvu. Tuteekwa okwolekera amazima gano ag’ennaku. Tuteekwa okugayogera mu lwatu, era tunoonye, bwe kiba kisoboka, ekigaleeta n’eddagala lyago. Obulamu buno obw’okwegatta ne Katonda bwetaaga obwesimbu obusingirayo ddala eri ye n’eri ffe ffennyini. Ekibi kyandisobodde okutaataaganya okussa ekimu okwo okumala akaseera katono bukka. Naye obutaba beesimbu ku kyo kwandikusaanyaawo ddala. Okulemererwa okw’amangu si nsonga ya kuggwaamu mwoyo n’okwabulira byonna ng’ebibuze. Era n’obutuufu bw’enjigiriza yaffe tebukwatibwako. Tetubuulira mbeera, wabula entambula. Ekkubo ettukuvu si kifo, wabula lugendo. Okutukuzibwa si kintu ekifunibwa ku ddaala erimu ery’obulamu bwaffe ne kisigala nga kyaffe emirembe gyonna. Bwe bulamu obulina okuwangaalwamu buli lunaku era buli ssaawa.

Tuyinza okuwaba okuva ku kkubo okumala akaseera. Naye okuwaba kwaffe tekulisangulawo. Tusobola okuddayo mangu. Mu bulamu buno obw’okukkiriza, tuyinza oluusi okulemererwa. Okulemererwa kuno kwa nnaku, era kusaanidde okukungubagirwa. Naye bwe kukwatibwa mu ngeri entuufu, tekiteekwa kutaataaganya kwesiga kwaffe okujjuvu mu Katonda. Tekisaanidde kusalako kussa kimu kwaffe naye okw’essanyu okumala ebbanga eddene.

Ensonga enkulu kwe kuddayo eri Katonda amangu ddala. Ekibi kyaffe si nsonga ya kulekera awo kwesiga, wabula bukakafu obutayinza kuwakanyizibwa nti tuteekwa okwesiga mu bujjuvu okusinga bwe kyali kibadde. Ka kibe nti okulemererwa kwaffe kuvudde ku ki, okuggwaamu omwoyo tekujja kuyamba. Omwana ayiga okutambula ayinza okuggwaamu essuubi ng’amaze okugwa, n’agaana okuddamu okugezaako. Omukkiriza, ayiga okubeera mu bulamu obw’okukkiriza, tateekwa kwabulira byonna olw’okuba ayonoonye. Ekkubo lyokka mu mbeera zombi kwe kusituka amangu ago n’addamu okugezaako. Oluvannyuma lw’okuwangulwa okw’entiisa.

“Yoswa n’abakulembeze b’Abayisirayiri ne bayuza ebyambalo byabwe ne beesiiga enfuufu mu mitwe gyabwe era ne beeyala ku ttaka mu maaso g’Essanduuko ya Mukama okuzibya obudde. Yoswa n’agamba nti, “Mukama Katonda nga kitalo kino! Wasomosezaaki Abayisirayiri omugga Yoludaani ate n’obaleka bazikirizibwe Abamoli? Bwe twali tukyali emitala wa Yoludaani tetwaliko kabi n’akatono! Ayi Mukama, sonyiwa omuddu wo. Isirayiri alumbiddwa abalabe baabwe, nze nnaayogera ki kaakano! Abakanani n’abali mu kitundu ekyo kyonna bwe banaakiwulira bajja kutwebungulula batusaanyeewo. Olwo erinnya lyo ekkulu bwe lityo liriba terikyavuga.”(Yoswa 7:6-9) Nga guno gwali mulanga gwa kuggwaamu ssuubi! Era nga guddibwamu nnyo abaana ba Katonda bangi leero! Emitima gyabwe gibayenjebuka, ng’amazzi, olw’okuwangulwa. Bakaaba nti, “Mukama Katonda nga kitalo kino! Wasomosezaaki Abayisirayiri omugga Yoludaani ate n’obaleka bazikirizibwe Abamoli?

Bwe twali tukyali emitala wa Yoludaani tetwaliko kabi n’akatono!” Balagula okulemererwa okulala, n’okuwangulwa abalabe baabwe. Tewali kubuusabuusa, Yoswa yalowooza nga ffe bwe tulowooza kaakano. Oluvannyuma lw’okulemererwa okw’engeri eyo, okuggwaamu omwoyo n’okuggwaamu essuubi byalabika nga kye kyokka eky’amagezi okukola. Naye Katonda yalowooza bulala. “Mukama n’agamba Yoswa nti, “Golokoka. Kiki ekikuvuunamizza ku ttaka? “ Tebaalina kwewaayo eri okuggwaamu essuubi, ne bwe kwandirabise ng’obwetoowaze. Baali bateekwa okwolekera ekibi ne bakiggyawo. Kyali kibagwanidde “beetukuze” amangu ddala.”

“Golokoka otukuze abantu,” kye kiragiro kya Katonda bulijjo. “Galamira oggweemu omwoyo” kye kikemo ky’omulabe bulijjo. Tuwulira nga kya kwekulumbaza, era nga kya kyejo, okugenda amangu ago eri Mukama nga tumaze okumwonoona. Tulowooza nti tusaanidde okubonaabona n’ebiva mu bibi byaffe okumala akaseera, n’okugumira omutima gwaffe ogutusalira omusango. Tetuyinza kukkiriza nti Mukama yandyagadde okutwaniriza nate mu kussa ekimu naye okw’okwagala. Omuwala omuto lumu yannyinnyonnyola endowooza eno, n’obwesimbu obw’omwana. Yambuuza obanga Mukama Yesu bulijjo atusonyiwa ebibi byaffe bwe tumusaba. Ne mmuddamu nti, “Weewaawo, ddala atusonyiwa.””

“Amangu ago ddala” bwe yaddamu, ng’abuusabuusa. “Weewaawo,” bwe nnamuddamu, “mu kaseera kennyini ke tumusaba, atusonyiwa.”

“Kale,” bwe yagamba ng’afumiitiriza, “ekyo sisobola kukikkiriza. Ndowooza yandisoose kutuleka ne tunakuwala okumala ennaku bbiri oba ssatu. Era oluvannyuma ndowooza yanditusabye okumwegayirira emirundi mingi nnyo, era mu ngeri ennungi ddala, si mu bigambo bya bulijjo. Nzikiriza nti bw’atyo bw’akola. Tewetaaga kufuba kunkkirizisa nti ansonyiwa amangu ago, ne bwe kiba nti Bayibuli egamba ki.”

Yayogera bwogezi ekyo Abakristaayo abasinga bye balowooza. Ekisinga obubi, abasinga bakikolerako. Okwejjusa kwabwe kaakano kubaawula ku Katonda okusinga ekibi kyennyini bwe kyandibaawudde.

Kino kikontana nnyo n’engeri gye twagala abaana baffe beeyisemu, ne kinneewuunyisa engeri gye twasobola okufuna endowooza ng’eyo ku Katonda. Maama anakuwala omwana we omukyamu bw’agenda yekka ng’aggwaamu essuubi, ng’abuusabuusa obanga maama we ayagala okumusonyiwa. Naye omutima gwe nga gwaniriza nnyo omwagalwa adduka gy’ali n’amwegayirira amusonyiwe!

Mazima ddala, Katonda waffe yali amanyi okwagala kuno bwe yagamba nti, “ Mukomeewo mmwe abantu abatali beesigwa, nnaabawonya ne mbafuula abeesigwa.

Weewaawo tujja kudda gy’oli, kubanga ggwe Mukama Katonda waffe.”(Yeremiya 3:22) Akaseera ke kamu akabikkula ekibi kasaanidde okubikkula n’okusonyiyibwa. Kino kikulu nnyo eri okutambula okunywevu mu kkubo ettukuvu. Wano tetuyinza kugumiikiriza kwawukana ne Katonda wadde akaseera akamu. Tusobola okutambulira mu kkubo lino nga tutunuulira Yesu buli kaseera. Bwe tuggya amaaso gaffe ku ye ne tutunuulira ekibi kyaffe n’obunafu bwaffe, tujja kuva ku kkubo amangu ago. Omukkiriza eyeesiga nti ali ku kkubo lino, ekibi bwe kimuwangula, ateekwa okuddukira eri Mukama. Ateekwa okukolera ku kigambo kino (1 Yokaana 1:9): “Naye bwe twatula ebibi byaffe, ye mwesigwa era mutuukirivu okutusonyiwa n’okutunaazaako obutali butuukirivu bwonna.” Tateekwa kukweka kibi kye n’agezaako okukibikkako n’obusongasonga, wadde okukisindiikiriza okukiggya mu birowoozo bye ng’ebbanga liyitawo. Naye ateekwa okukola ng’abaana ba Isirayiri bwe baakola. Ateekwa “okukeera ennyo,” “n’adduka” okutuuka awakwekeddwa ekintu ekibi. Olwo ateekwa okukiggya mu kifo we kyakwekeddwa n’akiteeka “mu maaso ga Mukama.”

Ateekwa okwatula ekibi kye. Oluvannyuma ateekwa okukikuba amayinja, okukyokya, n’okukiggyawo. Olwo ateekwa okukituumako entuumu ennene ey’amayinja, kikwekebwe emirembe gyonna. Ateekwa, mu kiseera ekyo ddala, okukkiriza nti Katonda waali. Ateekwa okukkiriza, okusinziira ku kigambo kye, nti Katonda mwesigwa era mutuukirivu okumusonyiwa ekibi kye, era nti ddala akimusonyiwa. Era ateekwa okukkiriza nti Katonda amunaazaako obutali butuukirivu bwonna. Ateekwa, olw’okukkiriza, okwefunira okusonyiyibwa n’okunaazibwa amangu ago. Olwo ateekwa okwesiga okusinga bwe yali yeesiga.

Ekibi kya Isirayiri bwe kyamala okubikkulwa n’okuggibwawo, ekigambo kya Katonda ne kijja. Bwali bubaka obw’okuzzaamu ennyo amaanyi: “Mukama n’agamba Yoswa nti, “Totya era tokeŋŋentererwa, ddira abasajja bonna abalwanyi mulumbe ekibuga Ayi kubanga mbawadde obuwanguzi ku kyo. Kabaka, n’abantu be, ne byonna ebiri mu kibuga Ayi mbibawadde.”(Yoswa 8:1) Obuvumu bwaffe buteekwa okulinnya waggulu okusinga bwe bwali. Tuteekwa okwesiga Mukama okusingawo. Olwo amaanyi ge amangi gasobole okukola mu ffe okutuukiriza by’ayagala. Ate era, tuteekwa okwerabira ekibi kyaffe amangu ddala nga kimaze okwatulwa bwe kityo n’okusonyiyibwa. Tetuteekwa kukirowoozaako buli kiseera, n’okukyekenneenya, n’okwenyumiriza mu kubonaabona n’okwejjusa. Tetuteekwa kukifuula kisiinzibwa, ne tukyetooloola nga tukyerolera. Ekyo kyandikifuula olusozi olutukweka Katonda waffe. Tuteekwa okugoberera ekyokulabirako kya Pawulo, eyagamba nti: “kye nkola kwe kwerabira ebyo ebiri emabega ne nduubirira ebyo ebiri mu maaso.” Olwo, nga ye, tuteekwa okugamba nti: “Nduubirira okutuuka awawakanirwa awali empeera ey’okuyita kwa Katonda okwa waggulu mu Kristo Yesu.””

Njagala okuleeta ebyokulabirako bibiri ebikontana ku nsonga zino. Eky’olubereberye kyali kya Mukristaayo omunyiikivu. Yali mukozi munyiikivu mu kkanisa. Okumala emyezi egiwerako, yali anyumirwa obulokozi obujjuvu. Amangu ago n’awangulwa ekikemo eky’okuyisa obubi muganda we. Yali alowooza nti tekisoboka kuddamu kwonoona. Kale n’aggwaamu nnyo omwoyo. N’asalawo nti yali akyamye; nti teyali yeesizza ddala. Okuggwaamu omwoyo kwe ne kufuuka okuggwaamu essuubi. N’asalawo nti teyali azaaliddwa buggya, ne yeerowooza ng’abuze. Yamala emyaka esatu mu nnaku. Yeeyongera okwesamba Katonda, n’agwa mu kibi kimu oluvannyuma lw’ekirala. Obulamu bwe ne bufuuka kikolimo gy’ali n’eri abo abaali bamwetoolodde.

Obulamu bwe ne bwonooneka olw’omugugu ogwo ogw’entiisa. Ne watandika okutya nti n’amagezi ge gayinza okuwugulwa. Emyaka esatu bwe gyaggwako, n’asisinkana omukyala Omukristaayo eyali ategeera amazima ku kibi ge mbadde ngezaako okunnyonnyola. Bwe baamala okunyumya akaseera katono, omukyala n’ategeera obuzibu bwe. N’agamba nti, “Tewali kubuusabuusa, wayonoona mu kikolwa ekyo. Togezaako kukyekwasa.”

Naye tonnakyatula eri Mukama n’omusaba akusonyiwe?” “Okukyatula!” bwe yaleekaana, “Sirina kirala kye nkoze wabula okukyatula. Nneegayiridde Katonda ansonyiwe okumala emyaka gino esatu egy’entiisa.” “Era tokkirizangako nti yakusonyiwa?” omukyala bwe yabuuza. “Nedda,” omusajja omunaku bwe yaddamu, “nnyinza ntya, ng’okuva sawulirangako nga yansonyiwa?” “Naye singa yali agambye nti akusonyiye, ekyo tekyandibadde kirungi kyenkanyi n’okukiwulira?”

“Ddala, weewaawo,” omusajja bwe yaddamu, “Katonda bw’aba ng’akyogedde, kya lwatu nandikikkirizza.” “Kale bulungi, ky’agamba ddala,” omukyala bwe yaddamu, n’akyuka eri olunyiriri lwe tuwandiise waggulu. “Naye bwe twatula ebibi byaffe, ye mwesigwa era mutuukirivu okutusonyiwa n’okutunaazaako obutali butuukirivu bwonna.”(1 Yokaana 1:9) n’alusoma mu ddoboozi ery’omwanguka. “Kaakano,” bwe yeeyongera, “okumala emyaka esatu obadde oyatula ekibi kyo. Ekiseera kyonna, obujulizi bwa Katonda bubadde bulangirira nti mwesigwa era mutuukirivu okukusonyiwa n’okukunaaza. Kyokka tokkirizangako n’omulundi gumu.”

Obadde ‘ofuula Katonda mulimba’ ebbanga lino lyonna ng’ogaana okukkiriza obujulizi bwe.”

Omusajja omunaku n’alaba ensonga yonna. N’asamaalirira era n’atya. Omukyala bwe yamuyita bafukamire, n’agondera ng’omuntu atamanyi gy’ali. Omukyala yali ayagala omusajja ayatule ebibi bye eby’emabega, era yeefunire, mu kiseera ekyo ddala, okusonyiyibwa n’okunaazibwa. Era ekyavaamu kyali kya kitiibwa. Mu kaseera katono, omusana ne gwakira mu ye, n’abaguka n’atendereza olw’okununulibwa okwo okwewuunyisa. Mu ddakiika ssatu, emmeeme ye, olw’okukkiriza, n’etambula olugendo oluwanvu era olukooya olw’emyaka esatu. N’asanga nga yeewummulidde mu Yesu, ng’asanyukira obulokozi bwe obujjuvu.

Ekyokulabirako ekirala kyali kya mukyala Omukristaayo. Yali amaze mu bulokozi buno nga wiiki bbiri. Yali ng’ayitamu obulamu obw’omusana era obw’obuwanguzi. Amangu ago, ku nkomerero y’ekiseera ekyo, n’awangulwa obusungu obw’amaanyi obwamubutukako. Okumala akaseera, amataba ag’okuggwaamu omwoyo ne gayiika ku mmeeme ye. Omulabe n’agamba nti, “Laba kaakano, kino kiraga nti byonna byali nsobi. Kya lwatu, wabadde olimbibwa mu nsonga eno yonna, era tewayingirangako n’akatono mu bulamu obw’okwesiga okujjuvu.

Kirungi wabulire bwabulizi. Tosobola kwewaayo wadde okwesiga okusinga bwe wakola omulundi guno. Kale, kyeyoleka lwatu nti obulamu buno obw’obutukuvu si bwa ggwe!” Ebirowoozo bino ne bimuyitamu mu kaseera katono. Naye yali ayigiriziddwa bulungi amakubo ga Katonda. Kale, n’agamba nti, “Weewaawo, nnyonoonye, era kya nnaku nnyo.” Naye Bayibuli egamba nti bwe twatula ebibi byaffe, Katonda alitusonyiwa. Ye mwesigwa era mutuukirivu. Era alitunaazaako obutali butuukirivu bwonna. Nzikiriza nti ajja kukikola.” Teyalwa. Ng’akyabugujja obusungu, n’adduka, so si kutambula, n’ayingira mu kisenge abeere yekka. N’afukamira ku mabbali g’ekitanda, n’agamba nti, “Mukama, nkwatulira ekibi kyange.” Nnyonoonye, era ne mu kaseera kano kennyini nkyayonoona.

Nkikyawa, naye sisobola kukyeggyako. Nkyatula eri Katonda n’ensonyi era n’obuswavu mu maaso. Era kaakano nzikiriza nti, okusinziira ku kigambo kyo, ddala osonyiwa era ddala onaaza.” Yakyogera mu ddoboozi ery’omwanguka, kubanga akavuyo ak’omunda kaali kangi nnyo okukyogerera mu mutima. Ebigambo “Ddala osonyiwa era ddala onaaza” bwe byava ku mimwa gye, okununulibwa ne kujja. Mukama n’ayogera: “N’azuukuka n’aboggolera omuyaga n’agamba ennyanja nti, “Tteeka, sirika.” Omuyaga ne gusirika n’ennyanja n’eteekera ddala.” (Makko 4:39), era ne wabaawo akasiriikiriro akangi. Ekitangaala n’essanyu ne bijjula emmeeme ye ng’amataba, omulabe n’adduka, era n’awangula n’okukirawo ku bw’oyo eyamwagala. Kyatwala ddakiika ttaano zokka, ekibi n’eddagala lyakyo. Kaakano ebigere bye byatambulira ku kkubo ettukuvu ery’omukisa nga binywevu okusinga bwe kyali kibadde. Bw’atyo Ekiwonvu kya Akoli ne kifuuka oluggi olw’essuubi. N’ayimba oluyimba lwe olw’okununulibwa, nga lulina amakulu agasingawo obuziba: “Awo Musa n’abaana ba Isirayiri ne bayimbira Mukama oluyimba luno nga bagamba nti, “Nnaayimbiranga Mukama, kubanga awangudde n’ekitiibwa kingi. Asudde mu nnyanja embalaasi n’omwebagazi waayo.” (Okuva 15:1) Mu buli kizibu, eddagala lyokka kwe kwesiga Mukama. Obanga kino kye kyokka kye tuyinza okukola, tekisinga kukikola mangu ago? Emirundi mingi nnyimiriziddwa ekibuuzo kino nti, “Kale, kiki kye nnyinza okukola okuggyako okwesiga?” Amangu ago ne ntegeera obusirusiru bw’okunoonya okununulibwa mu ngeri endala yonna. Ne ndowooza nti, “Ku nkomerero nja kuteekwa okwesiga. “Kale, lwaki ssikikola kaakano?” Tuyingidde mu bulamu obw’okukkiriza. Bwe tulemererwa, okudda engulu kwaffe kwokka kuteekwa kuba kweyongera mu kukkiriza, so si kukendeera.

Buli kulemererwa, bwe kuba nga kubaddewo, ka kukuddize eri Mukama. Weewaayo gy’ali ddala era omwesige mu bujjuvu. Wadde okulemererwa kuno kwa nnaku, tekujja kumalawo kuwummula kwo wadde okussa ekimu kwo naye okuwoomu. Ndaze ekkubo ery’okuva mu kulemererwa. Kaakano njagala okwogera ku bivaako okulemererwa mu bulamu buno obw’obulokozi obujjuvu.

Ebivaako tebiri mu maanyi g’ekikemo, mu bunafu bwaffe ffennyini, oba, okusinga byonna, mu kubulwa kwonna mu maanyi oba mu kwagala kw’Omulokozi waffe okutulokola. Ekisuubizo eri Isirayiri kyali kikakafu: “ Tewali n’omu alisobola kubaziyiza ennaku zonna ez’obulamu bwo; nga bwe nabeeranga ne Musa era bwe ntyo bwe nnaabeeranga naawe, sirikuleka wadde okukwabuulira. ” (Yoswa 1:5). Era ekisuubizo eri ffe nakyo kikakafu kyenkanyi: “ Tewali kukemebwa kubatuukako okutali kwa bantu; kyokka Katonda mwesigwa, kubanga taabalekenga kutuukibwako kukemebwa kwe mutayinza kugumira, naye anaabasobozesanga okubigumira, n’abalaga n’ekkubo ery’okubiwangula.” (1 Abakkolinso 10:13) Abayisirayiri ng’enkumi ssatu ne boolekera Ayi, kyokka abasajja be Ayi ne babafubutula emisinde. Tegaali maanyi ga balabe baabwe, era Katonda teyali abaabulidde. Okuwangulwa kwabwe kwalina ensibuko endala, Mukama gy’alangirira nti: “Isirayiri eyonoonye kubanga bavudde ku ndagaano gye nabakuutira,

ne batwala ku bintu ebiwonge, ne babitabika mu byabwe ate ne balimba.”

“Abayisirayiri tebayinza kwolekera balabe baabwe, babadduka buddusi.”” Ekibi ekyakwekebwa kye kyabawangula. Wansi mu ttaka, mu weema emu mu ggye eryo eddene ennyo, mwalimu ekintu Katonda kye yali awakanya.

Ekintu kino ekyakwekebwa kyafuula eggye lyonna obutaba na maanyi mu maaso g’abalabe baabwe. “Ayi Isirayiri! Waliwo ebikwekeddwa mu mmwe; okuggyako nga mubikwekula temuyinza kuwangula balabe bammwe.””

Okuyigiriza kuli kuti: Ekibi kyonna ekikwekeddwa mu mitima gyaffe, ne bwe kiba kitono kitya, kijja kutusuula mu maaso g’abalabe baffe. Obukaawu bwonna bwe tukuumira mu mutima, okusalira abalala emisango mu bukambwe, oba okugayaala mu kugondera Mukama, bijja kulemaza obulamu bwaffe obw’omwoyo. Ne empisa oba embeera zonna ezibuusibwabuusibwa bwe zityo. Tuyinza okuba nga twakweka ekibi mu mitima gyaffe.

Tuyinza okuba nga twakibikkako, ne tugaana okukiraba. Naye mu kyama tukimanyi.

Tuyinza okukibuusa amaaso ne tulangirira nti twesiga mu bujjuvu. Tuyinza okweyongera obunyiikivu mu mirimu gyaffe egy’eddiini. Tuyinza okulaba amazima n’obulungi obusingawo mu bulamu obw’okukkiriza. Tuyinza okulabika ng’abawangudde, eri ffe ffennyini n’eri abalala.

Kyokka tuyinza okuwangulwa mu ngeri ey’obulumi. Tuyinza okwewuunya, okwebuuza, okuggwaamu essuubi, n’okusaba. Naye tewali kijja kuyamba okutuusa ekintu ekikolimire lwe kinaasimwa, ne kireetebwa mu kitangaala, ne kiteekebwa mu maaso ga Katonda. Omukkiriza abeera mu bulamu obw’omunda bw’awangulwa, ateekwa okunoonya ekikivuddeko. Si maanyi ga mulabe. Kwe kubulwa okwewaayo okukwekeddwa wansi ddala mu mutima gwe.

Okulumwa omutwe si bulwadde, wabula kabonero ka bulwadde. Obulwadde buli mu kitundu ekirala eky’omubiri. Bwe kityo, mu Mukristaayo, ekibi kabonero bukabonero. Kiraga obubi obuyinza okuba nga buli mu kitundu ekirala eky’obuntu bwe.

Oluusi, omuntu ayinza okukweka obubi ne mu ekyo, bw’okitunuulira amangu, ekirabika ng’ekirungi. Emabega w’okwagala ennyo amazima, wayinza okubaawo okwagala okusalira abalala emisango oba okuwagira endowooza zaffe zokka. Obwesigwa obw’Ekikristaayo obweyoleka buyinza okukweka obutabaamu kwagala kwa Kikristaayo. Wansi w’okufaayo okulabika ng’okutuufu ku nsonga zaffe, tuyinza okukweka okubulwa ennyo okwesiga Katonda. Omukulembeze waffe ow’omukisa, Omwoyo Omutukuvu abeera mu ffe, aliwo. Ye mu kyama atubikkulira ebintu bino. Akikola ng’ayita mu kutunyeenya okutono n’okulumwa okw’omunda mu mutima. Bwe tutyo tusigala nga tetulina kya kwekwasa. Kyangu okubuusa amaaso eddoboozi lye ery’obukkakkamu, ne twerimbalimba nti byonna biri bulungi. Kino kijja kukweka mu ffe obubi obutta, ne butuleetera okuwangulwa kwe tutasuubira.

Ekyokulabirako ekirungi ennyo ekya kino kyantuukako lumu mu by’okulabirira amaka gange. Nnasengukira mu nnyumba empya. Bwe nnali ngikebera okulaba obanga etegese, ne nsanga mu kisenge eky’omu ttaka ekipipa ekiyonjo ennyo, ekyakozesebwanga omwenge gw’ebibala. Kyali kisibiddwa emitwe gyombi. Ne nfumiitiriza obanga nkiggye mu kisenge ekyo ne nkiggulawo. Kyalabika nga temuli kantu era nga kirungi. Kale ne nsalawo okukireka, kubanga kyandibadde mulimu munene okukyambusa amadaala. Saawulira mirembe ddala, naye ne nsindiikiriza okubuusabuusa kwange ebbali ne nkireka. Emirundi ebiri buli mwaka, mu biseera by’okuyonja ennyumba, nnajjukiranga ekipipa ekyo. Omutima gwange ogw’omukyala afaayo ku maka gwannuubanga. Saasobolanga kuwummula mu nnyumba eyayonjeddwa ddala nga kikyali tekiggulwawo. Kubanga nnali mmanyi ntya nti tekikweka bubi bwonna wansi w’endabika yaakyo ennungi?

Wadde kyali kityo, ne nkkakkanya okubuusabuusa kwange. Nnatya obuzibu bw’okukinoonyereza. Okumala emyaka ebiri oba esatu, ekipipa ekyo ekyalabika ng’ekitaliiko kabi kyatuula mu kisenge kyange eky’omu ttaka. Olwo, mu ngeri etategeerekeka n’akatono, obuwojjolo obulya engoye ne butandika okujjula ennyumba yange. Nnakozesa buli ngeri eyasoboka okubwekuuma, era ne nfuba nnyo okubusaanyaawo, naye nga bwereere. Bwakula mu muwendo mangu nnyo era ne butiisatiisa okwonoona buli kye nnalina.

Nnateebereza nti kapeti zange ze zaali zibuleeta, ne nzinaaza bulungi ddala. Nnateebereza nti waliwo ekikyamu ku ntebe n’ebintu ebirala eby’omu nnyumba, ne mbiddabiriza. Nnateebereza ebintu ebya buli ngeri ebitayinza kubaawo.

Ku nkomerero, ekirowoozo ky’ekipipa ne kinzijira amangu ago. Ne nkireetesa okuva mu kisenge eky’omu ttaka, ne bamenya omutwe gwakyo.

Ndowooza siyinza kusobya bwe ŋŋamba nti obuwojjolo enkumi n’enkumi bwafubutukamu. Eyasooka okubeera mu nnyumba eyo ateekwa okuba nga yalekamu ekintu ekyazaalisa obuwojjolo. Kino kye kyali ekivaako obuzibu bwange bwonna.

Kaakano nzikiriza nti empisa emu, oba okwesanyusa okumu, ekintu ekimu ekirabika ng’ekitaliiko kabi era ekitono, kye kitunyeenya buli kiseera munda mu mutima. Tekyekenneenyezebwanga bulungi mu maaso ga Katonda agakebera. Ndowooza kye kiri ku kikolo ky’okulemererwa okusinga obungi mu bulamu buno obw’awaggulu. Si byonna nti byaweebwayo. Waliwo ensonda ey’ekyama esibiddwa, Mukama aleme kugiyingiramu. Era olw’ensonga eyo, tetusobola kwolekera balabe baffe, wabula ne twesanga nga tukubiddwa wansi mu maaso gaabwe.

Okwewala okulemererwa, oba okuzuula ekikuleeta bwe tulemererwa, tuteekwa okukuuma okusaba kuno mu maaso gaffe: “Nkebera, Ayi Katonda, otegeere omutima gwange. Ngezesa omanye ebirowoozo byange. Olabe obanga mu nze mulimu engeri yonna enkyamu; era onkulembere mu kkubo erintuusa mu bulamu obutaggwaawo.””

Wayinza okubaawo ekintu ekirimba ennyo mu nnaku gye tulaba olw’okulemererwa kwaffe. Tuyinza okulowooza nti tufaayo ku kitiibwa kya Katonda. Kyokka emmeeme zaffe ziyinza okuba nga zeeraliikirira olw’omuntu waffe yekka. Tetuli batukuvu nga bwe twali tulowooza. Okuzuula kino kulumya okwagala kwe twagala ffe ffennyini. Okunyiiga kwaffe kuyinza okuba ensobi esinga obunene ku kibi kyennyini ekyasooka. Ekkubo lyokka ery’obukuumi ery’okukwatamu okulemererwa kwaffe kwe kwewala okwebalira obutuukirivu oba okwesalira omusango.

Wabula, tusaanidde okukuteeka mu maaso ga Mukama mu kasirise. Tusaanidde okukutunuulira mu mirembe ne mu kwagala.

Abawandiisi ab’edda ab’obulamu bw’omwoyo obw’omunda bagamba nti okukyukira Katonda mu ngeri ennyangu era ey’emirembe kutuyamba okusinga okwejjusa olw’okuwaba okumuvaako. “Beera mwesigwa bwesigwa,” bwe bagamba. “Kyukira gy’ali yekka, mu kaseera kennyini k’olaba ekibi kyo. Okubeerawo kwe kujja kukusumulula okuva mu mitego egyakukwasa.” Okwetunuulira wekka kukwongera kukusuula mu bitosi, kubanga ebitosi bino byennyini si kirala wabula ggwe wennyini; so ng’okutunula obutunuzi eri Katonda kusobola okukkakkanya n’okubudaabuda omutima gwo.

Ku nkomerero, ka tuleme kwerabira, ne bwe tuba nga twalemererwa kitya, nti Mukama Yesu asobola, nga bwe kyalangirirwa, okutulokola okuva mu balabe baffe. Olwo tusobole “okulokolebwa okuva mu mukono gw’abalabe baffe awatali kutya, tulyoke tuweereze mu maaso ge, mu butukuvu ne mu butuukirivu ennaku zonna ez’obulamu bwaffe.”(Lukka 1:74-75). Ka tusabe, buli omu ku ffe, emisana n’ekiro: “ Era omuddu wo omuwonye okukola ebibi ebigenderere, bireme kunfuga.”(Zabbuli 19:13). “ Naye muliweebwa amaanyi, Mwoyo Mutukuvu bw’alimala okubakkako, era munaabanga bajulirwa bange mu Yerusaalemi, ne mu Buyudaaya yonna, ne mu Samaliya okutuukira ddala ku nkomerero z’ensi.”(Ebikolwa by’Abatume 1:8). Tuteekwa okuba abagonvu ennyo mu mikono gye, era tumwesige. Olwo alyoke “ abawe buli kirungi kyonna kye mwetaaga okubasobozesa okukola by’ayagala, era atukozese ebisiimibwa mu maaso ge ng’ayita mu Yesu Kristo. Aweebwenga ekitiibwa emirembe n’emirembe. Amiina.” (Abaebbulaniya 13:21)