Obusobozi bwaffe buva eri Katonda

Naye okusinga byonna yali wa kitalo mu kusaba. Obuziba n’obuzito bw’omwoyo gwe, okussaamu ekitiibwa n’obukkakkamu mu kwogera kwe ne mu nneeyisa ye, n’ebigambo bye ebitono naye ebijjuvu, emirundi mingi byewuunyisanga n’abantu abatamumanyi, nga bwe byabudaabudanga abalala. Ekifaananyi ekisinga okutiisa, ekisinga obulamu era ekisinga okussibwamu ekitiibwa kye nnali mpulidde oba kye nnali ndabye, nnina okugamba nti kwali kusaba kwe. Era mazima kwali kujulira. Yali amanyi Mukama era ng’abeera kumpi naye okusinga abantu abalala, kubanga abo abamumanyi ennyo be balaba ensonga esinga ey’okumusemberera n’okussaamu ekitiibwa n’okutya.—William Penn ng’ayogera ku George Fox

EBIRABO by’ekisa ebisinga obuwoomi, bwe byonoonebwako katono, biyinza okubala ebibala ebisinga okukaawa. Enjuba ewa obulamu, naye okwokebwa enjuba kutta. Okubuulira kulina okuwa obulamu; naye kuyinza okutta. Omubuulizi akwata ebisumuluzo; ayinza okuggalawo era n’okuggulawo. Okubuulira ye nteekateeka ya Katonda enkulu ey’okusimba n’okukuza obulamu obw’omwoyo. Bwe kukolebwa obulungi, emiganyulo gyakwo tegibalika; bwe kukolebwa obubi, tewali kabi kayinza kusinga bulabe bwe kuleeta. Kyangu okuzikiriza ekisibo singa omusumba tafaayo oba singa omuddo guzikirizibwa; kyangu okuwamba ekigo singa abakuumi beebase oba singa emmere n’amazzi biteekeddwamu obutwa. Okubuulira bwe kuba nga kuweereddwa obuyinza obw’ekisa obwenkanidde awo, nga kuli mu kabi ak’amaanyi bwe gatyo, era nga kuliko obuvunaanyizibwa obuzito bungi bwe butyo, kyandibadde kuduulira bukalabakalaba bwa Setaani era kwonoona linnya lye n’ettutumu lye, singa taleeta maanyi ge gonna okwonoona omubuulizi n’okubuulira. Nga tutunuulidde ebyo byonna, ekibuuzo kya Pawulo eky’okwewuunya nti, “Kale ebyo ani abisobola?” bulijjo kituukirawo.

Pawulo agamba nti: “obwesige bwaffe buva eri Katonda, oyo ye yatusaanyiza okuba abaweereza b’endagaano empya etali ya nnukuta wabula ey’omwoyo. Kubanga ennukuta etta, naye omwoyo aleeta obulamu.” Obuweereza obw’amazima Katonda abukwatako, Katonda abuwa obusobozi, era Katonda y’abukola. Omwoyo wa Katonda ali ku mubuulizi mu maanyi ag’okufukibwako amafuta, ebibala by’Omwoyo biri mu mutima gwe, Omwoyo wa Katonda awadde obulamu omuntu n’ekigambo; okubuulira kwe kuwa obulamu, kuwa obulamu ng’ebiseera by’enkuba bwe biwa obulamu; kuwa obulamu ng’okuzuukira bwe kuwa obulamu; kuwa obulamu obwa bbugumu ng’ekiseera eky’omusana bwe kiwa obulamu obwa bbugumu; kuwa obulamu obubala ebibala ng’ekiseera ky’amakungula bwe kiwa obulamu obubala ebibala. Omubuulizi aleeta obulamu muntu wa Katonda, omutima gwe bulijjo guyaayaanira Katonda, emmeeme ye bulijjo yeekwata ku Katonda, eriiso lye litunuulira Katonda yekka, era mu ye, olw’amaanyi g’Omwoyo wa Katonda, omubiri n’ensi bikomereddwa, era obuweereza bwe buli ng’amataba agajjudde ag’omugga oguleeta obulamu.

Okubuulira okutta kwe kubuulira okutali kwa mwoyo. Obusobozi bw’okubuulira obwo tebuva eri Katonda. Ensulo eziri wansi wa Katonda ze zikuwadde amaanyi n’ekikusiikuula. Omwoyo talabikira mu mubuulizi wadde mu kubuulira kwe. Amaanyi ag’ebika bingi gayinza okusindikibwa n’okukubirizibwa okubuulira okutta, naye si maanyi ga mwoyo. Gayinza okufaanana amaanyi ag’omwoyo, naye kisiikirize bukisiikirize, kya bulimba; gayinza okulabika ng’agalina obulamu, naye obulamu obwo buleetebwa bukodyo. Okubuulira okutta y’ennukuta; kuyinza okuba okulungi mu ndabika era nga kutegekeddwa bulungi, naye kikyali nnukuta, ennukuta enkalu ey’ebisusunku, ekisosonkole ekyereere ekitaliimu kantu. Ennukuta eyinza okubaamu ensigo y’obulamu, naye terina mukka gwa biseera bya nkuba kugizuukusa; nsigo za mu kiseera ky’obutiti, nkalubo ng’ettaka ery’obutiti, nnyogovu ng’empewo ey’obutiti, tezisaanuuka era tezimera. Okubuulira kuno okw’ennukuta kulina amazima. Naye n’amazima ag’obwakatonda gokka tegalina maanyi gawa bulamu; galina okuweebwa amaanyi Omwoyo, nga gali n’amaanyi ga Katonda gonna emabega waago. Amazima Omwoyo wa Katonda g’atawadde bulamu gafiisa nga bwe kiri ku nsobi, oba n’okusingawo. Gayinza okuba amazima amalongoofu agatatabuddwamu kintu; naye awatali Mwoyo ekisiikirize kyago n’okukwata kwago bitta, amazima gaago ne gafuuka nsobi, n’ekitangaala kyago ne kifuuka kizikiza. Okubuulira okw’ennukuta tekuliiko kufukibwako mafuta, Omwoyo takugonzezza wadde okukusiiga amafuta. Wayinza okubaawo amaziga, naye amaziga tegayinza kutambuza byuma bya Katonda; amaziga gayinza okuba omukka gw’ekiseera eky’omusana ku lusozi lw’omuzira olubikkiddwako omuzira, nga tewali kirala kivaamu wabula omuzira omusaanuufu ku ngulu kwokka. Wayinza okubaawo enneewulira n’obunyiikivu, naye eyo y’enneewulira y’omuzannyi wa katemba n’obunyiikivu bw’omuwolereza mu kkooti. Omubuulizi ayinza okuwulira olw’ensasi z’omuliro ze yeekoleereza yekka, n’ayogera bulungi nnyo ku kunnyonnyola kwe yennyini, n’anyiikira mu kwanjula ebiva mu bwongo bwe; omusomesa ayinza okwesenza mu kifo ky’omutume n’akoppa omuliro gwe; obwongo n’obusimu biyinza okutwala ekifo n’okwefuula omulimu gw’Omwoyo wa Katonda, era olw’amaanyi gano ennukuta eyinza okwaka n’okumasamasa ng’ekyawandiikibwa ekiyooyooteddwa, naye okwaka n’okumasamasa okwo kujja kuba nga tekuliiko bulamu ng’ennimiro esigiddwamu luulu. Ekireeta okufa kiri emabega w’ebigambo, emabega w’obubaka, emabega w’omukolo, emabega w’engeri, emabega w’ekikolwa. Ekiziyiza ekinene kiri mu mubuulizi yennyini. Talina mu ye maanyi ag’ekitalo agatonda obulamu. Wayinza obutabaawo kamogo mu njigiriza ye entuufu, mu bwesimbu bwe, mu bulongoofu bwe oba mu bunyiikivu bwe; naye mu ngeri emu omuntu, omuntu ow’omunda, mu bifo bye eby’ekyama tamenyekanga n’okwewaayo eri Katonda, obulamu bwe obw’omunda si luguudo lunene olw’okuyisaamu obubaka bwa Katonda, amaanyi ga Katonda. Mu ngeri emu okwerowoozaako, so si Katonda, kwe kufuga mu Kifo Ekitukuvu Ennyo. Awalala, nga ye kennyini tamanyi n’akatono, ekintu eky’omwoyo ekitayisa maanyi kyakoonye ku bwenyini bwe obw’omunda, era amaanyi ag’obwakatonda agakulukuta ne gaziyizibwa. Obwenyini bwe obw’omunda tebuwulirangako bwavu bwabwo obw’omwoyo obw’enkomeredde, obutaba na maanyi bwabwo obw’enkomeredde; tayigangako kukaaba n’okukaaba okutayogerekeka okw’okwennyamira ku bubwe n’okulemererwa kwe yennyini, okutuusa amaanyi ga Katonda n’omuliro gwa Katonda lwe bijja ne bimujjuza, ne bimutukuza, ne bimuwa amaanyi. Okwetwala ng’ow’ekitalo, n’okwesiga obusobozi bwe yennyini mu ngeri emu ey’akabi, byavumaganya era ne byonoona yeekaalu eyandibadde etukuzibwa ku lwa Katonda. Omubuulizi okubuulira okuleeta obulamu kumusasuza bingi—okufa eri obwe, okukomererwa eri ensi, okulumwa kw’emmeeme ye yennyini. Okubuulira okukomereddwa kwokka kwe kuyinza okuwa obulamu. Okubuulira okukomereddwa kuyinza okuva mu muntu omukomerere yekka.