Engeri y’Okuyambamu Abo Abeegomba Okulokolebwa naye nga Tebamanyi Ngeri

Waliwo ekibiina ekinene ennyo eky’abantu abeegomba okulokolebwa naye nga tebamanyi ngeri ya kukikolamu. Abantu ab’ekika kino si kizibu kubakulembera eri Kristo. Oboolyawo tewali kitundu kirala mu Bayibuli kikozesebwa nnyo ku nsonga eno okusinga Isaaya 53:6. Kiraga ekkubo ly’obulokozi mu ngeri entangaavu ennyo. Somera omunoonya ekitundu ekisooka eky’olunyiriri, “Ffenna twawaba ng’endiga; buli omu ku ffe n’akwata ekkubo lye.” Oluvannyuma mubuuze nti, “Ekyo kikukwatako,” era bw’amala okukirowoozaako n’agamba nti “yee,” omugambe nti, “Kale katulabe Katonda ky’akoze ebibi byo,” omusomere ekitundu ekisigaddeyo eky’olunyiriri, “Mukama n’amuteekako obutali butuukirivu bwaffe ffenna.” “Kale kiki ky’oteekwa okukola okulokolebwa?” Mangu ddala ajja kutegeera nti kyonna ky’alina okukola kwe kukkiriza Oyo eyeetikka ebibi Katonda gw’ataddewo. Emyaka egiyise, mu lukuŋŋaana nalabamu omusajja ow’envi enjeru ataayimirira wamu n’Abakristaayo. Olukuŋŋaana bwe lwaggwa ne ntambula ne mmutuukako ne mmubuuza nti, “Ggwe toli Mukristaayo?” N’agamba nti si Mukristaayo. Nali mukakafu nti ensonga emukwatako, kale ne mmubuuza ekibuuzo ekyolekedde ddala nti, “Wandifuuse Omukristaayo ekiro kya leero singa nkulaga ekkubo?” N’addamu nti yandifuuse. Ne tutuula wamu, ne mbikkula Bayibuli yange ku Isaaya 53:6 ne nsoma ekitundu ekisooka eky’olunyiriri, “Ffenna twawaba ng’endiga; buli omu ku ffe n’akwata ekkubo lye.” Ne mmubuuza nti, “Ekyo kikukwatako?” n’addamu nti “yee.” “Kale,” ne ŋŋamba, “katusome ekisigaddeyo ku lunyiriri, ‘Mukama n’amuteekako obutali butuukirivu bwaffe ffenna.’” “Mukama,” ne mmubuuza, “akoze ki ebibi byo?” N’alowoozaamu akaseera n’agamba nti “abitadde ku Kristo.” “Kale” ne ŋŋamba “kiki kyokka ky’olina okukola okulokolebwa?” n’addamu mangu ddala nti, “Okumukkiriza.” “Kale,” ne ŋŋamba, “onoomukkiriza ekiro kya leero?” N’agamba nti, “Nja kumukkiriza.” “Kale katufukamire tukibuulire Katonda.” Ne tufukamira, ne nkulembera mu kusaba, naye n’agoberera mu ngeri ennyangu ennyo ng’abuulira Katonda nti mwonoonyi, naye ng’akkiriza nti Katonda yateeka ebibi bye ku Yesu Kristo, era ng’asaba Katonda ku lwa Kristo amusonyiwe ebibi bye. Bwe yamaliriza ne mmubuuza obanga alowooza nti Katonda awulidde okusaba kwe era nti ebibi bye bisonyiyiddwa, n’agamba nti “yee.” Ne mmubuuza obanga anaatandikirawo okutambula mu bulamu bw’Omukristaayo, okusinzizanga Katonda awamu n’ab’omu nnyumba ye, n’okwatula Kristo mu lwatu mu maaso g’ensi, n’addamu nti bw’anaakola. Oluvannyuma lw’emyezi egimu ne nsisinkana omusumba we ne mmubuuza ebimukwatako, ne nkitegeera nti yali yaddayo ewaabwe mu kyalo eky’ewala, n’atandika okusinzizanga Katonda awamu n’ab’omu nnyumba ye, n’ayingira mu kkanisa wamu ne mutabani we, eyali asigaddeyo yekka mu maka ago nga tali mu Kristo. Kirabika kye yali alinda kyokka, kwali kufuna muntu amulaga ekkubo ly’obulokozi mu ngeri entangaavu. Oluusi olunyiriri luno ndukozesa bwe nti: “Waliwo ebintu bibiri omuntu by’ateekwa okumanya, n’ekintu kimu ky’ateekwa okukola, alyoke alokolebwe. By’ateekwa okumanya bye bino: ekisooka, nti mwonoonyi abuze, era olunyiriri luno lumutegeeza ekyo; eky’okubiri, nti Kristo Mulokozi amala mu byonna, era olunyiriri luno lumutegeeza ekyo. Ky’ateekwa okukola kwe kukkiriza bukkiriza Omulokozi ono amala mu byonna, Katonda gw’ataddewo.” Yokaana 1:12 eggyayo ensonga eno bulungi nnyo, “bonna abaamusembeza, yabawa obuyinza okufuuka abaana ba Katonda; be bo abakkiriza erinnya lye.” Bw’omala okusoma olunyiriri luno, oyinza okubuuza oyo gw’oyogera naye nti, “Baani Katonda b’awa obuyinza okufuuka abaana ba Katonda?” “Bonna abaamusembeza.” Kale ggwe olina kukola ki okufuuka omwana wa Katonda? “Okumusembeza.” Kale, onoomusembeza kaakano ng’Omulokozi wo era nga Mukama wo? Isaaya 55:7; Ebikolwa by’Abatume 16:31; Yokaana 3:16 ne 3:36 byonna bya mugaso mu kulaga ekkubo ly’obulokozi mu ngeri entangaavu. Yokaana 3:14 nga kigeraageranyizibwa ne Okubala 21:8 n’ennyiriri eziddirira, emirundi mingi kiyinza okukozesebwa ne kivaamu ebibala ebirungi. Bw’obikozesa, kulembera omunoonya alabe bulungi Omuyisirayiri omusota gwe gwabojja kye yalina okukola alyoke awone—nti yalina kutunula butunuzi ku musota ogw’ekikomo ogwawanikibwa ku mulongooti—oluvannyuma mulage nti omuntu ekibi gwe kyabojja alina kukola kye kimu—kutunula ku Kristo eyawanikibwa ku Musaalaba olw’ebibi bye. Abaruumi 1:16 lunyiriri lulala olulungi ennyo olw’okukozesa. Lulaga ekkubo ly’obulokozi mu ngeri entangaavu ennyo. Oyinza okubuuza omunoonya, ng’olunyiriri luno bwe lugamba, baani Enjiri b’erokola, era ajja kulaba nti ye “buli muntu akkiriza.” Oluvannyuma mubuuze nti, “Kale kiki kyokka omuntu ky’ateekwa okukola alyoke alokolebwe,” era ajja kulaba nti kwe kukkiriza bukkiriza. Oluvannyuma mubuuze nti “okukkiriza ki,” era eky’okuddamu kiri nti “Enjiri.” Ekibuuzo ekiddako ekijja mu ngeri ey’obutonde kiri nti, Enjiri kye ki? Kino kiddibwamu mu 1 Abakkolinso 15:1‒4. Ennyiriri zino ziraga Enjiri ky’eri, “nti Kristo yafa olw’ebibi byaffe, ng’Ebyawandiikibwa bwe bigamba, era nti yaziikibwa, n’azuukizibwa ku lunaku olwokusatu ng’Ebyawandiikibwa bwe bigamba” era kino ky’ateekwa okukkiriza alyoke alokolebwe. Ateekwa okukkiriza okuva mu mutima gwe nti Kristo yafa olw’ebibi bye era nti yazuukira. Oluvannyuma buuza omunoonya nti, “okkiriza nti Kristo yafa olw’ebibi byo? okkiriza nti yazuukira?” Bw’agamba nti akkiriza, mubuuze obanga anaafuula okukkiriza kuno okw’omutima, n’afukamira n’asaba Katonda, ku lwa Kristo, amusonyiwe ebibi bye, n’akkiriza nti Katonda akikola kubanga bw’atyo bw’agamba, era oluvannyuma ne yeesiga Omulokozi omulamu okumulokolanga buli lunaku okuva mu maanyi g’ekibi. Abaruumi 10:9–10 nakyo kiraga ekkubo ly’obulokozi mu ngeri entangaavu eri ebirowoozo bingi, awo ennyiriri endala we zigaanira. Abaruumi 10:13 kirufuula, bwe kiba kisoboka, kyangu n’okusingawo. Kino kiraga nti kyonna omuntu ky’alina okukola alyoke alokolebwe, kwe kuba nga y’oyo “alikoowoola erinnya lya Mukama.” Oyinza okubuuza omunoonya nti “Oli mwetegefu kaakano wano okufukamira n’okoowoola erinnya lya Mukama akulokole, era n’okkiriza nti Katonda akulokola kubanga agamba nti bw’atyo bw’anaakola?” Ekkubo ly’obulokozi liyinza okulagibwa mu ngeri entangaavu ng’okozesa Okuva 12:7, 13, 23. Ennyiriri zino ziraga nti omusaayi gwe gwakuuma Abayisirayiri ne batatuukibwako kabi, era bwe kityo ne leero omusaayi gwe gutukuuma, era Katonda bw’alaba omusaayi atuyitako. Ekintu kyokka kye tulina okukola kwe kwekweka emabega w’omusaayi. Oluvannyuma laga omunoonya nti engeri y’okubeera emabega w’omusaayi kwe kukkiriza obukkiriza Yesu Kristo. Lukka 18:10–14 kya mugaso nnyo okulaga omuntu by’ayinza okuba nabyo naye n’abula (Omufalisaayo), n’omuntu by’ayinza okubulwa naye n’alokolebwa (Omuwooza), era nti kyonna omuntu ky’alina okukola alyoke alokolebwe kwe kukola nga Omuwooza bwe yakola, kwe kugamba, okwetwala ng’omwonoonyi n’akaabirira Katonda amusaasire, olwo ajja kuddayo eka ng’aweereddwa obutuukirivu. Ekitundu kino kiyinza okukozesebwa mu ngeri eno okusobola okutegeeza amakulu bulungi. Buuza omunoonya nti, “Ani ku bano bombi (Omufalisaayo oba Omuwooza) eyaddayo eka ng’aweereddwa obutuukirivu?” Oluvannyuma mubuuze nti, “Omuwooza yakola ki Omufalisaayo kye yatakola, ekyamuleetera okusonyiyibwa ebibi bye, so ng’Omufalisaayo yava mu Yeekaalu nga tasonyiyiddwa?” Bw’anaasoma ekitundu ekyo, mangu ajja kulaba nti Omuwooza kye yakola kwe kwetwala obwetwazi ng’omwonoonyi mu maaso ga Katonda n’akaabirira okusaasirwa, era nti amangu ddala nga kino akikoze “yaddayo eka ng’asonyiyiddwa ebibi bye,” kwe kugamba, yaweebwa obutuukirivu. Oluvannyuma oyinza okumubuuza nti, “Kiki kyokka ky’oteekwa okukola okusonyiyibwa?” Ate mubuuze nti, “Onookikola kaakano wano?” era bw’amala okukikola, mubuuze obanga akkiriza ekigambo kya Katonda, era obanga agenda kuddayo eka ng’aweereddwa obutuukirivu. Okukkiriza okulokola kwe kuli, kulagibwa bulungi nnyo mu Lukka 7:48–50. Olunyiriri olw’amakumi ataano lutubuulira nti omukazi ono yalina okukkiriza okulokola. Kaakano buuza omunoonya nti, “Okukkiriza kwe yalina kwali kwa ngeri ki,” omulage nti okukkiriza kwe kwali bukkiriza nti Yesu yali asobola era yali ayagala okumusonyiwa ebibi bye, ne kiba nti yajja gy’ali akikole. Kuno kwe kukkiriza okulokola. Abaggalatiya 3:10–13 nakyo kifuula ekkubo ly’obulokozi ennyangu ennyo. Olunyiriri olw’ekkumi lulaga embeera y’omwonoonyi nga tannakkiriza Kristo—“bafugibwa kikolimo.” Olunyiriri olw’ekkumi n’essatu lulaga Kristo ky’akoze—yafuuka ekikolimo ku lwaffe. Omwonoonyi ky’alina okukola, kyeyoleka, kwe kukkiriza bukkiriza Kristo.