ማጥራት

ፍሬ የሚያፈራውንም ሁሉ አብዝቶ እንዲያፈራ ያጠራዋል—ዮሐንስ 15:2

ስለ ወይን ግንድ ሁለት አስደናቂ ነገሮች አሉ። እንደ ወይን ፍሬው ይህን ያህል መንፈስ (ብርቱ ኃይል) ያለበት፣ ከእርሱም ይህን ያህል በብዛት መንፈስ ሊወጣ የሚችልበት ተክል የለም። ደግሞም እንደ ወይን ፈጥኖ ፍሬውን ወደሚያሰናክል የዱር እንጨት የሚያድግ፣ ስለዚህም እጅግ ያለ ርኅራኄ ማጥራት የሚያስፈልገው ተክል የለም። እዚህ ከመስኮቴ ሰፋፊ የወይን ቦታዎችን እመለከታለሁ፤ የወይን ጠባቂው ዋና ሥራ ማጥራት ነው። ቁፋሮም፣ ፍግም፣ ውኃም እስከማያስፈልገው ድረስ በመልካም አፈር ውስጥ ሥሩን ጥልቅ አድርጎ የሰደደ በመደገፊያ ላይ የተዘረጋ የወይን ግንድ ሊኖርህ ይችላል፤ መልካም ፍሬ እንዲያፈራ ከተፈለገ ግን ያለ ማጥራት ሊሆን አይችልም። አንዳንድ ዛፍ አልፎ አልፎ ማጥራት ያስፈልገዋል፤ ሌሎች ያለ ምንም ማጥራት ፍጹም ፍሬ ያፈራሉ፤ ወይን ግን የግድ ያስፈልገዋል። ስለዚህም ጌታችን እዚሁ በምሳሌው መጀመሪያ ላይ አብ ፍሬ ለሚያፈራው ቅርንጫፍ የሚያደርገው አንዱ ሥራ ይህ እንደ ሆነ ይነግረናል፦ አብዝቶ እንዲያፈራ ያጠራዋል።

ይህ ማጥራት ወይም መቁረጥ ምን እንደ ሆነ ለአፍታ አስብ። ከውጭ የሚመጣውንና እድገትን የሚያሰናክለውን አረም ወይም እሾህ ወይም ሌላ ነገር ማስወገድ አይደለም። አይደለም፤ ያለፈውን ዓመት ረጃጅም ቀንበጦች መቁረጥ ነው፤ ከውስጥ የመጣውን፣ በራሱ በወይኑ ሕይወት የተገኘውን ነገር ማስወገድ ነው። የሕይወቱ ብርታት ማስረጃ የሆነውን ነገር ማስወገድ ነው፤ እድገቱ ብርቱ በሆነ መጠን የማጥራቱ አስፈላጊነትም ይበልጣል። መቆረጥ ያለበት የወይኑ ቅን፣ ጤናማ እንጨት ነው። ለምን? ያለፈውን ዓመት እድገት ረጃጅም ቀንበጦች ሁሉ ለመሙላት እጅግ ብዙ ጭማቂ ስለሚፈጅ ነው፤ ጭማቂው ተጠብቆ ለፍሬ ብቻ መዋል አለበት። አንዳንድ ጊዜ ስምንትና አሥር ጫማ የሚረዝሙት ቅርንጫፎች ከግንዱ አጠገብ ተቆርጠው ይወድቃሉ፤ ወይኑን ለማፍራት የሚበቃ አንድ ወይም ሁለት ኢንች እንጨት ብቻ ይቀራል። ለፍሬ ማፍራት የማያስፈልገው ሁሉ ያለ ምሕረት ተቆርጦ፣ ከቅርንጫፎቹም በተቻለ መጠን ጥቂት ብቻ ሲቀር ነው ሙሉና የበለጸገ ፍሬ የሚጠበቀው።

እንዴት ያለ ከባድና ውድ ትምህርት ነው! የገበሬው ማጥራት እዚህ የሚያመለክተው ኃጢአትን ብቻ አይደለም። ፍሬ በማፍራቱ ሥራ ውስጥ በሚያድገው በራሳችን ሃይማኖታዊ እንቅስቃሴ ላይም ነው። መቆረጥና መጥራት ያለበት ይህ ነው። ለእግዚአብሔር ስንሠራ ተፈጥሯዊ ስጦታዎቻችንን፣ ጥበብን ወይም የአንደበት ርቱዕነትን ወይም ተጽዕኖን ወይም ቅንዓትን፣ መጠቀም አለብን። ነገር ግን እነዚህ ከመጠን በላይ የማደግና ከዚያም የምንታመንባቸው የመሆን አደጋ ሁልጊዜ አለባቸው። ስለዚህም ከእያንዳንዱ የሥራ ወቅት በኋላ እግዚአብሔር ወደ ራሳችን ፍጻሜ ሊያደርሰን፣ ከሰው የሆነው ሁሉ ምን ያህል አቅመ ቢስና አደገኛ እንደ ሆነ እንድንገነዘብ፣ ምንም እንዳልሆንን እንድናውቅ ሊያደርገን ይገባል። ከእኛ የሚቀረው ሁሉ ሕይወት የሚሰጠውን የመንፈስ ቅዱስን ጭማቂ ኃይል ለመቀበል የሚበቃው ብቻ ነው። ከሰው የሆነው እጅግ ወደ ዝቅተኛው መጠኑ መቀነስ አለበት። ለክርስቶስ አገልግሎት ፍጹም ከሆነ መሰጠት ጋር የማይስማማው ሁሉ መወገድ አለበት። ከራስ የሆነው ሁሉ ማጥራቱና መቆረጡ ፍጹም በሆነ መጠን፣ መንፈስ ቅዱስ የሚሰራጭበት ገጽ እያነሰ ይሄዳል፤ በዚያው መጠንም ሁለንተናችን ሙሉ በሙሉ በመንፈስ እጅ እንዲሆን ይበልጥ ሊሰበሰብ ይችላል። ይህ እውነተኛው የልብ መገረዝ፣ በክርስቶስ መገረዝ ነው። ይህ ከክርስቶስ ጋር እውነተኛው መሰቀል ነው፤ የኢየሱስን መሞት በሥጋችን ተሸክመን መዞር ነው።

የተባረከ ማጥራት፣ የእግዚአብሔር የራሱ ማጥራት! የበዛ ፍሬ እንደምናፈራ በሚሰጠን ማረጋገጫ ምንኛ ደስ ሊለን ይችላል።

ቅዱስ ገበሬያችን ሆይ፣ ያማረ መልክ ሊያሳይ ወይም የራስ መተማመንና የመመካት ምንጭ ሊሆን የሚችለውን በእኛ ያለውን ሁሉ አጥራ፣ ቁረጥም። ጌታ ሆይ፣ ሥጋን የለበሰ ሁሉ በፊትህ እንዳይመካ እጅግ ዝቅ አድርገህ ጠብቀን። ሥራህን እንድትሠራ በአንተ እንታመናለን።