ፍሬው

ፍሬ የማያፈራውን በእኔ ያለውን ቅርንጫፍ ሁሉ ያስወግደዋል—ዮሐንስ 15:2

ፍሬ።—የወይን ግንዱ፣ ገበሬው፣ ቅርንጫፉ፣ ፍሬው፤ ቀጥሎ የምናገኘው ታላቅ ቃል ይህ ነው። ጌታችን ስለ ፍሬ የሚለን ምንድር ነው? ይህንኑ ብቻ ነው፦ ቅርንጫፍ የተገኘበት ብቸኛው ዓላማ ፍሬ ነው፤ ፍሬ ካላፈራም ገበሬው ያስወግደዋል። የወይን ግንዱ የገበሬው ክብር ነው፤ ቅርንጫፉ የወይን ግንዱ ክብር ነው፤ ፍሬው የቅርንጫፉ ክብር ነው። ቅርንጫፉ ፍሬ ካላፈራ ምንም ክብርም ሆነ ዋጋ የለውም፤ ማሰናከያና እንቅፋት ነው፤ ገበሬውም ያስወግደዋል። ቅርንጫፍ የሚኖርበት ብቸኛው ምክንያት፣ የሰማያዊው የወይን ግንድ እውነተኛ ቅርንጫፍ የመሆን ብቸኛው ምልክት፣ መለኮታዊው ገበሬ የወይን ግንዱ በሆነው ሕይወት ተካፋይ እንዲሆን የሚፈቅድለት ብቸኛው ቅድመ ሁኔታ ይህ ነው፦ ፍሬ ማፍራት።

ፍሬስ ምንድር ነው? ቅርንጫፉ ለራሱ ሳይሆን ለባለቤቱ የሚያፈራው፣ የሚለቀምና የሚወሰድ ነገር ነው። ቅርንጫፉ ለራሱ ሕይወት የሚሆነውን ጭማቂ ከወይን ግንዱ በእርግጥ ይቀበላል፤ በዚህም እየወፈረና እየጠነከረ ያድጋል። ነገር ግን ይህ ራሱን ለማኖር የሚቀበለው ምግብ የተገኘበትን ዓላማ ከመፈጸሙ፣ ማለትም ፍሬ ከማፍራቱ፣ ሙሉ በሙሉ በታች ነው። ክርስቲያኖች በጥረታቸውና በጸሎታቸው የቅርንጫፍን ኑሮ ለመኖር እንዲህ የሚወድቁት ይህን እውነት ስለማያስተውሉትና ስለማይቀበሉት ነው። ብዙ ጊዜ ይህን ኑሮ በብርቱ ይመኙታል፤ ያነባሉ፣ ያሰላስላሉ፣ ይጸልያሉ፤ ነገር ግን ይወድቃሉ፤ ለምን እንደ ሆነም ይገረማሉ። ምክንያቱ እጅግ ቀላል ነው፤ ይህን አያውቁም፦ የዳኑበት ብቸኛው ነገር ፍሬ ማፍራት ነው። ክርስቶስ እውነተኛው የወይን ግንድ የሆነው ለአንድ ዓላማ ብቻ እንደ ነበረ ሁሉ፣ አንተም ደግሞ ቅርንጫፍ የተደረግኸው ለሰዎች መዳን ፍሬ እንድታፈራ ለዚያው ለአንድ ዓላማ ብቻ ነው። የወይን ግንዱም ቅርንጫፉም፣ የመኖራቸው ብቸኛ ምክንያት ፍሬ ማፍራት ነው በሚለው በማይለወጠው ሕግ ሥር በእኩል ናቸው። ክርስቶስና አማኙ፣ ሰማያዊው የወይን ግንድና ቅርንጫፉ፣ በዓለም ውስጥ ስፍራቸውን ያገኙት በእኩል ለአንድ ዓላማ ብቻ ነው፤ ይኸውም የእግዚአብሔርን አዳኝ ፍቅር ለሰዎች ማድረስ ነው። ስለዚህም ነው ይህ ከባድ ቃል የተነገረው፦ «ፍሬ የማያፈራውን በእኔ ያለውን ቅርንጫፍ ሁሉ ያስወግደዋል።»

በተለይ ከአንድ ታላቅ ስሕተት እንጠንቀቅ። ብዙ ክርስቲያኖች የራሳቸው መዳን የመጀመሪያው ጉዳይ እንደ ሆነ ያስባሉ፤ ምድራዊ ኑሯቸውና ብልጽግናቸው ከቤተሰባቸው እንክብካቤ ጋር ሁለተኛው ነው፤ ከዚያ የተረፈው ጊዜና ትኩረት ደግሞ ለፍሬ ማፍራት፣ ሰዎችን ለማዳን ሊሰጥ ይችላል ብለው ያስባሉ። ስለዚህ በአብዛኛው እጅግ ጥቂት ጊዜና ትኩረት ብቻ መገኘቱ አያስደንቅም። አይደለም፣ ክርስቲያን ሆይ፤ የክርስቶስ አካል ብልት የተደረግኸበት ብቸኛው ዓላማ ራስ የሆነው እርሱ የማዳን ሥራውን በአንተ እንዲፈጽም ነው። እግዚአብሔር አንተን ቅርንጫፍ ያደረገበት ብቸኛው ዓላማ ክርስቶስ በአንተ በኩል ለሰዎች ሕይወትን እንዲያመጣ ነው። የግልህ መዳን፣ ሥራህና ለቤተሰብህ የምታደርገው እንክብካቤ ሙሉ በሙሉ ከዚህ በታች ናቸው። በሕይወትህ የመጀመሪያው ግብህ፣ በየዕለቱም የመጀመሪያው ግብህ፣ ክርስቶስ ዓላማውን በአንተ እንዴት ሊፈጽም እንደሚወድ ማወቅ ሊሆን ይገባዋል።

እግዚአብሔር እንደሚያስብ ማሰብ እንጀምር። የክርስቶስን ትምህርት እንቀበል፤ ምላሽም እንስጥበት። ቅርንጫፍ የመሆኔ ብቸኛው ዓላማ፣ እውነተኛ ቅርንጫፍ የመሆኔ ብቸኛው ምልክት፣ የመኖሬና የመበርታቴ ብቸኛው ቅድመ ሁኔታ፣ የሚሞቱ ሰዎች በልተው በሕይወት እንዲኖሩ የሰማያዊውን የወይን ግንድ ፍሬ ማፍራቴ ነው። ፍጹም በሆነ እርግጠኝነት ልይዘው የምችለው አንዱ ነገርም ይህ ነው፤ ክርስቶስ የወይን ግንዴ፣ አብም ገበሬዬ ሆነው ሳለ፣ በእርግጥ ፍሬያማ ቅርንጫፍ ልሆን እችላለሁ።

አባታችን ሆይ፣ አንተ ፍሬን ፈልገህ ትመጣለህ። ይህ የሕልውናችንና ከክርስቶስ ጋር ያለን የአንድነታችን ብቸኛ ዓላማ መሆኑን በእውነት እንድናስተውል፣ እንለምንሃለን፣ አስተምረን። በብዛት ፍሬ እስክናፈራ ድረስ በወይን ግንዱ መንፈስ የተሞላን ቅርንጫፎች መሆንን የልባችን ብቸኛ ምኞት አድርግልን።