የሚያሸንፍ ጸሎት

አብም በስሜ የምትለምኑትን ሁሉ እንዲሰጣችሁ፥ ልትሄዱና ፍሬ ልታፈሩ ፍሬአችሁም ሊኖር ሾምኋችሁ—ዮሐንስ 15:16

በምሳሌያችን የመጀመሪያው ቁጥር ክርስቶስ ራሱን እውነተኛ የወይን ግንድ፣ አብንም ገበሬ አድርጎ ገለጠ፤ ለራሱና ለአብም በልብ ውስጥ ስፍራን ጠየቀ። እዚህ በመጨረሻው ቁጥር ደግሞ ስለ ራሱና ስለ አብ ያስተማረውን ትምህርት ሁሉ በመረጣቸው ሁለት ዓላማ ያጠቃልለዋል። ከራሱ ከወይን ግንዱ አንጻር ዓላማው ፍሬ እንዲያፈሩ ነበር። ከአብ አንጻር ደግሞ በስሙ የሚለምኑት ሁሉ በሰማይ ባለው አብ እንዲደረግላቸው ነበር። ፍሬ ከክርስቶስ ጋር ያለን እውነተኛ ግንኙነት ታላቅ ማስረጃ እንደ ሆነ፣ ጸሎትም እንዲሁ ከአብ ጋር ያለን ግንኙነት ማስረጃ ነው። በወልድ ውስጥ ፍሬያማ ሆኖ መኖርና ወደ አብ የሚያሸንፍ ጸሎት በእውነተኛው ክርስቲያናዊ ሕይወት ውስጥ ሁለቱ ታላላቅ ምሰሶዎች ናቸው።

አብም በስሜ የምትለምኑትን ሁሉ እንዲሰጣችሁ።—እነዚህ የወይን ግንዱ ምሳሌ የመደምደሚያ ቃላት ናቸው። የወይን ግንዱና የቅርንጫፎቹ ምሥጢር ሁሉ ወደ ሌላው ምሥጢር ይመራል፤ ይኸውም በስሙ የምንለምነውን ሁሉ አብ እንደሚሰጠን ነው! የጸሎት ማጣታችንና በጸሎት የኃይል ማጣታችን ምክንያት እዚህ ላይ ተመልከት። እውነተኛውን የቅርንጫፍ ሕይወት እጅግ ጥቂት ስለምንኖር፣ ራሳችንን በወይን ግንዱ ውስጥ እጅግ ጥቂት ስለምናጣና በእርሱ ፈጽመን ስለማንኖር ነው ወደ ብዙ ጸሎት እጅግ ጥቂት የምንገፋፋው፣ እንደምንሰማም እጅግ ጥቂት የምንተማመነው፣ ስሙንም የእግዚአብሔር ግምጃ ቤት መክፈቻ አድርገን እንዴት እንደምንጠቀምበት የማናውቀው። በምድር ላይ የተተከለው የወይን ግንድ ወደ ሰማይ ደርሶአል፤ በብዙ ለማሸነፍ በኃይል ወደ ሰማይ ልትደርስ የምትችለው በእርሱ ፈጽማና አጥብቃ የምትኖር ነፍስ ብቻ ናት። በምሳሌው ትምህርትና እውነት፣ በወይን ግንዱ እውነትና ሕይወት ላይ ያለን እምነት በጸሎት ኃይል ራሱን ማስመስከር አለበት። የመኖርና የመታዘዝ፣ የፍቅርና የደስታ፣ የመጣራትና ፍሬ የማፍራት ሕይወት በእርግጥ ወደ የሚያሸንፍ ጸሎት ኃይል ይመራል።

የምትለምኑትን ሁሉ—ተስፋው የተሰጠው በእውነተኛው የወይን ግንድ አምሳል ለባልንጀሮቻቸው ራሳቸውን ለመስጠት ዝግጁ ለነበሩ ደቀ መዛሙርት ነበር። ይህ ተስፋ ለሥራቸው ያላቸው ስንቅ ሁሉ ነበር፤ ቃል በቃል ተቀበሉት፤ አመኑት፤ ተጠቀሙበት፤ እውነትም ሆኖ አገኙት። እኛም እንደ እውነተኛው የወይን ግንድ ቅርንጫፎች፣ በእርሱም አምሳል፣ ሰዎችን ለማዳንና ለእግዚአብሔር ክብር ፍሬ ለማፍራት ሥራ ራሳችንን እንስጥ፤ ለመጸለይና «የምትለምኑትን ሁሉ» የሚለውን ለመጠየቅ አዲስ ግፊትና ኃይል እናገኛለን። እንዲህ ባለ ተስፋ የንጉሡ ግምጃ ቤቶች መክፈቻዎች የተሰጡን መሆናችን ስላለብን አስደናቂ ኃላፊነት እንነቃለን፤ ለሚጠፉትም እንጀራንና በረከትን እስክንቀበል ድረስ አናርፍም።

«እኔ መረጥኋችሁ … አብም በስሜ የምትለምኑትን ሁሉ እንዲሰጣችሁ፥ ልትሄዱና ፍሬ ልታፈሩ ፍሬአችሁም ሊኖር ሾምኋችሁ።» የተወደድህ ደቀ መዝሙር ሆይ፥ ከሁሉ በላይ የጸሎት ሰው ለመሆን ፈልግ። እንደ ወይን ግንዱ ቅርንጫፍ ያለህ መብት ከሁሉ የላቀው መገለጫ ይህ ነው፤ በእግዚአብሔርና በልጁ መልክ መታደስህ ሙሉ ማስረጃ ይህ ነው፤ እንደ ክርስቶስ ለራስህ ሳይሆን ለሌሎች እንደምትኖር የምታሳይበት ኃይልህ ይህ ነው፤ ለሰዎች ስጦታን ለመቀበል ወደ ሰማይ የምትገባው እዚህ ነው፤ በክርስቶስ መኖርህ እርሱ በአንተ ውስጥ ወደ መኖሩ፣ አንተንም የጸጋው መተላለፊያና መሣሪያ አድርጎ ወደ መጠቀሙ ያደረሰው እዚህ ነው። ለሰዎች ፍሬ የማፍራት ኃይል በእግዚአብሔር ፊት በሚያሸንፍ ኃይል ዘውድ ተቀዳጅቶአል።

«እውነተኛ የወይን ግንድ እኔ ነኝ፤ ገበሬውም አባቴ ነው።» ክርስቶስ በአንተ ውስጥ የሚሠራው ሥራ ቃሉ በአንተ ላይ እንዲፈጸም ወደ አብ እንዲሁ ማቅረብ ነው፦ «በዚያን ቀን በስሜ ትለምናላችሁ፤ እኔም ስለ እናንተ አብን እንድለምን የምላችሁ አይደለሁም፤ … አብ እርሱ ራሱ ይወዳችኋልና።» ለሰዎች ብሎ በቀጥታ ወደ አብ የመቅረብ ኃይል፣ በእምነት ለእነርሱ በረከትን የሚጠይቅና የሚቀበል የምልጃ ነፃነት፣ ከክርስቶስ ጋር ያለን አንድነት ከሁሉ የላቀ መገለጫ ነው። በእውነትና በሙላት ቅርንጫፎች መሆን የሚሹ ሁሉ ራሳቸውን ለምልጃ ሥራ ይስጡ። ይህ የወይን ግንዱ ክርስቶስ በሰማይ ያለው ብቸኛ ታላቅ ሥራ፣ ለሥራው ሁሉ የኃይል ምንጭ ነው። አንተም እንደ ቅርንጫፍ ብቸኛ ታላቅ ሥራህ አድርገው፤ ለሥራህ ሁሉ ኃይል ይሆናል።

በስሜ። አዎን ጌታ ሆይ፥ በስምህ፤ እዚህ ለራስህ በሰጠኸው በአዲሱ ስም፣ በእውነተኛው የወይን ግንድ ስም። ፈጽሜ ራሴን በመስጠት፣ ሙሉ በሙሉ በመደገፍ፣ ፍጹም በመመሳሰል፣ በሚኖርም ፍሬያማነት በአንተ እየኖርሁ እንደ ቅርንጫፍ በአንተ ሆኜ ወደ አብ እመጣለሁ፤ እርሱም የምለምነውን ይሰጠኛል። ኦ ሕይወቴ የማያቋርጥና የሚያሸንፍ የምልጃ ሕይወት ይሁን! አሜን!