የክርስቶስ ወዳጅነት፦ መነሻው

ነፍሱን ስለ ወዳጆቹ ከመስጠት ይልቅ ከዚህ የሚበልጥ ፍቅር ለማንም የለውም—ዮሐንስ 15:13

በሚቀጥሉት ሦስት ቁጥሮች ጌታችን ከደቀ መዛሙርቱ ጋር ስላለው ግንኙነት በአዲስ ገጽታ—በወዳጅነት ገጽታ—ይናገራል። በእርሱ በኩል የወዳጅነቱ መነሻ ወደ ሆነው ፍቅር ይጠቁመናል (ቁ. 13)፤ በእኛ በኩል ወዳጅነቱ ወደሚጸናበት መታዘዝ (ቁ. 14)፤ ከዚያም ወደሚያደርሰው ቅዱስ ቅርበት (ቁ. 15)።

ከክርስቶስ ጋር ያለን ግንኙነት የፍቅር ግንኙነት ነው። ቀደም ሲል ስለዚህ ሲናገር፣ ፍቅሩ በሰማያዊ ክብሩ ምን እንደ ሆነ አሳየን፤ አብ እርሱን የወደደበት ያው ፍቅር ነው። እዚህ ደግሞ በምድራዊ መገለጡ እናየዋለን—ሕይወቱን ስለ እኛ መስጠቱ። «ነፍሱን ስለ ወዳጆቹ ከመስጠት ይልቅ ከዚህ የሚበልጥ ፍቅር ለማንም የለውም።» ክርስቶስ እንደ ወይን ግንድ ለእኛ የሆነውና የሚያደርገው ሁሉ የተሰወረ ሥሩና ኃይሉ ፍቅር መሆኑን እንድናውቅ በእርግጥ ይናፍቃል። ይህን ማመን ስንማር፣ ይህ ልናስብበትና ልናውቀው ብቻ የሚገባን ነገር ሳይሆን፣ በውስጣችን ልንቀበለው የሚያስፈልገን ሕያው ኃይል፣ መለኮታዊ ሕይወት መሆኑ ይሰማናል። ክርስቶስና ፍቅሩ የማይለያዩ ናቸው፤ አንድና ያው ናቸው። እግዚአብሔር ፍቅር ነው፤ ክርስቶስም ፍቅር ነው። እግዚአብሔርንና ክርስቶስን መለኮታዊውንም ፍቅር ማወቅ የሚቻለው እነርሱን በማግኘት፣ ሕይወታቸውና ኃይላቸው በውስጣችን ሲሠራ ብቻ ነው። «አንተን ያውቁ ዘንድ ይህች የዘላለም ሕይወት ናት»፤ ሕይወቱን ሳይኖረን እግዚአብሔርን ማወቅ አይቻልም፤ እውቀትን የሚሰጠው በእኛ ውስጥ የሚሠራው ሕይወት ብቻ ነው። ፍቅርም እንዲሁ ነው፤ ልናውቀው ከፈለግን ከሕያው ጅረቱ መጠጣት፣ በመንፈስ ቅዱስም በውስጣችን እንዲፈስስ ማድረግ አለብን።

«ነፍሱን ስለ ወዳጆቹ ከመስጠት ይልቅ ከዚህ የሚበልጥ ፍቅር ለማንም የለውም።» ሕይወት ሰው ካለው ነገር ሁሉ እጅግ የከበረ ነው፤ ሕይወት ሰው የሆነው ሁሉ ነው፤ ሕይወት ራሱ ሰውየው ነው። ይህ ከፍተኛው የፍቅር መለኪያ ነው፦ ሰው ሕይወቱን ሲሰጥ ምንም አያስቀርም፤ ያለውንና የሆነውን ሁሉ ይሰጣል። ጌታችን ኢየሱስ ስለ ወይኑ ግንድ ምሥጢሩ ግልጽ ሊያደርግልን የሚፈልገው ይህን ነው፦ ባለው ሁሉ ራሱን ለእኛ አሳልፎ ሰጥቷል። የራሳችን አድርገን እንድንቈጥረው ይፈልጋል፤ እኛ ሙሉ በሙሉ የእርሱ ገንዘብ እንድንሆን፣ እርሱ ሙሉ በሙሉ የእኛ ገንዘብ ሊሆን ይፈልጋል። ሕይወቱን በሞት ስለ እኛ የሰጠው ተፈጽሞ እንዳበቃ አላፊ ድርጊት ብቻ አይደለም፤ አይደለም፣ ለዘላለም ራሱን የእኛ ማድረጉ ነው እንጂ። ሕይወት ስለ ሕይወት፤ እኛ ሕይወታችንን ገንዘቡ ያደርገው ዘንድ ለእርሱ እንድንሰጥ፣ እርሱ ሕይወቱን ገንዘባችን እናደርገው ዘንድ ለእኛ ሰጠ። የወይኑ ግንድና የቅርንጫፉ ምሳሌ በአስደናቂ መዋሐዳቸውና በፍጹም አንድነታቸው የሚያስተምረው ይህን ነው።

ይህን በማሰብ ወይም በምናብ ሳይሆን በልብና በሕይወት ጥልቅ ውስጥ በጥቂቱም ቢሆን ስናውቀው ነው፣ እንደ ሰማያዊው የወይን ግንድ ቅርንጫፎች ሕይወታችን ምን መሆን እንዳለበት ማየት የምንጀምረው። እርሱ ራሱን ለሞት ሰጠ፤ እኛ በእርሱ ሕይወትን እናገኝ ዘንድ ራሱን አጣ። በእኛ ውስጥ ለመኖር ብቻ የሚኖረው እውነተኛው የወይን ግንድ ይህ ነው። ክርስቶስ የሚጋብዘን የዚያ ቅዱስ ወዳጅነት መጀመሪያውና ሥሩ ይህ ነው።

እግዚአብሔርን የመምሰል ምሥጢር ታላቅ ነው! አለማወቃችንንና አለማመናችንን እንናዘዝ። ምሥጢሩን ለመጨበጥ ከራሳችን ማስተዋልና ከራሳችን ጥረት እናርፍ። እርሱን ይገልጥልን ዘንድ በውስጣችን የሚያድረውን መንፈስ ቅዱስን እንጠብቅ። ነፍሱን ስለ እኛ የሰጠው ወሰን የሌለው ፍቅሩ እንዲወርሰን፣ ሙሉ በሙሉም የራሱ በማድረጉ ደስ እንዲሰኝ እርሱን እንታመን።

ሕይወቱን ስለ ወዳጆቹ። ሕይወቱን ራሱ ለቅርንጫፎቹ የሚሰጠው የወይኑ ግንድ ትምህርቶች እንዴት ድንቅ ናቸው! ኢየሱስም ሕይወቱን ስለ ወዳጆቹ ሰጠ። ያ ፍቅርም ራሱን ለእነርሱና በእነርሱ ውስጥ ይሰጣል። ሰማያዊው የወይን ግንዴ ሆይ፣ በእኔ ውስጥ ለመኖር ምን ያህል ሙሉ በሙሉ እንደምትናፍቅ፣ አቤቱ፣ አስተምረኝ!