እስኪመጣ ድረስ
ተራሮችን ተሻግሮ

ምዕራፍ 5 · 13 ደቂቃ ንባብ · 16 ደቂቃ ማዳመጥ

ተራሮችን ተሻግሮ

ተራሮችን ተሻግሮ።«ውዴ የእኔ ነው፥ እኔም የእርሱ ነኝ፤ በሱፍ አበቦች መካከል መንጋውን ያሰማራል። ቀኑ እስኪነጋ ጥላውም እስኪሸሽ ድረስ፥ ውዴ ሆይ፥ ተመለስ፤ በቤቴር ተራሮች ላይ ሚዳቋን ወይም የዋላን ግልገል ምሰል።»— መኃልየ መኃልይ 2፥16, 17።

ተራሮችን ተሻግሮ።

ሁልጊዜ በመልካም ሁኔታቸው ላይ የሚገኙ፥ የአባታቸውንም ፊት ብርሃን ፈጽሞ የማያጡ ደስተኛ ቅዱሳን ይኖሩ ይሆናል። እንደነዚህ ያሉ ሰዎች መኖራቸውን እርግጠኛ አይደለሁም፤ እኔ በቅርብ የማውቃቸው አማኞች ልዩ ልዩ ልምምድ ነበራቸውና፤ ሁልጊዜ ፍጹማን ነን ብለው የተመኩት ያወቅኋቸው ሰዎች ደግሞ ከሁሉ ይልቅ የሚታመኑ አልነበሩም። የነፍሳችንን ፀሐይ የሚጋርድ ደመና የሌለበት መንፈሳዊ ስፍራ ሊደረስበት እንደሚችል ተስፋ አደርጋለሁ፤ ነገር ግን ያን የተባረከ ምድር ስላልተጓዝሁበት በእርግጠኝነት መናገር አልችልም። የሕይወቴ እያንዳንዱ ዓመት በጋ ብቻ ሳይሆን ክረምትም ነበረው፤ እያንዳንዱም ቀን ሌሊት ነበረው። እስከ አሁን የጠራ ብሩህነትንና ከባድ ዝናብን አይቻለሁ፤ ሞቃት ነፋስንና ብርቱ ዐውሎንም ተሰምቶኛል። ስለ ብዙ ወንድሞቼ ስናገር እመሰክራለሁ፤ እንደ ኮምበልና እንደ ባሉጥ ዛፍ ግንዱ በውስጣችን ቢኖርም፥ ቅጠላችን ይረግፋል፤ በውስጣችንም ያለው ልምላሜ በሁሉ ወራት እኩል ኃይል አይፈስስም። ከፍታ እንዳለን ዝቅታም አለን፤ ኮረብቶች እንዳሉን ሸለቆዎችም አሉን። ሁልጊዜ ደስ አይለንም፤ አንዳንድ ጊዜ በልዩ ልዩ ፈተና እናዝናለን። ወዮ! ከተወደደው ጋር ያለን ኅብረት ሁልጊዜ የሚመስጥ ደስታ እንዳልሆነ ለመናዘዝ እናዝናለን፤ አንዳንድ ጊዜ እርሱን መፈለግና «ወዴት እንደማገኘው ባወቅሁ ኖሮ!» ብለን መጮኽ ይኖርብናል። ሙሽራይቱ «ቀኑ እስኪነጋ ጥላውም እስኪሸሽ ድረስ፥ ውዴ ሆይ፥ ተመለስ» ብላ በጮኸች ጊዜ በተወሰነ መጠን የነበረችበት ሁኔታ ይህ ይመስለኛል።

1ኛ. እነዚህ ቃላት በመጀመሪያ ኅብረት ሊቋረጥ እንደሚችል ያስተምሩናል። ሙሽራይቱ የሙሽራዋን አብሮነት አጥታ ነበር፤ ጌታዋን ብትወድደውና ብትናፍቀውም ከእርሱ ጋር የነበራት የሚታወቅ ኅብረት ጠፍቶ ነበር። በብቸኝነቷ አዘነች፤ ነገር ግን እርሱን መውደድ ፈጽሞ አላቋረጠችም፤ ውዴ ብላ ትጠራዋለችና፥ በዚያም ነገር ጥርጥር እንደሌለባት ሰው ትናገራለች። በብርሃን ስንመላለስ እንደሚሆነው ሁሉ በጨለማ ስንቀመጥም ለጌታ ኢየሱስ ያለን ፍቅር ያንኑ ያህል እውነተኛ፥ ምናልባትም ያንኑ ያህል ብርቱ ሊሆን ይችላል። ከዚህም በላይ፥ እርሱ እንደሚወድዳትና እርስ በርሳቸውም እንደሚተሳሰሩ የነበራትን እርግጠኝነት አላጣችም ነበር፤ «ውዴ የእኔ ነው፥ እኔም የእርሱ ነኝ» ትላለችና፤ ቢሆንም «ውዴ ሆይ፥ ተመለስ» ብላ ትጨምራለች። የጸጋዎቻችን ሁኔታ ሁልጊዜ ከደስታችን ሁኔታ ጋር አይገጥምም። በእምነትና በፍቅር ባለ ጠጎች ሆነን ሳለን ለራሳችን ያለን ግምት እጅግ ዝቅ ብሎ በብርቱ ልንተክዝ እንችላለን።

ሙሽራይቱ ልትወድድና ልትወደድ፥ በጌታዋ ልትተማመን፥ የእርሱም ባለቤት መሆኗን ፈጽማ ልታረጋግጥ እንደምትችል፥ ሆኖም ለጊዜው በእርሷና በእርሱ መካከል ተራሮች ሊኖሩ እንደሚችሉ ከዚህ ቅዱስ መዝሙር ግልጽ ነው። አዎን፥ በመለኮታዊ ሕይወት እጅግ ገፍተን ሳለን እንኳ ለጊዜው ከሚታወቅ ኅብረት ልንሰደድ እንችላለን። ለሕፃናት ብቻ ሳይሆን ለጎልማሶችም ሌሊት አለ፤ ፀሐይ መሰወሯን ሕሙማንና ደካሞች እንደሚያውቁ ብርቱዎችም ያውቃሉ። ስለዚህ ወንድሜ ሆይ፥ ደመና ስለ ሸፈነህ ራስህን አትኰንን፤ መተማመንህን አትጣል፤ ይልቁንም በጨለማው ውስጥ እምነት ይንበልበል፤ ፍቅርህም ከጌታህ የሚለዩህ መሰናክሎች ምንም ቢሆኑ እንደ ገና ወደ እርሱ ለመድረስ ይቍረጥ።

ኢየሱስ ከእውነተኛ የመንግሥተ ሰማያት ወራሽ በራቀ ጊዜ ኀዘን ይከተላል። ሁኔታችን ጤናማ በሆነ መጠን መራቁ ቶሎ ይታወቃል፤ ይበልጥም ያስለቅሳል። ይህ ኀዘን በጥቅሱ ውስጥ እንደ ጨለማ ተገልጿል፤ ይህም «ቀኑ እስኪነጋ» በሚለው አገላለጽ ውስጥ ተካትቷል። ክርስቶስ እስኪገለጥ ድረስ ለእኛ ቀን አልነጋም። በመንፈቀ ሌሊት ጨለማ እንኖራለን፤ ጌታችን እንደ ፀሐይ ወጥቶ ሌሊቱን እስኪያበቃ ድረስ የተስፋ ቃሎች ከዋክብትና የልምምድ ጨረቃ የመጽናናት ብርሃን አይሰጡም። ክርስቶስ ከእኛ ጋር ሊሆን ይገባል፤ ያለዚያ በጨለማ እንዋጣለን፤ እንደ ዕውሮች ግድግዳውን እንዳብሳለን፤ በድንጋጤም እንቅበዘበዛለን።

ሙሽራይቱ ስለ ጥላዎችም ትናገራለች፦ «ቀኑ እስኪነጋ ጥላውም እስኪሸሽ ድረስ።» ፀሐይ በሄደች ጊዜ ጥላዎች ይበዛሉ፤ እነዚህም ፈሪዎችን ያስጨንቃሉ። ኢየሱስ ከእኛ ጋር ሲሆን እውነተኛ ጠላቶችን አንፈራም፤ እርሱን ስናጣ ግን በጥላ እንኳ እንንቀጠቀጣለን። «በሞት ጥላ መካከል እንኳ ብሄድ አንተ ከእኔ ጋር ነህና ክፉን አልፈራም፤ በትርህና ምርኵዝህ እነርሱ ያጽናኑኛል!» የሚለው መዝሙር እንዴት ጣፋጭ ነው! ነገር ግን መንፈቀ ሌሊት ሲደርስ ኢየሱስም ከእኛ ጋር ሳይሆን ቃናችንን እንለውጣለን፤ ያን ጊዜ ሌሊቱን በሽብር እንሞላዋለን፤ ምትሐቶች፥ አጋንንት፥ ጭራቆችና በሐሳብ ብቻ እንጂ ከቶ ያልነበሩ ነገሮች በዙሪያችን ይርመሰመሳሉ፤ ፍርሃትም በሌለበት እንፈራለን።

የሙሽራይቱ ከሁሉ የከፋው ችግር ውዷ ጀርባውን ወደ እርሷ መመለሱ ነበር፤ ስለዚህም «ውዴ ሆይ፥ ተመለስ» ብላ ጮኸች። ፊቱ ወደ እርሷ ሲሆን በፍቅሩ ፀሐይ ትሞቃለች፤ የፊቱ ብርሃን ቢከለከል ግን እጅግ ትታወካለች። ጌታችን ልቡን ከሕዝቡ ፈጽሞ ባይመልስም ፊቱን ከሕዝቡ ይመልሳል። መርከቢቱ በዐውሎ ነፋስ ስትናወጥ ዓይኖቹን ጨፍኖ እንኳ ሊተኛ ይችላል፤ ልቡ ግን ሁልጊዜ ነቅቶ ነው። ቢሆንም በማናቸውም መጠን እርሱን ማሳዘን በቂ ሕመም ነው፤ ርኅሩኅ ልቡን እንዳቈሰልን ማሰብ እስከ አጥንታችን ይወጋናል። እርሱ ቀናተኛ ነው፥ ያለ ምክንያት ግን ፈጽሞ አይደለም። ለጊዜው ጀርባውን ቢሰጠን ያለ ጥርጥር ከበቂ በላይ ምክንያት አለው። እኛ በተቃራኒው ባንሄድበት ኖሮ እርሱም በተቃራኒያችን ባልሄደ ነበር። አቤት፥ ይህ እንዴት ያለ አሳዛኝ ነገር ነው! የጌታ መገኘት ይህን ሕይወት የሰማያዊው ሕይወት መግቢያ ያደርገዋል፤ መራቁ ግን እንድንመነምንና እንድንዝል ያደርገናል፤ በስደታችንም ምድር ምንም መጽናናት አይቀርም። መጻሕፍትና ሥርዓቶች፥ የግል ጸሎትና የሕዝብ አምልኮ ሁሉ እንደ ፀሐይ ሰዓቶች ናቸው፤—ፀሐይ ስትበራ እጅግ መልካሞች፥ በጨለማ ግን ጥቅማቸው ጥቂት ነው። ጌታ ኢየሱስ ሆይ፥ አንተን ማጣታችንን ምንም ሊካስልን አይችልም! ያለ አንተ ሌሊታችን ከቶ አያልቅምና እንደ ገና ወደ ተወዳጅህ ቅረብ።

«እነሆ! ንስሐ እገባለሁ፥ ነፍሴንም አስጨንቃለሁ፥

አንተን እንዲህ በመተዌ!

አዳኜን እንዲሄድ የፈቀዱ

እነዚያ ርኩስ ስሜቶች ወዴት ይነጕዳሉ?»

ከክርስቶስ ጋር ያለው ኅብረት በተቋረጠ ጊዜ በእውነተኛ ልቦች ሁሉ ውስጥ መልሶ ለማግኘት ብርቱ ናፍቆት አለ። ከክርስቶስ ጋር የኅብረትን ደስታ ያወቀ ሰው ቢያጣው እስኪመለስለት ድረስ ከቶ አይረካም። ልዑሉን አማኑኤልን አስተናግደኸው ታውቃለህን? ወደ ሌላ ስፍራ ሄዷልን? እስኪመለስ ድረስ እልፍኝህ ጭር ያለ ይሆናል። «ክርስቶስን ስጠኝ፥ ያለዚያ እሞታለሁ» የኢየሱስን ውድ አብሮነት ያጣ መንፈስ ሁሉ ጩኸት ነው። እንደነዚህ ያሉትን ሰማያዊ ደስታዎች ያለ ብዙ ጭንቀት አንለያቸውም። ለእኛ «ምናልባት ይመለስ ይሆናል፥ እንደሚመለስም ተስፋ እናደርጋለን» የሚባል ጉዳይ አይደለም፤ ሊሆን ግድ ነው፤ ያለዚያ እንዝላለን እንሞታለንም። ያለ እርሱ መኖር አንችልም፤ ይህም የሚያበረታታ ምልክት ነው፤ ያለ እርሱ መኖር የማትችል ነፍስ ያለ እርሱ አትኖርምና፤ ሕይወትና ሞት በመምጣቱ ላይ በተንጠለጠሉበት ስፍራ ቶሎ ይመጣል። ክርስቶስ ግድ ካስፈለገህ ታገኘዋለህ። ነገሩ እንዲህ ነው፤ ከዚህ ጕድጓድ መጠጣት አለብን፥ ያለዚያ በጥማት እንሞታለን፤ ኢየሱስን መመገብ አለብን፥ ያለዚያ መንፈሳችን በራብ ይጠፋል።

2ኛ. አሁን አንድ እርምጃ ወደ ፊት ገፍተን፥ ከክርስቶስ ጋር ያለው ኅብረት ሲቋረጥ እንደ ገና ለማደስ በመንገዱ ላይ ታላላቅ ችግሮች እንዳሉ እንናገራለን። ወደዚያው ከፍታ እንደ ገና ከመውጣት ይልቅ ቍልቍለት መውረድ እጅግ ይቀላል። የጠፋውን ዕንቍ ከማግኘት ይልቅ በእግዚአብሔር ያለውን ደስታ ማጣት እጅግ ይቀላል። ሙሽራይቱ ከውዷ የሚለዩአትን «ተራሮች» ትጠቅሳለች፤ ችግሮቹ ታላላቅ እንደ ነበሩ ማለቷ ነው። መንገዷን የዘጉት ትናንሽ ኮረብቶች ሳይሆኑ ተራሮች ነበሩ። የሚታወስ ኃጢአት ተራሮች፥ የኋላ መመለስ የአልፕስ ሰንሰለቶች፥ አስፈሪ የመርሳት፥ የምስጋና ቢስነት፥ የዓለማዊነት፥ በጸሎት የመቀዝቀዝ፥ የቅልልነት፥ የትዕቢትና የአለማመን ሰንሰለቶች። ወዮልኝ፥ የዚህን አሳዛኝ ልምምድ ጨለማ መልክዓ ምድር ሁሉ ላስተምራችሁ አልችልም! እንደ ሊባኖስ ረጃጅም ገደሎች ግዙፍ ቅጥሮች በፊቷ ተነሡ። ወደ ውዷ እንዴት ልትደርስ ትችላለች?

የሚለዩአት ችግሮች ታላላቅ ብቻ ሳይሆኑ ብዙዎችም ነበሩ። «ተራራ» አትልም፥ «ተራሮች» እንጂ፤ የአልፕስ ተራሮች በአልፕስ ላይ ተነሡ፥ ቅጥር በቅጥር ላይ። ቅድም «ግራው ከራሴ በታች ነው፥ ቀኙም ታቅፈኛለች» ብላ በዘመረችለት በእርሱና በእርሷ መካከል በዚህ ባጭር ጊዜ ይህን ያህል ነገር መግባቱን ስታስብ ተጨነቀች። ወዮ፥ እነዚህን የቤቴር ተራሮች በሚያሳዝን ፍጥነት እናበዛቸዋለን! ጌታችን ቀናተኛ ነው፤ እኛም ፊቱን እንዲሰውር እጅግ ብዙ ምክንያት እንሰጠዋለን። ስንሠራው እጅግ ትንሽ መስሎ የታየ በደል በራሱ ውጤቶች ብርሃን ይታያል፤ ከዚያም ወደ ላይ እስኪረዝምና የውዱን ፊት እስኪሰውር ድረስ ያድጋል ያብጣልም። ያን ጊዜ ፀሐያችን ጠልቃለች፤ ፍርሃትም «ብርሃኑ ይመለስ ይሆን? ይነጋ ይሆን? ጥላዎቹ ይሸሹ ይሆን?» ብሎ ያንሾካሹካል። ሰማያዊውን የፀሐይ ብርሃን አሳዝኖ ማባረር ቀላል ነው፤ ነገር ግን ወዮ፥ ሰማዩን አጥርቶ ደመና የሌለበትን ብሩህነት መልሶ ማግኘት እንዴት ከባድ ነው!

ምናልባት ለሙሽራይቱ ከሁሉ የከፋው ሐሳብ የሚለያቸው መሰናክል ዘላቂ ሊሆን ይችላል የሚል ፍርሃት ነበር። ከፍ ያለ ነበር፥ ግን ሊቀልጥ ይችላል፤ ቅጥሮቹ ብዙ ነበሩ፥ ግን ሊፈርሱ ይችላሉ፤ ነገር ግን ወዮ፥ ተራሮች ነበሩ፤ እነዚህም ለዘመናት ጸንተው ይቆማሉ! «ኃጢአቴ ሁልጊዜ በፊቴ ነው» ብሎ እንደ ጮኸው እንደ መዝሙረኛው ተሰማት። ከእርሱ ተስፋ በሌለው ሁኔታ እንደ ተዘጋብን ስንፈራ የጌታችን መራቅ ሕመም የማይታገሥ ይሆናል። ሰው ንጋትን ተስፋ እያደረገ ሌሊትን ሊታገሥ ይችላል፤ ነገር ግን ቀኑ ከቶ ባይነጋስ? እኔና እናንተም ከክርስቶስ ርቀን ብንቅበዘበዝና በእርሱና በእኛ መካከል የማይነቃነቁ የተራሮች ሰንሰለቶች እንዳሉ ቢሰማን፥ ልባችን ይታመማል። ለመጸለይ እንሞክራለን፥ ጸሎት ግን በከንፈራችን ላይ ይሞታል። በቍርባን ማዕድ ወደ ጌታ ለመቅረብ እንሞክራለን፥ ነገር ግን ከዮሐንስ ይልቅ ይሁዳን እንደምንመስል ይሰማናል። በእንደዚህ ያለ ጊዜ የሙሽራውን ፊት እንደ ገና ለማየትና በደስተኛው ዘመን እንደ ነበረው በእኛ ደስ እንደሚሰኝ ለማወቅ ዓይኖቻችንን እንኳ እንሰጥ ነበር። አሁንም አስፈሪዎቹ ተራሮች ጥቍሮች፥ አስጊዎችና የማይሻገሩ ሆነው ቆመዋል፤ በሩቁም ምድር የሕይወታችን ሕይወት ርቆ አዝኗል።

ስለዚህ ሙሽራይቱ በመንገዷ ያሉት ችግሮች በራሷ ኃይል ሊሻገሩ እንደማይችሉ የደመደመች ትመስላለች። ተራሮቹን ተሻግራ ወደ ውዷ ለመሄድ እንኳ አታስብም፤ ይልቁንም «ቀኑ እስኪነጋ ጥላውም እስኪሸሽ ድረስ፥ ውዴ ሆይ፥ ተመለስ፤ በቤቴር ተራሮች ላይ ሚዳቋን ወይም የዋላን ግልገል ምሰል» ብላ ትጮኻለች። ተራሮቹን ለመውጣት አትሞክርም፥ እንደማትችል ታውቃለችና፤ ዝቅ ያሉ ቢሆኑ ኖሮ ትሞክረው ይሆን ነበር፤ ጫፎቻቸው ግን ሰማይ ይደርሳሉ። ገደላቸው ያነሰ ወይም ቀላል ቢሆን ኖሮ ልትወጣቸው ትሞክር ነበር፤ እነዚህ ተራሮች ግን አስፈሪዎች ናቸው፤ በብቸኛ ቋጥኞቻቸውም ላይ ምንም እግር ሊቆም አይችልም። በራስ ፈጽሞ ተስፋ መቍረጥ እንዴት ያለ ምሕረት ነው! ነፍስ ወደዚያ ጠባብ ማዕዘን ተገፍታ ስለዚህም ወደ እግዚአብሔር ብቻ እንድትመለከት ስትገደድ ማየት እወዳለሁ። የፍጡር ፍጻሜ የፈጣሪ መጀመሪያ ነው። ኃጢአተኛው በሚያበቃበት አዳኙ ይጀምራል። ተራሮቹ የሚወጡ ቢሆኑ እኛው ልንወጣቸው ይገባን ነበር፤ ፈጽሞ የማይሻገሩ ከሆኑ ግን ነፍስ ከነቢዩ ጋር እንዲህ ብላ ትጮኻለች፦ «ሰማያትን ቀድደህ ምነው በወረድህ፥ ተራሮችም በፊትህ በቀለጡ! እሳት ጭራሮን እንደሚያቃጥል፥ እሳትም ውኃን እንደሚያፈላ፥ ስምህን ለጠላቶችህ ታስታውቅ ዘንድ፥ አሕዛብም በፊትህ ይንቀጠቀጡ ዘንድ። ያልጠበቅነውን የሚያስፈራ ነገር ባደረግህ ጊዜ ወረድህ፥ ተራሮችም በፊትህ ቀለጡ።» ነፍሳችን አንካሳ ናት፤ ወደ ክርስቶስ መንቀሳቀስ አትችልም፤ ብርቱ ናፍቆታችንን ወደ እርሱ እንመልሳለን፥ ተስፋችንንም በእርሱ ብቻ ላይ እናደርጋለን፤ ታዲያ በፍቅር አያስበንምን? ቀድሞ በኪሩብ ላይ ተቀምጦ በበረረ ጊዜ፥ አዎን፥ በነፋስ ክንፎች ላይ በበረረ ጊዜ ለባሪያው እንዳደረገው ወደ እኛስ አይበርምን?

3ኛ. እዚህ ላይ ሁኔታውን ፈጽሞ የሚያሟላው የጥቅሱ ጸሎት ይነሣል፦ «ውዴ ሆይ፥ ተመለስ፤ በመለያየት ተራሮች ላይ ሚዳቋን ወይም የዋላን ግልገል ምሰል።» ወደ እርሱ መሄድ በማንችልበት ጊዜ ኢየሱስ ወደ እኛ ሊመጣ ይችላል። ሚዳቋና የዋላ ግልገል፥ ወይም ልትተረጕሙት እንደምትችሉ፥ ሳላና የዱር ፍየል፥ በተራሮች ቋጥኞች መካከል ይኖራሉ፤ ገደሉንም በሚያስደንቅ ቅልጥፍና ይዘልላሉ። በፍጥነትና በእግር ጽናት ተወዳዳሪ የላቸውም። ቅዱሱ ባለ ቅኔ «እግሮቼን እንደ ዋላ እግሮች አደረገ፥ በከፍታዎቼም ላይ አቆመኝ» ብሎ በተራራ ጥግ ላይ በጽናት ለመቆም የተሠሩትን የእነዚህን እንስሳት እግሮች አመለከተ። የተባረከው ጌታችን በሃያ ሁለተኛው መዝሙር አርእስት «የማለዳ ዋላ» ተብሎ ተጠርቷል፤ ሙሽራይቱም በዚህ ወርቃማ መዝሙር «ውዴ ሚዳቋን ወይም የዋላን ግልገል ይመስላል፤ እነሆ፥ በተራሮች ላይ እየዘለለ በኮረብቶችም ላይ እየተወረወረ ይመጣል» ብላ ትዘምራለች።

ይህ ጸሎት በትክክል ልናቀርበው የምንችለው መሆኑን እዚህ ላይ ላሳስባችሁ እወዳለሁ፤ ወደ እርሱ መምጣታችን የማይታሰብ ሲሆን ወደ እኛ መምጣት የክርስቶስ መንገድ ነውና። «እንዴት?» ትላላችሁ። ቀድሞ ይህን አደረገ ብዬ እመልሳለሁ፤ «ከወደደን ከትልቅ ፍቅሩ የተነሣ በበደላችን ሙታን እንኳ በሆንን ጊዜ» ያደረገውን እናስታውሳለንና። በሰው መልክ ወደ ዓለም መጀመሪያ መምጣቱ፥ እግዚአብሔር ወደ ሰው እስኪመጣ ድረስ ሰው ወደ እግዚአብሔር ከቶ መምጣት ስለማይችል አልነበረምን? በፊተኞቹ ወላጆቻችን በኩል ስለ እንባ፥ ወይም ስለ ጸሎት፥ ወይም እግዚአብሔርን ስለ መለመን አልሰማሁም፤ ነገር ግን የተበደለው ጌታ በራሱ ፈቃድ የሴቲቱ ዘር የእባቡን ራስ እንደሚቀጠቅጥ የተስፋ ቃል ሰጠ። የጌታችን ወደ ዓለም መምጣት ያልተገዛ፥ ያልተፈለገ፥ ያልታሰበ ነበር፤ ለመቤዠት ደስ እያለው ፈጽሞ በገዛ ፈቃዱ መጣ።

«የጸጋ ልዑል በርኅራኄ ዓይኖች

ረዳት የሌለውን ኀዘናችንን አየ፤

አየ፥ (አቤት፥ የሚያስደንቅ ፍቅር!)

ሊረዳንም ሮጠ።»

በሥጋ መገለጡ በመንፈሱ ወደ እኛ የሚመጣበት መንገድ ምሳሌ ነበር። ተጥለን፥ ረክሰን፥ ተዋርደን፥ እየጠፋን አየን፤ በአጠገባችንም ሲያልፍ ርኅሩኅ ከንፈሮቹ «በሕይወት ኑር!» አሉ። «ላልፈለጉኝ ተገኘሁ» የሚለው ቃል በእኛ ተፈጸመ። እርሱ ወደ እኛ ባይመለስ ኖሮ ቅድስናን እጅግ ስለምንጠላና ለኃጢአት እጅግ ባሪያዎች ስለ ነበርን ከቶ ወደ እርሱ ባልተመለስን ነበር። ምን ይመስላችኋል? ጠላቶች ሳለን ወደ እኛ መጥቶ፥ ወዳጆች ከሆንን በኋላ አይጐበኘንምን? ሙታን ኃጢአተኞች ሳለን ወደ እኛ መጥቶ፥ አሁን የምናለቅስ ቅዱሳን ስንሆን አይሰማንምን? የክርስቶስ ወደ ምድር መምጣት እንዲህ ከሆነ፥ ወደ እያንዳንዳችንም መምጣቱ በዚህ ዓይነት ከሆነ፥ አሁንም እንደዚሁ ወደ እኛ እንደሚመጣ ተስፋ ልናደርግ እንችላለን፤ ሣርን እንደሚያረካ፥ ሰውንም እንደማይጠብቅ፥ የሰው ልጆችንም እንደማይቈይ ጠል። ደግሞም በኋለኛው ዘመን በአካል ዳግመኛ ይመጣል፤ የኃጢአት፥ የስሕተት፥ የጣዖት አምልኮ፥ የአጉል እምነትና የጭቈና ተራሮች በመንግሥቱ መንገድ ላይ ቆመዋል፤ እርሱ ግን በሁሉ ላይ እስኪነግሥ ድረስ በእርግጥ ይመጣል፥ ይገለብጣል፥ ደግሞም ይገለብጣል። በኋለኛው ዘመን ይመጣል እላለሁ፥ ይህን ለማድረግ ኮረብቶችን መዝለል ቢኖርበትም፤ ስለዚህም መራቁን በምሬት ወደምናለቅስ ወደ እኛ እንደሚቀርብ በደስታ መደምደም እንደምንችል እርግጠኛ ነኝ። እንግዲያውስ ራሳችንን ለጥቂት ጊዜ እናጐንብስ፤ በጸጥታም የጥቅሳችንን ልመና ለከበረው ግርማው እናቅርብ፦ «ውዴ ሆይ፥ ተመለስ፤ በመለያየት ተራሮች ላይ ሚዳቋን ወይም የዋላን ግልገል ምሰል።»

ጥቅሳችን ጌታችን ለእኛ ፈጽመው ሊሻገሩ በማይችሉ ችግሮች መካከል እንደ ቤቱ እንደሚመላለስ ጣፋጭ ማረጋገጫ ይሰጠናል። ሚዳቋ ወይም የዋላ ግልገል የተራሮችን መተላለፊያዎችና በሸካራ ዓለቶች መካከል ያሉትን መረገጫዎች እንደሚያውቅ፥ በሸለቆዎችና በገደሎች መካከልም ፍርሃት ሁሉ እንደሌለበት፥ እንዲሁ ጌታችን የኃጢአታችንንና የኀዘናችንን ከፍታና ጥልቀት፥ ጎርፍና ዋሻ ያውቃል። መተላለፋችንን ሁሉ ተሸከመ፤ ስለዚህም የበደላችንን አስፈሪ ሸክም አወቀ። የባሕርያችንን ድካም ጠንቅቆ ያውቃል፤ በምድረ በዳ ፈተናን፥ በአትክልቱ ውስጥ ልብ መሰበርን፥ በመስቀል ላይ መተውን አውቋል። ሕመምንና ድካምን ጠንቅቆ ያውቃል፥ «እርሱ ድካማችንን ተቀበለ ደዌያችንንም ተሸከመ» ተብሏልና። ተስፋ መቍረጥን ያውቃል፥ «የሕማም ሰው ደዌንም የሚያውቅ» ነበርና። ሞትን እንኳ ያውቃል፥ ነፍሱን ሰጥቷልና፥ በመቃብርም አልፎ ወደ ትንሣኤ ደርሷልና። እናንተ የተከፈታችሁ ጥልቆችና የተጨማደዳችሁ የወዮታ ገደሎች ሆይ፥ ውዳችን እንደ ዋላ ወይም እንደ ሚዳቋ ጨለማችሁን አቋርጧል! ጌታዬ ሆይ፥ ከአንተ የሚለየኝን ሁሉ ታውቃለህ፤ ወደ አንተ እደርስ ዘንድ እነዚህን የሚለዩ ተራሮች ለመውጣት እጅግ ደካማ እንደ ሆንሁ ደግሞ ታውቃለህ፤ ስለዚህ እለምንሃለሁ፥ የሚናፍቀውን መንፈሴን ለመገናኘት ተራሮቹን ተሻግረህ ና! የተከፈተውን ጥልቅና የሚያንሸራትተውን ገደል ሁሉ ታውቃለህ፥ ከእነዚህ አንዱም ሊያግድህ አይችልም፤ ወደ እኔ ወደ ባሪያህ፥ ወደ ተወዳጅህ ፍጠን፥ በመገኘትህም እንደ ገና ልኑር።

ደግሞም ክርስቶስ ሊረዳን ተራሮቹን ተሻግሮ መምጣት ቀላል ነው። ለሳላ ተራሮችን ማቋረጥ ቀላል ነው፥ ለዚያው ተፈጥሯልና፤ እንዲሁ ለኢየሱስ ቀላል ነው፥ ሰው በከፋው ሁኔታው ሳለ ወደ እርሱ እንዲመጣና የአብን ፍቅር ይዞ እንዲመጣ ለዚህ ዓላማ ከጥንት ተሾሟልና። ከክርስቶስ የሚለየን ምንድር ነው? የኃጢአት ስሜት ነውን? አንድ ጊዜ ይቅር ተብለሃል፤ ኢየሱስም የሙሉ ይቅርታን ስሜት እጅግ ሕያው አድርጎ ሊያድስ ይችላል። ነገር ግን «ወዮ! እንደ ገና ኃጢአት ሠርቻለሁ፤ አዲስ በደል ያስደነግጠኛል» ትላለህ። በቅጽበት ሊያስወግደው ይችላል፤ ለዚያ የተዘጋጀው ምንጭ ተከፍቷልና፥ አሁንም ሞልቷልና። የወንጀለኛውን ዓመፅ ይቅርታ አስቀድሞ ስላስገኘ፥ የሚቤዠው ፍቅር ውድ ከንፈሮች የልጁን በደል ማስወገድ ቀላል ነው። በልቡ ደም ከፈራጃችን ይቅርታችንን ካገኘልን የአባታችንን ይቅርታ ሊያመጣልን በቀላሉ ይችላል። አዎን፥ ክርስቶስ እንደ ገና «ኃጢአትህ ተሰረየችልህ» ማለት ቀላል ነው! «ነገር ግን እጅግ የማልበቃ፥ ኅብረትን ለመደሰት እጅግ የማልችል ሆኖ ይሰማኛል።» የሥጋን ደዌ ሁሉ የፈወሰ እርሱ መንፈሳዊ ድካምህን በአንድ ቃል ሊፈውስ ይችላል። ቍርጭምጭሚቱ ጸንቶ የሮጠውንና የዘለለውን ሰው፥ በንዳድም ታማ ወዲያው የተፈወሰችውን፥ ተነሥታም ጌታዋን ያገለገለችውን አስታውስ። «ጸጋዬ ይበቃሃል፥ ኃይሌ በድካም ይፈጸማልና።» «ነገር ግን እንደዚህ ያሉ መከራዎች፥ ችግሮችና ኀዘኖች ስላሉብኝ ተጭኜአለሁ፤ ወደ ደስተኛ ኅብረትም መነሣት አልችልም።» አዎን፥ ኢየሱስ ግን ሸክምን ሁሉ ቀላል፥ ቀንበርንም ሁሉ ልዝብ ሊያደርግ ይችላል። መከራዎችህ ወደ ሰማይ የምታደርገውን ጕዞ ከማሰናከል ይልቅ እንዲረዱ ሊደረጉ ይችላሉ። ስለ እነዚያ ከባድ ሸክሞች ሁሉ አውቃለሁ፤ ልታነሣቸው እንደማትችልም አስተውላለሁ፤ ነገር ግን ብልሃተኛ መሐንዲሶች ከባድ ክብደቶች ሌሎች ክብደቶችን እንዲያነሡ ገመዶችንና መዘውሮችን ማዘጋጀት ይችላሉ። ጌታ ኢየሱስ በጸጋ መሣሪያ ታላቅ ነው፤ የመከራ ክብደት የመንፈሳዊ ሙታንነትን ሸክም ከእኛ ላይ እንዲያነሣ የማድረግ ጥበብ አለው፤ ስለዚህም እንደ ወፍጮ ድንጋይ ሊያሰጥመን በዛተው ነገር ወደ ላይ እንወጣለን።

ሌላ ምን ያግዳል? ፈጽሞ የማይቻል ነገር ቢሆን እንኳ ጌታ ኢየሱስ ሊያስወግደው እንደሚችል እርግጠኛ ነኝ፤ በሰው ዘንድ የማይቻል በእግዚአብሔር ዘንድ ይቻላልና። ነገር ግን አንድ ሰው እንዲህ ብሎ ይቃወማል፦ «ለክርስቶስ እጅግ የማልገባ ነኝ። ታላላቅ ቅዱሳንና የተወደዱ ደቀ መዛሙርት እጅግ ቢሞላቀቁ ይገባኛል፤ እኔ ግን ትል ነኝ እንጂ ሰው አይደለሁም፤ ከእንደዚህ ያለ ዝቅ ብሎ መቅረብ ፈጽሞ በታች ነኝ።» እንዲህ ትላለህን? የክርስቶስ መገባት አለመገባትህን እንደሚሸፍን፥ እርሱም ከእግዚአብሔር ጥበብና ጽድቅ ቅድስናም ቤዛነትም እንደ ሆነልህ አታውቅምን? አብ በክርስቶስ አንተ ስለ ራስህ እንደምታስበው አድርጎ አያቃልልህም፤ ልጁ ልትባል አይገባህም፥ እርሱ ግን እንዲህ ብሎ ይጠራሃል፥ ከዕንቍዎቹም መካከል ይቈጥርሃል። አድምጥ፥ እንዲህ ሲል ትሰማዋለህ፦ «በዓይኔ ፊት ክቡር ስለ ሆንህ ከበርህ፥ እኔም ወደድሁህ፤ ግብጽን ለቤዛህ፥ ኢትዮጵያንና ሳባን በአንተ ፋንታ ሰጠሁ።» እንግዲህ ኢየሱስ ወደ አንተ ለመምጣትና የተሰበረውን ኅብረትህን እንደ ገና ለማቆም ቢወስን ሊዘልለው የማይችል ምንም ነገር አይቀርም።

ለመደምደም፥ ጌታችን ይህን ሁሉ ወዲያውኑ ሊያደርግ ይችላል። ሙታን በዓይን ጥቅሻ የማይበሰብሱ ሆነው እንደሚነሡ፥ እንዲሁ የሞቱት ፍቅሮቻችን በቅጽበት ወደ ሙሉ ደስታ ሊነሡ ይችላሉ። ይህን ተራራ «ተነቅለህ ወደ ባሕር ተወርወር» ሊለው ይችላል፤ ይሆንማል። አሁን በዚህ የራት ማዕድ ላይ ባሉት ቅዱሳት ምልክቶች ኢየሱስ በመካከላችን አለ። እምነት «መጥቷል!» ብላ ትጮኻለች። እንደ መጥምቁ ዮሐንስ አተኵራ ትመለከተዋለች፥ «እነሆ የእግዚአብሔር በግ» ብላም ትጮኻለች። በዚህ ማዕድ ኢየሱስ በሥጋውና በደሙ ይመግበናል። ሥጋዊ መገኘቱ ከእኛ ጋር የለም፤ እውነተኛውን መንፈሳዊ መገኘቱን ግን እናስተውላለን። ጌታ መሆኑን አውቀው ከደቀ መዛሙርቱ አንድ ስንኳ «አንተ ማን ነህ?» ብሎ ሊጠይቀው ባልደፈረ ጊዜ እንደ ነበሩት ደቀ መዛሙርት ነን። መጥቷል። በእነዚህ መስኮቶች ይመለከታል፤—ይህን እንጀራና ወይን ማለቴ ነው፤ በዚህ አስተማሪና አፍቃሪ ሥርዓት ዐይነ ርግቦች በኩል ራሱን ያሳያል። ይናገራል። «እነሆ፥ ክረምት አለፈ፥ ዝናቡም አልፎ ሄደ» ይላል። እንዲሁም ነው፤ እንዲህ እንደ ሆነ ይሰማናል፤ ሰማያዊ የጸደይ ወራት የቀዘቀዙ ልቦቻችንን ያሞቃል። እንደ ሙሽራይቱ በመደነቅ «ሳላውቅ ነፍሴ እንደ አሚናዳብ ሰረገሎች አደረገችኝ» ብለን እንጮኻለን። አሁን በደስተኛ ኅብረት ውዱን እናያለን፥ ድምፁንም እንሰማለን፤ ልባችን ይቃጠላል፤ ፍቅራችን ይፍለቀለቃል፤ ደስተኞች፥ ዕረፍት ያገኘን፥ በደስታ የተትረፈረፍን ነን። ንጉሡ ወደ ግብዣ ቤቱ አገባን፤ በእኛ ላይ ያለው ዓላማውም ፍቅር ነው። በዚህ መሆን መልካም ነው!

ወዳጆች ሆይ፥ አሁን ወደየመንገዳችን መሄድ አለብን። አንድ ድምፅ «ተነሡ፤ ከዚህ እንሂድ» ይላል። የልባችን ጌታ ሆይ፥ ከእኛ ጋር ሂድ! ያለ አንተ ቤት ቤት አይሆንም። ያለ አንተ ሕይወት ሕይወት አይሆንም። አንተ ብትርቅ መንግሥተ ሰማያት ራሷ መንግሥተ ሰማያት አትሆንም ነበር። ከእኛ ጋር እደር። ዓለም እየጨለመ ነው፥ የዘመን ምሽት እየቀረበ ነው። ከእኛ ጋር እደር፥ ማታ ቀርቦአልና። ዓመታችን ይጨምራል፤ ጠል ቀዝቅዞ የሚወርድበትን ሌሊት እንቀርባለን። ታላቅ የወደ ፊት ዘመን በዙሪያችን ነው፤ የመጨረሻው ዘመን ግርማ እየወረደ ነው፤ በተከበረና በሚያስፈራ ተስፋ ስንጠብቅም ልባችን በውስጧ ሳታቋርጥ እንዲህ ትጮኻለች፦ «ቀኑ እስኪነጋ ጥላውም እስኪሸሽ ድረስ፥ ውዴ ሆይ፥ ተመለስ፤ በመለያየት ተራሮች ላይ ሚዳቋን ወይም የዋላን ግልገል ምሰል።»

«ጌታ ሆይ! የተስፋውን ሰዓት አፋጥን፤

በክብርና በኃይል ና፤

ጠላቶችህ ገና አልተገዙም፤

ፍጥረት ሊታደስ ይቃትታል።

ዘመን ወደ ፍጻሜው ሊደርስ ቀርቧል፥

ሁሉ ከሙሽራህ ጋር ‹ና› ይላል፤

ዓለማት ሁሉ የሚሰግዱለት ኢየሱስ ሆይ፥

ና፥ ለዘላለምም ንገሥ!»

ቀዳሚ ቀጣይ