ምዕራፍ 3 · 10 ደቂቃ ንባብ · 13 ደቂቃ ማዳመጥ
በጥላው ሥር
በሜንቶን ከሃያ ያህል ወንድሞች ፊት የቀረበ አጭር የቍርባን መልእክት
«በልዑል መጠጊያ የሚኖር ሁሉን በሚችል አምላክ ጥላ ሥር ያድራል።»—መዝሙር 91፥1።
በጥላው ሥር።
ስለዚህ አጭር መልእክቴ፥ በውኃ ውስጥ ስለ ወደቀው መጥረቢያ ያ ሰው እንዳለው፥ የተዋስሁት መሆኑን መናዘዝ ይገባኛል። ዋናው አሳብ ከቶ በእኔ ላይ ከማታማርር ከአንዲት ሴት የተወሰደ ነው፤ ቤተ ክርስቲያንን ታላቅ ጕድለት ላይ ጥላ፥ እነዚህን የታችኛውን መዘምራን ትታ በላይ ለመዘመር ሄዳለችና። ከዘመናችን ባለ ቅኔዎች የመጨረሻዋና እጅግ የተዋበችው ሚስ ሃቨርጋል፥ ድምፅዋ እጅግ በለሰለሰበትና ቋንቋዋ እጅግ በከበረበት ጊዜ፥ የሰማይን ዜማ ለማብዛት ተነጥቃለች። የመጨረሻ ግጥሞችዋ «በጥላው ሥር» በሚል ርዕስ ታትመዋል፤ መቅድሙም የስሙን ምክንያት ይገልጣል። እርስዋ እንዲህ አለች፦ «ርዕሱ ‹በጥላው ሥር› እንዲሆን እወዳለሁ። ይህ ቃል አራት ሥዕሎችን የሚጠቁም ይመስለኛል፤ በሚያደክም ሜዳ ውስጥ በዓለት ጥላ ሥር፤ በዛፍ ጥላ ሥር፤ ከዚህም ይበልጥ ቀርቦ፥ በክንፉ ጥላ ሥር፤ እጅግ ቀርቦና ተጠግቶ ደግሞ፥ በእጁ ጥላ ውስጥ። በእርግጥ ያ እጅ የተወጋው እጅ መሆን አለበት፤ ብዙ ጊዜ አጥብቆ ሊጫነን ይችላል፤ ነገር ግን ዘወትር የሚከበን፥ የሚደግፈንና የሚጋርደን ነው።»
«በጥላው ሥር» የዚህ ከሰዓት በኋላ ርዕሳችን ነው፤ ሚስ ሃቨርጋል በውርስ የተወችልንን ይህን የመጽሐፍ ቅዱስ ንድፍ በጥቂት ቃላት እናስፋፋዋለን። ጥቅሳችን፦ «በልዑል መጠጊያ የሚኖር ሁሉን በሚችል አምላክ ጥላ ሥር ያድራል» የሚል ነው። የእግዚአብሔር ጥላ ለቅዱሱ አልፎ አልፎ የሚጠጋበት ስፍራ ሳይሆን ዘወትር የሚኖርበት ማደሪያ ነው። በዚህ መጽናናታችንን ብቻ ሳይሆን መኖሪያችንንም እናገኛለን። ከእግዚአብሔር ጥላ ፈጽሞ ልንወጣ አይገባንም። ጌታ ጥበቃውን የሚሰጠው ለሚኖሩበት እንጂ ለሚጐበኙ አይደለም። «በልዑል መጠጊያ የሚኖር ሁሉን በሚችል አምላክ ጥላ ሥር ያድራል»፤ ያም ጥላ ከሌሊት ድንጋጤና ከመናፍስት ክፋት፥ ከጦርነትና ከቸነፈር ፍላጻ፥ ከሞትና ከጥፋት ይጠብቀዋል። ሁሉን በሚችል አምላክ የሚጠበቁ የጌታ ምርጦች ሁልጊዜ በሰላም ናቸው፤ በጥንት ደም በተረጨበት በስርየት መክደኛው አጠገብ በቅዱሱ ስፍራ ይኖራሉና፥ ዘወትር በመቅደሱ ላይ የሚያንዣብበው የሌሊቱ የእሳት ዓምድና የቀኑ የደመና ዓምድ እነርሱንም ይሸፍናቸዋል። «በመከራዬ ቀን በድንኳኑ ይሰውረኛል፥ በድንኳኑም መሸሸጊያ ይሸሽገኛል» ተብሎ የተጻፈ አይደለምን? ከዚህ የተሻለ ምን ዋስትና እንሻለን? የእግዚአብሔር ሕዝብ እንደ መሆናችን ሁልጊዜ በልዑሉ ጥበቃ ሥር ነን። ወደየትም ብንሄድ፥ ምንም ብንቀበል፥ ችግራችን፥ ፈተናችን፥ መከራችን ወይም ጭንቀታችን ምንም ቢሆን፥ ሁልጊዜ «ሁሉን በሚችል አምላክ ጥላ ሥር» ነን። ከእግዚአብሔር ጋር ኅብረታቸውን በሚጠብቁ ሁሉ ላይ እጅግ ርኅሩኅ የሆነ የአሳዳጊ ጥንቃቄ ተዘርግቶአል። የሰማዩ አባታቸው ራሱ በእነርሱና በጠላቶቻቸው መካከል ይቆማል። ቅዱሳን ሁሉ በጥላው ሥር ቢሆኑም እንኳ፥ ያንን ጥበቃ ያጣጣሙበት መልክ በልምዳቸው ይለያያል፤ ስለዚህ አሁን ትኵረታችንን የሚይዙት አራቱ ምሳሌዎች ዋጋ አላቸው።
1ኛ. ሚስ ሃቨርጋል ከጠቀሰችው ከመጀመሪያው ሥዕል፥ ማለትም የደከመውን መንገደኛ ከሚጋርደው ዓለት እንጀምራለን፦ «በደረቅ ምድር እንዳለ እንደ ታላቅ ዓለት ጥላ» (ኢሳይያስ 32፥2)።
የጌታችንን ጥላ ማወቅ የምንጀምረው በዚህ ይመስለኛል። እርሱ በመጀመሪያ በመከራ ጊዜ መጠጊያ ሆነልን። መንገዱ አድካሚ፥ ሙቀቱም ታላቅ ነበረ፤ ከንፈሮቻችን ደርቀው፥ ነፍሳችንም ዝላ ነበር፤ መጠለያ ፈለግን፥ አላገኘንምም፤ በኃጢአትና በፍርድ ምድረ በዳ ውስጥ ነበርንና፥ ማዳንን ወይም ተስፋን እንኳ ማን ሊያመጣልን ይችል ነበር? ያን ጊዜ በመከራችን ወደ ጌታ ጮኽን፥ እርሱም ከጥንት ጀምሮ ስለ እኛ ወደ ተሰነጠቀው ወደ ዘመናት ዓለት መራን። ጣልቃ የሚገባው መካከለኛችን በእኛና በሚያቃጥለው የፍትሕ ሙቀት መካከል ሲመጣ አየን፥ ያንንም የተባረከ ጋሻ በደስታ ተቀበልነው። ጌታ ኢየሱስ ለኃጢአታችን መሸፈኛ፥ ስለዚህም ከቍጣ መሸሸጊያ ሆነልን። በሕሊናችን ላይ ይወርድ የነበረው የመለኮት ቍጣ ስሜት የተወገደው ኃጢአቱ ራሱ ሲወገድ ነው፤ ያም ኃጢአት በእኛ ስፍራና ፋንታ ቅጣቱን በታገሠው በኢየሱስ ላይ መጫኑን አየን።
የዓለት ጥላ እጅግ ያቀዘቅዛል፤ ጌታ ኢየሱስም እንዲሁ እጅግ አጽናናን። የዓለት ጥላ ከሌላ ጥላ ሁሉ ይልቅ ጥቅጥቅ ያለ፥ ፍጹምና ቀዝቃዛ ነው፤ እንዲሁም ኢየሱስ የሚሰጠው ሰላም አእምሮን ሁሉ ያልፋል፤ እንደ እርሱ ያለ የለም። በዓለቱ ጥላ ውስጥ አንዲት የተሳሳተች የፀሐይ ጨረር እንኳ አትሰርግም፤ በጫካ ቅጠሎች መካከል በመጠኑ እንደሚያልፍ ሙቀቱም አይዘልቅም። ኢየሱስ ፍጹም መጠለያ ነው፤ «በጥላው ሥር» ያሉም ብፁዓን ናቸው። በዚያ እንዲኖሩ ይጠንቀቁ፤ ለራሳቸው መልስ ለመስጠት ወይም የሰይጣንን ክስ ለመጋፈጥ ከቶ ወደ ውጭ አይውጡ።
ከኃጢአት ጋር እንዲሁ በማንኛውም ዓይነት ኀዘን ጌታ የመጠጊያችን ዓለት ነው። ከክርስቶስ ውጭ ከቶ አንሆንምና ፀሐይ ወይም ማንኛውም ሙቀት አይመታንም። ቅዱሳን ወዴት እንደሚሸሹ ያውቃሉ፥ መብታቸውንም ይጠቀሙበታል።
«መከራ እንደሚያቃጥል ፀሐይ
በራሳቸው ላይ ሲከብድ፥
ወደ ኃያሉ ዓለታቸው ወደ ክርስቶስ ይሮጣሉ፥
ደስ የሚያሰኝ ጥላም ያገኛሉ።»
ሆኖም በዚህ ታላቅ ጥላ ውስጥ የሚያስፈራ ነገር አለ። ዓለት ብዙ ጊዜ እጅግ ከፍ ብሎ የሚያስደነግጥ ነው፤ በታላቅነቱም ፊት እንንቀጠቀጣለን። ታናሽነት ከግዙፍ ታላቅነት በስተኋላ መሸሸጉ በሚገባ ተገልጦአል፤ ነገር ግን የኅብረት ወይም የየዋህነት ርኅሩኅ አሳብ በዚህ የለም፤ እንዲሁም በመጀመሪያ ጌታ ኢየሱስን የምናየው ከሚገባን ቅጣት ከሚበላው ሙቀት እንደሚጋርደን መጠለያ ብቻ ነው፤ ከዚያ ብዙም አናውቅም። ይህ የአራት እጥፉ ሥዕል አንድ ክፍል ብቻ መሆኑን ማስታወስ እጅግ ደስ ያሰኛል። የተባረከው ጌታዬ ጥልቅና ቀዝቃዛ የዓለት ጥላ፥ የዳንሁ ኃጢአተኛ ሆኜ በእርሱ ስቆም፥ ለነፍሴ በቃል ሊገለጥ በማይቻል መጠን የተወደደ ነው፤ ቢሆንም ከዚህ የበለጠ አለ።
2ኛ. ሁለተኛው ሥዕላችን፥ የዛፉ ምሳሌ፥ በመኃልየ መኃልይ ዘሰሎሞን 2፥3 ይገኛል፦ «በዱር ዛፎች መካከል እንዳለ ትርንጎ፥ እንዲሁ ውዴ በወጣቶች መካከል ነው። በጥላው ሥር በታላቅ ደስታ ተቀመጥሁ፥ ፍሬውም ለጕሮሮዬ ጣፋጭ ነበረ።» በዚህ ያለን ከመከራ የሚሆን መጠጊያ ሳይሆን በደስታ ጊዜ የሚገኝ ልዩ ዕረፍት ነው። ሙሽራዪቱ በደስታ በዱር ውስጥ ትመላለሳለች፤ ብዙ ዛፎችን ትመለከታለች፥ በወፎችም ዝማሬ ደስ ይላታል። አንድ ዛፍ በተለየ ሁኔታ ይማርካታል፤ ወርቃማ ፍሬ ያለው ትርንጎ አድናቆትዋን ይወስዳል፥ በጥላውም ሥር በታላቅ ደስታ ትቀመጣለች፤ ውዴዋ ለእርስዋ እንደዚህ ነበረ፤ ከመልካሞች መካከል የሚበልጥ፥ ከውቦች መካከል እጅግ ውብ፥ የደስታዋ ደስታ፥ የሐሤትዋ ብርሃን። ኢየሱስም ለምታምን ነፍስ እንዲሁ ነው።
የክርስቶስ ጣፋጭ ተጽዕኖዎች ደስተኛ ዕረፍት እንዲሰጡን የታሰቡ ናቸው፤ እኛም ልንጠቀምባቸው ይገባናል፤ «በጥላው ሥር ተቀመጥሁ።» ይህ ማርታ በመባከንዋ ልታጣው የቀረባት የማርያም መልካም ዕድል ነበረ። ይህ ልንሄድበት የሚገባን መልካሚቱ የቀድሞ መንገድ፥ ለነፍሳችን ዕረፍት የምናገኝበት መንገድ ነው። ሃይማኖታቸው ሁሉ ሥርዓት ብቻ፥ ወይም ሥራ ብቻ፥ ወይም መቃተት ብቻ፥ ወይም ስሜት ብቻ የሆነ የጳጳሱ ተከታዮችና እነርሱን የሚመስሉ ሰዎች ከቶ ወደ ፍጻሜ አልደረሱም። ስለ ሃይማኖታቸው ስለ ሕጉ እንደሚባል፥ አንዳች ፍጹም አላደረገም ልንል እንችላለን፤ በወንጌል ግን የተፈጸመ ነገር አለ፥ ያም ነገር የመዳናችን ድምርና ፍሬ ነገር ነው፤ ስለዚህ ዕረፍት አለልን፥ «ተቀመጥሁ» ብለንም ልንዘምር ይገባናል።
ውድ ወዳጆች ሆይ፥ ክርስቶስ ለእያንዳንዳችን የመቀመጫ ስፍራ ነውን? የስንፍናንና ራስን የመርካትን ዕረፍት ማለቴ አይደለም፤ እግዚአብሔር ከዚያ ያድነን፤ ነገር ግን ክርስቶስን አውቆ በመጨበጥ የሚገኝ ዕረፍት፥ እርሱን ሁሉ በሁላችን አድርጎ በመርካት የሚገኝ ዕረፍት አለ። እግዚአብሔር ይህን አብልጠን እንድናውቅ ይስጠን! ይህ ጥላ ደግሞ የማያቋርጥ መጽናናትን እንዲሰጥ የታሰበ ነው፤ ሙሽራዪቱ ወደ ጥላው ሥር መጥታ ብቻ አልቀረችም፥ ለመቆየት እንዳሰበች ሰው በዚያ ተቀመጠች እንጂ። የዕረፍትና የደስታ መቀጠል በጌታችን በተፈጸመው ሥራ ተገዝቶልናል። በጥላው ሥር ምግብ አገኘች፤ አንዲትን የሚያስፈልግ ነገር ለማግኘት ከዚያ መውጣት አላስፈለጋትም፤ የጋረዳት ዛፍ ፍሬም ሰጥቶአልና፤ ከዕረፍትዋ መነሣት እንኳ አላስፈለጋትም፥ ተቀምጣ ሳለች ጣፋጩን ፍሬ በላች እንጂ። ጌታ ኢየሱስን የምታውቁ እናንተ ይህ ምን ማለት እንደ ሆነ ደግሞ ታውቃላችሁ።
ሙሽራዪቱ ከጌታዋ አልፋ ለመሄድ ከቶ አልተመኘችም። በተወደደው ጥላ ሥር ከመቀመጥ የሚበልጥ ከፍ ያለ ሕይወት አላወቀችም። ዝግባውንና ባሉጡን ሌላውንም መልካም ዛፍ ሁሉ አለፈች፥ ትርንጎው ግን ያዛት፥ በዚያም ተቀመጠች። «መልካምን ማን ያሳየናል? የሚሉ ብዙዎች ናቸው። እኛ ግን፥ አቤቱ፥ ልባችን ጸና፥ ልባችን ጸና፥ በአንተም ዐረፈ። ከዚህ ወዲያ አንሄድም፥ አንተ ማደሪያችን ነህና፤ ከአንተ ጋር ቤታችን እንዳለን ይሰማናል፥ በጥላህም ሥር እንቀመጣለን።» አንዳንድ ክርስቲያኖች የሕፃንነትን ፍቅር እያጐደሉ አክብሮትን ያሳድጋሉ፤ ይንበረከካሉ፥ ለመቀመጥ ግን አይደፍሩም። መለኮታዊው ወዳጃችንና አፍቃሪያችን እንዲህ እንዲሆን አይፈቅድም፤ ከእርሱ ጋር በሥርዓት ተጨንቀን እንድንቆም አይወድም፥ በድፍረት ወደ እርሱ እንድንመጣ እንጂ።
«እንግዲያስ ከእርሱ ጋር ቅኖች እንሁን፥
ወደ ኋላ የማንል፥ ደረቆችና ቀዝቃዞች ሳንሆን፥
ቤተ ልሔማችን በጥንት
ሲና እንደ ነበረው የሚሆን ይመስል።»
ቅዱሱን ስሙን እንደ ዘወትር ቃል፥ እንደ ቤት ውስጥ ቃል እንጠቀምበት፤ ወደ እርሱም ወደ ውድና ቅርብ ወዳጅ እንደምንሮጥ እንሩጥ። በጥላው ሥር ቤታችን እንዳለን ሊሰማን ይገባል፤ ያን ጊዜ እርሱ ለነፍሳችን ምግብ በመሆንና በምናርፍበት ጊዜ መንፈሳዊ እረፍትን በመስጠት ከእኛ ጋር ቤቱ እንዳለ ያደርጋል። ሙሽራዪቱ በዚህ ፍሬውን ለመልቀም ወደ ዛፉ ተዘረጋሁ አትልም፤ በታላቅ ደስታ መሬት ላይ ተቀመጠች፥ ፍሬውም ወደ ተቀመጠችበት መጣላት። በጥላው ሥር ወደሚቀመጡ ነፍሳት ክርስቶስ እንዴት እንደሚወርድ ድንቅ ነው፤ ከክርስቶስ ጋር ቤታችን እንዳለን መሆን ብቻ ብንችል፥ በጣፋጭነት ከእኛ ጋር ይነጋገራል። «በእግዚአብሔር ደስ ይበልህ፥ የልብህንም መሻት ይሰጥሃል» ብሎ አልተናገረምን?
በዚህ በሁለተኛው የቅዱሱ ጥላ መልክ፥ የፍርሃት ስሜት በክርስቶስ ለሚገኝ የዕረፍት ደስታ ስፍራውን ይለቃል። ፍሬያማው ዛፍ በሚሰጠው ደስ የሚያሰኝ ጥላ ሥር እንደሚቀመጥ ሰው በእንደዚህ ያለ ትዕይንት ውስጥ ኖራችሁ ታውቃላችሁን? ዋስትናን ብቻ ሳይሆን በክርስቶስ ደስታንም አጣጥማችኋልን? እንዲህ ብላችሁ ዘምራችኋልን?—
«በጥላው ሥር ተቀመጥሁ፥
በታላቅ ደስታ ተቀመጥሁ፤
ፍሬውም ለጕሮሮዬ ጣፋጭ ነበረ፥
ለዓይኔም ደስ የሚያሰኝ»?
ይህ ልምድ ደስ የሚያሰኝ እንደ ሆነ ሁሉ አስፈላጊም ነው፤ ለብዙ ጥቅም አስፈላጊ ነው። የጌታ ደስታ ኃይላችን ነው፤ በጸሎት ኃይል እንዳለን ማረጋገጫ የምናገኘውም በጌታ ደስ ስንሰኝ ነው። በዚህ እምነት ያድጋል፥ ተስፋም ይደምቃል፥ ፍቅርም የጣፋጭ ሽቱዎችዋን መዓዛ ሁሉ ታፈስሳለች። ኦ! ወደ ትርንጎው ሂዱ፥ ከውቦች መካከል እጅግ ውብ የሆነውም ማን እንደ ሆነ እወቁ። የሰማይን ብርሃን የልባችሁ ደስታ አድርጉ፥ ከዚያም በልብ ሰላም ተሞሉ፥ በፍጹም እርካታም ሐሤት አድርጉ።
3ኛ. የዚሁ የአንዱ ርዕስ ሦስተኛው ገጽታ፥ የክንፎቹ ጥላ ነው፤ ይህ የከበረ ቃል ነው። ብዙ ጊዜ ይገኛልና፥ ከሁሉ የሚሻለው ምሳሌ በዚያ በተባረከው በስድሳ ሦስተኛው መዝሙር በቍጥር ሰባት ያለው ይመስለኛል፦—
«ረዳቴ ሆነኸኛልና በክንፎችህ ጥላ ደስ ይለኛል።»
ይህ ጌታችንን በድካም ሰዓት መታመኛችን አድርጎ አያሳየውምን? አሁን በፊታችን በተከፈተው መዝሙር፥ ዳዊት ከጸጋ መንገዶች ተለይቶ ውኃ ወደሌለበት ወደ ደረቅና ወደ ተጠማ ምድር ተሰድዶ ነበር። ከዚህም የከፋው፥ በተወሰነ መጠን እግዚአብሔርን አውቆ ከመደሰት ሁሉ ርቆ ነበር። እርሱ፦ «ገና ማልጄ እፈልግሃለሁ፤ ነፍሴ አንተን ተጠማች» ይላል። ከእግዚአብሔር ጋር ስላለው የአሁኑ ኅብረት ይልቅ ስለ ትዝታዎች ይዘምራል። እኛም ወደዚህ ሁኔታ ደርሰናል፥ አንዳች የአሁን መጽናናት ማግኘትም አቅቶናል። «ረዳቴ ሆነኸኛል» ልንደርስበት የቻልነው ከፍተኛው ዜማ ነበረ፤ እዚያ በመድረሳችንም ደስ ብሎናል። በእንደዚህ ያለ ጊዜ የእግዚአብሔር ፊት ብርሃን ተሰውሮ ነበር፤ እምነታችን ግን በክንፎቹ ጥላ ሥር ደስ እንዲለን አስተማረን። ብርሃን አልነበረም፤ ፈጽሞ በጥላ ውስጥ ነበርን፥ ነገር ግን ሞቃት ጥላ ነበረ። ቀርቦ የነበረው እግዚአብሔር አሁንም ወደ እኛ ቅርብ መሆን እንዳለበት ተሰማን፥ ስለዚህም ጸጥ አልን። አምላካችን ሊለወጥ አይችልም፤ ስለዚህ ረዳታችን እንደ ነበረ አሁንም ረዳታችን መሆን አለበት፤ በላያችን ጥላ ቢጥል እንኳ ረዳታችን ነው፤ ያ ጥላ የገዛ ዘላለማዊ ክንፎቹ ጥላ መሆን አለበትና። ምሳሌው ከእናታቸው ክንፎች ጥላ ሥር ከሚሸሸጉ ታናናሽ ወፎች የተወሰደ መሆኑ ግልጥ ነው፤ ሥዕሉም እጅግ ልብን የሚነካና የሚያጽናና ነው። ታናሺቱ ወፍ ራስዋን መጠበቅ ገና አትችልም፤ ስለዚህ በእናትዋ ሥር ትኰራመታለች፥ በዚያም ደስተኛና ደኅና ናት። ዶሮን ለአንድ አፍታ አስደንግጣት፥ ጫጩቶቹ ሁሉ በአንድነት ሲጠጋጉ፥ በጫጫታቸውም አንድ ዓይነት ዝማሬ ሲያሰሙ ታያለህ። ከዚያም ራሳቸውን በላባዋ ውስጥ ይቀብራሉ፥ በሞቀው መኖሪያቸውም ከመጠን በላይ ደስተኞች ይመስላሉ። እጅግ ስንታመምና እጅግ ስንተክዝ፥ በሚከሱ ልጆች ጭንቀትና በተቸገረ ቤተ ሰብ ችግር በሰይጣንም ፈተና ስንጨነቅ፥ ጫጩቶች ወደ ዶሮይቱ እንደሚሮጡ ወደ አምላካችን መሮጥ፥ በልቡ አጠገብ ከክንፎቹ በታች መሸሸግ እንዴት ያጽናናል! እናንተ የተፈተናችሁ ሆይ፥ ወደ ጌታችሁ አፍቃሪ ልብ ተጠጉ፥ ፈጽማችሁ ከክንፎቹ በታች ተሸሸጉ! በዚህ ፍርሃት ጠፍቶአል፤ ዕረፍትም ራሱ በፍቅራዊ መታመን አሳብ ይበልጥ ከፍ ብሎአል። ታናናሾቹ ወፎች በእናታቸው ፍቅር ደኅና ናቸው፤ እኛም ደግሞ በጌታ ፍቅራዊ ሞገስ ከመጠን በላይ ደኅንነትና ደስታ አለን።
4ኛ. የጥላው የመጨረሻ መልክ የእጅ ጥላ ነው፤ ይህም፥ እንደሚመስለኝ፥ በአገልግሎት ውስጥ ያለውን ኃይልና ስፍራ ያመለክታል። ኢሳይያስ 49፥2ን ተመልከቱ፦— «አፌንም እንደ ተሳለ ሰይፍ አደረገ፤ በእጁ ጥላ ሰወረኝ፥ የተሳለ ፍላጻም አደረገኝ፤ በሰገባውም ውስጥ ሸሸገኝ።» ይህ ስለ መድኃኒቱ እንደሚናገር አያጠራጥርም፤ ክፍሉ እንዲህ ይቀጥላልና፦— «እርሱም፦ እስራኤል ሆይ፥ አንተ ባሪያዬ ነህ፥ በአንተም እከብራለሁ አለኝ። እኔ ግን፦ በከንቱ ደከምሁ፥ ኃይሌንም ለከንቱና ለምናምን ጨረስሁ፤ ነገር ግን ፍርዴ በእግዚአብሔር ዘንድ፥ ሥራዬም በአምላኬ ዘንድ ነው አልሁ። አሁንም ያዕቆብን ወደ እርሱ እመልስ ዘንድ፥ ባሪያው እሆን ዘንድ ከማኅፀን የሠራኝ እግዚአብሔር እንዲህ ይላል፤ እስራኤል ባይሰበሰብም እንኳ በእግዚአብሔር ዓይን የከበርሁ እሆናለሁ፥ አምላኬም ኃይሌ ይሆናል። እርሱም፦ የያዕቆብን ነገዶች ታስነሣ ዘንድ የተጠበቁትንም የእስራኤልን ሰዎች ትመልስ ዘንድ ባሪያዬ መሆንህ ቀላል ነገር ነው፤ ማዳኔ እስከ ምድር ዳርቻ ድረስ ይሆን ዘንድ ለአሕዛብ ብርሃን አድርጌ እሰጥሃለሁ አለ።» ጌታችን ኢየሱስ ክርስቶስ ለጠላቶቹ መገልበጥና ለሕዝቡ ድል እንደ ተሳለ ፍላጻ ይጠቀምበት ዘንድ በይሖዋ እጅ ተሰውሮ ነበር። ሆኖም ይህ ስለ ክርስቶስ እንደ ሆነ መጠን፥ ስለ ክርስቶስ አገልጋዮች ሁሉ ደግሞ ነው፤ እርሱ እንዳለ እኛ ደግሞ እንዲሁ በዚህ ዓለም ነንና፤ ይህንንም ፈጽሞ እርግጥ ለማድረግ፥ በአምሳ አንደኛው ምዕራፍ በአሥራ ስድስተኛው ቍጥር ያንኑ አገላለጥ እናገኛለን፤ በዚያም ስለ ሕዝቡ ሲናገር፦ «በእጄ ጥላ ሸፈንሁህ» ይላል። ይህ ለአገልጋይ እጅግ መልካም ጥቅስ አይደለምን? ለኢየሱስ አንዲት ቃል የሚናገር እያንዳንዳችሁ ከዚህ ድርሻ ይኖራችኋል። ለክርስቶስ የሚሠሩ ሰዎች ሊሆኑበት የሚናፍቁት ስፍራ ይህ ነው፤ የዘላለም አሳቡን ለመፈጸም «በእጁ ጥላ» ውስጥ መሆን። ከጌታቸው ተለይተው የእግዚአብሔር አገልጋዮች ምንድር ናቸው? ከጦረኛው እጅ የወጡ፥ አንዳች ለማድረግ ኃይል የሌላቸው መሣሪያዎች አይደሉምን? ጌታ በጠላቶቹ ላይ እንደሚወረውራቸው ፍላጻዎች ልንሆን ይገባናል፤ የኃይሉ እጅ እጅግ ታላቅ፥ እኛም እንደ መሣሪያዎቹ እጅግ ታናናሾች ከመሆናችን የተነሣ፥ እስኪወረውረን ድረስ ሳንታይ በእጁ መዳፍ ውስጥ ይሰውረናል። እንደ ሠራተኞች በእግዚአብሔር እጅ ተሰውረን ልንኖር ይገባናል፤ ወይም ሌላውን ምሳሌ ለመጥቀስ፥ «በሰገባውም ውስጥ ሸሸገኝ»፤ እስኪጠቀምብን ድረስ ሳንታይ ልንኖር ይገባናል። ጌታ የሚጠቀምብን ከሆነ በመጠኑ አለመታወቅ አይቻለንም፤ ነገር ግን እንድንታይ ልንሻ አይገባንም፤ ይልቁንም እንደ ዋነኞቹ ሐዋርያት እንኳ ብንጠቀም፥ በእውነት «እኔ ምንም ባልሆን እንኳ» ብለን መጨመር አለብን። ምኞታችን ክርስቶስ እንዲከብርና ራሳችን እንድንሰወር መሆን ይገባዋል። ወዮ! በምናደርገው ሁሉ ራስን ዘወትር የማሳየት መንገድ አለ፤ ሁላችንም ወደዚያ ለመውደቅ እጅግ የተዘጋጀን ነን። ድሆችን በዚህ መንገድ ልትጐበኙ ትችላላችሁ፤ ጌታው ወይም እመቤቲቱ ራሳቸውን ዝቅ አድርገው ምስኪኗን ቤትሲን እንደ ጐበኙ እንዲሰማቸው፤ ነገር ግን ያንኑ ነገር የማድረግ ሌላ መንገድ አለ፤ የተፈተነችው የእግዚአብሔር ልጅ የተወደደ ወንድም ወይም በክርስቶስ ውድ እኅት እንደ ራስዋ እንደ ተሰማቸውና ከልብዋ ጋር እንደ ተነጋገሩ እንድታውቅ። አንድ ታላቅ መምህር ሰፊ ዕውቀቱንና ችሎታውን በግልጥ ያሳየበት የስብከት መንገድ አለ፤ የኢየሱስ ክርስቶስ ታማኝ አገልጋይ በጌታው ተደግፎ በጌታው ስም የተናገረበትና የበለጸገ ቅብዓትን ትቶ የሄደበትም ሌላ የስብከት መንገድ አለ። በእግዚአብሔር እጅ ውስጥ የተቀባይነትና የደኅንነት ስፍራ አለ፤ ለአገልግሎትም የመሰወር ብቻ ሳይሆን የኃይል ስፍራ ነው። እግዚአብሔር የሚሠራው በእጁ ካሉት ጋር ብቻ ነው፤ በዚያም አብልጠን በተሰወርን መጠን፥ ብዙም ሳይቆይ ይበልጥ በእርግጥ ይጠቀምብናል። ጌታ፦ «ቃሌን በአፍህ አኖርሁ፥ በእጄም ጥላ ሸፈንሁህ» እንዳለው ቃሉ ያድርግልን። እንዲህ ቢሆን የቀደሙት ስሜቶች ሁሉ በአንድነት ይሰሙናል፤ ጌታ ራሱን ዝቅ አድርጎ በእጁ ስለ ያዘን ፍርሃት፥ ሊጠቀምብን ስለ ፈቀደ ዕረፍትና ደስታ፥ ከድካም አሁን ብርቱዎች እንደምንሆን መታመን፤ በዚህም ላይ የሕልውናችን ዓላማ እንደሚፈጸም ፍጹም እርግጠኝነት ይጨመራል፤ ሁሉን በሚችል እጅ ወደ ፊት የሚገፋ ዒላማውን ሊስት አይችልምና።
እነዚህ የላይ ላዩን አሳቦች ብቻ ናቸው። ርዕሱ ተከታታይ መልእክቶች ይገባዋል። የተወደዳችሁ ወዳጆቼ ሆይ፥ ከሁሉ የሚሻላችሁ መንገድ ሁሉን በሚችል አምላክ ጥላ ሥር በመኖር በረጅም የግል ልምድ እነዚህን ፍንጮች ማስፋት ነው። እግዚአብሔር መንፈስ ቅዱስ ወደዚያ ይምራችሁ፥ በዚያም ይጠብቃችሁ፥ ስለ ኢየሱስ ብሎ!