ፈውስህን በተግባር መኖር

በብዙ መንገድ ይህ ለመጻፍ እጅግ አስቸጋሪው ምዕራፍ ነው። በቀደሙት ምዕራፎች የተዘረዘሩትን መርሖች ለብዙ የተለያዩ የሰዎች ቡድኖች አስተምሬአለሁ። ከወጣቶች ቡድኖችና ከአረጋውያን፣ ሥርዓተ አምልኮን ከሚከተሉና ከማይከተሉ ጉባኤዎች፣ ከመጽሐፍ ቅዱስ ኮሌጆችና ከቤት ኅብረቶች ጋር ነበርሁ። በሁሉም ማለት ይቻላል ስሜታዊ ምላሽ ነበረ፤ ብዙ ሰዎችም እያለቀሱ ምክር ለመጠየቅ ወደ እኔ ይመጡ ነበር።

ብዙውን ጊዜ በመንገድ የማልፍ እንግዳ ብቻ በመሆኔ፣ ከእነርሱ ብዙዎቹ ለሚያስፈልጋቸው ፈውስን በተግባር የመኖር ረጅም ሂደት ራሴን መስጠት ባለመቻሌ አዝናለሁ። ብዙ ጊዜ «ቁስል እንደ ከፈትሁ» — ለረጅም ጊዜ የታፈነ ትዝታ — አሁንም ፈውስ እንደሚያስፈልገው አውቃለሁ።

አንዳንድ ጊዜ ምላሻቸው ፈጽሞ ያልተጠበቀ ነው። በበሰሉ አዋቂዎች የተዋቀረ አንድ የኤጲስቆጶሳውያን ጉባኤ ትዝ ይለኛል፤ እኔና ፓስተሩ ከመልቀቅ በኋላ የሚመጣውን እርቅ በተግባር እያሳየን ስንተቃቀፍ ጉባኤው በጭብጨባ ፈነዳ። የዚያችን ቤተ ክርስቲያን የቀድሞ ፓስተር ይቅር ማለትና መልቀቅ እንደሚያስፈልጋቸው በሚገባ ያውቁ ነበር፤ የተሸከሙትን ሕመም እንዴት ሊያስወግዱ እንደሚችሉ በአዲስ መንገድ በመረዳታቸው የተሰማቸው ደስታ ድንገት በጭብጨባ እንዲፈነዱ አደረጋቸው። እኛም ያንን ጭብጨባ ወዲያውኑ ለጌታ የምስጋና መሥዋዕት አድርገን አቀረብነው።

ይህ መጽሐፍ በአብያተ ክርስቲያኖቻችን ውስጥ እጅግ ለበዙት ለተሰበሩ ግንኙነቶችና ለቆሰሉ ነፍሳት እርቅንና ፈውስን የማምጣት ታላቅ ኃላፊነት እንዳለብን ብዙ ፓስተሮችንና አማካሪዎችን እንደሚያነቃ ተስፋ አደርጋለሁ። ከዚህም በላይ ብዙ አማኞች ለሚወዷቸው ሰዎች መንግሥተ ሰማያትን የሚከፍቱትን መክፈቻዎች እንዴት መጠቀም እንደሚችሉ፣ ለረጅም ጊዜ ከተሸከሟቸው ቁስሎችም ራሳቸውን እንዴት ነጻ ማውጣት እንደሚችሉ እንደሚማሩ ተስፋ አደርጋለሁ።

ሰይጣን ስፍራውን የሚያውቅበትና የእግዚአብሔር ሕዝብ ብዙዎች እንደሚያደርጉት እያነከሱ ከመሄድ ይልቅ በሙሉ ጤንነትና በኃይል የሚመላለሱበት ጊዜ አሁን ደርሷል!

ይህን መጽሐፍ እያነበቡ ሳሉ ራሳቸውን እንደ ቆሰሉ ለተገነዘቡ ሰዎች፣ የራሳቸውን ፈውስ «በተግባር እንዲኖሩ» የሚያስችሏቸውን አንዳንድ መመሪያዎች በመስጠት እደመድማለሁ። ይህን ሂደት አብሮህ የሚያልፍ መልካም አማካሪ ማግኘት ከቻልህ፣ እንዲህ ያለው ጓደኛ እጅግ ከፍተኛ ዋጋ አለው። ከመጀመርህ በፊት ይህን መጽሐፍ በሚገባ እንዲያውቁት እንድታበረታታቸው እመክርሃለሁ።

አሳብህን እንዲመራ ጌታን ለምን

ጌታ የነፍስህን ቁስሎች ሊፈውስ እንደሚፈልግ እርግጠኛ ሁን። ቁስሎቹን ያውቃቸዋል፤ ነገር ግን የመፈወሻውን መክፈቻ ለአንተ ሰጥቶሃል፤ እንድትጠቀምበትም ይፈልጋል! በመስቀል ላይ አስቀድሞ ድል በነሣባቸውና ሥልጣኑን ወይም ኃላፊነቱን ለእኛ በሰጠባቸው የሕይወታችን ክፍሎች ጸሎትን አይመልስም።

ጊዜ ስጥ

ፈውስ በፍጥነት የሚመጣው አልፎ አልፎ ነው። ልነግራቸው የምችላቸው አብዛኞቹ ታሪኮች ለብዙ ወራት ከተደረገ የምክር አገልግሎት ጋር የተያያዙ ናቸው። ከከባድ ቁስል በኋላ እንደ ገና ለመራመድ ጊዜ ይወስዳል።

እግርን ከሚጎዳ ከባድ አደጋ በኋላ እንደ ገና ለመራመድ የአካል ሕክምና (ፊዚዮቴራፒ) የግድ አስፈላጊ እንደ ሆነ ሁሉ፣ ለረጅም ጊዜ ከቆዩ የነፍስ ቁስሎች በኋላ ፈውሳችንን በተግባር ለመኖር መንፈሳዊ ሕክምና የግድ አስፈላጊ ነው።

ስላለፈው ሕይወትህ ተናገር

ብዙውን ጊዜ ተመካሪው ያለፈውን ሕይወቱን በአጫጭር የጊዜ ክፍሎች እንዲከፋፍል አበረታታዋለሁ፤ ለምሳሌ ከትምህርት ቤት በፊት፣ የመጀመሪያ ደረጃ ትምህርት ቤት፣ የአፍላ ወጣትነት ዓመታት፣ የወጣትነት ዕድሜ፣ ወዘተ። ስለ ቤቱ፣ ስለ ትምህርት ቤቱ፣ ስለ ጓደኞቹ፣ ስለሚወዳቸውና ስለሚጠላቸው ነገሮች ጥያቄዎችን እያቀረብሁ፣ በዚያው ጊዜ ተደጋጋሚ የሆኑ ዝንባሌዎችን ወይም ጉዳቶችን እገመግማለሁ። «በውስጥህ ያለው ትንሽ ልጅ ምን ተሰማው?»

እያንዳንዱ ቁስል ሲገለጥ ጌታ እንዲዳስሰው ለምን።

ጠቃሚ ነው ብለህ የምታስበውን ሁሉ ጻፍ

ብቅ የሚሉ ተደጋጋሚ ሁኔታዎችን ወይም ወደ አእምሮዬ የሚመጡ አሳቦችን ለመጻፍ ሁልጊዜ እስክሪብቶና ወረቀት በአጠገቤ አለኝ። አማካሪም ሆነ ጓደኛ ከአንተ ጋር በሌለባቸው ቀናት፣ ለረጅም ጊዜ የተረሱ ነገሮች ትዝታዎች ሲመጡልህ ትደነቃለህ፤ ነገር ግን በፈውስህ ሂደት ውስጥ በንቃት እንዲሳተፍ ጌታን አስቀድመህ ለምነኸው ሳለ ለምን ትደነቃለህ? እነዚህን ትዝታዎች ጻፋቸው።

በሌላ ሰው ኃጢአት ቆስለህ እንደ ሆነ ለይተህ እወቅ

ኃጢአቱ የራስህ ከሆነ ሌላውን አትውቀስ። ቅያሜ ይዘህ ከሆነ በምዕራፍ ዘጠኝ እንደ ተገለጸው ልትፈታው ይገባል።

የበደለህ የምትወደው ሰው ከሆነ አትካድ፤ ለእርሱም በምንም ዓይነት ሰበብ አትፍጠርለት። እግዚአብሔር እንደ እኔና እንደ አንተ ኃጢአተኛ አድርጎ ያየዋል — ኃጢአተኞች ደግሞ ኃጢአት ይሠራሉ! በዙሪያው መዞር አያስፈልግም — ስሙን በትክክል ጥራው፦ ኃጢአት ነው! የተዋጀ ኃጢአተኛ ሊሆን ይችላል፤ ቢሆንም አሁንም ሊያቆስልህ ይችላል።

አብዛኛውን ጊዜ ቁስሎቹ የተፈጠሩት ሳይታሰብ ነው፤ ነገር ግን እውነተኛ ቁስሎች ናቸው፤ በደለኛው ኃጢአተኛ ባይሆን ኖሮ ይህን ያህል ባልጎዱህ ነበር።

ይህን መርሕ በተረዳሁ ጊዜ፣ እኔ ራሴ ሳላውቅ የገዛ ሴት ልጄን ምናልባት እንዴት እንዳቆሰልኋት አየሁ።

የመጀመሪያ ልጃችን ኮሪን ከመወለዷ በፊት አን ለጥቂት ሳምንታት ሆስፒታል ተኝታ ነበር፤ ስለዚህ ምጡ ሲጀምራት እኔ የሆነውን ሳላውቅ ቤት ነበርሁ። ስለ ምጧ መጀመሪያ የነገሩኝ ሁለት ጓደኞቼ ነበሩ፤ ለዕረፍት ከመሄዳቸው ጥቂት ቀደም ብለው ወደ ሆስፒታሉ ደውለው ነበርና። ነርሶቹ ሕፃኑ እንደ ተወለደ ነገሯቸው፤ ስለ ልደቱ ዝርዝር ግን — በተለይም ስለ ሕፃኑ ፆታ — ግልጽ አልነገሯቸውም፤ ይህን በመጀመሪያ የሚያውቀው አባትየው ነውና። ዕረፍታቸውን ከመጀመራቸው በፊት ዝርዝሩን እንዲያውቁ ወደ ሆስፒታሉ እንድደውል አጥብቀው ለመኑኝ። እያነበብሁት የነበረውን የአጋታ ክሪስቲን ልብ ወለድ ከጨረስሁ በኋላ እንደምደውል ነገርኋቸው! በርግጥ እየቀለድሁ ነበር፤ ጉጉታቸውን ለማባባስ ብቻ ነበር፤ ወዲያውኑም አብረን ወደ ሕዝብ የስልክ ማስደወያ ሄደን ውብ ሴት ልጅ አባት መሆኔን የሚያበስረውን አስደሳች ዜና ሰማን።

ይሁን እንጂ ያ ታሪክ በዓመታት ውስጥ ሊጠይቁን ለመጡ ጓደኞች ብዙ ጊዜ ተደጋግሞ ይነገር ነበር፤ አንዳንድ ጊዜም ሴት ልጄ ባለችበት። እርሷ ታሪኩን እንዴት እንደምትሰማው አስቤ አላውቅም — ማለትም አባዬ እርሷ ስትወለድ ግድ እንዳልነበረው። ምናልባትም እርሷን አልፈለጋት ይሆን?

ይህን መጽሐፍ ለመጀመሪያ ጊዜ ካሳተምሁ ከሁለት ዓመት በኋላ፣ በግዴለሽነቴ ላደረስሁባት ቁስሎች ይቅርታ እንድታደርግልኝ ለኮሪን ጻፍሁላት።

ጉዳቶችህን በዝርዝር እየገለጽህ ደብዳቤ ጻፍ

ይህን ደብዳቤ ለማንም ማሳየት አይጠበቅብህም፤ ምንም እንኳ ለአማካሪህ ልትገልጥለት ልትመርጥ ብትችልም። ይህ ግን መሆን ያለበት ምሥጢር እንደሚጠብቅ ሊታመን የሚችል ከሆነና የነገርኸው መረጃ በአንተም ሆነ ባቆሰለህ ሰው ላይ ያለውን አመለካከት እንዲነካ እንደማይፈቅድ ካወቅህ ብቻ ነው። በደብዳቤው ውስጥ የተሟላና ሚዛናዊ ለመሆን ሞክር፤ ስትቆስል የተሰማህን ጻፍ፦ እንደ ተናቅህ፣ እንደ ተዋረድህ፣ እንዳፈርህ፣ ወዘተ።

ልትናገራቸው የምትችላቸውን መልካም ነገሮችም ለመጨመር ሞክር።

ይህ ደብዳቤ ጠንካራ ስሜትንና ሕመምን ሊቀሰቅስ ስለሚችል ሚዛናዊ መሆን እጅግ አስቸጋሪ ሊሆን ይችላል። ዓላማው ለዓመታት አፍነህ ያቆየሃቸውን ስሜቶች ወደ ላይ እንድታወጣ ማስቻል ነው።

እስራት የሆኑ ፋሻዎች መፈታት አለባቸው! ጊዜ ስጥ!

ይቅር ለማለት ምረጥ

ያቆሰለህ ሰው በጨለማ የሚመላለስ ኃጢአተኛ እንደ ሆነ ተገንዘብ። በነፍስህ ላይ ያደረሰውን አያይም። እውነተኛ ባላጋራህ ከተወለድህበት ጊዜ ጀምሮ ሠራዊቱ ዒላማ ያደረገህ ሰይጣን ነው፤ በደለኛህ ግን የሰይጣንን ዘዴዎች የማያውቅ መሣሪያ ብቻ ነው። በሰይጣን ላይ ተቆጣ፤ ዕውሩን ሰው ግን ይቅር በለው። በጻፍኸው ደብዳቤ ውስጥ ለተጠቀሰው ለእያንዳንዱ ነገር ይቅር ለማለት መዘጋጀትህን እርግጠኛ ሁን።

ይቅር ለማለት ባልተዘጋጀህበት ስፍራ ጌታ ይፈውሰኛል ብለህ አትጠብቅ።

ለመልቀቅ ምረጥ

የቅዱስ እስጢፋኖስን ጸሎት ለምን አትጠቀምበትም? «አባት ሆይ፥ እነዚህን ኃጢአቶች አትቍጠርባቸው! ዛሬ ከበደል ሁሉ ልለቅቃቸው መርጫለሁ።»

ያንን ጸሎት ከጸለይህ በኋላ፣ የልደት ቀንን እንደምታስታውስ ሁሉ ቀኑን በትዝታህ እንድትመዘግብና እንድትጽፈው እመክርሃለሁ።

ደብዳቤውን አቃጥለው!

ጉዳዩ ተፈጽሟል — ታዲያ ለምን አንጠልጥለህ ታቆየዋለህ?

ይህ ቀን በትዝታህ ውስጥ መመዝገብ ያለበት ፈውስህን በተግባር መኖር የጀመርህበት ቀን ሆኖ ብቻ ነው — የሚከበር ቀን!

ላቆሰለህ ሰው ጸልይ

እግዚአብሔር ያቆሰለህን ሰው እንዲባርከው በየዕለቱ ለመጸለይ ራስህን ስጥ። ልጆቹ ከጌታ የራቁ ናቸው? ስለ እነርሱ ጸልይ። ሥራው ችግር ላይ ነው? እንዲሳካለት ጸልይ። በዚህ መንገድ መጸለይህን ስትቀጥል፣ እግዚአብሔር በራሱና በእነርሱ መካከል ባለው መተላለፊያ በኩል ይሠራል — ይህ መተላለፊያ በይቅርታህና በመልቀቅህ አንተ የከፈትኸው ነው። ይህን በማድረግህ ራስህን ከቁስሎችህ ስሜታዊ እስራት ባርነት ነጻ ታወጣለህ፤ ኢየሱስ እንድትሆን የጠራህም አገልጋይ ትሆናለህ።

አንድ ሰው እጀ ጠባብህን ወስዶ ቢበድልህ ባሪያው ያደርግሃል፤ መጎናጸፊያህን ደግሞ ብትሰጠው ግን ራስህን አገልጋዩ ታደርጋለህ። አንድ ምዕራፍ እንድትሄድ አስገድዶ ቢበድልህ ባሪያው ያደርግሃል፤ ሁለት ምዕራፍ ብትሄድ ግን ራስህን አገልጋዩ ታደርጋለህ (ማቴዎስ 5:40-41)። ነፍስህን ቢያቆስላት ስሜታዊ ባሪያ ትሆናለህ፤ ስለ እርሱ በመጸለይ ግን አገልጋዩ ትሆናለህ።

የደቀ መዝሙርነት የመጀመሪያው ጥሪ ኢየሱስ ለአንተ እንደ ሆነልህ አገልጋይ መሆን ነው።

ለእርቅ ክፍት ሁን

ካቆሰለህ ሰው ጋር ለመታረቅ ዕድል ቢገኝ፣ ስጋት ወይም ፍርሃት እንዲያደናቅፍህ አትፍቀድ።

የጌታ ቀዳሚ ትኩረት አንተን የሚባርክህ ፈውስ ብቻ ሳይሆን እርሱን የሚባርከው እርቅም ነው!

ፈውስህን በተግባር ኑር

በኤፌሶን 6:10-18 የሚገኘውን የእግዚአብሔርን ዕቃ ጦር ሁሉ በየዕለቱ ልበስ። ይህን በንቃት የምታደርገው ተግባር አድርገው፤ ስታደርገውም ድምፅህን አውጥተህ ተናገር። «‹ውስጣዊ ሰውነቴ› በጠላት ውሸት እንዳይቆስል ወገቤን በእውነት እታጠቃለሁ። ጠላት ልቤ ለጌታ ባለው መሰጠትና ፍቅር ፈጽሞ እንዲከፋፈል እንዳያደርገው የጽድቅን ጥሩር እለብሳለሁ»፤ ወዘተ። እግዚአብሔርን የሚያዩት «ልበ ንጹሖች» ብቻ ናቸው — ልባቸው በዚህ ዓለም ዝቃጭ ያልተበረዘ (ማቴዎስ 5:8)።

እያንዳንዱን ቁስል ለታላቁ ሐኪም ስጥ

ጠላት ቁስሎችህ የት እንዳሉ እንደሚያውቅ ሁሉ ጌታም በእርግጥ ያውቃል። በተጎዳህ ጊዜ ሕመምህ ተሰምቶታል፤ ፈውስህንም ይናፍቃል፤ ይሁን እንጂ መክፈቻውን ለአንተ ሰጥቶሃል።

መጠቀም ስትጀምር፣ ፈውስን በተግባር በመኖር ሂደት ሊረዳህ እጅግ ፈቃደኛ ነው። ቁስሎቹን እንደ ገለጠልህ ሁሉ፣ እስራቶቹንም ያስወግዳል፤ በምትካቸውም ሙሉ ጤንነትን ያመጣል፤ ደግሞም እርሱ ደዌያችንን የተቀበለ፣ ሕመማችንንም የተሸከመ፣ እኛም በቍስሉ የተፈወስንበት «ታላቁ ሐኪም»፣ ፈዋሹ ነውና (ኢሳይያስ 53:4-5)።

በመጨረሻም ስለ ፈውሱ አመስግነው!