ማድረግና ማወቅ

ኢየሱስ ግን፦ «አዎን፥ ብፁዓንስ የእግዚአብሔርን ቃል ሰምተው የሚጠብቁት ናቸው» አለ። ሉቃስ 11:28።

«ፈቃዱን ሊያደርግ የሚወድ ቢኖር፥ እርሱ ይህ ትምህርት ከእግዚአብሔር ቢሆን ወይም እኔ ከራሴ የምናገር ብሆን ያውቃል» ዮሐንስ 7:17።

ከጥቂት ጊዜ በፊት ትጉህ ክርስቲያን እንደ ሆነ በግልጥ ከሚታይ አንድ ሰው በመጽሐፍ ቅዱስ ጥናቱ የሚረዱትን አንዳንድ ምክሮች እንድሰጠው የሚጠይቅ ደብዳቤ ደረሰኝ። የመጀመሪያው ሐሳቤ፣ በዚህ ርዕስ ላይ እጅግ ብዙ ንግግሮችና ትናንሽ መጻሕፍት ስላሉ፣ እኔ ልናገር የምችለውን ሁሉ ከእኔ በተሻለ ተነግሮ እንደሚያገኘው መመለስ ነበር። ከጥቂት ጊዜ በኋላ ግን በቅርብ ክበቤ ውስጥ ያጋጠሙኝ አንዳንድ ገጠመኞች በዚህ እጅግ አስፈላጊ ርዕስ ላይ ትምህርት ምን ያህል እንደሚያስፈልግ እንዲሰማኝ አደረጉ፤ ልዩ ትኩረት ሊሰጣቸው የሚገባ የሚመስሉ ነጥቦች እንዳሉም አገኘሁ። የምጽፈው ነገር ከብርሃንና ከሕይወት ምንጭ ከእግዚአብሔር እንዲሆን፣ ትናንሽ ልጆቹም ከከበረው ቃሉ ያንን መለኮታዊ ትምህርትና ምግብ ሁሉ፣ ለእነርሱ ያከማቸላቸውንም ያንን የተትረፈረፈ ደስታና ብርታት ሁሉ እንዴት መቅዳት እንደሚችሉ እንዲያዩ እንዲረዳቸው በትጋት እየጸለይሁና ተስፋ እያደረግሁ ብዕሬን አነሣለሁ።

እንግዲህ፦ «መጽሐፍ ቅዱሴን እንዳጠና እርዳኝ። መጽሐፍ ቅዱሴን በሚገባ እንዳውቅ እንዴት መጀመርና እንዴት መቀጠል እንዳለብኝ የሚመሩኝን አንዳንድ ደንቦች ስጠኝ» ላለኝ አንድ ወጣት ክርስቲያን እንደምናገር አድርጌ ራሴን እቆጥራለሁ። ልነግረው የሚገባኝ የመጀመሪያው ነገር፣ ከሁሉ በፊት የሚቀድመው ነገር ይህ ነው፦ በመጽሐፍ ቅዱስ ጥናትህ ሁሉም ነገር የሚወሰነው ወደ እርሱ በምትቀርብበት መንፈስ ላይ፣ ለራስህ ባስቀመጥከው ዓላማ ወይም ግብ ላይ ነው። በዓለማዊ ነገሮች ሰው የሚመራውና የሚገፋፋው በፊቱ ባስቀመጠው ግብ ወይም ዓላማ ነው። ከመጽሐፍ ቅዱስም ጋር ቢሆን እንደዚሁ ነው። ዓላማህ መጽሐፍ ቅዱስን በሚገባ ማወቅ ብቻ ከሆነ ተስፋህ ይቈረጣል። የመጽሐፍ ቅዱስ ጥልቅ እውቀት የግድ በረከት ይሆናል ብለህ ካሰብህ ተሳስተሃል።

ለአንዳንዶች እርግማን ነው። ለሌሎች ኃይል የለውም፤ ቅዱሳንም ሆነ ደስተኞች አያደርጋቸውም። ለአንዳንዶች ሸክም ነው፤ ሕያው ከማድረግ ወይም ከማንሣት ይልቅ ያስጨንቃቸዋል። እንግዲህ የመጽሐፍ ቅዱስ ተማሪ ዓላማ ወይም ግብ፣ እውነተኛ ዝንባሌው ምን መሆን አለበት? የእግዚአብሔር ቃል ምግብ ነው፤ ከሰማይ የወረደ እንጀራ ነው፤ ለመጽሐፍ ቅዱስ ጥናት የመጀመሪያው ፍላጎት፦ — ጽድቅን እጅግ መራብ፣ የእግዚአብሔርን ፈቃድ ሁሉ ለማድረግ ታላቅ ምኞት ነው። መጽሐፍ ቅዱስ ብርሃን ነው፤ በእርሱ ደስ ለመሰኘት የመጀመሪያው ቅድመ ሁኔታ በእግዚአብሔር መንገድ ለመሄድ የሚናፍቅ ልብ ነው። ከላይ ያስቀመጥኋቸው ጥቅሶች የሚያስተምሩን ይህንን አይደለምን?

«ብፁዓንስ የእግዚአብሔርን ቃል ሰምተው የሚጠብቁት ናቸው።» የእግዚአብሔርን ቃል ከመጠበቅ ተለይቶ በመስማትም ሆነ በማወቅ ብፅዕና የለም። ቃሉ ካልተጠበቀ፣ ካልተታዘዘ ወይም ካልተፈጸመ ምንም አይደለም። «ፈቃዱን ሊያደርግ የሚወድ ቢኖር፥ እርሱ … ያውቃል።» ዮሐንስ 7:17። በዚህ በጌታችን ቃል መሠረት፣ የእግዚአብሔርን ቃል በእውነት ማወቅ ሁሉ በመጀመሪያ የተመካው እርሱን ለማድረግ ባለው ፈቃድ ላይ ነው።

እያስጨበጥነው ያለነው ትምህርት ይህ አይደለምን? እግዚአብሔር የቃሉን እውነተኛ ትርጉምና በረከት ፈቃዳቸው እርሱን ለማድረግ በቍርጥ ከተዘጋጀ ሰዎች በቀር ለማንም አይከፍትም። መጽሐፍ ቅዱሴን በአንድ ዓላማ ማንበብ አለብኝ፦ «የሚላችሁን ሁሉ አድርጉ።»

ይህ ለምን እንዲህ እንደ ሆነ ቃሎች የተሰጡት ለምን እንደ ሆነ ስናስብ በቀላሉ ይገባናል። ቃሎች በፈቃድና በድርጊት መካከል ይቆማሉ። አንድ ሰው አንድ ነገር ሊያደርግልህ ይፈቅዳል፤ ከማድረጉ በፊት ሐሳቡን ወይም ዓላማውን በቃል ይገልጻል፤ ከዚያም ቃል የገባውን በማድረግ ቃሉን ይፈጽማል። እግዚአብሔርም እንዲሁ ነው። ቃሎቹ ዋጋቸውን የሚያገኙት እርሱ ከሚያደርገው ነገር ነው። በፍጥረት ቃሉ በኃይል ነበረ፤ ተናገረ፥ ሆነም። በጸጋም የሚናገረውን ያደርጋል። ዳዊት (2ኛ ሳሙኤል 7:25)፦ «እንደ ተናገርህ አድርግ» ብሎ ይጸልያል። ሰሎሞን በመቅደሱ ምረቃ ጊዜ እንዲህ ይላል፦ «በአፉ የተናገረውን በእጁ የፈጸመ»፤ «የተናገረውን ቃሉን ያጸና»፤ «የሰጠኸውን ተስፋ የጠበቅህ»፤ «በአፍህ የተናገርህ በእጅህም የፈጸምህ»፤ «የተናገርኸው ቃልህ ይጽና» (2ኛ ዜና መዋዕል 6:4፣ 10፣ 15፣ 16፣ 17)። በነቢያትም እግዚአብሔር፦ «እኔ እግዚአብሔር ተናግሬአለሁ፥ አደርገውማለሁ» ይላል። እነርሱም፦ «የተናገርኸው ሆኖአል» ይላሉ።

እግዚአብሔር የሚሰጠው ተስፋ እውነትነቱና ዋጋው በዚህ ላይ ነው፤ እርሱ ያደርገዋልና። የተስፋ ቃሉ እንዲፈጸም የተሰጠ ነው። ይህ እኛ እንድናደርጋቸው ስለሚፈልጋቸው ነገሮች ስለ ትእዛዝ ቃሉም ያነሰ እውነት አይደለም። ባናደርጋቸው፣ ልናውቃቸው ብንፈልግ፣ ውበታቸውን ብናደንቅና ጥበባቸውን ብናመሰግን ነገር ግን ባናደርጋቸው ራሳችንን እናታልላለን። እንዲደረጉ የተሰጡ ናቸው፤ እውነተኛ ትርጉማቸውና በረከታቸው ሊገለጥልን የሚችለው ስናደርጋቸው ብቻ ነው።

በመለኮታዊው ሕይወት በእውነት ማደግ የምንችለው ስናደርጋቸው ብቻ ነው። «በነገር ሁሉ ደስ ልታሰኙት ለጌታ እንደሚገባ ትመላለሱ ዘንድ፥ በመልካም ሥራ ሁሉ እያፈራችሁ በእግዚአብሔርም እውቀት እያደጋችሁ» የበረከት ተስፋ ሊኖረን የሚችለው እግዚአብሔር ያሰበውን ያንኑ ዓላማ፣ ማለትም እንዲደረጉ፣ ይዘን ወደ ቃሎቹ ስንቀርብ ብቻ ነው።

በእውቀት ፍለጋም ሆነ በማንኛውም የሙያ ዘርፍ በዙሪያችን የምናየው ይህንን አይደለምን? ተለማማጁ ወይም ተማሪው የሚቀበላቸውን ትምህርቶች በተግባር እንዲያውላቸው ይጠበቅበታል፤ ለተጨማሪ ትምህርት የሚዘጋጀው ከዚያ በኋላ ብቻ ነው። እንዲሁም በክርስቲያናዊ ሕይወት፣ ተማሪው የእግዚአብሔርን ዓላማ የራሱ ሳያደርግና እርሱ፦ «የምናገረውን ሁሉ አድርግ» ሲለው ሳያደምጥ መጽሐፍ ቅዱሱን ፈጽሞ ላለመክፈትና ላለመዝጋት እስኪዘጋጅ ድረስ፣ የመጽሐፍ ቅዱስ ጥናት ከንድፈ ሐሳብ ያልዘለለ፣ አእምሮንና ምናብን ደስ የሚያሰኝ ልምምድ፣ ለእውነተኛ ቅድስና ወይም ክርስቶስን ለመምሰል ሕይወት ጥቂት ወይም ምንም ዋጋ የሌለው ነው። የጥንቶቹ ቅዱሳን ምልክት ይህ ነበር። «አብራምም እግዚአብሔር እንደ ነገረው ሄደ» «ሙሴም እንዲህ አደረገ፤ እግዚአብሔር እንዳዘዘው ሁሉ እንዲሁ አደረገ።» ይህ በቤቱ ሁሉ እንደ ሎሌ የታመነ የነበረው ሰው መግለጫ ነው። ስለ ዳዊትም እንዲህ እናነባለን፦ «እንደ ልቤ የሆነ ሰው ፈቃዴንም ሁሉ የሚያደርግ የእሴይን ልጅ ዳዊትን አገኘሁ።»

በመዝሙር 119 ስለ ቃሉ ከእግዚአብሔር ጋር ሲነጋገር፣ መለኮታዊ ብርሃንና ትምህርት እንዲሰጠው ሲጸልይ እንሰማዋለን፤ ይህ ግን ሁልጊዜ የመታዘዝ ስእለት ወይም ሌላ የፍቅርና የደስታ መግለጫ አብሮት ነው። ለእግዚአብሔር ልጅ ለራሱ እንኳ ወደ እግዚአብሔር ሞገስና ሐሳብ የመግባት ብቸኛ ምሥጢር የእግዚአብሔርን ፈቃድ ማድረግ ነው።

የአቶ ሙዲን «በመጽሐፍ ቅዱስ ጥናት ደስታና ጥቅም» የተባለውን አዲስ መጽሐፍ አሁን አንብቤ ጨርሻለሁ። ብዙዎች በውስጡ ያሉትን ምክሮች እንደሚጠቀሙባቸው አልጠራጠርም። እንደ ሙዲ ያለውን ሰው የረዳው ነገር እኔንም ሊረዳኝ ይችላል ብለው በትክክል ያስባሉ። ቢሆንም ተስፋቸው ሊቈረጥ ይችላል። አቶ ሙዲ ወደ መጽሐፍ ቅዱስ ያመጣውን፣ ማለትም እግዚአብሔር እንዲያደርገው እንደሚፈልግ ያየውን ሁሉ ለማድረግ ቅን ምኞትን፣ ይዘው ካልመጡ በቀር ተስፋቸው መቈረጡ አይቀርም። ወጣት ክርስቲያን ሆይ! ወደ ቃሉ መዝገቦች፣ ክርስቶስ ወደሚኖርበት ቤተ መንግሥት እንዲመራህ እግዚአብሔርን ስትለምን፣ እግዚአብሔር የሚናገረውን ሁሉ ለማድረግ ተዘጋጅቶ ራሱን ሕያው መሥዋዕት አድርጎ እንደሚያቀርብ ሰው ሆነህ እንድታደርገው በእግዚአብሔር ርኅራኄ እለምንሃለሁ።

ይህ የታወቀ ነገር ነው ብለህ አታስብ። ከምታውቀው በላይ ጥልቅ አስፈላጊነት አለው። ይህ ከምታስበው በላይ በብዛት ከመጽሐፍ ቅዱስ ጥናት ይጎድላል። በጥልቅ ትሕትና ፈልገው። ምግብህን ለመደሰት የመጀመሪያው ፍላጎት ረሀብ ነው። ለመጽሐፍ ቅዱስ ጥናት የመጀመሪያው መሥፈርት እግዚአብሔር እንድታደርግ የሚፈልገውን ለማወቅ ቀላልና የቈረጠ ናፍቆት፣ ያንንም ለማድረግ ከልብ የሆነ ፍጹም ቍርጥ ውሳኔ ነው። «ፈቃዱን ሊያደርግ የሚወድ ቢኖር፥ እርሱ ይህ ትምህርት ከእግዚአብሔር ቢሆን ወይም እኔ ከራሴ የምናገር ብሆን ያውቃል» ለእርሱ የእግዚአብሔር ቃል ይከፈትለታል።