ዘሩ ቃሉ ነው

በተፈጥሮ ሁሉ ውስጥ የእግዚአብሔር ቃል ምን እንደ ሆነ የሚያሳይ እንደ ዘር ያለ ያን ያህል እውነተኛና ያን ያህል ትርጉም የሞላበት ሌላ ምሳሌ የለም ብሎ በእርግጠኝነት መናገር የሚቻል ይመስለኛል። ስለ እርሱ ሙሉ መንፈሳዊ ማስተዋል ማግኘት አስደናቂ የጸጋ መንገድ ነው። የሚመሳሰሉባቸው ነጥቦች በቀላሉ ሊገለጹ ይችላሉ። በመጀመሪያ የዘሩ ኢምንት መስሎ መታየት አለ፤ ከእርሱ ከሚበቅለው ዛፍ ጋር ሲነጻጸር ትንሽ ነገር ነው። በቅርፊት ውስጥ ተዘግቶ ተኝቶ ያለ ሕይወት አለ። ተስማሚ አፈር ያስፈልገዋል፤ ያለ እርሱ ማደግ አይቻልም። ረጅም ጊዜ የሚወስድና የገበሬውን ብዙ ትዕግሥት የሚጠይቅ ዝግ ያለ እድገት አለ። በመጨረሻም ዘሩ ራሱን የሚተካበትና የሚያበዛበት ፍሬ አለ። በእነዚህ ሁሉ ረገድ ዘሩ የእግዚአብሔርን ቃል ስለምንጠቀምበት መንገድ እጅግ የከበሩ ትምህርቶችን ያስተምረናል።

በመጀመሪያ የእምነት ትምህርት አለ። እምነት ውጫዊ መልክን አይመለከትም።

እኛ እንደምንገምተው፣ አንድ የእግዚአብሔር ቃል በነፍስ ውስጥ ሕይወትን መስጠቱ፣ የሚናገርለትን ያንኑ ጸጋ በእኛ ውስጥ መሥራቱ፣ ባሕርያችንን በሙሉ መለወጡና በብርታት መሙላቱ ፈጽሞ የማይሆን ነገር ይመስላል። ቢሆንም እንዲሁ ነው። ቃሉ የሚገልጸውን ያንኑ እውነት በብርቱ ሊሠራ እንደሚችል ማመንን አንድ ጊዜ ከተማርን፣ ከመጽሐፍ ቅዱስ ጥናታችን ዋና ምሥጢሮች አንዱን አግኝተናል። ከዚያም እያንዳንዱን ቃል የመለኮታዊ ሥራ መያዣና ኃይል አድርገን እንቀበለዋለን።

ቀጥሎም የድካም ትምህርት አለ። ዘሩ መሰብሰብ፣ መጠበቅና በተዘጋጀ አፈር ውስጥ መዝራት ያስፈልገዋል። እንዲሁም አእምሮ ከመጽሐፍ ቅዱስ ውስጥ ፍላጎታችንን የሚያሟሉትን ቃሎች ሰብስቦ ማስተዋልና ይህ ሰማያዊ ዘር ሊያድግበት የሚችል ብቸኛ አፈር ወደ ሆነው ወደ ልብ ማስተላለፍ አለበት። እኛ ሕይወትን ወይም እድገትን መስጠት አንችልም። ደግሞም አያስፈልገንም፤ ሕይወቱ በዚያ አለና። ነገር ግን እኛ ማድረግ የምንችለው ቃሉን በልባችን መሰወርና ከላይ የሚመጣውን የፀሐይ ብርሃን እየጠበቅን በዚያ ማኖር ነው።

ዘሩም የትዕግሥትን ትምህርት ያስተምራል። ቃሉ በልብ ላይ የሚያደርገው ውጤት በአብዛኛው ወዲያውኑ አይታይም። ሥር ለመስደድና ለማደግ ጊዜ ያስፈልገዋል፤ የክርስቶስ ቃሎች በእኛ ሊኖሩ ይገባቸዋል። የመጽሐፍ ቅዱስ እውቀታችንን ክምችት ከቀን ወደ ቀን መጨመር ብቻ ሳይሆን — ይህ እህልን በጎተራ እንደ መሰብሰብ ብቻ ነው — በተለይ የያዝናቸውን የትእዛዝ ወይም የተስፋ ቃሎች መጠበቅና ሥርም ቅርንጫፍም እንዲዘረጉ በልባችን ስፍራ መስጠት አለብን። ምን ዓይነት ዘር እንደ ዘራን ማወቅና ነቅቶ የሚጠብቅ ነገር ግን የሚታገሥ ተስፋን ማዳበር ያስፈልገናል። ባንዝልም በጊዜው እናጭዳለን (ገላትያ 6:9)።

በመጨረሻም የፍሬያማነት ትምህርት ይመጣል። ያ ትንሽ የእግዚአብሔር ቃል ዘር ምንም ያህል ኢምንት ቢመስል፣ ሕይወቱ ምንም ያህል ደካማ ቢመስል፣ የሚናገረው ሐሳብ ራሱ ምንም ያህል በጥልቅ የተሰወረ ቢሆን፣ የእድገቱም ዝግታ ትዕግሥታችንን ምንም ያህል ቢፈትን — ፍሬው እንደሚመጣ እርግጠኛ ሁን። ቃሉ ሐሳቡን የያዘለት የእግዚአብሔር እውነትና ሕይወትና ኃይል ራሱ በውስጥህ ያድጋል፤ ይበስላልም። ዘር ለአዲስ መተካት የሚሆን ያንኑ ዘር የያዘ ፍሬ እንደሚያፈራ ሁሉ፣ ቃሉም ተስፋ የሰጠህን ፍሬ ማምጣት ብቻ አይደለም፤ ያ ፍሬ ራሱ በእያንዳንዱ ጊዜ ሕይወትንና በረከትን ለመስጠት ወደ ሌሎች የምትወስደው ዘር ይሆናል።

ቃሉ ብቻ ሳይሆን «መንግሥተ ሰማያት ሰው ወስዶ በእርሻው የዘራትን የሰናፍጭ ቅንጣት ትመስላለች» ማቴዎስ 13:31። የመንግሥቱም ጸጋ ሁሉ የሚመጣው ዳግመኛ በተወለደ ሰው ልብ ውስጥ እንደ ተሰወረ ዘር ሆኖ እንጂ በሌላ መንገድ አይደለም። ክርስቶስ ዘር ነው። መንፈስ ቅዱስ ዘር ነው። በልብ ውስጥ የፈሰሰው የእግዚአብሔር ፍቅር ዘር ነው። በእኛ የሚሠራው እጅግ ታላቅ የኃይሉ ብዛት ዘር ነው። የተሰወረው ሕይወት በልብ ውስጥ አለ፤ ነገር ግን ኃይሉ ወዲያውኑ ወይም ሁልጊዜ አይሰማም። መለኮታዊው ክብር በዚያ አለ፤ ነገር ግን ብዙ ጊዜ መልክና ውበት የሌለው ሆኖ ነው፤ በእምነት ብቻ የሚታወቅ፣ ባይሰማም እንኳ እንዳለ ተቆጥሮ የሚሠራበት፣ መብቀሉና ማደጉም በትዕግሥት የሚጠበቅ ነው።

ይህ ዋና እውነት በእያንዳንዱ ጊዜ በጽኑ ሲያዝና በምድር ላይ ላለው ሰማያዊ ሕይወት ሁሉ ሕግ ሆኖ ሲጠበቅ፣ የእግዚአብሔርን ቃል ማጥናት የእምነት፣ ራስን የመስጠትና በሕያው እግዚአብሔር ላይ የመደገፍ ተግባር ይሆናል። በቃሉ ውስጥ ባለው መለኮታዊ ዘርና ያንን በሕይወቴና በተሞክሮዬ እውነት በሚያደርገው በእግዚአብሔር መንፈስ ኃይል በትሕትና፣ እየተንቀጠቀጥሁ ማለት ይቻላል፣ አምናለሁ። ይህንን መለኮታዊ ዘር ለመቀበል ልቤን በረሀብና በሙሉ እሰጣለሁ። ደግሞም ከምንለምነው ወይም ከምናስበው በላይ በኃይል እንዲያሳድገው ፍጹም በሆነ መደገፍና መታመን እግዚአብሔርን እጠብቃለሁ።