የእግዚአብሔር ፈቃድ

«መንግሥትህ ትምጣ፤ ፈቃድህ በሰማይ እንደ ሆነች እንዲሁ በምድር ትሁን» ማቴዎስ 6:10።

1. የእግዚአብሔር ፈቃድ ዓለም ህልውናዋን ያገኘችበት ሕያው ኃይል ነው። ዓለም በዚያ ፈቃድ አማካይነትና በዚያ ፈቃድ መሠረት አሁን ያለችውን ሆናለች። እርሷ የመለኮታዊው ፈቃድ በጥበቡ፣ በኃይሉና በቸርነቱ የተገለጠበት መግለጫ፣ መገለጫና መልክ ነች። በውበትም ሆነ በክብር ያላት ነገር ሁሉ እግዚአብሔር ስለ ፈቀደው ብቻ ያገኘችው ነው። ያ ፈቃድ እንደ ሠራት፣ እንዲሁ ዕለት ዕለት ይደግፋታል። ፍጥረትም በዚህ መንገድ የተፈጠረችበትን ዓላማ ትፈጽማለች፤ የእግዚአብሔርን ክብር ትገልጣለች። «እንስሶቹ በዙፋን ላይ ለተቀመጠው ከዘላለም እስከ ዘላለም በሕይወት ለሚኖረው ክብርና ውዳሴ ምስጋናም ይሰጣሉ፤ አንተ ሁሉን ፈጥረሃልና፥ ከፈቃድህም የተነሣ ሆነዋልና ተፈጥረዋልምና።»

2. ይህ ሕይወት ለሌላቸው ፍጥረታት እውነት ነው። ለአስተዋይ ፍጥረታት ደግሞ ከዚህ ይበልጥ እውነት ነው። መለኮታዊው ፈቃድ በራሱ መልክና አምሳል የሆነ፣ ለህልውናው ምክንያት የሆነውን ያንን ፈቃድ ለማወቅ፣ ለመቀበልና ከእርሱ ጋር አብሮ ለመሥራት የሚችል ሕያው ኃይል ያለው ፍጡር ለመፍጠር ተነሣ። ያልወደቁት መላእክት ብፅዕና፣ እግዚአብሔር የሚፈቅደውንና የሚያደርገውን በትክክል መፈለግና ማድረግ መቻልን እንደ ታላቅ ክብራቸውና ደስታቸው መቁጠራቸው ነው። የሰማይ ክብር የእግዚአብሔር ፈቃድ በዚያ መደረጉ ነው።

የወደቁት መላእክትና የሰዎች ኃጢአትና ጉስቁልና በቀላሉ ከእግዚአብሔር ፈቃድ ዘወር ማለታቸው፣ በእርሱም ለመኖርና እርሱን ለማድረግ እንቢ ማለታቸው ነው።

3. ቤዛነት የእግዚአብሔርን ፈቃድ በዓለም ውስጥ ወደ ስፍራው መመለስ እንጂ ሌላ አይደለም። ለዚህም ዓላማ ክርስቶስ መጣ፤ ሰው የሚኖርለት አንድ ነገር ብቻ፣ ማለትም የእግዚአብሔርን ፈቃድ ማድረግ ብቻ እንዳለው በሰው ሕይወት አሳየ። የራስን ፈቃድ የምናሸንፍበት አንድ መንገድ ብቻ እንዳለ አሳየን፤ እርሱም እስከ ሞት ድረስ የእግዚአብሔርን ፈቃድ በመታዘዝ ለራስ ፈቃድ መሞት ነው። እንዲሁም ስለ ራስ ፈቃዳችን አስተሰረየ፣ ስለ እኛም አሸነፈው፤ በሞትና በትንሣኤም በኩል ሙሉ በሙሉ ከእግዚአብሔር ፈቃድ ጋር ወደ ተባበረና ለእርሱ ወደ ተሰጠ ሕይወት የሚያደርስ መንገድ ከፈተ።

4. እግዚአብሔር የፈጠረበት ፈቃዱ በተፈጥሮ ወይም ባልወደቁ ፍጡራን ውስጥ የሠራውንና ሁልጊዜም የሚሠራውን፣ የሚቤዥበት ፈቃዱ አሁን በወደቀው ሰው ውስጥ ሊያደርግ ይችላል። እግዚአብሔር በክርስቶስና በምሳሌው ከእኛ የሚፈልገውንና የሚጠብቀውን ለፈቃዱ መሰጠትንና በፈቃዱ ደስ መሰኘትን ገልጧል። በክርስቶስና በመንፈሱ ፈቃዳችንን ያድሳል፣ ይገዛውማል፤ ፈቃዱን ሁሉ ለማድረግ የምንችልና የምንወድድ ያደርገን ዘንድ በእርሱ ውስጥ መፈለግንም ማድረግንም ይሠራል። እርሱ ራሱ እንደ ፈቃዱ ምክር ሁሉን የሚሠራ ነው። «በፊቱ ደስ የሚያሰኘውን በእናንተ እያደረገ፥ ፈቃዱን ታደርጉ ዘንድ በመልካም ሥራ ሁሉ ፍጹማን ያድርጋችሁ»። ይህ በመንፈስ ቅዱስ ሲገለጥ፣ ሲታመንና ወደ ልብ ሲገባ፣ «ፈቃድህ በሰማይ እንደ ሆነች እንዲሁ በምድር ትሁን» የሚለውን ጸሎት መረዳት እንጀምራለን፤ ጸሎቱ ተስፋ ለሚሰጠው ሕይወትም እውነተኛ ናፍቆት ይቀሰቀሳል።

5. አማኝ ከእግዚአብሔር ፈቃድ ጋር ያለውን ግንኙነትና ፈቃዱ በእርሱ ላይ ያለውን መብት መገንዘቡ ምንኛ አስፈላጊ ነው! እጅግ ብዙ አማኞች ስለ እግዚአብሔር ፈቃድ እምነታቸው ወይም ስሜታቸው ምን መሆን እንዳለበት ምንም ግንዛቤ የላቸውም። እንዲህ የሚሉ ምንኛ ጥቂቶች ናቸው፦ የብፅዕና አሳቤ ሁሉ ከእግዚአብሔር ፈቃድ ጋር ፍጹም በሆነ ስምምነት ውስጥ ብቻ ነው። የሚያስፈልገኝ አንድ ነገር፣ እግዚአብሔር እንዳደርግ ከሚፈቅደው በቀር በትንሹም ነገር እንኳ ፈጽሞ ሌላ እንዳላደርግ፣ በጽናት የሚጠበቅ ራስን መስጠት እንደ ሆነ ይሰማኛል። በእግዚአብሔር ጸጋ እያንዳንዱ የሕይወቴ ሰዓት በእግዚአብሔር ፈቃድ ውስጥ መኖርና በሰማይ እንደሚደረግ እርሱን ማድረግ ሊሆን ይችላል።

6. ዓላማዎቹን በእኛ ውስጥ እየጨመረ የሚፈጽመው መለኮታዊ ፈቃድ ላይ ያለ ሕያው እምነት ልብን ሲገዛ ብቻ፣ ጌታችን ያስተማረንን ጸሎት መልስ ለማመን ድፍረት ይኖረናል። ይህ የእግዚአብሔር ፈቃድ በእኛ ውስጥ የሚሠራው በኢየሱስ ክርስቶስ በኩል መሆኑን ስናይ ብቻ፣ እግዚአብሔር ሁሉን በእኛ ውስጥ እንደሚሠራ መተማመንን የሚሰጠው ከእርሱ ጋር ያለው የቅርብ አንድነት መሆኑን እንረዳለን። እኛም ድርሻችንን መወጣት እንደምንችል፣ በምድር ያለው ደካማ ፈቃዳችንም ከእግዚአብሔር ፈቃድ ጋር በእውነት ሊስማማና አብሮ ሊሠራ እንደሚችል የሚያረጋግጥልን ይህ በኢየሱስ ክርስቶስ በኩል በእግዚአብሔር ላይ ያለን መተማመን ብቻ ነው። እንግዲህ በሰማይ እንደሚደረግ በሁሉ ነገር የእግዚአብሔር ፈቃድ በእኛ ውስጥና በእኛ በኩል እንዲደረግ፣ ዕጣ ፈንታችንንና ግዴታችንን ልባችን እንደሚመኘው አንድ ነገር አድርገን እንቀበል፤ ያ እምነት ዓለምን ያሸንፋል።

7. ፈቃዱ እዚህ ከአብ ጋር ካለው ሕያው አንድነት፣ ወይም ከተባረከው ወልድ ሕያው ሀልዎት ሊነጠል አይገባም። የእግዚአብሔር ፈቃድ በውበቱ፣ በዕለት ተዕለት ሕይወት ላይ ባለው አተገባበሩና እየጨመረ በሚሄደው መገለጡ በእውነት ሊታወቅ የሚችለው በመንፈስ ቅዱስ በሚሰጥ መለኮታዊ ምሪት ብቻ ነው። ይህ ትምህርት የሚሰጠው ለጥበበኞችና ለአስተዋዮች ሳይሆን ለሕፃናት፣ የሚሰጣቸውን ለመጠበቅና በእርሱ ላይ ለመደገፍ ፈቃደኞች ለሆኑ የሕፃን ልብ ላላቸው ሰዎች ነው። መለኮታዊው ምሪት በእግዚአብሔር ፈቃድ መንገድ ይመራል።

8. ከእግዚአብሔር ጋር ያለን ስውር አንድነት ታላላቆቹን ትምህርቶች የምንደግምበትና የምንማርበት ስፍራ ነው… የማመልከው አምላክ ከፈቃዱ ጋር ፍጹም አንድነትን ከእኔ ይፈልጋል… አምልኮዬ ማለት፦ «አምላኬ ሆይ፥ ፈቃድህን ላደርግ ወደድሁ» ማለት ነው። የማለዳው ሰዓት፣ የውስጥ እልፍኝ፣ ከእግዚአብሔር ጋር ያለው ስውር አንድነት — በእነዚህ ውስጥ የእግዚአብሔርን ፈቃድ ማወቅ፣ እርሱን የመፈጸም ኃይል፣ እግዚአብሔር የሚፈቅደውን ሁሉ ለማድረግ ሙሉና ደስ የተሞላ ራስን መስጠት ሲፈለግና ሲኮተኮት፣ የእግዚአብሔርን ቃል ማጥናታችንና ጸሎታችን እውነተኛና ሙሉ በረከታቸውን ያመጣሉ።