የመለኮት ርዳታን መሻትና ጸጋን መልሶ ለማግኘት መታመን

ክርስቶስ፦

ልጄ ሆይ፥ በመከራ ቀን ብርታትን የምሰጥ ጌታ እኔ ነኝ። ነገርህ ሁሉ መልካም ባልሆነ ጊዜ ወደ እኔ ና። ወደ ጸሎት ለመመለስ መዘግየትህ ለሰማያዊ መጽናናት ትልቁ እንቅፋት ነው፤ በብርቱ ወደ እኔ ከመጸለይህ በፊት አስቀድመህ ብዙ መጽናናቶችን ትፈልጋለህና፤ በውጫዊ ነገሮችም ደስ ትሰኛለህና። ስለዚህ በእኔ የሚታመኑትን የማድን እኔ እንደ ሆንሁ፣ ከእኔም ውጭ ዋጋ ያለው ርዳታ ወይም የሚጠቅም ምክር ወይም ዘላቂ መድኃኒት እንደሌለ እስክትገነዘብ ድረስ ሁሉ ነገር የሚጠቅምህ ጥቂት ብቻ ነው።

አሁን ግን ከማዕበሉ በኋላ አይዞህ፤ በምሕረቴ ብርሃን እንደገና በርታ፤ ሁሉን ነገር በሙላት ብቻ ሳይሆን በብዛትና ከመጠን በላይ ልመልስ እኔ ቅርብ ነኝና፥ ይላል ጌታ። በእኔ ዘንድ የሚከብድ ነገር አለን? ወይስ ተስፋ ሰጥቶ እንደማያደርግ እሆናለሁን? እምነትህ የት ነው? ጸንተህ ቁም፤ በትዕግሥትም ቀጥል። ታጋሽና ደፋር ሰው ሁን፤ መጽናናትም በጊዜው ይመጣልሃል። ጠብቀኝ፤ ጠብቅ—እኔም ልፈውስህ እመጣለሁ።

የሚያውክህ ፈተና ብቻ ነው፤ የሚያስደነግጥህም ከንቱ ፍርሃት ነው።

ስለሚመጣው ጊዜ መጨነቅ ምን ይጠቅማል? በመከራ ላይ መከራ ከማምጣት በቀር ምን ያመጣልሃል? ለቀኑ ክፋቱ ይበቃዋል። ምናልባት ከቶ ላይሆኑ በሚችሉ በሚመጡ ነገሮች ማዘንም ሆነ ደስ መሰኘት ሞኝነትና ከንቱ ነው። ነገር ግን በእንዲህ ያሉ ምናቦች መታለል ሰዋዊ ነው፤ በጠላትም ሹክሹክታ መመራት የደካማ ነፍስ ምልክት ነው። እርሱ በአሁኑ ነገር ፍቅር ይሁን በሚመጣው ነገር ፍርሃት ቢያሸንፍህ ግድ የለውምና።

እንግዲህ ልብህ አይታወክ፤ አይፍራም። በእኔ እመን፤ በምሕረቴም ታመን። ከእኔ የራቅህ በመሰለህ ጊዜ ያን ጊዜ ብዙ ጊዜ እጅግ ቅርብህ ነኝ። ሁሉ ነገር ሊጠፋ ጥቂት ቀርቶታል ብለህ በምትፈርድበት ጊዜ ያን ጊዜ ብዙ ጊዜ ታላቅ ዋጋ ለማግኘት በመንገድ ላይ ነህ።

ነገሮች ከምኞትህ በተቃራኒ ሲሄዱ ሁሉ አልጠፋም። እንደ አሁኑ ስሜትህ ልትፈርድ፣ በመጣም ጊዜ ለማንኛውም መከራ እጅ ልትሰጥ፣ ወይም የማምለጥ ተስፋ ሁሉ እንደ ጠፋ አድርገህ ልትቀበለው አይገባህም። አንዳች ጊዜያዊ ችግር ብልክ ወይም የምትመኘውን መጽናናት ብወስድ እንደ ተተውህ አድርገህ ራስህን አትቍጠር። ይህ ወደ መንግሥተ ሰማያት የሚወስድ መንገድ ነውና፤ ሁሉ ነገር እንደ ምኞታችሁ ከሚሆንላችሁ ይልቅ አንተና የቀሩት ባሪያዎቼ በመከራ መፈተናችሁ ያለ ጥርጥር ይሻላችኋል። የተሰወረውን አሳብህን አውቃለሁ፤ ምናልባት በመከናወን እንዳትታበይና ያልሆንኸውን እንደ ሆንህ አድርገህ ራስህን እንዳታስብ፣ አንዳንድ ጊዜ በልብ መዛል መተውህ ለመዳንህ እንደሚጠቅም አውቃለሁ።

የሰጠሁትን ልወስደው፣ ደስ ባሰኘኝም ጊዜ ልመልሰው እችላለሁ። የምሰጠው የእኔ ሆኖ ይኖራል፤ ስለዚህ ስወስደው የአንተ የሆነን ምንም አልወስድም፤ በጎ ስጦታ ሁሉ ፍጹምም በረከት ሁሉ የእኔ ናቸውና።

መከራና ችግር ብልክብህ አትበሳጭ፤ ልብህም አይዝል። ፈጥኜ እንደገና ላነሣህና ኀዘንህን ሁሉ ወደ ደስታ ልለውጥ እችላለሁ። እንዲህ ባደርግብህ ጊዜ ጻድቅነቴም ታላቅ ምስጋና የሚገባኝ መሆኔም አይቀንስም።

በቅንነት ብታስብ፣ ነገሮችንም በእውነተኛ ብርሃናቸው ብትመለከት፣ በመከራ ከቶ እንዲህ ልትዝልና ልታዝን አይገባህም፤ ይልቁንም በኀዘን ማስጨነቄንና አለመራራቴን እንደ ተለየ የደስታ ነገር ቈጥረህ ደስ ሊልህና ልታመሰግን ይገባሃል። ለደቀ መዛሙርቴ፦ «አብ እንደ ወደደኝ እኔ ደግሞ ወደድኋችሁ» አልሁ፤ በእርግጥም ወደ ጊዜያዊ ደስታ ሳይሆን ወደ ታላቅ ተጋድሎ፣ ወደ ክብር ሳይሆን ወደ ንቀት፣ ወደ ሥራ ፈትነት ሳይሆን ወደ ድካም፣ ወደ ዕረፍት ሳይሆን በመጽናት ብዙ ፍሬ እንዲያፈሩ ላክኋቸው። ልጄ ሆይ፥ አንተም እነዚህን ቃላት አስብ።