ታላቅ ሰላም የሚያመጡ አራት ነገሮች

ክርስቶስ፦

ልጄ ሆይ፥ አሁን የሰላምንና የእውነተኛ ነጻነትን መንገድ አስተምርሃለሁ።

ልጄ ሆይ፥ ከራስህ ፈቃድ ይልቅ የሌሎችን ፈቃድ ለማድረግ ፈልግ።

ዘወትር ከብዙ ይልቅ ጥቂት እንዲኖርህ ምረጥ።

ሁልጊዜ የመጨረሻውን ስፍራ ፈልግ፤ ከሁሉም በታች ለመሆንም ፈልግ።

የእግዚአብሔር ፈቃድ በአንተ ፈጽሞ እንዲፈጸም ዘወትር ተመኝ፤ ጸልይም።

እነሆ፥ እንዲህ ያለው ሰው ወደ ሰላምና ወደ ዕረፍት ግዛት ይገባል።

ደቀ መዝሙሩ፦

ጌታ ሆይ፥ ይህ አጭር ንግግርህ ብዙ ፍጽምናን ይዟል። በቃላት አጭር ነው፤ በትርጉም ግን የተሞላና በፍሬ የበለጸገ ነው። በታማኝነት ልጠብቀው ብችል ኖሮ በእርግጥ እንዲህ በቀላሉ ባልታወክሁ ነበር። ተጨንቄና ተክዤ ራሴን ባገኘሁ ቍጥር ከዚህ ትምህርት እንደ ራቅሁ አገኛለሁና። ነገር ግን ሁሉን የምትችል፣ ለነፍሴም ደኅንነት የሚበጀውን ዘወትር የምትወድ አንተ፣ ቃልህን እጠብቅና መዳኔን እፈጽም ዘንድ ጸጋን አብዛልኝ።

በክፉ አሳቦች ላይ የሚቀርብ ጸሎት

አቤቱ አምላኬ፥ ከእኔ አትራቅ፤ አምላኬ ሆይ፥ እኔን ለመርዳት ፍጠን፤ ልዩ ልዩ አሳቦችና ታላቅ ፍርሃት በውስጤ ተነሥተዋልና፤ ነፍሴንም ያስጨንቃሉ። ሳልጐዳ ከእነርሱ እንዴት አመልጣለሁ? እንዴትስ አባርራቸዋለሁ?

«በፊትህ እሄዳለሁ» ይላል ጌታ፤ «የምድርንም ታላላቆች አዋርዳለሁ። የወኅኒውን ደጆች እከፍታለሁ፤ የተሰወረውንም ምሥጢር እገልጥልሃለሁ።»

ጌታ ሆይ፥ እንደ ተናገርህ አድርግ፤ ክፉ አሳቦችም ሁሉ ከፊትህ ይሽሹ። በመከራ ሁሉ ወደ አንተ መሸሽ፣ በአንተ መታመን፣ ከልቤ ጥልቅም ወደ አንተ መጮኽና መጽናናትህን በትዕግሥት መጠበቅ—ይህ ተስፋዬና ብቸኛ መጽናናቴ ነው።

ልቡና እንዲበራ የሚቀርብ ጸሎት

ቸሩ ኢየሱስ ሆይ፥ በውስጣዊ ብርሃን ጸዳል አብራኝ፤ ከልቤ መኖሪያም ጨለማን ሁሉ አስወግድ። የሚቅበዘበዙ አሳቦቼን ግታ፤ እጅግ በብርቱ የሚያጠቁኝንም ፈተናዎች አጥፋ። ስለ እኔ በብርቱ ተዋጋ፤ እነዚህንም ክፉ አራዊት—የሥጋን አማላይ ምኞቶች—አሸንፍ፤ በኃይልህ ሰላም ይመጣ ዘንድ፣ የምስጋናህም ሙላት ንጹሕ ሕሊና በሆነው በቅዱሱ አደባባይ ያስተጋባ ዘንድ። ነፋሳትንና ማዕበሎችን እዘዝ፤ ባሕሩን፦ «ዝም በል»፣ የሰሜንንም ነፋስ፦ «አትንፈስ» በለው፤ ታላቅ ጸጥታም ይሆናል።

ብርሃንህንና እውነትህን ላክ፤ በምድርም ላይ ያብሩ፤ አንተ እስክታበራኝ ድረስ እንደ ባዶና መልክ እንደሌላት ምድር ነኝና። ጸጋህን ከላይ አፍስስ። ልቤን በሰማያዊ ጠል አርሰው። እጅግ መልካሙን ፍሬ ታፈራ ዘንድ ምድሪቱን የሚያጠጡትን የአምልኮ ምንጮች ክፈት። በኃጢአት ክብደት የተጫነውን ልቤን አንሣ፤ የላይኛውን ደስታ ጣፋጭነት ቀምሼ ምድራዊ ነገሮችን በማሰብ ደስ እንዳይለኝ ምኞቴን ሁሉ ወደ ሰማያዊ ነገሮች ምራ።

ከፍጥረታት ጊዜያዊ መጽናናት ሁሉ ነጥቀህ አድነኝ፤ ምኞቶቼን ፈጽሞ ሊያረጋጋና ሊያረካ የሚችል አንድም ፍጡር የለምና። በማይለያይ የፍቅር ማሰሪያ ከራስህ ጋር አጣብቀኝ፤ የሚወድህን ልታረካ የምትችል አንተ ብቻ ነህና፤ ያለ አንተም ሁሉ ነገር ዋጋ ቢስ ነው።