የኢየሱስ የቅርብ ወዳጅነት

ኢየሱስ በአጠገብ ሲሆን ሁሉ መልካም ነው፤ ምንም ነገር አስቸጋሪ አይመስልም። እርሱ በሌለ ጊዜ ግን ሁሉ ከባድ ነው። ኢየሱስ በውስጥ ካልተናገረ ሌላው መጽናናት ሁሉ ባዶ ነው፤ አንዲት ቃል ብቻ ቢናገር ግን ታላቅ መጽናናትን ያመጣል።

ማርታ፦ «መምህሩ መጥቶአል ይጠራሽማል» ባለቻት ጊዜ መግደላዊት ማርያም ከልቅሶዋ ወዲያው አልተነሣችምን? ኢየሱስ አንድን ሰው ከእንባ ወደ መንፈስ ደስታ የሚጠራባት ሰዓት የተባረከች ናት።

ያለ ኢየሱስ ምንኛ ደረቅና ደንዳና ነህ! ከእርሱ በቀር ሌላ ነገር ብትመኝ ምንኛ ሰነፍና ከንቱ ነህ! ይህ ዓለሙን ሁሉ ከማጣት የሚበልጥ ጕዳት አይደለምን? ያለ ኢየሱስ ዓለም ምን ሊሰጥህ ይችላል? ያለ እርሱ መኖር የማያቋርጥ ሲኦል ነው፤ ከእርሱ ጋር መኖር ግን ጣፋጭ ገነት ነው። ኢየሱስ ከአንተ ጋር ከሆነ ማንም ጠላት ሊጐዳህ አይችልም።

ኢየሱስን የሚያገኝ ብርቅ የሆነ መዝገብን፣ በእርግጥም ከመልካም ነገር ሁሉ በላይ የሆነውን መልካም ነገር ያገኛል፤ እርሱን የሚያጣ ግን ከዓለሙ ሁሉ የሚበልጥ ያጣል። ያለ ኢየሱስ የሚኖር ሰው ከድሆች ሁሉ የሚደኸይ ነው፤ በጸጋው እንደሚኖር ሰው ባለጠጋ ግን ማንም የለም።

ከኢየሱስ ጋር እንዴት መነጋገር እንደሚገባ ማወቅ ታላቅ ብልሃት ነው፤ እርሱን እንዴት መጠበቅ እንደሚገባ ማወቅም ታላቅ ጥበብ ነው። ትሑትና ሰላማዊ ሁን፤ ኢየሱስም ከአንተ ጋር ይሆናል። ለእግዚአብሔር ያደርህና ጸጥ ያልህ ሁን፤ እርሱም ከአንተ ጋር ይኖራል። ወደ ውጭው ዓለም ብትመለስ ፈጥነህ ልታባርረውና ጸጋውን ልታጣ ትችላለህ። ብታባርረውና ብታጣውስ ወደ ማን ትሄዳለህ? ያን ጊዜስ ማንን ወዳጅ አድርገህ ትፈልጋለህ? ያለ ወዳጅ በመልካም ልትኖር አትችልም፤ ኢየሱስም ከሁሉ በላይ ወዳጅህ ካልሆነ እጅግ ታዝናለህ፤ ብቸኛም ትሆናለህ። ስለዚህ በሌላ በማንም ብትታመን ወይም ደስ ቢልህ ስንፍና ታደርጋለህ። ኢየሱስን ከማሳዘን ይልቅ የዓለሙን ሁሉ ተቃውሞ ምረጥ። ከሚወዱህ ሁሉ መካከል እርሱ የተለየ ፍቅርህ ይሁን። ሁሉ ነገር ስለ ኢየሱስ ብሎ ይወደድ፤ ኢየሱስ ግን ስለ ራሱ ይወደድ።

ኢየሱስ ክርስቶስ ብቻውን በተለየ ፍቅር ሊወደድ ይገባዋል፤ ከወዳጆች ሁሉ መካከል መልካምና ታማኝ እርሱ ብቻ ነውና። ስለ እርሱና በእርሱ ወዳጆችህንም ጠላቶችህንም በአንድነት ልትወድ ይገባሃል፤ ሁሉም እንዲያውቁትና እንዲወዱትም ወደ እርሱ ጸልይ።

ተወዳዳሪ የሌለው የእግዚአብሔር ብቻ ነውና የተለየ ምስጋናን ወይም ፍቅርን ከቶ አትመኝ። የማንም ፍቅር በአንተ ላይ እንዲያተኵር ከቶ አትመኝ፤ ራስህንም በማንም ፍቅር እንድትጠመድ አትፍቀድ፤ ነገር ግን ኢየሱስ በአንተና በመልካም ሰው ሁሉ ይኑር። በውስጥህ ንጹሕና ነጻ ሁን፤ ከማንም ፍጥረት ጋር አትጠላለፍ።

ጌታ ምን ያህል ጣፋጭ እንደ ሆነ በጸጥታ ልትጠብቅና ልታይ ብትወድ፣ ንጹሕና የተከፈተ ልብ ወደ እግዚአብሔር ልታመጣ ይገባሃል። በእርግጥ ከእርሱ ብቻ ጋር አንድ ትሆን ዘንድ ሁሉን ነገር ትተው ዘንድ ጸጋው ካላዘጋጀህና ካልሳበህ በቀር ይህን ደስታ ከቶ አታገኘውም።

የእግዚአብሔር ጸጋ ወደ ሰው በመጣ ጊዜ ሁሉን ማድረግ ይችላል፤ ጸጋው በተለየው ጊዜ ግን ድሀና ደካማ ይሆናል፤ ለመከራ እንደ ተተወ ይሆናል። ቢሆንም በዚህ ሁኔታ ልቡ ሊዝል ወይም ተስፋ ሊቈርጥ አይገባውም። ይልቁንም የእግዚአብሔርን ፈቃድ በጸጥታ ሊጠብቅ፣ የሚደርስበትንም ሁሉ ኢየሱስ ክርስቶስን እያመሰገነ ሊታገሥ ይገባዋል፤ ከክረምት በኋላ በጋ፣ ከሌሊት በኋላ ቀን፣ ከማዕበልም በኋላ ታላቅ ጸጥታ ይመጣልና።