ትሕትና

ከአንተ ጋር ስለ ሆኑ ወይም ስለሚቃወሙህ ሰዎች አትጨነቅ፤ ነገር ግን በምታደርገው ሁሉ እግዚአብሔር ከአንተ ጋር እንዲሆን ተጠንቀቅ። ሕሊናህን ንጹሕ አድርገህ ጠብቅ፤ እግዚአብሔርም ይጠብቅሃል፤ እግዚአብሔር ሊረዳው የሚሻውን ሰው የሰው ክፋት ሊጎዳው አይችልምና። በዝምታ መከራን መቀበልን ብታውቅ፣ ያለ ጥርጥር የእግዚአብሔርን እርዳታ ታያለህ። እርሱ መቼና እንዴት እንደሚያድንህ ያውቃል፤ ስለዚህ ራስህን በእጁ አኑር፤ ሰዎችን መርዳትና ከጭንቀት ሁሉ ነጻ ማውጣት የመለኮት ሥልጣን ነውና።

ሌሎች ጕድለታችንን ቢያውቁና ቢገሥጹን ብዙ ጊዜ ይጠቅመናል፤ ይበልጥ ትሕትናን ይሰጠናልና። ሰው ስለ ጕድለቱ ራሱን ሲያዋርድ በዙሪያው ያሉትን በቀላሉ ያረጋጋል፤ የተቈጡበትንም ፈጥኖ ያበርዳል።

እግዚአብሔር የሚጠብቀውና የሚያድነው ትሑቱን ሰው ነው፤ የሚወዳቸውና የሚያጽናናቸውም ትሑታንን ነው። ወደ ትሑታን ይመለሳል፤ ታላቅ ጸጋንም ይሰጣቸዋል፤ ይኸውም ከተዋረዱ በኋላ ወደ ክብር ያነሣቸው ዘንድ ነው። ምሥጢሩን ለትሑታን ይገልጣል፤ በቸርነትም ጥሪ ወደ እርሱ እንዲመጡ ይጋብዛቸዋል። ስለዚህ ትሑት ሰው በብዙ ጭንቀት መካከል ሰላምን ያገኛል፤ መታመኑ በዓለም ሳይሆን በእግዚአብሔር ነውና። ስለዚህ ራስህን ከሌሎች ሁሉ እንደምታንስ አድርገህ እስክትቈጥር ድረስ አንዳች እድገት እንዳደረግህ አታስብ።