ሕሊናን መመርመርና ለመታረም መወሰን

ክርስቶስ፦

ከሁሉ በላይ የእግዚአብሔር ካህን ይህን ቅዱስ ቍርባን ለመቀደስና ለመቀበል በጥልቅ የልብ ትሕትናና በልመና አክብሮት፣ በሙሉ እምነትና እግዚአብሔርን ለማክበር ባለ ቅን ዓላማ ሊቀርብ ይገባዋል።

እንግዲህ ሕሊናህን በጥንቃቄ መርምር። ምንም ሸክም እንዳይኖርብህ፣ ምንም ጸጸት እንዳይወጋህ፣ በዚህም ለመቅረብ ነጻ እንድትሆን በእውነተኛ ጸጸትና በትሑት ኑዛዜ በምትችለው ሁሉ አጽዳው፤ አንጻውም። የኃጢአቶችህ ሁሉ ትዝታ ያሳዝንህ፤ በተለይም የዕለት ዕለት በደሎችህን አልቅስ፤ እዘንም። ከዚያም ጊዜ ቢፈቅድልህ ምኞቶችህ ያመጡብህን ጕስቍልና ሁሉ በልብህ ምሥጢራዊ ጥልቀት ለእግዚአብሔር ተናዘዝ።

ገና እንዲህ ዓለማዊ፣ እንዲህ ሥጋዊ፣ እንዲህ በስሜት የምትነዳና ራስህን ያልገደልህ ስለ ሆንህ አልቅስ፤ እዘንም፤ እንዲህ በሚቅበዘበዝ ምኞት የተሞላህ፣ ውጫዊ ስሜቶችህን በመጠበቅ እንዲህ ቸልተኛ፣ ብዙ ጊዜ በብዙ ከንቱ ቅዠቶች እንዲህ የተጠመድህ፣ ወደ ውጫዊ ነገሮች እንዲህ ያዘነበልህና በውስጥ ላለው እንዲህ ግድ የሌለህ፣ ለሳቅና ለቅብጠት እንዲህ የተጋህና ለኀዘንና ለእንባ እንዲህ ፈቃደኛ ያልሆንህ፣ ወደ ምቾትና ወደ ሥጋ ደስታ እንዲህ ያዘነበልህና ለተጋድሎና ለትጋት እንዲህ የቀዘቀዝህ፣ አዲስ ነገር ለመስማትና ውብ ነገር ለማየት እንዲህ ጕጕ የሆንህና ውርደትንና ዝቅታን ለመቀበል እንዲህ የዘገየህ፣ ብዙ ለማግኘት እንዲህ የምትስገበገብ፣ በመስጠት እንዲህ ንፉግና በመያዝ እንዲህ ጥብቅ፣ በንግግር እንዲህ የማታስብ፣ ዝም ለማለት እንዲህ የምታመነታ፣ በጠባይ እንዲህ ሥርዓት የለሽ፣ በሥራ እንዲህ የተዘበራረቅህ፣ በማዕድ እንዲህ ሆዳም፣ ለእግዚአብሔር ቃል እንዲህ ደንቆሮ፣ ለዕረፍት እንዲህ ፈጣንና ለሥራ እንዲህ ዳተኛ፣ ለከንቱ ወሬ እንዲህ ንቁ፣ ቅዱሱን የሌሊት ጸሎት በመጠበቅ እንዲህ እንቅልፋምና እስኪያልቅ እንዲህ የምትቸኵል፣ በልብ ትኵረትህ እንዲህ የምትባዝን፣ የሰዓታትን ጸሎት በማድረስ እንዲህ ቸልተኛ፣ በመቀደስ እንዲህ ለብ ያልህ፣ በመቀበል እንዲህ ልብ የለሽ፣ እንዲህ ፈጥነህ የምትበታተን፣ ፈጽመህ በውስጥህ የምትሰበሰበው እንዲህ አልፎ አልፎ፣ ለቍጣ እንዲህ ፈጥነህ የምትነሣሣ፣ በሌሎች ላይ ቅር ለመሰኘት እንዲህ የቀረብህ፣ ለመፍረድ እንዲህ የተጋህ፣ በመኰነን እንዲህ ጨካኝ፣ በደስታ ጊዜ እንዲህ የምትፈነድቅና በመከራ ጊዜ እንዲህ የምትደክም፣ ብዙ ጊዜ መልካም ውሳኔዎችን የምታደርግና ከእነርሱ ግን ጥቂቶችን ብቻ ወደ ሥራ የምታወጣ ስለ ሆንህ አልቅስ።

እነዚህንና ሌሎችንም ጕድለቶች ስለ ድካምህ በኀዘንና በታላቅ ቅሬታ ተናዝዘህ ካለቀስህባቸው በኋላ፣ ሕይወትህን ቀን በቀን ለማረምና በመልካምነት ወደ ፊት ለመግፋት ጽኑ ውሳኔ አድርግ። ከዚያም ወደ እግዚአብሔር ለመቅረብና መሥዋዕት ለማቅረብ፣ የሥጋዬንም ቅዱስ ቍርባን በጥቅም ለመቀበል የተገባህ ሆነህ እንድትቈጠር፣ ሥጋህንም ነፍስህንም በእምነት ለጥበቃዬ አደራ በመስጠት፣ በፍጹም ራስን መተውና በሙሉ ፈቃድህ ለስሜ ክብር ለዘላለም መሥዋዕት አድርገህ በልብህ መሠዊያ ላይ ራስህን አቅርብ። በቅዳሴና በቍርባን ከክርስቶስ ሥጋ መሥዋዕት ጋር ራስህን በንጽሕናና በሙሉ ለእግዚአብሔር ከማቅረብ የበለጠ የተገባ መባ፣ ኃጢአትንም ለማጠብ የበለጠ ካሳ የለምና።

ሰው የሚችለውን ቢያደርግና በእውነት ንስሐ ቢገባ፣ ለጸጋና ለይቅርታ ወደ እኔ የቱንም ያህል ጊዜ ቢመጣ፣ «እኔ ሕያው ነኝ፥ ይላል ጌታ እግዚአብሔር፥ ኃጢአተኛው ከመንገዱ ተመልሶ በሕይወት ይኖር ዘንድ እንጂ በኃጢአተኛው ሞት ደስ አይለኝም»፤ ኃጢአቱንም ከእንግዲህ አላስብም፤ ሁሉም ይቅር ይባልለታል።