ሁሉም ከክርስቶስ ወገን ሊቆሙ ይገባቸዋል

ክርስቶስ ድል የሚያደርግ ከሆነ፣ ለሕዝቦችና ለመንግሥታት ልጁን መሳም (መዝሙር 2)፣ ክርስቶስንና ሃይማኖቱን መቀበል፣ ከክርስቶስ ወገን መቆምና በዓለም ውስጥ ጉዳዩን የራሳቸው አድርገው መያዝ ከሁሉ የተሻለ መንገድ ነው፤ የእርሱ ወገን በመጨረሻ ብርቱው ወገን ሆኖ ይገኛልና፤ ክርስቶስ በኃያላን ላይ ውጊያውን ለመዋጋት ርዳታችንን እስኪጠቀም ድረስ ቢያከብረን ብፁዓን ነን (መሳፍንት 5:23)። በአንድ መንግሥት ውስጥ ያለ እውነተኛ ሃይማኖት ሁሉን እንደሚደግፍ እንደ ቤት ዋና ምሰሶና እንደ ድንኳን ዘንግ ነው፤ 2. እንዲሁም ለቤተሰቦች፣ ክርስቶስ የቤተሰቡ ዋና ገዢ ይሁን፤ 3. እያንዳንዱም ክርስቶስ በቅርበት የሚያድርበትና የሚገዛበት የክርስቶስ ቤት ይሁን፤ ክርስቶስ ባለበት ደስታ ሁሉ መከተሉ አይቀርም። ክርስቶስ ከሄደ ሁሉም ይሄዳል፤ የክርስቶስ አገዛዝ በሥርዓቶቹና በመንፈሱ ባለበት ስፍራ፣ በዚያ ከእርሱ በታች ያለው አገዛዝ ሁሉ ይከናወናል፤ ሃይማኖት በሌሎች በጎነቶች ሁሉ ውስጥ ሕይወትንና ጸጋን ያሳድራል፤ ያለ እርሱ ራስ እንደሌለው ያማረ ሥዕል ብቻ ናቸው። የክርስቶስ ሕጎች በልብ በተጻፉበት ስፍራ ሌሎች መልካም ሕጎች ሁሉ ከሁሉ በተሻለ ሁኔታ ይጠበቃሉ፤ አስቀድመው የክርስቶስን ሕግ ከናቁት በቀር የሰውን ሕግ የሚንቅ የለም። ከሰዎች ሁሉ በክርስቶስ የሚመራ ሰው ከሁሉ የተሻለ ነው፤ በዓለም ካሉ ፍጥረታት ሁሉ ደግሞ በገዛ ፈቃዱና በስሜቱ የሚመራ ሰው ከዲያብሎስ ቀጥሎ ከሁሉ የከፋ ነው። የደካሞች ነገሮች ደስታ በብርቱዎች በመገዛታቸው ላይ የቆመ ነው፤ ለዕውር ሰው የሚያየው ቢመራው ይሻለዋል፤ ለበጎችና ራሳቸውን መርዳት ለማይችሉ እንደ እነርሱ ላሉ ፍጥረታት በሰው ቢመሩ ይሻላቸዋል፤ ለሰውም በክርስቶስ መመራት ከሁሉ የሚበልጥ ብፅዕና ነው፤ አገዛዙ እጅግ ድል አድራጊ ስለ ሆነ ከታላላቅ ጠላቶቻችን ፍርሃትና አደጋ ነጻ ያወጣናልና፤ ተፈጥሮአችንም ሊቀበለው ወደሚችለው ወደ ታላቁ ደስታ ሊያደርሰን ይመራልና። ይህ ክርስቶስ በውስጣችን በሚነግሥበት ጊዜ ደስ እንዲለን ሊያደርገን ይገባል። ሰሎሞን ዘውድ በጫነ ጊዜ ሕዝቡ ምድር እስክትናወጥ ድረስ እልል አሉ፤ እኛማ በንጉሣችን በክርስቶስ እንዴት አብልጠን ደስ ሊለን ይገባል!

እንዲሁም ነፍሳቸው ለእኛ ውድ ስለ ሆነች ሰዎች፣ ክርስቶስ በእነርሱም ውስጥ እንዲነግሥ፣ ክርስቶስ በእሳት እንዲያጠምቃቸው፣ እነዚህም ፍንጣሪዎች በውስጣቸው እንዲቀጣጠሉ መጣር ይገባናል (ማቴዎስ 3:11)። ሰዎች የሚያሳድጓቸውን ልጆች እነርሱ እንደሚሉት መንፈሳቸውንና ወኔያቸውን ለመንከባከብ ይደክማሉ፤ በዚህ ሕይወት ልዩ ልዩ ጉዳዮችና መከራዎች ውስጥ እንደሚጠቅማቸው ያስባሉና። ኦ፣ እኛ ግን በእነርሱ ውስጥ ያሉትን የጸጋ ፍንጣሪዎች እንንከባከብ፤ የተፈጥሮ ወኔ በታላላቅ መከራዎች ውስጥ ይከዳልና፤ እነዚህ ፍንጣሪዎች ግን በታላላቅ ክፉ ነገሮች ላይ አሸናፊዎች ያደርጓቸዋል።

የክርስቶስ ፍርድ ድል አድራጊ የሚሆን ከሆነ፣ የሮማ ካቶሊክ ሥርዓት ተቃራኒ ሥሪት ሆኖ የተንደላቀቀ ሥራ ፈትነትን ለመጠበቅ በሰው ብልሃት የተቋቋመ ስለ ሆነ መውደቅ አለበት። ክርስቶስ ባበራላቸው ሰዎች ልብ ውስጥም አስቀድሞ ወድቆአል። ሐሰት ነው፤ በሐሰትም ላይ፣ ለኃጢአትና ለስሕተት በተገዛ ሰው የማይሳሳት ፍርድ ላይ የተመሠረተ ነው። የእውነት መርሕ ተብሎ የተወሰደው ነገር የስሕተት መርሕ በሆነ ጊዜ፣ በእርሱ ላይ ይበልጥ በተደገፍን መጠን አደጋው ይበልጣል።