የቪክቶሪያ ዩኒቨርሲቲ (ዩቪክ)

ውቢቱ ወደ ሆነችው ወደ ቪክቶሪያ፣ ብሪቲሽ ኮሎምቢያ ከተዛወርንበት ከ1983 ጀምሮ ለአካባቢው የዩኒቨርሲቲ ተማሪዎች ጥልቅ ፍቅር አድሮብኛል። በግቢው ውስጥ ጥቂት የተለያዩ የክርስቲያን አገልግሎቶች አሉ፤ በአብዛኞቹም ተሳትፌአለሁ፤ በተማሪዎች ስብሰባዎች ላይ በመናገር፣ በጸሎት ቡድኖች በመካፈል፣ ለበርካታ ዓመታትም በቤቴ ሳምንታዊ ስብሰባዎችን በማስተናገድ።

በኢንተርቫርሲቲ ክርስቲያን ፌሎውሺፕ (አይ.ቪ.ሲ.ኤፍ.) ሳምንታዊ ስብሰባዎች በአንዱ ላይ እንድናገር ተጋበዝሁ። ግብዣውን በደስታ ተቀበልሁ፤ መልእክቴንም አዘጋጅቼ ስብሰባው ወደሚካሄድበት የዩኒቨርሲቲው ሕንፃ ደረስሁ። አንድ ተማሪ ሰላምታ ሰጠኝ፤ ከዚያም ትንሽ እያፈረ፣ የሆነ መደበላለቅ ተፈጥሮ ሌላ ተማሪ የዚያ ምሽት ተናጋሪ እርሱ እንደሚሆን አስቦ «ከደሴቱ ሰሜናዊ ክፍል» ካለ ግቢ መጥቶ ስለ ነበር ጊዜዬን በግማሽ ሰዓት መወሰን እችል እንደ ሆነ ጠየቀኝ። ጊዜውን በሙሉ እርሱ ቢወስደው ሙሉ በሙሉ ፈቃደኛ እንደ ሆንሁና ፈጽሞ እንደማልከፋ መለስሁለት። እነዚህ ትጉህ ተማሪዎች በጌታና በቃሉ ዙሪያ ኅብረት ሲያደርጉ ከእነርሱ ጋር ተቀምጬ መካፈል አስደሰተኝ።

ቀደም ብዬ በተረክኋቸው በብዙ ታሪኮቼ እንደ ሆነው ሁሉ፣ ይህ «ቀጠሮ መሰረዝ» ከአይ.ቪ.ሲ.ኤፍ. ጋር ወደሚመጡት ድንቅ ጊዜያት የሚያሻግር የመሻገሪያ ድንጋይ ሆኖ ተገኘ። ምናልባት ውለታ እንዳለብኝ ተሰምቷቸው ይሆናል፤ ምክንያቱም ብዙም ሳይቆይ፣ አንድ ምሽት ከቤተ ክርስቲያን ስብሰባ ወደ ቤት እንደ ደረስሁ፣ በሌሊት የስልክ ጥሪ ደረሰኝ። «መጋቢ ኢቫንስ፣ በዓርብ ምሽት (ከሁለት ቀን በኋላ) በገና ግብዣችን ላይ መጥተው መናገር ይችላሉ? ተናጋሪ እንዲሆን የታቀደው ሰው በቶሮንቶ ታሟል፤ መሪያችንም በአንድ ጉባኤ ላይ ከእርሱ ጋር ነው። ዛሬ ቀደም ብሎ ደውሎ እርስዎን እንድደውልልዎ ጠየቀኝ፤ ቀደም ብዬ በደወልሁ ጊዜ ግን ባለቤትዎ እርስዎ ከቤት ውጭ እንደ ሆኑ ነገሩኝ። ሌሎች በርካታ መጋቢዎችን ሞክሬአለሁ፤ ሁሉም ግን ጊዜው በጣም አጭር ነው አሉ። እባክዎ ሊመጡ ይችላሉ?» እሺ ብዬ በመለስሁለት ጊዜ («ዳሩ ግን ጌታን እርሱም ክርስቶስ በልባችሁ ቀድሱት። በእናንተ ስላለ ተስፋ ምክንያትን ለሚጠይቁዋችሁ ሁሉ መልስ ለመስጠት ዘወትር የተዘጋጃችሁ ሁኑ፥ ነገር ግን በየዋህነትና በፍርሃት ይሁን።» — 1ኛ ጴጥሮስ 3:15)፣ እጅግ ተደሰተ፤ በእፎይታ በረጅሙ ሲተነፍስም ሰማሁ። ከ100 በላይ ተማሪዎች የተገኙበት ድንቅ ምሽት ነበር። በዚህም ሁኔታ ከአይ.ቪ.ሲ.ኤፍ. (ኢንተርቫርሲቲ ክርስቲያን ፌሎውሺፕ) እና ከመሪው ከጃክ ዲ. ጋር ያለኝ የፍቅር ትስስር ተጀመረ። ከተዘዋዋሪ አገልግሎቴ ወደ ቤት በተመለስሁ ቁጥር ጃክን በሥራው እደግፈው ነበር።

አንድ አስገራሚ «አጋጣሚ» አሁን ገና ተከሰተ። ጃክን ለብዙ ዓመታት አላየሁትም ነበር፤ ነገር ግን ከላይ ያለውን ስጽፍ ሳለሁ ስልኬ ጮኸ። ጃክ ነበር። ከሰዓት በኋላውን በቪክቶሪያ ነበር፤ አብረን ቡና ልንጠጣ እንችል እንደ ሆነም ጠየቀኝ! እነዚያን የጥንት ጊዜያት እያስታወስን እንዴት ያለ መልካም ጊዜ አሳለፍን! አጋጣሚ ነው? አይመስለኝም። አብ በጻፍሁት ነገር ደስታውን እየገለጸ የነበረበት «የእግዚአብሔር አጋጣሚ» እንደ ሆነ ማመን እመርጣለሁ።

ከጊዜ በኋላ፣ ጃክ ወደ ሌላ አገልግሎትና ወደ ሌላ ክፍለ ግዛት ከሄደ በኋላ፣ በሌላ የግቢ አገልግሎት ተሳተፍሁ፤ ይኸውም ቶኒ ጄ. የሚመራው ዩ.ሲ.ኤም. (ዩኒቨርሲቲ ክርስቲያን ሚኒስትሪስ) ነው። እንደ ገናም የቅርብ ትስስር ተፈጠረ፤ እኔና አንም ለበርካታ ዓመታት በየሳምንቱ ከ10–12 የሚሆኑ ተማሪዎችን በቤታችን ሰብስበን እናስተናግድ ነበር።

ለተማሪዎቹ ያለኝ ፍቅር ሌላም መልክ ያዘ። ግቢውን በሚያዋስነው 2 ኪሎ ሜትር ክብ መንገድ ዙሪያ በየሳምንቱ፣ ብዙውን ጊዜ ሰኞ ቀን፣ የጸሎት ጉዞ ማድረግ ጀመርሁ። አንዳንድ ጊዜ ተማሪዎች አብረውኝ ይሄዱ ነበር፤ አብዛኛውን ጊዜ ግን ብቻዬን ነበርሁ። ይህን ለሃያ ዓመታት ያህል አደረግሁ፤ በጸሎት ጉዞ ላይ ያለ ሌላ ሰው ያየሁበት ጊዜ እምብዛም አልነበረም። እንዲያውም በቪክቶሪያ ላሉት አብያተ ክርስቲያናት ሁሉ የተላከ ኢሜይል ጽፌ አባሎቻቸው እኔ እንደማደርገው ለማድረግ በየሳምንቱ አንድ ሰዓት እንዲለዩ አበረታታሁ — ነገር ግን የታወቀ ምላሽ እምብዛም አልነበረም (እንዴት ያሳዝናል!) — በአርትራይተስ ምክንያት በእግሮቼ ላይ እየጨመረ የመጣው ሕመም ይህን እስካስቆመው ድረስ ቀጠልሁ። አንገቴን ደፍቼ ከአውቶቡስ መናኸሪያዬ 200 ሜትር ሲቀረኝ ቆሜ ሳለሁ፣ ከኋላዬ አንድ ድምፅ ስሜን ጠራ። የአይ.ቪ.ሲ.ኤፍ. መሪ ቴሪ ነበረች። በዚህም ሁኔታ አብረን ለመጸለይ በየሳምንቱ በቤቴ እየተገናኘን አዲስ ግንኙነት ጀመርሁ፤ ይህም በሳምንታዊ ስብሰባችን ዘወትር ይመጡ ከነበሩት አንዱን ማይክን ለማግባት እስክትሄድ ድረስ ቀጠለ።

የመጨረሻውን ጉዞዬን ካደረግሁ ብዙም ሳይቆይ አንድ ወጣት ወደ ቤተ ክርስቲያናችን መጣ። ሰላምታ ሰጥቼው፦ «ወደዚህ ምን አመጣህ?» ብዬ ጠየቅሁት፤ እርሱም፦ «እርስዎ ነዎት!» ብሎ መለሰ። ቀጥሎም እንዲህ ሲል አስረዳ፦ «በቅርቡ ከሌሎች የድኅረ ምረቃ ተማሪዎችና ፕሮፌሰሮች ጋር በዩቪክ ግቢ ዙሪያ የጸሎት ጉዞ ጀምሬአለሁ። በዚያ በየሳምንቱ ይዞር ስለ ነበረው ሰው ሰምተናል፤ ስለዚህ እርስዎን በዓይኔ ለማየት መጣሁ።» ሸክሜን አሁን ሌሎች እንደ ተሸከሙት ሳውቅ ልቤ እንዴት ዘመረ! እግዚአብሔር በየቦታው ሠራተኞቹ አሉት።

አን ካረፈች በኋላ ለ40 ዓመታት የኖርሁበትን ቤቴን የምሸጥበት ጊዜ እንደ ደረሰ ተሰማኝ። ይህን ምዕራፍ ስጽፍ፣ ሠራተኞች ከአንድ ወር በኋላ ቤቱን ለሚረከቡት ለአዲሶቹ ባለቤቶች ቤቴን ሲያሻሽሉ የኤሌክትሪክ መሰርሰሪያዎችና መጋዞች ድምፅ ይሰማኛል። እነርሱም በሚቀጥለው ምዕራፍ የምታገኟቸው፣ እጅግ ውድ ወዳጆቼም የሆኑት ጄምስና ባለቤቱ ጆሲ ናቸው። ቤታቸውን በቴሪ አመራር ሥር ላሉት የአይ.ቪ.ሲ.ኤፍ. ተማሪዎች የማከራየት ዓላማ እንዳላቸው ሳውቅ ምን ያህል እንደ ተደሰትሁ መገመት ትችላላችሁ! የጌታ ስም እዚህ መመስገኑን ይቀጥላል፤ ለረጅም ጊዜ በጸለይሁባቸው ክፍሎች ውስጥ ብዙዎች እርሱን ያውቃሉ! ጌታ ኢየሱስ ሆይ፣ አመሰግንሃለሁ!