መግቢያ

ለብዙ ዓመታት እነዚህ ምዕራፎች ለእኔ የተለየ ትርጉም አልነበራቸውም፤ ነገር ግን ገና በጊዜ የእግዚአብሔርን ቃል በቅደም ተከተል እንዳነብ በመመራቴ ማመስገኔን ከቶ አላቋረጥሁም፤ እነዚህ ምዕራፎች በመጀመሪያ ለእኔ በተለየ ሁኔታ የከበሩት በዚሁ ልማድ በኩል ነበር። በቼኪያንግ ክፍለ ሀገር የሚስዮን ጉዞ እያደረግሁ ሳለሁ፥ እጅግ ክፉ በሆነች አንዲት ከተማ ውስጥ ሌሊቱን ማሳለፍ ግድ ሆነብኝ። የእንግዳ ማረፊያዎቹ ሁሉ አስከፊ ስፍራዎች ነበሩ፤ ሰዎቹም ሕሊናቸው የደነዘዘ፥ ልባቸውም ለእውነት የታተመ ይመስል ነበር። የገዛ ልቤ ተጨንቆ ነበር፤ ዕረፍትም ሊያገኝ አልቻለም፤ በማግሥቱም ማለዳ እጅግ ተክዤ፥ በመንፈስም በእውነት ተርቤና ተጠምቼ ነቃሁ።

መጽሐፍ ቅዱሴን በዘኍልቍ ሰባተኛው ምዕራፍ ላይ ስገልጥ፥ ያን ረጅምና ድግግሞሽ የሞላበትን ምዕራፍ በዚያች ሰዓት ማንበብ የማልችል መሰለኝ፤ ነፍሴን ወደሚመግብ ወደ ሌላ ምዕራፍ መሄድ አለብኝ ብዬ አሰብሁ። ይሁን እንጂ የዕለቱን የንባብ ድርሻዬን ትቼ ማለፍ ደስ አላሰኘኝም፤ ስለዚህ ከጥቂት ትግል በኋላ እግዚአብሔር በዘኍልቍ 7 በኩል እንኳ እንዲባርከኝ እየጸለይሁ ላነብበው ቈረጥሁ። በዚያ ጸሎት ውስጥ ብዙ እምነት አልነበረም ብዬ እፈራለሁ፤ ነገር ግን ኦ! እንዴት በብዛት ተመለሰልኝ! እግዚአብሔርስ ምን ዓይነት ግብዣ አበላኝ! የገዛ ታላቅ የፍቅር ልቡን ገለጠልኝ፤ ይህንና ከእርሱ በፊት ያለውን ምዕራፍ ከዚያ ቀደም ፈጽሞ ባልተረዳሁት መንገድ እንድረዳ መክፈቻውን ሰጠኝ። በዚያን ጊዜ ለእኔ እንደ ጠቀሙኝና ከዚያም ወዲህ ዘወትር እንደ ጠቀሙኝ፥ እግዚአብሔር በእነርሱ ላይ የምናደርገውን ማሰላሰል ለሌሎችም እንዲሁ የሚጠቅም ያድርገው።

በአዲስ ኪዳን ይበልጥ ተገልጦ የሚታየው ብዙ ነገር በእነዚህ ምዕራፎች ውስጥ በዘር መልክ ተገልጦአል። በብሉይ ኪዳን ዘመን ብዙ በረከቶች በመጠንና ለጊዜው ይገኙ ነበር፤ በዚህ ዘመን ግን በሙላታቸውና በቋሚነታቸው የእኛ ናቸው። ለምሳሌ፥ በሰባተኛው ወር ይቀርቡ የነበሩት የማስተስረያ መሥዋዕቶች በየዓመቱ መደገም ነበረባቸው፤ ክርስቶስ ግን ራሱን አንድ ጊዜ ፈጽሞ በማቅረብ «የሚቀደሱትን የዘላለም ፍጹማን አድርጎአቸዋል»። መዝሙረኛው «ቅዱስ መንፈስህንም ከእኔ አትውሰድ» ብሎ መጸለይ አስፈልጎት ነበር፤ ክርስቶስ ግን ለዘላለም ከእኛ ጋር እንዲኖር አጽናኙን ሰጥቶናል። እንደዚሁም እስራኤላዊው የናዝራዊነትን ስእለት ተስሎ ለተወሰነ ጊዜ ራሱን ለእግዚአብሔር ሊለይ ይችል ነበር፤ ክርስቲያን አማኝ ግን ራሱን ሁልጊዜ ለእግዚአብሔር እንደ ተለየ ማወቅ መብቱ ነው። ከግድየለሽና ላይ ላዩን ከሚያነቡ ሰዎች የተሰወሩ ሌሎች ብዙ ትምህርቶችም በእነዚህ ምዕራፎች ይጠቈማሉ፤ መንፈስ ቅዱስ እጅግ የከበረውንና እጅግ ፍጹም የሆነውን መጽሐፉን በጸሎት ለሚያጠኑ ይገልጣቸዋል።

የመረጥናቸው ክፍሎች በመጀመሪያ አጭር ምዕራፍ፥ ቀጥሎም በመጀመሪያ ሲታይ ከእርሱ ጋር የተለየ ግንኙነት የሌለው የሚመስል እጅግ ረጅም ምዕራፍ ናቸው። ነገር ግን ይበልጥ በጥንቃቄ ስናሰላስል፥ የተጠቀሱት ጉዳዮች ቅደም ተከተል በመካከላቸው በእውነት ተፈጥሮአዊና የቀረበ ግንኙነት እንዳለ የሚያሳይ መሆኑን እናያለን። ለእግዚአብሔር መለየትን ከእግዚአብሔር የሚገኝ በረከት እንደሚከተለው፥ ከእርሱም ታላቅ በረከት የሚቀበሉ በተራቸው ለእርሱ ተቀባይነት ያለውን አገልግሎት እንደሚያቀርቡ እናገኛለን፤ ይህም እግዚአብሔር ደስ የሚሰኝበትና ለዘላለም መታሰቢያ የሚያደርገው አገልግሎት ነው።

ክፍል አንድ

ለእግዚአብሔር መለየት