ከእግዚአብሔር ጋር ለብቻ

«አንተ ግን ስትጸልይ፥ ወደ እልፍኝህ ግባ መዝጊያህንም ዘግተህ በስውር ላለው አባትህ ጸልይ፤ በስውር የሚያይ አባትህም በግልጥ ይከፍልሃል።»—ማቴዎስ 6:6።

ኢየሱስ የመጀመሪያዎቹን ደቀ መዛሙርቱን ከጠራ በኋላ፣ የመጀመሪያውን የአደባባይ ትምህርቱን በተራራው ስብከት ሰጣቸው። በዚያም የእግዚአብሔርን መንግሥት፣ ሕጎቿንና ሕይወቷን ገለጠላቸው። በዚያች መንግሥት እግዚአብሔር ንጉሥ ብቻ ሳይሆን አባትም ነው፤ ሁሉን የሚሰጥ ብቻ ሳይሆን እርሱ ራሱ ሁሉ ነው። የመንግሥቲቱ ብፅዕና እርሱን በማወቅና ከእርሱ ጋር በኅብረት በመኖር ብቻ ይገኛል። ስለዚህ ሊመሠርታት ስለ መጣው ስለ አዲሲቱ መንግሥት ካስተማረው ትምህርት መካከል የጸሎትና የጸሎት ሕይወት መገለጥ መገኘቱ የሚጠበቅ ነገር ነበር። ሙሴ ስለ ጸሎት ትእዛዝም ሆነ ሥርዓት አልሰጠም፤ ነቢያትም እንኳ ስለ ጸሎት ግዴታ በቀጥታ የሚናገሩት ጥቂት ነው፤ መጸለይን የሚያስተምር ክርስቶስ ነው።

ጌታ ለደቀ መዛሙርቱ በመጀመሪያ የሚያስተምራቸው ነገር ለጸሎት የሚሆን የስውር ስፍራ ሊኖራቸው እንደሚገባ ነው፤ እያንዳንዱ ሰው ከአምላኩ ጋር ለብቻው የሚሆንበት አንድ ገለል ያለ ስፍራ ሊኖረው ይገባል። ማንኛውም መምህር የመማሪያ ክፍል ሊኖረው ይገባል። እኛም ኢየሱስን በጸሎት ትምህርት ቤት ብቸኛ መምህራችን አድርገን ማወቅንና መቀበልን ተምረናል። አምልኮ ከእንግዲህ በጊዜና በስፍራ የተወሰነ እንዳልሆነ፣ አምልኮ፣ እውነተኛው መንፈሳዊ አምልኮ፣ የመንፈስና የሕይወት ጉዳይ እንደ ሆነ በሰማርያ አስቀድሞ አስተምሮናል፤ ሰው ሁለንተናው በሕይወቱ ሁሉ በመንፈስና በእውነት አምልኮ ሊሆን ይገባዋል። ይሁን እንጂ እያንዳንዱ ሰው ኢየሱስ በየዕለቱ ሊገናኘው የሚችልበትን የተወሰነ ስፍራ ለራሱ እንዲመርጥ ይፈልጋል። ያ እልፍኝ፣ ያ ገለል ያለ ስፍራ፣ የኢየሱስ የመማሪያ ክፍል ነው። ያ ስፍራ የትም ሊሆን ይችላል፤ መኖሪያችንን መለወጥ ግድ ቢሆንብን ያ ስፍራ ከቀን ወደ ቀን ሊለዋወጥ ይችላል፤ ነገር ግን ያ የስውር ስፍራ፣ ተማሪው በመምህሩ ፊት ራሱን አቅርቦ አብን ለማምለክ በእርሱ የሚዘጋጅበት ያ ጸጥ ያለ ጊዜ፣ ሊኖር ግድ ነው። በዚያ ብቻ፣ ነገር ግን በዚያ በእርግጥ፣ ኢየሱስ እንድንጸልይ ሊያስተምረን ወደ እኛ ይመጣል።

መምህር የመማሪያ ክፍሉ ብሩህና ማራኪ፣ በሰማይ ብርሃንና አየር የተሞላ፣ ተማሪዎች ሊመጡበት የሚናፍቁትና በዚያ መቆየት የሚወዱት ስፍራ እንዲሆን ሁልጊዜ ይተጋል። ኢየሱስም በተራራው ስብከት ስለ ጸሎት በተናገራቸው የመጀመሪያ ቃላቱ እልፍኙን እጅግ በሚማርክ ብርሃኑ በፊታችን ሊያቀርበው ይሻል። በጥንቃቄ ብናደምጥ፣ በዚያ ስለምንቆይበት ሁኔታ ሊነግረን ያለው ዋናው ነገር ምን እንደ ሆነ ወዲያው እናስተውላለን። የአባትን ስም ሦስት ጊዜ ይጠቅሳል፦ «በስውር ላለው አባትህ ጸልይ»፤ «በስውር የሚያይ አባትህም በግልጥ ይከፍልሃል»፤ «አባታችሁ የሚያስፈልጋችሁን ያውቃልና»። በእልፍኝ ጸሎት የመጀመሪያው ነገር ይህ ነው፦ ከአባቴ ጋር መገናኘት አለብኝ። በእልፍኙ ውስጥ የሚያበራው ብርሃን የአብ ፊት ብርሃን ሊሆን ይገባዋል። ኢየሱስ እልፍኙ እንዲሞላበት የሚፈልገው ከሰማይ የሚመጣው ንጹሕ አየር፣ የምተነፍስበትና የምጸልይበት ከባቢ፣ የእግዚአብሔር አባታዊ ፍቅር፣ የእግዚአብሔር ወሰን የሌለው አባትነት ነው። በዚህም የምናቀርበው እያንዳንዱ ሐሳብ ወይም ልመና በአብ ላይ ያለ ቀላል፣ ከልብ የሆነ፣ የሕፃን ዓይነት መታመን ይሆናል። መምህሩ እንድንጸልይ የሚያስተምረን እንዲህ ነው፦ ወደ አብ ሕያው ሀልዎት ያመጣናል። በዚያ የምናቀርበው ጸሎት ኃይል ማግኘቱ አይቀርም። ጌታ የሚነግረንን ለመስማት በጥንቃቄ እናድምጥ።

በመጀመሪያ፣ «በስውር ላለው አባትህ ጸልይ።» እግዚአብሔር ከሥጋዊ ዓይን ራሱን የሚሰውር አምላክ ነው። ለእግዚአብሔር በምናቀርበው አምልኮ በዋነኛነት በራሳችን ሐሳብና ልምምድ እስከ ተጠመድን ድረስ፣ መንፈስ የሆነውን፣ የማይታየውን እርሱን አናገኘውም። ነገር ግን ከዓለምና ከሰው ከሆነው ሁሉ ራሱን ለይቶ እግዚአብሔርን ብቻ ለመጠበቅ ለሚዘጋጅ ሰው አብ ራሱን ይገልጥለታል። ዓለምንና የዓለምን ሕይወት ሲተው፣ ሲለቅና በራሱ ላይ ሲዘጋበት፣ ወደ እግዚአብሔር ሀልዎት ምሥጢር በክርስቶስ እንዲመራም ራሱን ሲሰጥ፣ የአብ ፍቅር ብርሃን ይወጣለታል። የእልፍኙና የተዘጋው መዝጊያ ስውርነት፣ በዙሪያችን ካለው ሁሉ ፈጽሞ መለየታችን፣ ለዚያ ውስጣዊ መንፈሳዊ መቅደስ፣ ከመጋረጃው ውስጥ ላለው ለእግዚአብሔር ድንኳን ምሥጢር፣ መንፈሳችን ከማይታየው ጋር በእውነት ለሚገናኝበት ስፍራ ምሳሌ ነው፤ ስለዚህም ረዳት ነው። ስለዚህ የሚሠራውን ጸሎት ምሥጢር መፈለግ ስንጀምር ገና ከመነሻው፣ በትክክል መጸለይን የምንማረው ከአብ ጋር ለብቻችን በምንሆንበት በእልፍኙ እንደ ሆነ እንድናስታውስ እንማራለን። አብ በስውር ነው፦ ኢየሱስ በእነዚህ ቃላት የት እንደሚጠብቀን፣ ሁልጊዜስ የት እንደሚገኝ ያስተምረናል። ክርስቲያኖች የግል ጸሎታቸው መሆን የሚገባውን ያህል እንዳልሆነ ብዙ ጊዜ ያማርራሉ። ደካሞችና ኃጢአተኞች እንደ ሆኑ ይሰማቸዋል፤ ልባቸው የቀዘቀዘና የጨለመ ነው፤ የሚጸልዩት ጥቂት ነገር ብቻ ያላቸው፣ በዚያች ጥቂትም እምነትም ሆነ ደስታ የሌላቸው ይመስላቸዋል። እንደሚገባቸው ወይም እንደሚመኙት ወደ አብ መምጣት እንደማይችሉ በማሰብ ተስፋ ይቆርጣሉ፤ ከጸሎትም ይከለከላሉ። የእግዚአብሔር ልጅ ሆይ! መምህርህን ስማ። ወደ ግል ጸሎት ስትሄድ የመጀመሪያው ሐሳብህ ይህ ሊሆን እንደሚገባ ይነግርሃል፦ አብ በስውር ነው፤ አብ በዚያ ይጠብቀኛል። ልብህ የቀዘቀዘና ጸሎት የራቀው በመሆኑ ምክንያት ነው ወደ አፍቃሪው አብ ፊት መግባት ያለብህ። አባት ለልጆቹ እንደሚራራ፣ እንዲሁ እግዚአብሔር ለአንተ ይራራል። ለእግዚአብሔር የምታመጣው ምን ያህል ጥቂት እንደ ሆነ አታስብ፤ ይልቁንም እርሱ ሊሰጥህ ምን ያህል እንደሚሻ አስብ። በፊቱ ብቻ ራስህን አቅርብ፤ ወደ ፊቱም ቀና ብለህ ተመልከት፤ ፍቅሩን፣ ድንቅና ርኅሩኅ፣ የሚራራ ፍቅሩን አስብ። ሁሉ ነገር ምን ያህል ኃጢአተኛ፣ ቀዝቃዛና ጨለማ እንደ ሆነ ብቻ ንገረው፤ ለልብህ ብርሃንና ሙቀት የሚሰጠው የአብ አፍቃሪ ልብ ነው። ኦ ኢየሱስ የሚለውን አድርግ፦ መዝጊያህንም ዘግተህ በስውር ላለው አባትህ ጸልይ። ይህ ድንቅ አይደለምን? ከእግዚአብሔር፣ ወሰን ከሌለው አምላክ ጋር ለብቻ መሆን መቻል! ከዚያም ቀና ብሎ፦ አባቴ ሆይ! ማለት።

«በስውር የሚያይ አባትህም በግልጥ ይከፍልሃል።» እዚህ ኢየሱስ የስውር ጸሎት ፍሬ አልባ ሊሆን እንደማይችል ያረጋግጥልናል፤ በረከቱ በሕይወታችን ይገለጣል። እኛ ማድረግ ያለብን በስውር፣ ከእግዚአብሔር ጋር ለብቻችን ሆነን፣ በሰዎች ፊት ያለውን ሕይወታችንን ለእርሱ አደራ መስጠት ብቻ ነው፤ እርሱ በግልጥ ይከፍለናል፤ የጸሎቱ መልስ በእኛ ላይ በሚያፈሰው በረከቱ እንዲገለጥ ያደርጋል። ጌታችን በዚህ መንገድ እንዲህ ሊያስተምረን ይሻል፦ እግዚአብሔር በስውር የሚገናኘን ወሰን በሌለው አባትነትና ታማኝነት እንደ ሆነ፣ በእኛም በኩል የሕፃን ዓይነት የእምነት ቅንነት፣ ጸሎታችን በእርግጥ በረከትን እንደሚያወርድ መተማመን ሊኖር ይገባል። «ወደ እግዚአብሔር የሚደርስ እግዚአብሔር እንዳለ ለሚፈልጉትም ዋጋ እንዲሰጥ ያምን ዘንድ ያስፈልገዋልና።» የእልፍኙ በረከት የተመካው በምጸልይበት ብርቱ ወይም የጋለ ስሜት ላይ ሳይሆን፣ በዚያ ችግሮቼን አደራ በምሰጠው በአብ ፍቅርና ኃይል ላይ ነው። ስለዚህ መምህሩ አንድ ምኞት ብቻ አለው፦ አባትህ እንዳለ፣ በስውርም እንደሚያይና እንደሚሰማ አስታውስ፤ ወደዚያ ሂድ፣ በዚያም ቆይ፣ ደግሞም ከዚያ በዚህ መተማመን ውጣ፦ እርሱ ይከፍላል። በዚህ ታመነው፤ በእርሱ ተደገፍ፦ ወደ አብ የሚቀርብ ጸሎት ከንቱ ሊሆን አይችልም፤ በግልጥ ይከፍልሃል።

ይህንም በእግዚአብሔር አባታዊ ፍቅር ላይ ያለውን እምነት ይበልጥ ለማጽናት ክርስቶስ ሦስተኛ ቃል ይናገራል፦ «ሳትለምኑት አባታችሁ የሚያስፈልጋችሁን ያውቃልና።» በመጀመሪያ ሲታይ ይህ ሐሳብ ጸሎትን ያነሰ አስፈላጊ የሚያደርገው ሊመስል ይችላል፤ የሚያስፈልገንን እግዚአብሔር ከእኛ እጅግ አብልጦ ያውቃልና። ነገር ግን ጸሎት በእውነት ምን እንደ ሆነ ጠለቅ ብለን ስናስተውል፣ ይህ እውነት እምነታችንን ለማጠንከር እጅግ ይረዳል። እንደ አሕዛብ በቃላችን ብዛትና ግፊት ፈቃደኛ ያልሆነን አምላክ እንዲሰማን ማስገደድ እንደማያስፈልገን ያስተምረናል። ይህ እንደሚያስፈልገኝ አባቴ በእርግጥ ያውቃልን? የሚለውን ጥያቄ ስለሚያስነሣ፣ በጸሎት ወደ ቅዱስ አሳቢነትና ጸጥታ ይመራናል። ልመናችን በእርግጥ በቃሉ መሠረት ለእግዚአብሔር ክብር የሚያስፈልገን ነገር እንደ ሆነ በመንፈስ ተመርተን አንድ ጊዜ ካረጋገጥን በኋላ፣ አባቴ ይህ እንደሚያስፈልገኝ ያውቃል፣ ሊኖረኝም ይገባል ብለን ለመናገር ድንቅ መተማመን ይሰጠናል። መልሱ ቢዘገይ ደግሞ በጸጥታና በትዕግሥት አጥብቀን እንድንይዝ ያስተምረናል፦ አባት ሆይ! አንተ ታውቃለህ፤ ይህ ያስፈልገኛል። ኦ ክርስቶስ መምህራችን ወደ እግዚአብሔር ስንቀርብ በእኛ ውስጥ ሊያሳድገው የሚሻው የሕፃን የተባረከ ነጻነትና ቅንነት! መንፈሱ ይህን በእኛ እስኪሠራ ድረስ ወደ አብ ቀና ብለን እንመልከት። አንዳንድ ጊዜ በጸሎታችን፣ አብ እንደሚያውቅና እንደሚሰማ እስክንረሳ ድረስ በጋለና በአጣዳፊ ልመናዎቻችን የመጠመድ አደጋ ላይ ስንሆን፣ ዝም ብለን በጸጥታ እንዲህ እንበል፦ አባቴ ያያል፣ አባቴ ይሰማል፣ አባቴ ያውቃል፤ ይህ እምነታችን መልሱን እንዲቀበልና፦ ከእርሱ የለመነውን ልመና እንደ ተቀበልን እናውቃለን እንዲል ይረዳዋል።

አሁንም እንድትጸልዩ ትማሩ ዘንድ እንደ ገና ወደ ክርስቶስ ትምህርት ቤት የገባችሁ ሁላችሁ፣ እነዚህን ትምህርቶች ተቀበሉ፤ ተለማመዷቸው፤ በእነርሱም ፍጹማን እንዲያደርጋችሁ በእርሱ ታመኑ። መዝጊያው ተዘግቶ፣ ከሰዎች ተለይታችሁ ከእግዚአብሔር ጋር ተዘግታችሁ፣ በእልፍኙ ብዙ ተቀመጡ፤ አብ የሚጠብቃችሁ በዚያ ነው፤ ኢየሱስ እንድትጸልዩ የሚያስተምራችሁ በዚያ ነው። ከአብ ጋር በስውር ለብቻ መሆን፦ ይህ ታላቁ ደስታችሁ ይሁን። አብ የስውሩን ጸሎት በግልጥ እንደሚከፍል፣ ስለዚህም ያለ በረከት ሊቀር እንደማይችል ማረጋገጥ፦ ይህ በየዕለቱ ኃይላችሁ ይሁን። የምትለምኑት እንደሚያስፈልጋችሁ አብ እንደሚያውቅ ማወቅ፦ አምላካችሁ እንደ ባለ ጠግነቱ መጠን በክብር በክርስቶስ ኢየሱስ እንደሚሞላው በመተማመን፣ ማንኛውንም ችግር ወደ እርሱ ለማምጣት ይህ ነጻነታችሁ ይሁን።

«ጌታ ሆይ፥ እንጸልይ ዘንድ አስተምረን።»

የተባረክህ መድኃኒት ሆይ! እያንዳንዱን ተማሪህን ለብቻው የምታገኝበትና አብን የምትገልጥለት ትምህርት ቤት አድርገህ እልፍኙን ስለ ሠራህ በሙሉ ልቤ አመሰግንሃለሁ። ጌታዬ ሆይ! ኃጢአተኛነት ወይም ጭንቀት በተሰማኝ ቁጥር የመጀመሪያው ድንገተኛ ሐሳቤ አብ ወደሚጠብቀኝ፣ ጸሎትም ፈጽሞ ያለ በረከት ወደማይቀርበት ስፍራ መሄድ እንዲሆን፣ በአብ ርኅሩኅ ፍቅርና ቸርነት ላይ ያለኝን እምነት እንዲሁ አጽናልኝ። ሳልለምነው ችግሬን እንደሚያውቅ ማሰቤ፣ ልጁ የሚያስፈልገውን እንደሚሰጥ እንድታመን በታላቅ የእምነት እረፍት ያምጣኝ። ኦ የስውር ጸሎት ስፍራ በምድር ላይ ካሉ ስፍራዎች ሁሉ ይበልጥ የምወደው ይሁንልኝ።

ጌታ ሆይ! በየስፍራው የሚያምኑ ሕዝብህን እልፍኞች ሁሉ ትባርክ ዘንድ ስጸልይ ስማኝ። ድንቁ የአባት ርኅራኄ መገለጥህ አዲስ ክርስቲያኖችን ሁሉ የስውርን ጸሎት እንደ ግዴታ ወይም እንደ ሸክም ከሚቈጥር ሐሳብ ሁሉ ነጻ ያውጣቸው፤ የሕይወታቸው ታላቅ መብት፣ ደስታና በረከት አድርገው እንዲቈጥሩት ይምራቸው። በጸሎት ወደ አንተ የሚያመጡት ምንም ነገር ስላላገኙ ተስፋ የቈረጡትን ሁሉ መልሳቸው። ኦ ሁሉን ሊሰጥ ወዳለውና ይህንንም በማድረግ ደስ ወደሚለው ወደ እርሱ ከባዶነታቸው ጋር መምጣት ብቻ እንዳለባቸው እንዲያስተውሉ አድርጋቸው። ለአብ የሚያመጡት ነገር ሳይሆን፣ አብ ሊሰጣቸው የሚጠብቀው ነገር ብቸኛ ሐሳባቸው ይሁን።

በተለይም ለአንተ የሚሠሩ ባሪያዎችህን ሁሉ እልፍኝ ባርክ፤ የእግዚአብሔር እውነትና የእግዚአብሔር ጸጋ የሚገለጥላቸው፣ በየዕለቱ በአዲስ ዘይት የሚቀቡበት፣ ኃይላቸው የሚታደስበት፣ ባልንጀሮቻቸውን የሚባርኩበትን በረከት በእምነት የሚቀበሉበት ስፍራ ይሁንላቸው። ጌታ ሆይ፥ ሁላችንንም በእልፍኙ ወደ አንተና ወደ አብ አቅርበን። አሜን።