ሁሉን የሚያሸንፈው መማጸኛ

«በስሜ የምትለምኑትን ሁሉ አደርገዋለሁ። ማናቸውንም ነገር በስሜ ብትለምኑ እኔ አደርገዋለሁ። …አብም በስሜ የምትለምኑትን ሁሉ እንዲሰጣችሁ… እውነት እውነት እላችኋለሁ፥ አብ በስሜ የምትለምኑትን ሁሉ ይሰጣችኋል። እስከ አሁን በስሜ ምንም አልለመናችሁም፤ … ለምኑ ትቀበሉማላችሁ። በዚያን ቀን በስሜ ትለምናላችሁ።»—ዮሐንስ 14:13-14፤ 15:16፤ 16:23-24, 26።

እስከዚያች ጊዜ ድረስ ደቀ መዛሙርቱ በክርስቶስ ስም አልለመኑም ነበር፤ እርሱም ራሱ ይህን አነጋገር ከቶ ተጠቅሞበት አያውቅም ነበር። ወደዚህ የሚቀርበው «በስሜ በሚሰበሰቡበት» የሚለው ቃል ብቻ ነው። እዚህ ግን በመሰናበቻ ቃሉ፣ ወሰን የሌለው ትርጉም ካላቸው ከእነዚያ ተስፋዎች ጋር አያይዞ፣ «የምትለምኑትን ሁሉ»፣ «ማናቸውንም ነገር»፣ «የምትወዱትን ሁሉ»፣ ይህን ቃል ሳያቋርጥ ደጋግሞ ይናገራል፤ ስሙ ብቸኛ፣ ነገር ግን ደግሞ ሁሉን የሚበቃ መማጸኛችን መሆኑን እነርሱንም እኛንም ሊያስተምረን ነው። የጸሎት ኃይልና መልሱ ስሙን በትክክል በመጠቀም ላይ የተመሠረቱ ናቸው።

የአንድ ሰው ስም ምንድር ነው? ያ ሰው የሚጠራበት ወይም በፊታችን የሚወከልበት ቃል ወይም መግለጫ ነው። አንድን ስም ስጠራ ወይም ስሰማ ሰውየውን በሙሉ፣ ስለ እርሱ የማውቀውን ሁሉ፣ በእኔም ላይ ያሳደረውን ስሜት ጭምር በፊቴ ያመጣዋል። የንጉሥ ስም ክብሩን፣ ሥልጣኑንና መንግሥቱን ያጠቃልላል። ስሙ የኃይሉ ምልክት ነው። እንዲሁም እያንዳንዱ የእግዚአብሔር ስም የዚያን የማይታየውን ክብር በከፊል ይገልጣል፤ ይወክላልም። የክርስቶስም ስም እንደ መካከለኛችን ያደረገውን ሁሉ፣ እርሱ የሆነውን ሁሉ፣ ሊያደርገውም በሕይወት የሚኖርለትን ሁሉ የሚገልጥ ነው።

ታዲያ አንድን ነገር በሌላ ሰው ስም ማድረግ ምን ማለት ነው? እንደ ወኪሉና በእርሱ ቦታ እንደ ቆመ ሆኖ በዚያ ሰው ኃይልና ሥልጣን መምጣት ማለት ነው። የሌላውን ስም እንዲህ መጠቀም ሁልጊዜ በሁለቱ መካከል የጥቅም አንድነት መኖሩን እንደሚያመለክት እናውቃለን። ክብሩና ጥቅሙ በራሱ እጅ እንዳለ ያህል በዚያ በሌላው እጅም ደኅና እንደሚሆን አስቀድሞ ሳያረጋግጥ ማንም ስሙን ሌላው በነጻ እንዲጠቀምበት አይሰጥም።

ታዲያ ኢየሱስ በስሙ ላይ ሥልጣን ሲሰጠን፣ በነጻ እንድንጠቀምበት ሲፈቅድልንና በእርሱ የምንለምነው ሁሉ እንደሚሰጠን ሲያረጋግጥልን ይህ ምን ማለት ነው? አንድ ሰው በአንድ ልዩ አጋጣሚ ሌላው በስሙ አንድን ነገር እንዲለምን ፈቃድ እንደሚሰጥ የሚናገረው የተለመደው ምሳሌ እዚህ ላይ ፈጽሞ አይበቃም፤ ኢየሱስ ለደቀ መዛሙርቱ ሁሉ ስሙን በማናቸውም ጊዜ ለሚመኙት ነገር ሁሉ በነጻ እንዲጠቀሙበት አጠቃላይና ወሰን የሌለው ሥልጣን በታላቅ ክብደት ሰጥቷቸዋልና። ጥቅሙን በእኛ ላይ ሊያምን እንደሚችል፣ ክብሩም በእጃችን ደኅና እንደሚሆን ባያውቅ ኖሮ ይህን ማድረግ ባልቻለም ነበር። የሌላውን ስም በነጻ መጠቀም ሁልጊዜ የታላቅ መተማመንና የቅርብ አንድነት ምልክት ነው። ስሙን ለሌላው የሚሰጥ ያ ሌላው ስለ እርሱ እንዲሠራ ራሱ ገለል ይላል፤ የሌላውን ስም የሚይዝ ደግሞ የራሱን ስም ዋጋ እንደሌለው ቈጥሮ ይተዋል። በሌላ ሰው ስም ስሄድ ራሴን እክዳለሁ፤ ስሙን ብቻ ሳይሆን እርሱን ራሱንና እርሱ የሆነውን ሁሉ በራሴና እኔ በሆንሁት ፋንታ እወስዳለሁ።

የአንድን ሰው ስም እንዲህ መጠቀም በሕጋዊ አንድነት ምክንያት ሊሆን ይችላል። አንድ ነጋዴ ቤቱንና ንግዱን ትቶ ሲሄድ በነጋዴው ስም በሺዎች የሚቈጠር ፓውንድ ማውጣት የሚችልበትን አጠቃላይ ሥልጣን ለዋና ጸሐፊው ይሰጠዋል። ጸሐፊውም ይህን የሚያደርገው ለራሱ ሳይሆን ለንግዱ ጥቅም ብቻ ነው። ነጋዴው ስሙንና ንብረቱን በእጁ አሳልፎ ለመስጠት የሚደፍረው ጸሐፊው ለጥቅሙና ለንግዱ ፈጽሞ ያደረ መሆኑን ስለሚያውቅና ስለሚያምነው ነው። ጌታ ኢየሱስ ወደ ሰማይ በሄደ ጊዜ ሥራውን፣ ማለትም በምድር ላይ ያለውን የመንግሥቱን አስተዳደር፣ በአገልጋዮቹ እጅ ተወ። ሥራውን በሚገባ ለማካሄድ የሚያስፈልጋቸውን ሁሉ በእርሱ እንዲያወጡ ስሙን ደግሞ ከመስጠት በቀር ሌላ ማድረግ አይችልም ነበር። እነርሱም ለጌታቸው ጥቅምና ሥራ ብቻ ለመኖር ራሳቸውን በሰጡበት ልክ የኢየሱስን ስም ለመጠቀም መንፈሳዊ ኃይል አላቸው። ስሙን መጠቀም ሁልጊዜ ጥቅማችንን ለምንወክለው ለእርሱ አሳልፎ መስጠትን ያመለክታል።

ወይም ስሙን እንዲህ መጠቀም በሕይወት አንድነት ምክንያት ሊሆን ይችላል። በነጋዴውና በጸሐፊው ረገድ አንድነቱ ጊዜያዊ ነው። ነገር ግን በምድር ላይ የሕይወት አንድነት የስም አንድነትን እንደሚያስገኝ እናውቃለን፤ ልጅ የአባቱ ሕይወት ስላለው የአባቱን ስም ይይዛል። ብዙ ጊዜም የደግ አባት ልጅ በተሸከመው ስም ምክንያት በሌሎች ዘንድ ተከብሯል ወይም ተረድቷል። ነገር ግን ስም ብቻ እንደሆነና የአባቱ ጠባይ እንደጐደለው ቢታወቅ ይህ ብዙ አይዘልቅም ነበር። ስሙና ጠባዩ ወይም መንፈሱ ተስማምተው መሄድ አለባቸው። እንዲህ ሲሆን ልጁ በአባቱ ወዳጆች ዘንድ ድርብ መብት ይኖረዋል፤ በመጀመሪያ ስለ ስሙ የተሰጠውን ፍቅርና አክብሮት ጠባዩ ያጸናዋል፤ ይጨምረዋልም። ከኢየሱስና ከአማኙም ጋር እንዲሁ ነው፤ እኛ ከእርሱ ጋር አንድ ነን፤ ከእርሱ ጋር አንድ ሕይወት፣ አንድ መንፈስ አለን፤ ስለዚህም በስሙ ልንመጣ እንችላለን። ያን ስም በመጠቀም ያለን ኃይል፣ በእግዚአብሔር ፊት ቢሆን ወይም በሰዎች ወይም በአጋንንት ፊት፣ ከእርሱ ጋር ባለን መንፈሳዊ የሕይወት አንድነት መጠን ላይ የተመሠረተ ነው። ስሙን መጠቀም በሕይወት አንድነት ላይ ይመሠረታል፤ የኢየሱስ ስምና መንፈሱ አንድ ናቸው።

ወይም ስሙን ለመጠቀም ሥልጣን የሚሰጠው አንድነት የፍቅር አንድነት ሊሆን ይችላል። ሕይወቷ በድህነት ያለፈ አንዲት ሙሽራ ከሙሽራው ጋር ስትጣመር የራሷን ስም ትታ በእርሱ ስም ትጠራለች፤ አሁንም ያን ስም ለመጠቀም ሙሉ መብት አላት። በእርሱ ስም ትገዛለች፤ ያም ስም እምቢ አይባልም። ይህም የሚሆነው ሙሽራው ለጥቅሙ እንደምትጠነቀቅ ተማምኖ ለራሱ ስለ መረጣት ነው፤ አሁን አንድ ናቸው። እንዲሁም ሰማያዊው ሙሽራ ከዚህ ያነሰ ሊያደርግ አይችልም ነበር፤ ወዶን ከራሱ ጋር አንድ ካደረገን በኋላ፣ ስሙን ለተሸከሙት ያን ስም በአብ ፊት እንዲያቀርቡት ወይም ለሚያስፈልጋቸው ሁሉ ይዘውት ወደ እርሱ ራሱ እንዲመጡ መብት ከመስጠት በቀር ሌላ ምን ሊያደርግ ይችል ነበር? በኢየሱስ ስም ለመኖር ራሱን በእውነት የሚሰጥ ሰው ሁሉ የወደደውን በዚያ ስም ለመለመንና ለመቀበል የሚያስችል መንፈሳዊ ችሎታን እየጨመረ በሚሄድ መጠን ይቀበላል። የሌላውን ስም መሸከም የራሴን ስም፣ ከእርሱም ጋር ራሴን ችዬ የምኖረውን የራሴን ሕይወት መተዌን ያመለክታል፤ ነገር ግን እንዲሁ በእርግጥ በራሴ ስም ፋንታ በወሰድሁት ስም ውስጥ ያለው ሁሉ የእኔ መሆኑንም ያመለክታል።

እንዲህ ያሉት ምሳሌዎች፣ በሌላው ስም እንዲለምን ስለ ተላከ መልእክተኛ ወይም የዋሱን ስም ስለሚጠራ በደለኛ የሚናገረው የተለመደው አመለካከት ምን ያህል ጎደሎ እንደሆነ ያሳዩናል። አይደለም፤ ኢየሱስ ራሱ ከአብ ጋር ነው፤ በስሙ የምንመጣው በሩቅ ባለ ሰው ስም አይደለም። ወደ ኢየሱስ ራሱ ስንጸልይ እንኳ በስሙ መሆን አለበት። ስሙ ሰውየውን ይወክላል፤ በስሙ መለመን ማለት በእርሱ ውስጥና ለእርሱ እንደሚኖር ሰው ሆኖ ከእርሱ ጋር ፍጹም በሆነ የጥቅም፣ የሕይወትና የፍቅር አንድነት መለመን ነው። የኢየሱስ ስም በልቤና በሕይወቴ ያልተከፋፈለ የበላይነት ብቻ ይኑረው፤ ያን ጊዜ በዚያ ስም የምለምነው እምቢ ሊባል እንደማይችል እምነቴ ወደ ሙሉ እርግጠኝነት ያድጋል። ስሙና የመለመን ኃይል አብረው ይሄዳሉ፤ የኢየሱስ ስም ሕይወቴን የሚገዛ ኃይል በሆነ ጊዜ በጸሎት በእግዚአብሔር ፊት ያለው ኃይሉም ደግሞ ይታያል።

እንግዲህ ሁሉ ነገር ከስሙ ጋር ባለን በራሳችን ግንኙነት ላይ እንደሚመሠረት እናያለን፤ ስሙ በሕይወቴ ላይ ያለው ኃይል በጸሎቴም የሚኖረው ኃይል ነው። ይህን ግልጽ ሊያደርግልን የሚችል ከአንድ በላይ የመጽሐፍ ቃል አለ። «የምታደርጉትን ሁሉ በጌታ በኢየሱስ ስም አድርጉት» ሲል፣ ይህ የሌላኛው፣ ማለትም የ«የምትለምኑትን ሁሉ።» ተጓዳኝ እንደሆነ እናያለን። ሁሉን በስሙ ማድረግና ሁሉን በስሙ መለመን፣ እነዚህ አብረው ይሄዳሉ። «በአምላካችን በእግዚአብሔር ስም እንሄዳለን» የሚለውን ስናነብ፣ የስሙ ኃይል በሕይወት ሁሉ ላይ መግዛት እንዳለበት እናያለን፤ ያን ጊዜ ብቻ በጸሎት ኃይል ይኖረዋል። ስሙ ለእኛ ምን እንደሆነ ለማየት እግዚአብሔር የሚመለከተው ወደ ከንፈር ሳይሆን ወደ ሕይወት ነው። መጽሐፍ «ስለ ጌታችን ስለ ኢየሱስ ክርስቶስ ስም ነፍሳቸውን አሳልፈው ስለ ሰጡ ሰዎች»፣ ወይም «ስለ ጌታ ስለ ኢየሱስ ስም በኢየሩሳሌም ለመሞት እንኳ ተሰናድቼአለሁ» ስላለው ሰው ሲናገር፣ ከስሙ ጋር ያለን ግንኙነት ምን መሆን እንዳለበት እናያለን፤ ስሙ ለእኔ ሁሉ ነገር ሲሆን ሁሉን ነገር ያስገኝልኛል። ያለኝን ሁሉ እንዲወስድ ብፈቅድለት ያለውን ሁሉ እንዳገኝ ይፈቅድልኛል።

«በስሜ የምትለምኑትን ሁሉ አደርገዋለሁ።» ኢየሱስ ይህን ተስፋ ቃል በቃል ማለቱ ነው። ክርስቲያኖች ሊገድቡት ሞክረዋል፤ እጅግ ልቅ መስሎ ታያቸው፤ ሰውን ያለ ቅድመ ሁኔታ እንዲህ ማመን ደኅንነት ያለው አልመሰላቸውም። «በስሜ» የሚለው ቃል ራሱ የራሱ ጠባቂ መሆኑን አላስተዋልንም። ማንም በዚያ ስም በመኖሩና በመሥራቱ ካገኘው ችሎታ በላይ ሊጠቀምበት የማይችል መንፈሳዊ ኃይል ነው። ያን ስም በሰዎች ፊት በተሸከምነው ልክ በእግዚአብሔር ፊት ልንጠቀምበት ኃይል አለን። ኦ፣ ስሙ ምን ማለት እንደሆነና ትክክለኛው አጠቃቀሙ ምን እንደሆነ እንዲያሳየን የእግዚአብሔርን መንፈስ ቅዱስ እንለምን። በሰማይ ከስም ሁሉ በላይ የሆነው ስም በልባችንና በሕይወታችንም የበላይነቱን ስፍራ የሚይዘው በመንፈስ በኩል ነው።

የኢየሱስ ደቀ መዛሙርት ሆይ! የዛሬው ትምህርት በልባችሁ ውስጥ ጠልቆ ይግባ። ጌታ እንዲህ ይላል፦ በስሜ ብቻ ጸልዩ፤ የምትለምኑት ሁሉ ይሰጣችኋል። ሰማይ ተከፍቶላችኋል፤ የመንፈሳዊው ዓለም ሀብትና ኃይል በዙሪያችሁ ላሉ ሰዎች ሲባል በእጃችሁ ተሰጥቷችኋል። ኦ፣ ኑ፣ በኢየሱስ ስም መጸለይን እንማር። ለደቀ መዛሙርቱ እንደ ተናገረ ለእኛም «እስከ አሁን በስሜ ምንም አልለመናችሁም፤ … ለምኑ ትቀበሉማላችሁ» ይለናል። እያንዳንዱ የኢየሱስ ደቀ መዝሙር የንጉሣዊ ክህነቱን መብቶች ለመጠቀም ይፈልግ፤ በእጁ የተሰጠውንም ኃይል ለአካባቢውና ለሥራው ይጠቀምበት። ክርስቲያኖች ይንቁ፤ መልእክቱንም ይስሙ፦ ጸሎታችሁ ያለ እርሱ የሚከለከለውን ሊያስገኝ፣ ያለ እርሱ ሳይፈጸም የሚቀረውን ሊፈጽም ይችላል። ኦ፣ ንቁ፤ ለዚህ ለሚጠፋው ዓለም የሰማይን መዝገብ ለመክፈት የኢየሱስን ስም ተጠቀሙበት። የንጉሡ አገልጋዮች እንደ መሆናችሁ ስሙን መጠቀም ተማሩ፦ «በስሜ የምትለምኑትን ሁሉ አደርገዋለሁ።»

«ጌታ ሆይ፥ እንጸልይ ዘንድ አስተምረን።»

ብሩክ ጌታ ሆይ! የምትሰጠኝ እያንዳንዱ ትምህርት እጅግ የተትረፈረፈና ጥልቅ ትርጉም ያለው ስለሆነ ያን አንዱን ብቻ ብማር በትክክል መጸለይን የማውቅ ይመስለኛል። ዛሬም በየቀኑ አንድ ጸሎት ብቻ የሚያስፈልገኝ ያህል እንደ ገና ይሰማኛል፦ ጌታ ሆይ! በስምህ መጸለይ ምን እንደሆነ አስተምረኝ። ጸሎቴ በዚያ ብሩክ ስም ከመሆን በቀር ሌላ ሊሆን እንዳይችል፣ ሁሉን በኢየሱስ ስም እንዳደርግ እንዲህ እንድኖርና እንድሠራ፣ እንድመላለስና እንድናገር አስተምረኝ።

ጌታ ሆይ! በስምህ የምንለምነውን ሁሉ አንተ እንደምታደርገው፣ አብም እንደሚሰጥ የሚናገረውን ውድ ተስፋ አጥብቄ እንድይዝም አስተምረኝ። በስሜ ስትል ያሰብከውን ድንቅ አንድነት ገና ሙሉ በሙሉ ባይገባኝም፣ ይልቁንም ገና ሙሉ በሙሉ ባልደረስሁበትም፣ ተስፋው ልቤን በማያወላውል እርግጠኝነት እስኪሞላው ድረስ አጥብቄ ልይዘው እወዳለሁ፦ በኢየሱስ ስም ማናቸውንም ነገር።

ኦ ጌታዬ ሆይ! መንፈስ ቅዱስህ ይህን ያስተምረኝ። ስለ እርሱ «አብ በስሜ የሚልከው ግን መንፈስ ቅዱስ የሆነው አጽናኝ» ብለሃል። በስምህ ከሰማይ መላክ ምን እንደሆነ፣ በአገልጋዮችህ ውስጥ የዚያን ስም ኃይል መግለጥና ማክበር፣ ያን ስም ብቻ መጠቀም፣ በዚህም አንተን ማክበር ምን እንደሆነ እርሱ ያውቃል። ጌታ ኢየሱስ ሆይ! መንፈስህ በእኔ ይኑር፤ ይሙላኝም። ሁለንተናዬን ለእርሱ አገዛዝና አመራር ልሰጥ እወዳለሁ፤ እሰጣለሁም። ስምህና መንፈስህ አንድ ናቸው፤ በእርሱ በኩል ስምህ የሕይወቴና የጸሎቴ ብርታት ይሆናል። ያን ጊዜ ስለ ስምህ ሁሉን ለመተው፣ በስምህ ለሰዎችና ለእግዚአብሔር ለመናገር፣ ይህም በእርግጥ ከስም ሁሉ በላይ ያለው ስም መሆኑን ለማስመሰከር እችላለሁ።

ጌታ ኢየሱስ ሆይ! ኦ፣ በመንፈስ ቅዱስህ በስምህ መጸለይን አስተምረኝ። አሜን።

ማስታወሻ።

«በክርስቶስ ስም መጸለይ ምን ማለት ነው? በአዳኙ መካከለኝነት በማመን በእግዚአብሔር ፊት መቅረብ ብቻ ማለት ሊሆን አይችልም። ደቀ መዛሙርቱ ኢየሱስን መጸለይ እንዲያስተምራቸው በለመኑት ጊዜ የልመና ቃላትን ሰጣቸው። ከዚያም በኋላ ኢየሱስ ‹እስከ አሁን በስሜ ምንም አልለመናችሁም› አላቸው። መንፈስ እስኪመጣ ድረስ የጌታ ጸሎት ሰባቱ ልመናዎች በውስጣቸው እንደ ተኙ ያህል ነበሩ። ክርስቶስ በመንፈስ ቅዱስ ወደ ልባቸው በወረደ ጊዜ፣ ክርስቶስ እንደ ሊቀ ካህናታችን በጸሎቱ ከአብ የሚያስገኝልንን እነዚያኑ በረከቶች ተመኙ። እንዲህ ያሉ ልመናዎችም ሁልጊዜ መልስ ያገኛሉ። አብ ክርስቶስ የሚለምነውን ለመስጠት ሁልጊዜ ፈቃደኛ ነው። የክርስቶስ መንፈስ ክርስቶስ የሚያጸድቃቸውንና ለአብ የሚያቀርባቸውን ልመናዎች እንድናቀርብ ሁልጊዜ ያስተምረናል፤ ይገፋፋናልም። ስለዚህ በክርስቶስ ስም መጸለይ ማለት በጽድቃችን ረገድ ከክርስቶስ ጋር አንድ መሆን፣ በውስጣችን በሚኖረው በመንፈስ ቅዱስም በምኞታችን ከክርስቶስ ጋር አንድ መሆን ነው። በመንፈስ መጸለይ፣ እንደ አብ ፈቃድ መጸለይ፣ በክርስቶስ ስም መጸለይ፣ አንድ ትርጉም ያላቸው አነጋገሮች ናቸው። አብ እርሱ ራሱ ይወደናል፤ ሊሰማንም ፈቃደኛ ነው፤ ሁለት ጠበቆች፣ በላይ ያለው ጠበቃ ክርስቶስና በውስጣችን ያለው ጠበቃ መንፈስ ቅዱስ፣ የፍቅሩ ስጦታዎች ናቸው።

«ይህ አመለካከት፣ በክርስቶስ ስም መጸለይን በዋናነት በክርስቶስ ብቃት ከመታመን ጋር ከሚያያይዘው ይበልጥ ከተስፋፋው አመለካከት ይልቅ፣ በመጀመሪያ ያነሰ መጽናናት የሚሰጥ ሊመስል ይችላል። የዚያ አመለካከት ጕድለት የአዳኙን ምልጃ ከአብ ፈቃድና በውስጣችን የሚኖረው መንፈስ በጸሎት ከሚሰጠው እርዳታ ጋር አለማጣመሩ ነው። የክርስቶስንም መካከለኝነት ሙሉ በሙሉ አይረዳም፤ መካከለኝነቱ ቅዱሱ አብ ስለ ክርስቶስ ብሎ እኔንና ጸሎቴን ሊመለከት መቻሉ ብቻ አይደለምና፤ ነገር ግን በረከቶች ሁሉ በክቡር ደሙ እንደ ተገዙልኝ፣ እንዲሁ ክርስቶስ ራሱ ልመናዎቼን ለእኔ የሚመኛቸው የራሱ ልመናዎች አድርጎ ማቅረቡም ጭምር ነው።

«በጸሎት ሁሉ ዋናው አንድ ቅድመ ሁኔታ፣ ለእኛ እንደሚመኘው፣ እንደ አብ ፈቃድ፣ እንደ መንፈስም ትምህርት በኢየሱስ ስም ልናቀርበው መቻላችን ነው። ስለዚህም በክርስቶስ ስም መጸለይ ራስን ሳይመረምሩ፣ ሳያሰላስሉ፣ ራስን ሳይክዱ፣ ባጭሩ ያለ መንፈስ እርዳታ የማይቻል ነው።»—ሳፊር፣ የጌታ ጸሎት፣ ገጽ 411, 142።