ብቸኛው መምህር

«እርሱም በአንድ ስፍራ ይጸልይ ነበር፥ በጨረሰም ጊዜ ከደቀ መዛሙርቱ አንዱ። ጌታ ሆይ፥ እንጸልይ ዘንድ አስተምረን አለው።»—ሉቃስ 11:1።

ደቀ መዛሙርቱ ከክርስቶስ ጋር ነበሩ፤ ሲጸልይም አይተውታል። በሕዝብ ፊት በሚኖረው ድንቅ ሕይወቱና በስውር በሚኖረው የጸሎት ሕይወቱ መካከል ያለውን ግንኙነት በመጠኑ ማስተዋል ተምረው ነበር። በጸሎት ጥበብ እርሱ መምህር እንደ ሆነ ማመንን ተምረው ነበር፤ እንደ እርሱ ሊጸልይ የሚችል ማንም አልነበረም። ስለዚህም «ጌታ ሆይ፥ እንጸልይ ዘንድ አስተምረን» የሚል ልመና ይዘው ወደ እርሱ መጡ። ከጊዜ በኋላም፣ ካስተማራቸው ነገሮች መካከል ስለ ጸሎት ከሰጣቸው ትምህርቶች ይበልጥ የሚደንቅ ወይም የተባረከ ነገር እምብዛም እንዳልነበረ ይነግሩን ነበር።

ዛሬም እንዲሁ፣ እርሱ በአንድ ስፍራ ሲጸልይ፣ በዚህ ሥራ ተጠምዶ የሚያዩት ደቀ መዛሙርት ያንኑ ልመና፦ «ጌታ ሆይ፥ እንጸልይ ዘንድ አስተምረን» ብለው መድገም እንደሚያስፈልጋቸው ይሰማቸዋል። በክርስትና ሕይወት ባደግን መጠን፣ የተወደደው መምህር ያለማቋረጥ በሚያደርገው ምልጃው ላይ ያለን ሐሳብና እምነት ይበልጥ እየከበረልን ይሄዳል፤ በምልጃውም ክርስቶስን የመምሰል ተስፋ ከዚህ በፊት ያልታወቀ መስሕብ ያገኛል። ሲጸልይም ስናየው፣ እንደ እርሱ ሊጸልይ የሚችል፣ እንደ እርሱም ሊያስተምር የሚችል ማንም እንደሌለ ስናስታውስ፣ «ጌታ ሆይ፥ እንጸልይ ዘንድ አስተምረን» የሚለው የደቀ መዛሙርቱ ልመና በትክክል የሚያስፈልገን እንደ ሆነ ይሰማናል። እርሱ የሆነውና ያለው ሁሉ፣ እርሱ ራሱም እንዴት የራሳችን እንደ ሆነ፣ እርሱ ራሱ እንዴት ሕይወታችን እንደ ሆነ ስናስብ፣ መለመን ብቻ እንደሚበቃን፣ እርሱም ከራሱ ጋር ወደ ቀረበ ኅብረት ሊያስገባንና እርሱ እንደሚጸልይ እንድንጸልይ ሊያስተምረን ደስ እንደሚለው እርግጠኞች እንሆናለን።

ወንድሞቼ ሆይ፣ ኑ! በመለኮታዊው የጸሎትና የምልጃ ጥበብ ትምህርታቸውን ለመቀጠል ለሚናፍቁ ሁልጊዜ ክፍት አድርጎ በሚጠብቀው በዚያ ትምህርት ቤት ስማችንን እኛም እንደ ገና እንዲያስመዘግብልን ወደ ብሩኩ መምህር ሄደን አንለምነውምን? አዎን፣ ጥንት እነርሱ እንዳደረጉት፣ በዚህችው ቀን ለመምህሩ «ጌታ ሆይ፥ እንጸልይ ዘንድ አስተምረን» እንበለው። ስናሰላስልም፣ የምናቀርበው ልመና እያንዳንዱ ቃል ትርጕም የሞላበት መሆኑን እናገኛለን።

«ጌታ ሆይ፥ እንጸልይ ዘንድ አስተምረን።» አዎን፣ እንጸልይ ዘንድ። ልንማረው የሚያስፈልገን ይህንኑ ነው። ጸሎት በጅማሬው እጅግ ቀላል በመሆኑ ደካማው ሕፃን እንኳ ሊጸልይ ቢችልም፣ በዚያው ጊዜ ሰው ሊደርስበት የሚችለው ከፍተኛውና ቅዱሱ ሥራ ነው። ከማይታየውና ከቅዱሳን ቅዱስ ከሆነው ጋር ኅብረት ማድረግ ነው። የዘላለሙ ዓለም ኃይላት በእጁ ተሰጥተውታል። የእውነተኛ ሃይማኖት ዋና ባሕርይ፣ የበረከት ሁሉ መተላለፊያ፣ የኃይልና የሕይወት ምሥጢር ነው። ለራሳችን ብቻ ሳይሆን ለሌሎችም፣ ለቤተ ክርስቲያን፣ ለዓለም፣ እግዚአብሔር እርሱንና ብርታቱን የመያዝ መብትን የሰጠው ለጸሎት ነው። ተስፋዎች ለፍጻሜያቸው፣ መንግሥቱ ለመምጣትዋ፣ የእግዚአብሔርም ክብር ለሙሉ መገለጡ የሚጠባበቁት ጸሎትን ነው። ለዚህ ለተባረከ ሥራ ግን እኛ ምንኛ ሰነፎችና የማንበቃ ነን! በትክክል እንድንሠራው ሊያስችለን የሚችለው የእግዚአብሔር መንፈስ ብቻ ነው። ኃይሉ ጐድሎ ሳለ በመልኩ ብቻ ወደ ማረፍ ምንኛ ፈጥነን እንታለላለን! የልጅነት አስተዳደጋችን፣ የቤተ ክርስቲያን ትምህርት፣ የልማድ ተጽዕኖ፣ የስሜት መነሣሣት፣ እነዚህ መንፈሳዊ ኃይል ወደሌለውና እምብዛም ወደማይጠቅም ጸሎት ምንኛ በቀላሉ ይመሩናል! የእግዚአብሔርን ብርታት የሚይዝ፣ እጅግ ኃይል የሚያደርግ፣ የሰማይ ደጆችም በእውነት ወለል ብለው የሚከፈቱለት እውነተኛ ጸሎት፤ ማን ነው፦ ኦ እንዲህ እንድጸልይ የሚያስተምረኝ ሰው ባገኘሁ! ብሎ የማይጮኽ?

ኢየሱስ ትምህርት ቤት ከፍቶአል፤ በዚያም የተቤዣቸውን፣ በተለይ ይህን የሚመኙትን፣ በጸሎት ኃይል እንዲኖራቸው ያሠለጥናቸዋል። እንግዲህ፦ ጌታ ሆይ! ልንማረው የሚያስፈልገን ይህንኑ ነው! ኦ መጸለይን አስተምረን! በሚል ልመና ወደዚያ አንገባምን?

«ጌታ ሆይ፥ እኛን እንጸልይ ዘንድ አስተምረን።» አዎን፣ እኛን፣ ጌታ ሆይ። ጥንት በአንተ ያመኑ ሕዝብህ በምን ያህል ኃይል ይጸልዩ እንደ ነበር፣ ለጸሎታቸውም መልስ ምን ያህል ታላላቅ ተአምራት እንደ ተደረጉ በቃልህ አንብበናል። ይህ በብሉይ ኪዳን ዘመን፣ በዝግጅቱ ጊዜ ከሆነ፣ አሁን በዚህ በፍጻሜ ዘመን በመካከላቸው ለመገኘትህ ይህን እርግጠኛ ምልክት ለሕዝብህ እንዴት አብልጠህ አትሰጥም! በስምህ ስለሚቀርብ ጸሎት ኃይል ለሐዋርያትህ የተሰጡትን ተስፋዎች ሰምተናል፤ እውነትነታቸውንም እንዴት በክብር እንደ ተለማመዱ አይተናል፤ ለእኛም እውነት ሊሆኑ እንደሚችሉ በእርግጥ እናውቃለን። በእነዚህ ዘመናት እንኳ፣ ፈጽመው ለሚታመኑብህ የኃይልህን ምን ያህል ክቡር ምልክቶች አሁንም እንደምትሰጥ ዘወትር እንሰማለን። ጌታ ሆይ! እነዚህ ሁሉ እንደ እኛ ያሉ ሰዎች ናቸው፤ እኛንም እንዲሁ እንድንጸልይ አስተምረን። ተስፋዎቹ ለእኛ ናቸው፤ የሰማያዊው ዓለም ኃይላትና ስጦታዎች ለእኛ ናቸው። ኦ በብዛት እንቀበል ዘንድ እኛን መጸለይ አስተምረን። ሥራህን ለእኛም በአደራ ሰጥተሃል፤ የመንግሥትህ መምጣት በእኛም ጸሎት ላይ የተመሠረተ ነው፤ በእኛም ጸሎት ስምህን ልታከብር ትችላለህ፤ «ጌታ ሆይ፥ እንጸልይ ዘንድ አስተምረን።» አዎን፣ እኛን፣ ጌታ ሆይ፤ ራሳችንን እንደ ተማሪዎች እናቀርባለን፤ በእርግጥም ከአንተ ልንማር እንወዳለን። «ጌታ ሆይ፥ እኛን እንጸልይ ዘንድ አስተምረን።»

«ጌታ ሆይ፥ እንጸልይ ዘንድ አስተምረን።» አዎን፣ መጸለይን መማር እንደሚያስፈልገን አሁን ይሰማናል። መጀመሪያ ላይ ከዚህ የቀለለ የሚመስል ሥራ የለም፤ ቆይቶ ግን ከዚህ የከበደ የለም፤ ኑዛዜውም ከአፋችን በግድ ይወጣል፦ እንዴት እንድንጸልይ እንደሚገባን አናውቅም። እርግጥ ነው፣ ግልጽና እርግጠኛ ተስፋዎችን የያዘው የእግዚአብሔር ቃል አለን፤ ነገር ግን ኃጢአት አእምሮአችንን እጅግ ስላጨለመው፣ ቃሉን እንዴት ተግባራዊ እንደምናደርገው ሁልጊዜ አናውቅም። በመንፈሳዊ ነገሮች እጅግ የሚያስፈልጉትን ነገሮች ሁልጊዜ አንፈልግም፤ ወይም እንደ መቅደሱ ሕግ መጸለይ ይሳነናል። በምድራዊ ነገሮች ደግሞ፣ አባታችን የሚያስፈልገንን እንድንለምን የሰጠንን ድንቅ ነፃነት ለመጠቀም ከዚህ ይበልጥ ዐቅም እናጣለን። የምንለምነውን ስናውቅ እንኳ፣ ጸሎት ተቀባይነት እንዲያገኝ ገና ምን ያህል ነገር ያስፈልጋል! ለእግዚአብሔር ክብር፣ ለፈቃዱ ፈጽሞ ራስን በመስጠት፣ በሙሉ የእምነት እርግጠኝነት፣ በኢየሱስ ስም፣ ቢያስፈልግም እምቢ መባልን በማይቀበል ጽናት መሆን አለበት። ይህ ሁሉ መማር ይገባዋል። ሊማር የሚችለውም በብዙ ጸሎት ትምህርት ቤት ብቻ ነው፤ ልምምድ ፍጹም ያደርጋልና። ባለማወቅና ባለመገባት በሚያሠቃይ ስሜት መካከል፣ በማመንና በመጠራጠር መካከል ባለው ትግል ውስጥ፣ ውጤታማ የጸሎት ሰማያዊ ጥበብ ይማራል። ምክንያቱም እኛ ባናስታውሰው እንኳ፣ የእምነትና የጸሎት ጀማሪና ፈጻሚ የሆነ አንድ አለ፤ እርሱም ጸሎታችንን ይጠብቃል፤ ለዚህ በእርሱ በሚታመኑ ሁሉ ዘንድ በጸሎት ትምህርት ቤት የሚያገኙት ትምህርት ወደ ፍጻሜ እንዲደርስ ይከታተላል። የጸሎታችን ሁሉ ጥልቅ ውስጣዊ ቃና፣ ካለማወቅ ስሜትና ፍጹም መምህር በሆነው በእርሱ ካለ እምነት የሚመነጭ የመማር ልብ ብቻ ይሁን፤ እኛም እንደምንማር፣ በኃይልም መጸለይን እንደምንማር እርግጠኞች መሆን እንችላለን። አዎን፣ በዚህ ልንተማመን እንችላለን፤ እርሱ መጸለይን ያስተምራል።

«ጌታ ሆይ፥ እንጸልይ ዘንድ አስተምረን።» እንደ ኢየሱስ የሚያስተምር የለም፤ ከኢየሱስ በቀር ማንም የለም፤ ስለዚህ «ጌታ ሆይ፥ እንጸልይ ዘንድ አስተምረን» ብለን እርሱን እንጠራለን። ተማሪ ሥራውን የሚያውቅ፣ የማስተማር ስጦታ ያለው፣ በትዕግሥትና በፍቅር ወደ ተማሪው ፍላጎት ዝቅ የሚል መምህር ያስፈልገዋል። እግዚአብሔር ይባረክ! ኢየሱስ ይህ ሁሉ ነው፤ ከዚህም እጅግ የሚበልጥ ነው። ጸሎት ምን እንደ ሆነ ያውቃል። መጸለይን የሚያስተምረው ራሱ የሚጸልየው ኢየሱስ ነው። ጸሎት ምን እንደ ሆነ ያውቃል። በምድራዊ ሕይወቱ ፈተናዎችና እንባዎች መካከል ተምሮታል። በሰማይም የሚወደው ሥራው አሁንም ይኸው ነው፤ በዚያ ያለው ሕይወቱ ጸሎት ነው። ወደ አብ ፊት ከእርሱ ጋር ይዞ ሊገባቸው የሚችላቸውን፣ በዙሪያቸው ባሉት ላይ የእግዚአብሔርን በረከት በጸሎት እንዲያወርዱ ኃይልን ሊያለብሳቸው የሚችላቸውን፣ መንግሥቱ በምድር በምትገለጥበት ምልጃ ከእርሱ ጋር አብረው የሚሠሩ እንዲሆኑ ሊያሠለጥናቸው የሚችላቸውን ሰዎች ከማግኘት የበለጠ ደስ የሚያሰኘው ነገር የለም። እንዴት እንደሚያስተምርም ያውቃል። አንዳንድ ጊዜ በሚሰማ አጣዳፊ ችግር፣ ሌላ ጊዜ ደስታ በሚያሳድረው መተማመን፤ እዚህ በቃሉ ትምህርት፣ እዚያ ደግሞ ጸሎት መሰማት ምን እንደ ሆነ በሚያውቅ በሌላ አማኝ ምስክርነት ያስተምራል። በመንፈስ ቅዱስ በኩል ወደ ልባችን መግቢያ አለው፤ ጸሎትን የሚያደናቅፈውን ኃጢአት በማሳየት፣ ወይም እግዚአብሔርን ደስ እንደምናሰኝ ማረጋገጫ በመስጠት እንድንጸልይ ያስተምረናል። የሚያስተምረውም ምን እንደምንለምን ወይም እንዴት እንደምንለምን ሐሳብ በመስጠት ብቻ ሳይሆን፣ የጸሎትን መንፈስ ራሱ በውስጣችን እፍ በማለትና እንደ ታላቁ አማላጅ በውስጣችን በመኖር ነው። በእርግጥ በታላቅ ደስታም፦ «እንደ እርሱ የሚያስተምር ማን ነው?» ልንል እንችላለን። ኢየሱስ ደቀ መዛሙርቱን እንዴት እንደሚሰብኩ አላስተማራቸውም፤ ያስተማራቸው እንዴት እንደሚጸልዩ ብቻ ነው። በሚገባ ለመስበክ ስለሚያስፈልገው ብዙ አልተናገረም፤ በሚገባ ስለ መጸለይ ግን ብዙ ተናግሮአል። ከእግዚአብሔር ጋር እንዴት እንደሚነገር ማወቅ ከሰው ጋር እንዴት እንደሚነገር ከማወቅ ይበልጣል። ቀዳሚው ነገር በሰዎች ዘንድ ያለ ኃይል ሳይሆን በእግዚአብሔር ዘንድ ያለ ኃይል ነው። ኢየሱስ እንዴት እንደምንጸልይ ሊያስተምረን ይወዳል።

የተወደዳችሁ የደቀ መዝሙርነት ባልንጀሮቼ ሆይ! ምን ይመስላችኋል? በጸሎት ጥበብ ላይ ለአንድ ወር ልዩ ተከታታይ ትምህርት እንዲሰጠን መምህሩን መለመን በትክክል የሚያስፈልገን አይደለምን? በምድር ሳለ የተናገራቸውን ቃላት ስናሰላስል፣ እንደዚህ ካለ መምህር ጋር እንደምናድግ በፍጹም መተማመን ራሳችንን ለትምህርቱ እናስገዛ። ለማሰላሰል ብቻ ሳይሆን ለመጸለይም፣ በዙፋኑ ግርጌ ለመቆየትና ለምልጃ ሥራ ለመሠልጠንም ጊዜ እንውሰድ። በመንተባተባችንና በፍርሃታችን መካከል እርሱ ሥራውን እጅግ በሚያምር ሁኔታ እያከናወነ እንደ ሆነ በመተማመን ይህን እናድርግ። ሁለንተናው ጸሎት የሆነውን የራሱን ሕይወት በውስጣችን እፍ ይላል። የጽድቁና የሕይወቱ ተካፋዮች እንዳደረገን፣ የምልጃውም ተካፋዮች ያደርገናል። እንደ አካሉ ብልቶች፣ እንደ ቅዱስ ክህነት፣ ስለ ሰዎች በእግዚአብሔር ፊት በመማለድና በማሸነፍ የካህንነት ሥራው ተካፋዮች እንሆናለን። አዎን፣ አላዋቂዎችና ደካሞች ብንሆንም፣ በታላቅ ደስታ «ጌታ ሆይ፥ እንጸልይ ዘንድ አስተምረን» እንበል።

«ጌታ ሆይ፥ እንጸልይ ዘንድ አስተምረን።»

ብሩክ ጌታ ሆይ! ዘወትር ልትጸልይ በሕይወት የምትኖር አንተ፣ እኔንም መጸለይን፣ እኔንም ዘወትር ልጸልይ መኖርን ልታስተምረኝ ትችላለህ። በዚህ በሰማይ ያለህን ክብር እንድካፈል ታደርገኝ ዘንድ ትወዳለህ፤ ሳላቋርጥ እንድጸልይ፣ ሁልጊዜም በአምላኬ ፊት እንደ ካህን እንድቆም።

ጌታ ኢየሱስ ሆይ! በዚህች ቀን፣ እንደሚገባ እንዴት እንደሚጸልዩ እንደማያውቁ ከሚናዘዙትና በተለይ በጸሎት ትምህርት እንድትሰጣቸው ከሚለምኑህ ሰዎች መካከል ስሜን እንድታስመዘግብ እለምንሃለሁ። ጌታ ሆይ! በትምህርት ቤቱ ከአንተ ጋር እንድቆይ፣ እንድታሠለጥነኝም ጊዜ እንድሰጥህ አስተምረኝ። ስለ አለማወቄ፣ ስለ ጸሎት ድንቅ መብትና ኃይል፣ የጸሎት መንፈስ የሆነው መንፈስ ቅዱስ ስለሚያስፈልገኝም ያለኝ ጥልቅ ስሜት፣ አውቀዋለሁ ብዬ የማስበውን ሐሳቤን እንድጥል ይምራኝ፤ በእውነተኛ የመማር ልብና በመንፈስ ድህነትም በፊትህ እንድበረከክ ያድርገኝ።

ጌታ ሆይ፣ አንተን የመሰለ መምህር ካለኝ መጸለይን እንደምማር በሚል መተማመንም ሙላኝ። ዘወትር ወደ አብ የሚጸልየውና በጸሎቱ የቤተ ክርስቲያኑንና የዓለምን ዕጣ ፈንታ የሚገዛው ኢየሱስ መምህሬ እንደ ሆነ በማረጋገጥ አልፈራም። ከጸሎት ዓለም ምሥጢራት ማወቅ የሚያስፈልገኝን ያህል ትገልጥልኛለህ። ማወቅ በማልችልበት ጊዜም፣ ለእግዚአብሔር ክብር እየሰጠሁ በእምነት እንድበረታ ታስተምረኛለህ።

ብሩክ ጌታ ሆይ! በአንተ የሚታመነውን ተማሪህን አታሳፍረውም፤ እርሱም በጸጋህ አንተን አያሳፍርህም። አሜን።