የኅብረት ጸሎት ኃይል

«ደግሞ እላችኋለሁ፥ ከእናንተ ሁለቱ በምድር በማናቸውም በሚለምኑት ነገር ሁሉ ቢስማሙ በሰማያት ካለው ከአባቴ ዘንድ ይደረግላቸዋል። ሁለት ወይም ሦስት በስሜ በሚሰበሰቡበት በዚያ በመካከላቸው እሆናለሁና።»—ማቴዎስ 18:19-20።

ጌታችን በጸሎት ትምህርት ቤቱ ካስተማራቸው የመጀመሪያ ትምህርቶች አንዱ ይህ ነበር፦ በሰዎች ዘንድ ለመታየት አትጸልይ። ወደ እልፍኝህ ግባ፤ ከአብ ጋር ብቻህን ሁን። የጸሎት ትርጉም ከእግዚአብሔር ጋር የሚደረግ የግል፣ የአንድ ሰው ግንኙነት መሆኑን በዚህ መንገድ ካስተማረን በኋላ፣ ሁለተኛ ትምህርት ይዞ ይመጣል፦ የሚያስፈልግህ በስውር ብቻህን የምታደርገው ጸሎት ብቻ ሳይሆን፣ ከሌሎች ጋር በአደባባይ በኅብረት የምታደርገው ጸሎትም ጭምር ነው። በሚለምኑትም ነገር ለሚስማሙ ለሁለት ወይም ለሦስት ሰዎች የኅብረት ጸሎት እጅግ የተለየ የተስፋ ቃል ይሰጠናል። ዛፍ ሥሩ በመሬት ውስጥ ተሰውሮ ግንዱ ግን ወደ ፀሐይ ብርሃን እያደገ እንደሚወጣ፣ እንዲሁ ጸሎትም ሙሉ በሙሉ እንዲያድግ ሁለቱንም እኩል ያስፈልገዋል፦ ነፍስ ከእግዚአብሔር ጋር ብቻዋን የምትገናኝበትን የተሰወረ ስፍራ፣ እንዲሁም በኢየሱስ ስም የጋራ መገናኛቸውን ካገኙ ሰዎች ጋር የሚደረገውን የአደባባይ ኅብረት።

ይህ እንዲህ መሆን ያለበት ምክንያት ግልጽ ነው። ሰውን ከባልንጀሮቹ ጋር የሚያስተሳስረው ማሰሪያ ከእግዚአብሔር ጋር ከሚያስተሳስረው ያላነሰ እውነተኛና የቀረበ ነው፤ ሰው ከእነርሱ ጋር አንድ ነው። ጸጋ የሚያድሰው ከእግዚአብሔር ጋር ያለንን ግንኙነት ብቻ ሳይሆን ከሰውም ጋር ያለንን ጭምር ነው። «አባቴ» ማለትን ብቻ ሳይሆን «አባታችን» ማለትንም እንማራለን። የአንድ ቤተሰብ ልጆች ከአባታቸው ጋር ሁልጊዜ ለየብቻ ቢገናኙ፣ ምኞታቸውን ወይም ፍቅራቸውን በአንድነት ግን ፈጽሞ ባይገልጹ፣ ከዚህ የበለጠ ከተፈጥሮ ውጭ የሆነ ነገር አይኖርም። አማኞች የአንድ ቤተሰብ አባላት ብቻ ሳይሆኑ የአንድ አካልም ብልቶች ናቸው። የአካል እያንዳንዱ ብልት በሌላው ላይ እንደሚመካ፣ በአካል ውስጥ የሚኖረው መንፈስ ሙሉ ሥራውም በሁሉም አንድነትና ትብብር ላይ እንደሚመሠረት፣ እንዲሁ ክርስቲያኖች እግዚአብሔር በመንፈሱ በኩል ሊሰጥ የተዘጋጀውን ሙሉ በረከት ሊደርሱበት የሚችሉት እርስ በርሳቸው በኅብረት ሲፈልጉትና ሲቀበሉት ብቻ ነው። መንፈስ ሙሉ ኃይሉን ሊገልጥ የሚችለው በአማኞች አንድነትና ኅብረት ውስጥ ነው። መንፈስ ከከበረው ጌታ ዙፋን የወረደው በአንድ ስፍራ አብረው ለነበሩትና በአንድ ልብ ሆነው ለሚጸልዩት ለመቶ ሃያዎቹ ነበር።

የእውነተኛ የኅብረት ጸሎት ምልክቶች በእነዚህ በጌታችን ቃላት ውስጥ ተሰጥተውናል። የመጀመሪያው በሚለመነው ነገር ላይ መስማማት ነው። ሌላው ሰው ለሚለምነው ማናቸውም ነገር ለመስማማት በጥቅሉ መፍቀድ ብቻ በቂ አይደለም፤ የተለየ አንድ ነገር፣ በግልጽ በአንድነት የሚመኙት ጉዳይ መኖር አለበት፤ ይህም መስማማት እንደ ጸሎት ሁሉ በመንፈስና በእውነት መሆን አለበት። እንዲህ ባለው መስማማት ውስጥ የምንለምነው በትክክል ምን እንደ ሆነ፣ በእግዚአብሔር ፈቃድ መሠረት በድፍረት መለመን እንችል እንደ ሆነ፣ የምንለምነውንም እንደ ተቀበልን ለማመን ዝግጁ መሆናችንን በግልጽ እናስተውላለን።

ሁለተኛው ምልክት በኢየሱስ ስም፣ ወይም ወደ ኢየሱስ ስም፣ መሰብሰብ ነው። ወደ ፊት በጸሎት ውስጥ የኢየሱስ ስም ስላለው አስፈላጊነትና ኃይል ብዙ የምንማረው ይኖረናል፤ እዚህ ግን ጌታችን የሚያስተምረን ይህን ነው፦ ቤት በውስጡ ያሉትን ሁሉ እንደሚይዝና አንድ እንደሚያደርግ፣ እንዲሁ ስሙ አማኞች የሚሰበሰቡበት የአንድነት ማዕከል፣ አንድ የሚያደርጋቸውም የአንድነት ማሰሪያ መሆን አለበት። «የእግዚአብሔር ስም የጸና ግንብ ነው፤ ጻድቅ ወደ እርሱ ሮጦ ይድናል።» ያ ስም ለሚያስተውሉትና ለሚያምኑት እጅግ እውነተኛ ከመሆኑ የተነሣ፣ በውስጡ መገናኘት እርሱን ራሱን በመካከል ማግኘት ነው። የደቀ መዛሙርቱ ፍቅርና አንድነት ለኢየሱስ ወሰን የሌለው የሚስብ ኃይል አለው፦ «ሁለት ወይም ሦስት በስሜ በሚሰበሰቡበት በዚያ በመካከላቸው እሆናለሁና።» ለኅብረት ጸሎት ኃይሉን የሚሰጠው፣ በሚወዱትና በሚጸልዩት ደቀ መዛሙርቱ ኅብረት ውስጥ ያለው የኢየሱስ ሕያው መገኘት ነው።

ሦስተኛው ምልክት እርግጠኛው መልስ ነው፦ «ከአባቴ ዘንድ ይደረግላቸዋል።» ሃይማኖታዊ ኅብረትን ለመጠበቅ ወይም የራሳችንን መታነጽ ለመፈለግ የሚደረግ የጸሎት ስብሰባ የራሱ ጥቅም ሊኖረው ይችላል፤ አዳኙ ግን ይህን ሲሠራ ዓላማው ይህ አልነበረም። እርሱ ያሰበው ለጸሎት የተለየ መልስ ማግኛ መንገድ እንዲሆን ነበር። ለጸሎት የታወቀ መልስ የማይገኝበት የጸሎት ስብሰባ ያልተለመደ እንግዳ ነገር ሊሆን ይገባዋል። ማንኛችንም የሚያስፈልገውን እምነት ለመለማመድ በጣም ደካሞች እንደ ሆንን የሚሰማን የተለየ ምኞት ሲኖረን፣ በሌሎች እርዳታ ብርታትን ልንፈልግ ይገባናል። በእምነት፣ በፍቅርና በመንፈስ አንድነት ውስጥ የስሙ ኃይልና የኢየሱስ መገኘት ይበልጥ በነጻነት ይሠራሉ፤ መልሱም ይበልጥ በእርግጠኝነት ይመጣል። እውነተኛ የኅብረት ጸሎት መደረጉን የሚያሳየው ምልክት ፍሬው፣ መልሱ፣ የለመንነውን ነገር መቀበል ነው፦ «እላችኋለሁ፥ … በሰማያት ካለው ከአባቴ ዘንድ ይደረግላቸዋል።»

ይህ የኅብረት ጸሎት እንዴት ያለ ሊነገር የማይችል መብት ነው! ምን ያህል ታላቅ ኃይልስ ሊሆን በቻለ ነበር! አማኞች የሆኑ ባልና ሚስት በኅብረት ጸሎት የእርሱን መገኘትና ኃይል እንዲለማመዱ በኢየሱስ ስም አብረው እንደ ተጣመሩ ቢያውቁ (1ኛ ጴጥሮስ)፤ ወዳጆች በአንድነት የሚጸልዩ ሁለት ወይም ሦስት ሰዎች እርስ በርሳቸው ምን ያህል ታላቅ እርዳታ ሊሰጣጡ እንደሚችሉ ቢያምኑ፤ በእያንዳንዱ የጸሎት ስብሰባ በስሙ መሰብሰብ፣ በመገኘቱ ማመንና መልሱን መጠባበቅ ከሁሉ በፊት ቦታ ቢያገኙ፤ በእያንዳንዱ ቤተ ክርስቲያን በኅብረት የሚደረግ የሚሠራ ጸሎት አባላቱ ከተሰባሰቡባቸው ዋና ዋና ዓላማዎች አንዱ፣ እንደ ቤተ ክርስቲያንም ኃይላቸውን የሚገልጡበት ከሁሉ የላቀ ተግባር ሆኖ ቢቆጠር፤ በዓለም አቀፋዊቱ ቤተ ክርስቲያን የመንግሥቱ መምጣት፣ የንጉሡ ራሱ መምጣት—በመጀመሪያ በመንፈስ ቅዱሱ ብርቱ መፍሰስ፣ ከዚያም በራሱ በክቡር አካሉ—በእውነት ወደ እግዚአብሔር የማያቋርጥ የኅብረት ጩኸት ጉዳይ ቢሆን፤—ኦ፣ እግዚአብሔር የተስፋ ቃሉን እንደሚፈጽም በተግባር ለማየት እንዲህ በተስማሙ ሰዎች ላይና በእነርሱም በኩል ምን ያህል በረከት ሊመጣ እንደሚችል ማን ሊናገር ይችላል!

በሐዋርያው ጳውሎስ ዘንድ በኅብረት ጸሎት ኃይል ላይ የነበረው እምነቱ ምን ያህል እውነተኛ እንደ ነበረ በግልጽ እናያለን። ለሮሜ ሰዎች (15:30) እንዲህ ሲል ይጽፋል፦ «ወንድሞች ሆይ፥ ስለ እኔ ወደ እግዚአብሔር እየጸለያችሁ ከእኔ ጋር ትጋደሉ ዘንድ በመንፈስ ፍቅር እለምናችኋለሁ።» ለዚህም መልስ ከጠላቶቹ እንደሚድንና በሥራው እንደሚከናወንለት ይጠብቃል። ለቆሮንቶስ ሰዎች ደግሞ (2ኛ ቆሮንቶስ 1:11) «እግዚአብሔር ገና ደግሞ ያድነናል፤ እናንተም ደግሞ ስለ እኛ በልመናችሁ አብራችሁ ትረዳላችሁ፤» ይላል፤ ጸሎታቸው በመዳኑ ውስጥ እውነተኛ ድርሻ ሊኖረው ነው። ለኤፌሶን ሰዎች ደግሞ እንዲህ ሲል ይጽፋል፦ «በጸሎትና በልመናም ሁሉ ዘወትር በመንፈስ ጸልዩ፤ ስለ ቅዱሳን ሁሉ እየለመናችሁ፥ ቃል ይሰጠኝ ዘንድ ስለ እኔ ለምኑ።» በአገልግሎቱ ያለውን ኃይሉንና ስኬቱን በጸሎታቸው ላይ እንዲመሠረት ያደርገዋል። ከፊልጵስዩስ ሰዎች ጋር ሆኖ (1:19) መከራው ለመዳኑና ለወንጌል እድገት እንደሚሆን ይጠብቃል፤ ይህም «በጸሎታችሁና በኢየሱስ ክርስቶስ መንፈስ መሰጠት» ነው። ለቆላስይስ ሰዎች (4:3) በጸሎት እንዲጸኑ በሰጠው ምክር ላይ ይህን ይጨምራል፦ «እግዚአብሔር የቃሉን ደጅ ይከፍትልን ዘንድ ስለ እኛ ደግሞ ጸልዩ።» ለተሰሎንቄ ሰዎችም (2ኛ ተሰሎንቄ 3:1) እንዲህ ሲል ይጽፋል፦ «በቀረውስ፥ ወንድሞች ሆይ፥ የጌታ ቃል እንዲሮጥ እንዲከበርም፥ ከዓመፀኞችና ከክፉዎች ሰዎችም እንድንድን ስለ እኛ ጸልዩ።» ጳውሎስ ራሱን ርኅራኄያቸውና ትብብራቸው የሚያስፈልገው የአንድ አካል ብልት አድርጎ ይቆጥር እንደ ነበረ፣ በሌላ መንገድ ሊሰጠው የማይችለውን እንዲያስገኙለትም በእነዚህ አብያተ ክርስቲያናት ጸሎት ላይ ይታመን እንደ ነበረ በየስፍራው ግልጽ ነው። የቤተ ክርስቲያን ጸሎት ለእርሱ በመንግሥቱ ሥራ ውስጥ እንደ እግዚአብሔር ኃይል እውነተኛ ሥፍራ ያለው ነገር ነበረ።

አንዲት ቤተ ክርስቲያን ለመንግሥቱ መምጣት፣ በአገልጋዮቹና በቃሉ ላይ ለሚገለጠው የእግዚአብሔር ኃይል፣ በነፍሳትም መዳን እግዚአብሔር እንዲከብር ቀንና ሌሊት ራሷን ለጸሎት ሥራ ብትሰጥ ምን ያህል ኃይል ልታዳብርና ልትጠቀምበት እንደምትችል ማን ሊናገር ይችላል? አብዛኞቹ አብያተ ክርስቲያናት አባሎቻቸው በአንድነት የሚሰበሰቡት እርስ በርሳቸው ለመተሳሰብና ለመተናነጽ ብቻ እንደ ሆነ ያስባሉ። እግዚአብሔር ዓለምን በቅዱሳኑ ጸሎት እንደሚገዛ፣ ጸሎት ሰይጣን የሚሸነፍበት ኃይል እንደ ሆነ፣ በጸሎትም በምድር ያለችው ቤተ ክርስቲያን የሰማያዊውን ዓለም ኃይላት በእጅዋ እንደምታዝ አያውቁም። ኢየሱስ በስሙ የሚደረገውን እያንዳንዱን ጉባኤ በተስፋ ቃሉ የሰማይ ደጅ እንዲሆን እንደ ቀደሰው አያስታውሱም፤ በዚያም መገኘቱ ይሰማል፣ አብ ምኞታቸውን በመፈጸሙም ኃይሉ ይታያል።

ሕዝበ ክርስቲያን በዘመናችን በየዓመቱ መጀመሪያ ለሚያደርገው ለተባረከው የኅብረት ጸሎት ሳምንት እግዚአብሔርን በበቂ ሁኔታ ልናመሰግነው አንችልም። ለአንድነታችንና በኅብረት ጸሎት ኃይል ላይ ላለን እምነት ማስረጃ እንደ መሆኑ፣ የዓለም አቀፋዊቱን ቤተ ክርስቲያን ፍላጎቶች ሁሉ እንዲያቅፍ ልባችንን ለማስፋት የሚያሠለጥን ትምህርት ቤት እንደ መሆኑ፣ ለኅብረትና ለጽናት ጸሎትም እርዳታ እንደ መሆኑ ሊነገር የማይችል ዋጋ አለው። ከሁሉም በላይ ግን በትናንሽ ክበቦች ውስጥ በጸሎት ለሚቀጥል አንድነት እንደ ማነቃቂያ በረከቱ ታላቅ ሆኖአል። የእግዚአብሔር ሕዝብም ይህ ምን እንደ ሆነ ሲገነዘቡ—ይህም ሁሉም በመንፈስ ቅዱስ አንድ በሆነ አካል መካከል መገኘቱን ለማግኘት በኢየሱስ ስም እንደ አንድ መሰብሰብ፣ የሚስማሙበትንም ነገር አብ እንደሚያደርግላቸው የተሰጠውን የተስፋ ቃል በድፍረት መጠየቅ መሆኑን ሲያውቁ—በረከቱ ከዚህ የበለጠ ይሆናል።

«ጌታ ሆይ፥ እንጸልይ ዘንድ አስተምረን።»

ብሩክ ጌታ ሆይ! በሊቀ ካህናት ጸሎትህ ስለ ሕዝብህ አንድነት አጥብቀህ የለመንህ አንተ፣ ለኅብረት ጸሎት በሰጠኸው ክቡር የተስፋ ቃልህ ወደዚህ አንድነት እንዴት እንደምትጋብዘንና እንደምታበረታታን አስተምረን። እምነታችን መገኘትህንና የአብን መልስ የሚያገኘው በፍቅርና በምኞት አንድ ስንሆን ነው።

አባት ሆይ! ስለ ሕዝብህና አብረው ስለሚሰበሰቡ ስለ እያንዳንዱ ትንሽ ክበብ አንድ እንዲሆኑ እንለምንሃለን። ያንን አንድነት የሚያደናቅፉትን ራስ ወዳድነትንና የግል ጥቅም ፍለጋን ሁሉ፣ የልብ ጥበትንና መራራቅን ሁሉ፣ እባክህ አስወግድ። የተስፋ ቃልህ ኃይሉን ሁሉ የሚያጣበትን የዓለምንና የሥጋን መንፈስ አውጣ። ኦ፣ የመገኘትህና የአብ ሞገስ አሳብ ሁላችንንም እርስ በርሳችን ይበልጥ ያቀራርበን።

ብሩክ ጌታ ሆይ፣ በተለይም ቤተ ክርስቲያንህ በሰማይ ማሰርና መፍታት የምትችለው፣ ሰይጣን ሊወጣ፣ ነፍሳት ሊድኑ፣ ተራሮች ሊነቀሉ፣ መንግሥቱም ሊፋጠን የሚችለው በኅብረት ጸሎት ኃይል እንደ ሆነ እንድታምን ስጣት። ቸሩ ጌታ ሆይ! እኔ አብሬ በምጸልይበት ክበብ ውስጥም የቤተ ክርስቲያን ጸሎት ስምህና ቃልህ የሚከብሩበት ኃይል በእውነት እንዲሆን ስጥ። አሜን።