እግዚአብሔር ዓለምን በጸሎት ይቀርጻል

የማምነው እምነቴ ጸሎት ፍሬያማ እንደ ሆነ እንዳስብ ይመራኛል፤ ደግሞም ነገሮችን ሁሉ ለበጎ እንዲያደርጋቸው እግዚአብሔርን በመለመን ያለፈ አንድ ቀን በእርግጥ የባከነ አይደለም። ሆኖም ሰው በሚጸልይበት ጊዜ ምንም እየሠራ እንዳልሆነ የሚያስብ ብርቱ ስሜት አለ፤ ይህም ስሜት ለሥራ ከሚገባው በላይ ክብደት እንድንሰጥ ያደርገናል፤ አንዳንድ ጊዜም ጸሎትን በችኮላ እንድናልፈው፣ አልፎ ተርፎም ቸል እንድንለው ያደርገናል።

በዘመናችን በሥጋ ክንድ ላይ ከመጠን በላይ አንደገፍምን? በጥንት ጊዜ የተደረጉት ድንቆች ዛሬም ሊደረጉ አይችሉምን? በእርሱ ለሚታመኑት ብርታቱን ይገልጥ ዘንድ የእግዚአብሔር ዓይኖች ዛሬም በምድር ሁሉ ላይ ወዲያና ወዲህ አይመለከቱምን? እግዚአብሔር በእርሱ ላይ በተግባር የሚገለጥ እምነትን ቢያበዛልኝ ምንኛ መልካም ነበር! የኤልያስ አምላክ እግዚአብሔር አሁን ወዴት ነው? እርሱ ኤልያስ እንዲጠራው እየጠበቀ ነው።—የሞንጎሊያው ጄምስ ጊልሞር

በዓለም ላይ ጸሎት በበዛ መጠን ዓለም የተሻለች ትሆናለች፤ በየስፍራውም ክፋትን የሚቃወሙ ኃይላት ይበልጥ ይበረታሉ። ጸሎት ከሥራዎቹ በአንዱ ገጽታ በሽታን እንደሚያጠፋና እንደሚከላከል መድኃኒት ነው። አየሩን ያነጻል፤ የክፋትን ተላላፊ ወረርሽኝ ያጠፋል። ጸሎት አንድ ጊዜ ብልጭ ብሎ ቶሎ የሚጠፋ ነገር አይደለም። በጸጥታ ውስጥ ማንም ሳይሰማውና ማንም ሳያስተውለው የሚጮኽ ድምፅ አይደለም። ወደ እግዚአብሔር ጆሮ የሚገባ ድምፅ ነው፤ የእግዚአብሔር ጆሮ ለቅዱስ ልመና ክፍት እስከ ሆነ ድረስ፣ የእግዚአብሔርም ልብ ለቅዱሳት ነገሮች ሕያው እስከ ሆነ ድረስ በሕይወት ይኖራል።

እግዚአብሔር ዓለምን በጸሎት ይቀርጻል። ጸሎቶች አይሞቱም። የጸለዩአቸው ከንፈሮች በሞት ተዘግተው፣ የተሰማቸውም ልብ መምታቱን አቁሞ ሊሆን ይችላል፤ ጸሎቶቹ ግን በእግዚአብሔር ፊት ሕያዋን ሆነው ይኖራሉ፤ የእግዚአብሔርም ልብ በእነርሱ ላይ ነው፤ ጸሎቶች ከጸለዩአቸው ሰዎች ዕድሜ አልፈው ይኖራሉ፤ ከአንድ ትውልድ፣ ከአንድ ዘመን፣ ከአንድ ዓለምም ዕድሜ አልፈው ይኖራሉ።

ከሰዎች ሁሉ ይበልጥ የማይሞተው ብዙና መልካም ጸሎት የጸለየ ሰው ነው። እንዲህ ያሉት የእግዚአብሔር ጀግኖች፣ የእግዚአብሔር ቅዱሳን፣ የእግዚአብሔር አገልጋዮች፣ የእግዚአብሔር እንደራሴዎች ናቸው። ሰው ባለፉት ዘመናት ጸሎቶች ምክንያት የተሻለ ሊጸልይ ይችላል፤ ባለፉት ዘመናት ጸሎቶች ምክንያት ይበልጥ በቅድስና ሊኖር ይችላል፤ ብዙና ተቀባይነት ያለው ጸሎት የጸለየ ሰው ለሚመጣው ትውልድ እጅግ እውነተኛና ታላቅ አገልግሎት ፈጽሟል። የእግዚአብሔር ቅዱሳን ጸሎቶች ገና ያልተወለደውን ትውልድ ከሚያጠፋው የኃጢአትና የክፋት ማዕበል ያጸኑታል። ጥናዎቻቸው ከበለጸገው የጸሎት ዕጣን ባዶ ሆነው ለሚያገኙ ልጆች ትውልድ ወዮለት፤ አባቶቻቸው ለመጸለይ እጅግ ሥራ የበዛባቸው ወይም እጅግ የማያምኑ ነበሩና፤ በቃል የማይገለጹ አደጋዎችና የማይነገሩ መዘዞችም አሳዛኝ ርስታቸው ይሆናሉ። አባቶቻቸውና እናቶቻቸው የበለጸገ የጸሎት ውርስ ያቆዩላቸው ግን የታደሉ ናቸው።

የእግዚአብሔር ቅዱሳን ጸሎቶች ክርስቶስ በምድር ላይ ታላቁን ሥራውን የሚያካሂድበት በሰማይ የተቀመጠ ዋና ገንዘብ ናቸው። በምድር ላይ የሚታዩት ታላላቅ ምጦችና ብርቱ መናወጦች የእነዚህ ጸሎቶች ውጤቶች ናቸው። ጸሎቶች እየበዙና ይበልጥ ፍሬያማ እየሆኑ በሄዱ መጠን ምድር ትለወጣለች፣ ከሥር መሠረቷ ትገለባበጣለች፤ መላእክትም በበለጠ ብርቱና ፈጣን ክንፍ ይንቀሳቀሳሉ፤ የእግዚአብሔርም አሠራር ይቀረጻል።

ወደ እግዚአብሔር ጉዳይ የሚመጡት እጅግ ታላላቅ ስኬቶች የሚፈጠሩትና የሚቀጥሉት በጸሎት እንደ ሆነ እውነት ነው። የእግዚአብሔር የኃይል ቀን፣ መላእክት በብርቱ የሚሠሩበትና ኃይል የሚገልጡበት ዘመን፣ የእግዚአብሔር ቤተ ክርስቲያን እጅግ ብርቱ የሆነውን የእምነትና የጸሎት ታላቅ ርስቷን የምትወርስበት ጊዜ ነው። የእግዚአብሔር የድል ቀናት ቅዱሳን ራሳቸውን ለብርቱ ጸሎት የሰጡባቸው ቀናት ናቸው። በምድር ያለው የእግዚአብሔር ቤት የጸሎት ቤት ሲሆን፣ ያን ጊዜ በሰማይ ያለው የእግዚአብሔር ቤት በዕቅዶቹና በእንቅስቃሴዎቹ ትጉና ሁሉን ቻይ ይሆናል፤ ያን ጊዜ በምድር ያሉት ሠራዊቱ የድልን ክብርና ምርኮ ይለብሳሉ፤ ጠላቶቹም በየአቅጣጫው ድል ይሆናሉ።

እግዚአብሔር የጉዳዩን ሕይወትና ብልጽግና በጸሎት ላይ የተመሠረተ አድርጎታል። ይህ ቅድመ ሁኔታ የእግዚአብሔር ጉዳይ በዚህ ዓለም ውስጥ በተመሠረተበት ጊዜ በራሱ በመሠረቱ ውስጥ ተቀምጧል። ለምነኝ የሚለው ቃል እግዚአብሔር ለጉዳዩ መስፋፋትና ድል ያስቀመጠው ብቸኛ ቅድመ ሁኔታ ነው።

ሰዎች ሊጸልዩ ይገባቸዋል—ለእግዚአብሔር ጉዳይ መስፋፋት ሊጸልዩ ይገባቸዋል። ጸሎት እግዚአብሔርን በዓለም ውስጥ በሙሉ ኃይሉ እንዲገለጥ ያደርገዋል። ለሚጸልይ ሰው እግዚአብሔር በተጨባጭ ኃይል ይገኛል፤ ለምትጸልይ ቤተ ክርስቲያን እግዚአብሔር በክቡር ኃይል ይገኛል፤ ሁለተኛው መዝሙርም የእግዚአብሔር ጉዳይ በኢየሱስ ክርስቶስ በኩል እንዴት እንደሚጸና የሚገልጽ መለኮታዊ መግለጫ ነው። ከዚህ ያነሱት የእግዚአብሔር የአሠራር ዘመናት ሁሉ በኢየሱስ ክርስቶስ በዙፋን መቀመጥ ውስጥ ተጠቃለዋል። እግዚአብሔር ልጁ በዙፋን መቀመጡን ያውጃል። አሕዛብ በጉዳዩ ላይ በመራራ ጥላቻ ተቈጥተዋል። እግዚአብሔር በደከመው ጥላቻቸው እንደሚሥቅ ተገልጿል። ጌታ ይሥቅባቸዋል፤ ጌታ ይሳለቅባቸዋል። «እኔ ግን ንጉሤን በተቀደሰው ተራራዬ በጽዮን ላይ ሾምሁ።» የማይለወጠውና ዘላለማዊው ትእዛዝ ታውጇል፦

ትእዛዙን እናገራለሁ፤

እግዚአብሔር አለኝ፦ አንተ ልጄ ነህ፥

እኔ ዛሬ ወለድሁህ።

ለምነኝ፥ አሕዛብን ለርስትህ፥

የምድርንም ዳርቻ ለግዛትህ እሰጥሃለሁ።

በብረት በትር ትሰብራቸዋለህ፤

እንደ ሸክላ ሠሪ ዕቃ ትቀጠቅጣቸዋለህ።

ለምነኝ የሚለው ቅድመ ሁኔታ ፈቃደኛና ታዛዥ የሆነ የሚጸልይ ሕዝብን ይሻል። «ሰዎችም ዘወትር ስለ እርሱ ይጸልያሉ።» ለሁሉ በተሰጠው በዚህ ቀላል የተስፋ ቃል ላይ ተመሥርተው የጥንት ወንዶችና ሴቶች ራሳቸውን ለእግዚአብሔር አሳልፈው ሰጡ። ጸለዩ፤ እግዚአብሔርም ጸሎታቸውን መለሰ፤ የእግዚአብሔርም ጉዳይ በጸሎታቸው ነበልባል በዓለም ውስጥ ሕያው ሆኖ ቆየ።

ጸሎት የልጁን መንግሥት ወደ ፊት ለማራመድ የጸና ብቸኛ ቅድመ ሁኔታ ሆነ። «ለምኑ፥ ይሰጣችሁማል፤ ፈልጉ፥ ታገኙማላችሁ፤ መዝጊያን አንኳኩ፥ ይከፈትላችሁማል።» በክርስቶስ መንግሥት ውስጥ ከሁሉ የበረታው ከሁሉ የተሻለ አንኳኪ የሆነው ነው። በክርስቶስ መንግሥት ውስጥ የስኬት ምሥጢር የመጸለይ ችሎታ ነው። የጸሎትን ኃይል መጠቀም የሚችል እርሱ በክርስቶስ መንግሥት ውስጥ ብርቱውና ቅዱሱ ነው። ልንማረው የምንችለው ከሁሉ የሚበልጥ ትምህርት እንዴት መጸለይ እንዳለብን ነው።

ጸሎት እጅግ የተቀደሰ ሕይወትና እጅግ ቅዱስ አገልግሎት ዋና ቃና ነው። ለእግዚአብሔር ከሁሉ አብልጦ የሚሠራ በጸሎት ከሁሉ የላቀ ብቃት ያለው ሰው ነው። ኢየሱስ ክርስቶስም አገልግሎቱን የፈጸመው በዚህ ሥርዓት ነበር።