ንጽሕና ምንድን ነው?

ማቴዎስ 5:8 እንዲህ ይላል፦ «ልበ ንጹሖች ብፁዓን ናቸው፥ እግዚአብሔርን ያዩታልና።»

ውድ ጓዶቼ ሆይ፥ እኛ የድኅነት ሠራዊት አባላት ስለ ንጹሕ ልብ ዘወትር እንዘምራለን፣ እንጸልያለን ወይም እንናገራለን። በእርግጥም ከዚህ አብልጠን የምንናገርበት ወይም ከልብ የምንመካበት ርእስ ጥቂት ነው። እጅግ ውብ ከሆኑትና ልብን ከሚያነቃቁት መዝሙሮቻችን አንዳንዶቹ በዚህ ርእስ ላይ ያተኮሩ ናቸው። ከሁሉ ይልቅ ደጋግመን የምንዘምረው ምናልባት እንዲህ ብሎ የሚጀምረው መዝሙር ሳይሆን አይቀርም፦ «አምላኬን የሚያመሰግን ልብ በኖረኝ!

ከኃጢአት ነጻ የወጣ ልብ!

ስለ እኔ በልግስና የፈሰሰውን ደም ዘወትር የሚሰማው ልብ!» ይህ ውብ አይደለምን? ነገር ግን መዝሙሩ ይበልጥ እየተዋበ ይቀጥላል፦ «በአሳቡ ሁሉ የታደሰ፣ መለኮታዊ ፍቅርም የሞላበት ልብ፤ ፍጹምና ቅን፣ ንጹሕና በጎ የሆነ፣ ጌታ ሆይ፣ የአንተ አምሳል የሆነ ልብ!»

ይሁን እንጂ እንዲህ ያሉ መዝሙሮች ልባችንን የማነቃቃት ኃይላቸው ታላቅ ቢሆንም፥ እውነተኛውን የሠራዊቱን አባል ከሁሉ ይልቅ ደስ የሚያሰኘው ምናልባት በዚህ በረከት ደስታ የሚኖሩ ሰዎች የሚሰጡት ግልጽ ምስክርነት፣ ወይም በረከቱ እንዲሰጥ የሚቀርበው ልባዊ ጸሎት፣ ወይም ጓዶች ይህን ዋጋው እጅግ የበዛ ዕንቁ የራሳቸው እንዲያደርጉ የሚቀርበው የጋለ ጥሪ ነው፤ ይህም በመካከላችን ብዙ ጊዜ የሚሰማ ነው።

ሆኖም ከወታደሮቻችን ብዙዎቹ የበረከቱን ደስታ በግልጽ አልተለማመዱትም፤ በአደባባይም አይመሰክሩለትም። ይህ የሆነው ምናልባት ርእሱ በሚገባው መጠን ስላልተረዳ ሊሆን ይችላል ብዬ ሳስብ ቆይቻለሁ። ስለዚህ በጥቂት ደብዳቤዎች ላብራራው ልሞክር አስባለሁ፤ ጓዶቼም በጥንቃቄ እንደሚያስቡበት ተስፋ አደርጋለሁ።

እንግዲህ ርእሴ «የልብ ንጽሕና» መሆኑን እባካችሁ አስታውሱ። ንጹሕ ልብ ስንል ምን ማለታችን እንደ ሆነ ላብራራ፣ ይህ የከበረ ሀብት እስካሁን የእናንተ ካልሆነ እንዴት ልታገኙት እንደምትችሉ፣ ካገኛችሁትም በኋላ በረከቱን እንዴት ልትጠብቁት እንደምትችሉ ላሳይ እወዳለሁ። እንዲህ ብዬ እጀምራለሁ፦ ንጹሕ መሆን ምን ማለት እንደ ሆነ ሁላችንም እናውቃለን። በዙሪያችን ስላሉት ነገሮች ንጽሕና ስንናገር፥ ንጹሖችና ያልተበረዙ ናቸው ማለታችን ነው። ከቆሻሻና ከእድፍ ነጻ መሆናቸው ብቻ ሳይሆን ዝቅተኛ የሆነ ሌላ ነገርም አልተቀላቀለባቸውም።

አንድ ሰው በሃይማኖታዊ ትርጉሙ ንጹሕ ነው ስንል፥ በውስጡም በውጭውም ቅን፣ ታማኝና እውነተኛ ነው ማለታችን ነው፤ ለእግዚአብሔርና ለሰው ካለበት ግዴታ ጋር የተያያዙትን ነገሮች በአፉ የሚናገራቸው ብቻ ሳይሆን በሥራም የሚፈጽማቸው ነው ማለታችን ነው።

መጽሐፍ ቅዱስ ስለ ኃጢአት ሲናገር የሥጋ፣ የአእምሮ ወይም የመንፈስ ርኵሰትና እድፍ አድርጎ ይገልጸዋል። ስለዚህ በሃይማኖት ንጽሕና ማለት እንደ ስካር፣ ሆዳምነት፣ ታማኝነት ማጣት፣ ማጭበርበር፣ ሐሰት፣ ትዕቢት፣ ክፋት፣ ቍጡነት፣ ራስ ወዳድነት፣ አለማመን፣ አለመታዘዝና የመሳሰሉት ርኵሳን ነገሮች አለመኖር መሆን አለበት።

ባጭሩ፥ በነፍስ ንጹሕ መሆን ማለት ጌታ ከቅዱስ ፈቃዱ ጋር የሚቃረን መሆኑን ከሚያሳያችሁ ከማናቸውም ነገር ሁሉ ነጻ መውጣት ማለት ነው። እርሱ የሚወደውን ዓይነት ሕይወት ለመኖር ችሎታ ያላችሁ መሆናችሁ ብቻ ሳይሆን በእርግጥም እንዲያ ያለውን ሕይወት የምትኖሩ መሆናችሁ ማለት ነው።

እንግዲህ ጓዶቼ ሆይ፥ ንጽሕና ቅን አስተሳሰብ ባላቸው ፍጡራን ሁሉ እጅግ የሚደነቅና እጅግ የሚናፈቅ ነገር መሆኑን ልነግራችሁ አያስፈልገኝም። ለመጀመሪያ ያህል፦ ሁላችንም የሚታዩ ነገሮችን ንጽሕና እንወዳለን፤ ለምሳሌ፥ ይህን ደብዳቤ የሚያነብ ሁሉ ንጹሕ ሰውነት እንዲኖረው እንደሚመርጥ እርግጠኛ ነኝ። ጠዋት ስትነሡ እስክትታጠቡ ድረስ አይመቻችሁም። የማዕድን ሠራተኞች ከጕድጓዱ፣ ገበሬዎች ከእርሻው፣ ሴቶች ልጆችም ከፋብሪካው ሲመለሱ መጀመሪያ የሚጠይቁት ራሳቸውን የሚያጸዱበትን ውኃ ነው።

ንጹሕ ልብስና ንጹሕ የተልባ እግር ትወዳላችሁ፥ አይደለም? ልብሳችሁን ንጹሕ ለማድረግ የሚወጣውን ገንዘብና የሚደከመውን ድካም አስቡ። ንጹሕ ቤትም ትወዳላችሁ። የቤት እመቤቷ ወለሉን፣ መስኮቶቹንና የቤት ዕቃዎቹን ንጹሕ ለማድረግ እንዴት እንደምትፈገፍግ፣ እንደምታጥብ፣ እንደምትጠርግና አቧራ እንደምታራግፍ ተመልከቱ።

ንጹሕ ከተማም ትወዳላችሁ። መንገዶችን መጥረግና ቆሻሻን ማስወገድ ምንኛ አድካሚና ውድ ነው! ከተሞቻችን ንጹሖችና ጤናማዎች እንዲሆኑ የፍሳሽ ማስወገጃዎችን ለመሥራትና ለማጽዳትም ምን ያህል ገንዘብ ይወጣል! ይህን ዓይነቱን ንጽሕና የምንወደው ለዓይን ደስ የሚያሰኝና ለጤና የሚበጅ ስለ ሆነ ነው። ቆሻሻ ለስሜት ሕዋሳት የሚያስጠላ እንደ ሆነ፣ ተባዮችን እንደሚያራባ፣ ኮሌራን፣ ቸነፈርንና ልዩ ልዩ በሽታዎችን እንደሚያመጣ፣ ሰዎችንም ወደ መቃብር እንደሚያጣድፍ እናውቃለን። ስለዚህ እንጠላዋለን፤ «ይወገድ፤ ንጹሖች እንሁን!» እንላለን።

ነገር ግን ቅን አስተሳሰብ ያላቸው ፍጡራን ሁሉ ከሥጋ፣ ከልብስ፣ ከቤት ወይም ከሌላ ከማናቸውም ነገር ንጽሕና ይልቅ የነፍስን ንጽሕና እጅግ አብልጠው ያደንቃሉ፤ ይህም የሆነው እጅግ የላቀ አስፈላጊነት ስላለው ነው።

ለምሳሌ፦ (ሀ) እግዚአብሔር የነፍስን ንጽሕና ይወዳል። ይህ ባሕርዩ ነው። እንደ እኛው ልጆቹን በውጭም ንጹሖች ሆነው ማየት እንደሚመርጥ አልጠራጠርም። በሐዋርያው ጳውሎስ በኩል ሰውነታችንንም በጥሩ ውኃ ታጥበን እንድንቀርብ ይነግረናል፤ ነገር ግን ከሰውነት መታጠብ ይልቅ የልብ መታጠብ በእርሱ ዘንድ እጅግ የሚወደድ ነው።

«ቅዱሳኑ በፊቱ የተወደዱ ናቸው፤ ልጆቹንም በደስታ ይመለከታቸዋል፤ ተስፋቸውን ያያል፣ ፍርሃታቸውንም ያውቃል፤ ይመለከታልም፣ በእነርሱም ያለውን መልኩን ይወዳል።»

አዎን፥ እግዚአብሔር በቅድስና ደስ ይለዋል። ማደሪያው የሆነው ሰማይ ንጹሕ ነው። በዚያ የሚኖሩት ንጹሖች ናቸው። ሥራቸውም፣ ደስታቸውም፣ አምልኮአቸውም ሁሉ በአንድነት ንጹሕ ነው።

(ለ) መላእክት ንጽሕናን ይወዳሉ። ቅዱስ ያልሆነ ፍጡር በምንም መንገድ ወደ ሰማያዊቱ ከተማ ሊገባ ቢችል፥ እኛ አስከፊ በሽታ ያለበትን ሰው እንደምንርቅ ነዋሪዎቿም እንዲህ ያለውን ፍጡር እንደሚርቁት እርግጠኛ ነኝ።

(ሐ) አጋንንት ንጽሕናን በሙሉ ኃይላቸው ቢጠሉትና ቢቃወሙትም የከበረ ነገር መሆኑን ያውቃሉ።

(መ) ብዙ ክፉ ሰዎች ንጽሕናን ያደንቃሉ። ለራሳቸው የማይቻል አድርገው ቢቈጥሩትም በሌሎች ላይ ሲያዩት ውብና የሚያስመኝ ነገር አድርገው ይመለከቱታል። በአሳብ በተዋጡበት ጊዜ፣ የእግዚአብሔር መንፈስ ከእነርሱ ጋር በሚታገልበት ጊዜ፣ ያለፈው የየዋህነት ዘመናቸው ትዝታ በአእምሮአቸው በሚጎርፍበት ጊዜ፣ ንጹሖችና መልካሞች መሆናቸውን የሚያውቋቸውን ሰዎች ሲያዩ፥ ስለ ራሳቸው ርኵሰት ራሳቸውን ይጠላሉ፤ ይህም ሆኖ ግን ሁልጊዜ ለእግዚአብሔር ለመገዛትና ንጹሖች የሚያደርጋቸውን መዳን ለመቀበል እምቢ ይላሉ።

(ሠ) በሲኦል ያሉ የጠፉ ነፍሳት ቅድስና ከክፋት ምን ያህል ወሰን በሌለው መጠን እንደሚበልጥ ይሰማቸዋል። ዕድሉ በነበራቸው ጊዜ ልባቸውን በበጉ ደም አጥበው ቢሆን ኖሮ ለእነርሱ ምን ያህል በተሻለ እንደ ነበር አሁን ያያሉ። ወይ! እናንተ ያገኛችሁትን የመሰለ ዕድል ለማግኘት የማይሰጡት ምን አለ!

ወዳጆቼ ሆይ፥ ንጽሕናን ትወዱታላችሁን? ምናልባት የእናንተ ይሆናል። ምናልባት የሚያነጻውን ኃይል ለማግኘት ወደ ኢየሱስ ሄዳችሁ፣ ራሳችሁን በእግሩ ሥር አኑራችሁ፣ አጠራጣሪ ነገሮቻችሁን ትታችሁ፣ በሕይወትም ሆነ በሞት ፈቃዱን ለማድረግ ራሳችሁን አቅርባችሁ፣ የኢየሱስ ክርስቶስ ደም እንዳነጻችሁ አምናችሁ ይሆናል።

ወይ! ይህ ተሞክሮ የእናንተ ከሆነ ብፁዓን ናችሁ፤ ዛሬም በዚያ ተሞክሮ ኃይልና ሰላም የምትመላለሱ ከሆነ ደግሞ ይበልጥ ብፁዓን ናችሁ። እንዲህ ከሆነ እንኳን ደስ አላችሁ እላችኋለሁ፤ በእናንተ ደስ ይለኛል፤ ስለ እናንተም እግዚአብሔርን አመሰግናለሁ።

ነገር ግን ይህ በረከት የእናንተ ካልሆነ፥ ትናፍቁታላችሁን? ስለ እርሱ ማሰብ ነፍሳችሁን በምኞት ይሞላታልን? ገጣሚው እንዲህ ብሎ ሲዘምር የተሰማው ስሜት ይሰማችኋልን? «አቤት፥ የፍጹም ፍቅር ክቡር ተስፋ!

ወደ ላይኛው ነገር ከፍ ያደርገኛል፤ በንስር ክንፍ ይሸከመኛል፤ ለተመሰጠች ነፍሴ ቅምሻ ይሰጣታል፤ ለጥቂት ጊዜም ከኢየሱስ ካህናትና ነገሥታት ጋር እንድመገብ ያደርገኛል።»

ወዳጆቼ ሆይ፥ ደስታችሁም ተጽዕኖአችሁም ሁሉ ቅዱሳን ከመሆናችሁ ጋር የተያያዘ ነው። ወይ! አሁን እዚሁ ተንበርክካችሁ እግዚአብሔር እያንዳንዳችሁን በመንፈስ ቅዱስ ኃይል፣ በበጉ ደም ንጹሖች እንዲያደርጋችሁ ትለምኑት ዘንድ እማጸናችኋለሁ።