ካሣ

ለተሳካ ጸሎት ሦስተኛው ክፍል ካሣ ነው። የእኔ ያልሆነን ነገር በማንኛውም ጊዜ ወስጄ ካሣ ለመክፈል ፈቃደኛ ካልሆንሁ፣ ጸሎቴ ወደ ሰማይ ብዙም አይዘልቅም። እንግዳ ነገር ነው፤ ነገር ግን በንግግሮቼ ይህን ጕዳይ ባነሣሁ ቍጥር ወዲያውኑ ውጤቱን ሳልሰማ ቀርቼ አላውቅም። አንድ ጊዜ አንድ ሰው፣ ልናገርበት በነበረው ስብሰባ ላይ ካሣ መክፈል የሚያስፈልገው ሰው ምናልባት ስለማይኖር በዚህ ነጥብ ላይ ብዙ መቈየት እንደማያስፈልገኝ ነገረኝ። እኔ ግን የእግዚአብሔር መንፈስ ልባችንን ቢመረምር አብዛኞቻችን ከዚህ በፊት ፈጽሞ ያላሰብናቸው መደረግ ያለባቸው ብዙ ነገሮች የምናገኝ ይመስለኛል።

ዘኬዎስ ከክርስቶስ ጋር ከተገናኘ በኋላ ነገሮች ፈጽመው ሌላ መስለው ታዩት። ካሣ የመክፈል አሳብ ከዚያ በፊት ፈጽሞ ወደ አእምሮው እንዳልገባ ለመናገር እደፍራለሁ። በዚያች ጠዋት ምናልባት ፍጹም ታማኝ ሰው እንደ ሆነ ያስብ ነበር። ጌታ መጥቶ ባነጋገረው ጊዜ ግን ራሱን ፈጽሞ በተለየ ብርሃን አየ። ንግግሩ ምን ያህል አጭር እንደ ነበረ ልብ በሉ። እንደ ተናገረው ተመዝግቦ የሚገኘው ብቸኛ ነገር ይህ ነው፦ «ጌታ ሆይ፥ ካለኝ ሁሉ እኵሌታውን ለድሆች እሰጣለሁ፤ ማንንም በሐሰት ከስሼ እንደ ሆንሁ አራት እጥፍ እመልሳለሁ።» አጭር ንግግር ነው፤ ቃሎቹ ግን በዘመናት ሁሉ እንዴት እያስተጋቡ ወርደዋል!

ይህን በመናገሩ ኃጢአቱን ተናዘዘ—ታማኝ ያልሆነ ሰው እንደ ነበረ አመነ። ከዚህም በተጨማሪ የሙሴን ሕግ መስፈርቶች እንደሚያውቅ አሳየ። አንድ ሰው የእርሱ ያልሆነን ነገር ወስዶ ከሆነ መመለስ ብቻ ሳይሆን አራት እጥፍ አድርጎ መመለስ ነበረበት። በዚህ ዘመን ያሉ ሰዎች በሕግ ሥር ከነበሩት ሰዎች ባላነሰ ሁኔታ ታማኞች መሆን አለባቸው ብዬ አስባለሁ። የሰውን ሕይወት የማያቃናው ባዶ ስሜታዊነታችሁ እጅግ ሰልችቶኛል፤ አንገፍግፎኛልም። መዝሙሮቻችንንና ቅኔዎቻችንን ልንዘምር፣ ጸሎቶችንም ልናቀርብ እንችላለን፤ ነገር ግን በዕለት ኑሮአችን ፈጽመን ቀጥተኞች ለመሆን ፈቃደኞች ካልሆንን በእግዚአብሔር ዘንድ አስጸያፊ ይሆናሉ። የእግዚአብሔር አማኝ ሕዝብ በዚህ መንገድ መመላለስ ቢጀምሩ፣ ክርስትና በዓለም ላይ እንደዚህ ያለ ጽኑ ተሰሚነት እንዲያገኝ የሚያደርግ ሌላ ምንም ነገር የለም። ዘኬዎስ ካሣ ከከፈለ በኋላ በኢያሪኮ ከማንም ሰው ይልቅ የበለጠ ተሰሚነት ሳይኖረው አይቀርም።

ፊኒ ክርስቲያን ነን ለሚሉ ሰዎች ባቀረባቸው ትምህርቶቹ ውስጥ እንዲህ ይላል፦ «‹ይህን ዓለም አትምሰሉ› ከሚለው ትእዛዝ ምክንያቶች አንዱ፣ ሁሉም ሰው በወንጌል መርሆች ላይ ተመሥርቶ ቢነግድ የሚኖረው እጅግ ታላቅ፣ ጠቃሚና ፈጣን ተጽዕኖ ነው። ሁኔታውን ገልብጡት፤ ክርስቲያኖች ለአንድ ዓመት በወንጌል መርሆች ይነግዱ። ዓለምን ያናውጣታል! ከነጐድጓድ ይልቅ ይበልጥ ያስተጋባል! እግዚአብሔርን የማይፈሩ ሰዎች ክርስቲያን ነን የሚሉትን ሰዎች በእያንዳንዱ ግብይት የሚነግዱትን ሰው ጥቅም ሲያስቡ—እያንዳንዱ የራሱን ሀብት ሳይሆን የሌላውን ሀብት ሲፈልግ—ከዓለም በላይ ሲኖሩ—ዓለም እግዚአብሔርን ለማክበር መሣሪያ ከሚሆንበት በላይ ምንም ዋጋ ሳይሰጡት ቢያዩአቸው፣ ውጤቱ ምን የሚሆን ይመስላችኋል? ዓለምን በፊት ኀፍረት ይሸፍነዋል፤ በኃጢአት ወቀሳም ያጥለቀልቃቸዋል።»

ፊኒ ከእውነተኛ ንስሐ ታላላቅ ምልክቶች አንዱ ካሣ እንደ ሆነ ያስተምራል። «የሰረቀውን ገንዘብ ይዞ የሚያቆይ ሌባ ንስሐ አልገባም። የኃጢአት ወቀሳ ሊሰማው ይችላል፤ ንስሐ ግን የለውም። ንስሐ ቢገባ ኖሮ ሄዶ ገንዘቡን ይመልስ ነበር። ማንንም አታልለህ ያለ አግባብ የወሰድኸውን ካልመለስህ፣ ወይም ማንንም በድለህ የሠራኸውን በደል በተቻለህ መጠን ለማስተካከል ካልተነሣህ፣ በእውነት ንስሐ አልገባህም።»

በዘጸአት እንዲህ እናነባለን—«ሰው በሬ ወይም በግ ቢሰርቅ፥ ቢያርደውም ወይም ቢሸጠው፥ ስለ አንድ በሬ አምስት በሬዎች፥ ስለ አንድ በግም አራት በጎች ይመልስ።» ደግሞም፦ «ሰው እርሻን ወይም የወይን ቦታን ቢያስበላ፥ እንስሳውንም ለቅቆ በሌላ ሰው እርሻ ቢያሰማራ፥ ከገዛ እርሻው ከተሻለው፥ ከገዛ ወይኑም ከተሻለው ካሣ ይክፈል። እሳት ተነሥቶ እሾህን ቢይዝ፥ የተከመረውም ነዶ ወይም ያልታጨደው እህል ወይም እርሻው ቢቃጠል፥ እሳቱን ያነደደው ፈጽሞ ካሣ ይክፈል።»

ወይም የበደል መሥዋዕት ሕግ ወደ ተደነገገበት ወደ ዘሌዋውያን ዞር በሉ—በዚያም ይኸው ነጥብ በእኩል ግልጽነትና ኃይል ተጠቅሶአል።

«ሰው ኃጢአት ቢሠራ፥ በእግዚአብሔርም ላይ በደል ቢያደርግ፥ ለማስቀመጥ በተሰጠው ነገር ወይም በመያዣ ወይም በቅሚያ ነገር ባልንጀራውን ቢክድ፥ ወይም ባልንጀራውን ቢያታልል፥ ወይም የጠፋውን ነገር አግኝቶ ስለ እርሱ ቢክድና በሐሰት ቢምል፥ ሰው ከሚያደርገው ከዚህ ሁሉ በአንዱ ኃጢአት ቢሠራ፥ ኃጢአት ስለ ሠራና ስለ በደለ በቅሚያ የወሰደውን፥ ወይም በማታለል ያገኘውን፥ ወይም እንዲያስቀምጥ የተሰጠውን፥ ወይም አግኝቶ የያዘውን የጠፋውን ነገር፥ ወይም በሐሰት የማለበትን ሁሉ ይመልስ፤ ዋናውን ፈጽሞ ይመልስ፥ አምስተኛውንም ክፍል ይጨምርበት፤ የበደሉን መሥዋዕት በሚያቀርብበት ቀን ለባለቤቱ ይስጠው።»

ይኸው ነገር በዘኍልቍ ተደግሞአል፤ በዚያም እንዲህ እናነባለን—«እግዚአብሔርም ሙሴን እንዲህ ብሎ ተናገረው፦ ለእስራኤል ልጆች እንዲህ ብለህ ንገራቸው፦ ወንድ ወይም ሴት ሰዎች ከሚሠሩት ኃጢአት ማናቸውንም ቢሠሩ፥ በእግዚአብሔርም ላይ ቢበድሉ፥ ያም ሰው በደለኛ ቢሆን፥ የሠሩትን ኃጢአታቸውን ይናዘዙ፤ በደሉንም በዋናው ይመልስ፥ አምስተኛውንም ክፍል ይጨምርበት፥ ለበደለውም ሰው ይስጠው። ነገር ግን በደሉ የሚመለስለት የቅርብ ዘመድ ለሰውየው ባይኖር፥ የሚመለሰው በደል ለእግዚአብሔር ለካህኑ ይሁን፤ ይህም ማስተስረያ ከሚደረግለት ከማስተስረያው አውራ በግ ሌላ ነው።»

እግዚአብሔር ለሕዝቡ የደነገጋቸው ሕጎች እነዚህ ነበሩ፤ መርሆአቸውም በዚያን ጊዜ እንደ ነበረው ዛሬም አስገዳጅ እንደ ሆነ አምናለሁ። ከማንም ሰው ማንኛውንም ነገር ወስደን ከሆነ፣ በማንኛውም መንገድ ማንንም አታልለን ከሆነ፣ መናዘዝ ብቻ ሳይሆን ካሣ ለመክፈል የምንችለውን ሁሉ እናድርግ። ማንንም በሐሰት ገልጸን ከሆነ—ስለ እርሱ ስም ማጥፋት ወይም የሐሰት ወሬ አስነሥተን ከሆነ—በደሉን ለማስተካከል በአቅማችን ያለውን ሁሉ እናድርግ።

እግዚአብሔር በኢሳይያስ እንዲህ የሚለው እንደዚህ ያለውን የተግባር ጽድቅ በማሰብ ነው—«እነሆ፥ ለጠብና ለክርክር፥ በክፋትም ጡጫ ለመምታት ትጾማላችሁ፤ ድምፃችሁን በአርያም ታሰሙ ዘንድ ዛሬ እንደምትጾሙ አትጾሙም። እኔ የመረጥሁት ጾም እንዲህ ያለ ነውን? ሰው ሰውነቱን የሚያስጨንቅበት ቀን ነውን? ራሱን እንደ እንግጫ ያጎነብስ ዘንድ፥ በበታቹም ማቅና አመድ ያነጥፍ ዘንድ ነውን? በውኑ ይህን ጾምና እግዚአብሔርን ደስ የሚያሰኝ ቀን ትለዋለህን? እኔ የመረጥሁት ጾም ይህ አይደለምን? የበደልን እስራት ትፈታ ዘንድ፥ የከበደውን ሸክም ታራግፍ ዘንድ፥ የተገፉትንም አርነት ታወጣ ዘንድ፥ ቀንበሩንም ሁሉ ትሰብሩ ዘንድ አይደለምን? እንጀራህን ለተራበ ትቈርስ ዘንድ፥ የተጣሉትንም ድሆች ወደ ቤትህ ታገባ ዘንድ፥ የተራቈተውንም ብታይ ታለብሰው ዘንድ፥ ከሥጋ ዘመድህም እንዳትሸሸግ አይደለምን? የዚያን ጊዜ ብርሃንህ እንደ ንጋት ይበራል፥ ፈውስህም ፈጥኖ ይበቅላል፤ ጽድቅህም በፊትህ ይሄዳል፥ የእግዚአብሔርም ክብር ዋጋህ ይሆናል። የዚያን ጊዜ ትጠራለህ፥ እግዚአብሔርም ይመልስልሃል፤ ትጮኻለህ፥ እርሱም፦ እነሆኝ ይላል።»

ትራፕ ስለ ዘኬዎስ በሰጠው ማብራሪያ እንዲህ ይላል፦ «ሱልጣን ሰሊም ከፋርስ ነጋዴዎች የወሰደውን ታላቅ ሀብት ለድሆች መርጃ ለሚሆን ለአንድ ታዋቂ የበጎ አድራጎት ቤት እንዲሰጠው ለመከረው ለአማካሪው ለፒርሁስ፣ እግዚአብሔር ለሚቃጠል መሥዋዕት የሚቀርብን ቅሚያ እንደሚጠላ ሊነግረው ቻለ። ይህ በሞት አፋፍ ላይ የነበረ ቱርካዊ ሀብቱ ይልቁንም ለትክክለኛ ባለቤቶቹ እንዲመለስ አዘዘ፤ እንዳዘዘውም ተደረገ፤ ይህም ካሣን ከምንም ነገር ይልቅ ቸል ለሚሉ ለብዙ ክርስቲያኖች ታላቅ ኀፍረት ነው። የእንግሊዙ ንጉሥ ሄንሪ ሣልሳዊ ለፍራንሲስካውያን መነኮሳት የሚለብሱትን አንድ ጭነት ሻካራ የሱፍ ጨርቅ በላከላቸው ጊዜ፣ ‹ከድሆች ከቀማው ነገር ምጽዋት መስጠት እንደማይገባው፣ እነርሱም ያን አስጸያፊ ስጦታ እንደማይቀበሉ› የሚል መልእክት ጨምረው መለሱለት። መምህር ላቲመር፦ ‹የያዛችሁትን ንብረት ካሣ ካልከፈላችሁ በገሃነም ትስላላችሁ፤ አጋንንትም ይስቁባችኋል› ይላል። ሄንሪ ሰባተኛ በመጨረሻው የኑዛዜ ቃሉ ስለ ነፍሱና ስለ ሥጋው ካዘዘ በኋላ፣ በሹማምንቱ ያለ አግባብ የተሰበሰበው ገንዘብ ሁሉ እንዲመለስ ወሰነ፤ አዘዘም። ንግሥት ሜሪ ወደ ዘውዱ የተወሰዱትን የቤተ ክርስቲያን ርስቶች ሁሉ መለሰች፤ የገዛ ነፍሷን መዳን ከአሥር መንግሥታት የበለጠ ዋጋ እንደምትሰጠው ተናገረች። በዚያው ጊዜ ሌሎችም እንዲሁ እንዲያደርጉ የሚያዝዝ አዋጅ ከጳጳሱ መጣ፤ ነገር ግን ማንም አላደረገም። ላቲመር ስለ ካሣ በሰበከበት የመጀመሪያው ቀን አንድ ሰው መጥቶ እንዲመልስለት 20 ፓውንድ እንደ ሰጠው፣ በሚቀጥለው ቀን ሌላው 30 ፓውንድ እንዳመጣለት፣ በሌላ ጊዜም ሌላው 200 ፓውንድ እንደ ሰጠው ይነግረናል።

«መምህር ብራድፎርድ ላቲመር ስለዚህ ጕዳይ ሲሰብክ በሰማ ጊዜ፣ አሠሪው ሳያውቅ በብዕሩ አንድ ጊዜ ስለ ጻፈው ነገር ልቡ ተወጋ፤ በመምህር ላቲመር ምክር ካሣ እስኪከፈል ድረስ ሰላም ሊያገኝ አልቻለም፤ ለዚህም በምድር ላይ የነበረውን የግል ርስቱንና የተረጋገጠ ሀብቱን ሁሉ በፈቃዱ ተወ። መምህር ባሮውስ ደግሞ፦ ‹እኔ ራሴ ሌላውን ሰው በአምስት ሺሊንግ ብቻ የበደለ፣ ከሃምሳ ዓመት በኋላም እስኪመልሰው ድረስ ሰላም ሊያገኝ ያልቻለ አንድ ሰው አውቃለሁ› ይላል።»

እውነተኛ ንስሐ ካለ ፍሬ ያፈራል። በአንድ ሰው ላይ በደል ሠርተን ከሆነ ካሣ ለመክፈል ፈቃደኞች እስክንሆን ድረስ እግዚአብሔር ይቅር እንዲለን ፈጽሞ መለመን የለብንም። በአንድ ሰው ላይ ታላቅ ግፍ ሠርቼ ማስተካከል የምችል ከሆነ፣ ይህን ለማድረግ ፈቃደኛ እስክሆን ድረስ እግዚአብሔርን ይቅርታ መለመን አያስፈልገኝም። የእኔ ያልሆነን ነገር ወስጃለሁ እንበል። ካሣ እስክከፍል ድረስ ይቅርታን ልጠብቅ አልችልም። በምሥራቅ ባለች አንዲት ከተማ እየሰበክሁ ሳለ፣ በስብሰባው መጨረሻ መልከ መልካም የሆነ አንድ ሰው ወደ እኔ መጣ። በአእምሮው እጅግ ተጨንቆ ነበር። «እውነቱ ይህ ነው፤ እኔ ገንዘብ ያጎደልሁ ሰው ነኝ። የአሠሪዎቼ የሆነውን ገንዘብ ወስጃለሁ። ሳልመልሰው እንዴት ክርስቲያን መሆን እችላለሁ?» አለኝ። «ገንዘቡ አለህ?» ሁሉም በእጁ እንደሌለ ነገረኝ። 1,500 ዶላር ያህል ወስዶ ነበር፤ አሁንም 900 ዶላር ያህል ነበረው። «ያን ገንዘብ ይዤ ንግድ ብጀምርና የሚመልሰውን ያህል ባተርፍ አይቻልም?» አለ። ይህ የሰይጣን ማታለያ እንደ ሆነ፣ በተሰረቀ ገንዘብ እበለጽጋለሁ ብሎ መጠበቅ እንደማይችል፣ ያለውን ሁሉ መመለስ እንዳለበትና ወደ አሠሪዎቹ ሄዶ እንዲምሩትና ይቅር እንዲሉት መለመን እንዳለበት ነገርሁት። «ነገር ግን ወህኒ ያስገቡኛል» አለ። «አንዳች እርዳታ ልትሰጠኝ አትችልም?» «አልችልም፤ ከእግዚአብሔር ምንም እርዳታ ከመጠበቅህ በፊት ገንዘቡን መመለስ አለብህ።» «እጅግ ከባድ ነው» አለ። «አዎን፣ ከባድ ነው፤ ነገር ግን ታላቁ ስሕተት በመጀመሪያ በደሉን መሥራቱ ነበር።» ሸክሙ እጅግ ከበደበት፤ እንዲያውም ሊሸከመው አልቻለም። ገንዘቡን—950 ዶላርና ጥቂት ሳንቲሞች—ሰጠኝ፤ ለአሠሪዎቹም እንድመልስለት ለመነኝ። ታሪኩን ነገርኋቸው፤ ፍትሕን ሳይሆን ምሕረትን ከእነርሱ እንደሚፈልግም አልኋቸው። በእነዚያ በሁለቱ ሰዎች ጕንጭ ላይ እንባ ወረደ፤ «ይቅር እንበለው! አዎን፣ ይቅር ብንለው ደስ ይለናል» አሉ። ወደ ታች ወርጄ ወደ ላይ አመጣሁት። ጥፋቱን ተናዝዞ ይቅር ከተባለ በኋላ ሁላችንም በጕልበታችን ተንበርክከን የተባረከ የጸሎት ስብሰባ አደረግን። እግዚአብሔር በዚያ ተገናኘን፤ ባረከንም።

ወደ ክርስቶስ የመጣና ራሱንና ሀብቱን ለእግዚአብሔር ለመቀደስ የሚጥር ሌላ ወዳጅ ነበረኝ። ቀደም ሲል ከመንግሥት ጋር ግብይት ነበረው፤ በዚያም አላግባብ ተጠቅሞ ነበር። ይህ ነገር ትዝ አለው፤ ኅሊናውም አስጨነቀው። ታላቅ ትግል ገጠመው፤ ኅሊናው ደጋግሞ እየተነሣ ይወቅሰው ነበር። በመጨረሻም የ1500 ዶላር ቼክ ጽፎ ወደ መንግሥት ግምጃ ቤት ላከ። ይህን ካደረገ በኋላ እጅግ ታላቅ በረከት እንዳገኘ ነገረኝ። ለንስሐ የሚገባ ፍሬ ማፍራት ይህ ነው። ብዙ ሰዎች ብርሃን እንዲሰጣቸው ወደ እግዚአብሔር እየጮኹ እንዳሉ፣ ነገር ግን ቅኖች ስላልሆኑ እንደማያገኙት አምናለሁ።

ይህ ጕዳይ በተነሣበት ጊዜ አንድ ሰው ወደ ስብሰባዎቻችን ወደ አንዱ መጥቶ ነበር። የአንድ የማታለል ግብይት ትዝታ በድንገት ወደ አእምሮው መጣ። ጸሎቱ ያልተመለሰለት፣ ይልቁንም መጽሐፍ ቅዱስ እንደሚለው «ወደ ብብቱ የተመለሰው» ለምን እንደ ሆነ ወዲያውኑ ገባው። ስብሰባውን ትቶ ባቡር ተሳፍሮ ከዓመታት በፊት አሠሪውን ወዳታለለበት ወደ ሩቅ ከተማ ሄደ። በቀጥታ ወደዚህ ሰው ሄዶ በደሉን ተናዘዘ፤ ካሣም ለመክፈል ጠየቀ። ከዚያም በእርሱ ላይ የነበረበትን ትክክለኛ ዕዳ ያልከፈለበትን ሌላ ግብይት አስታወሰ፤ ወዲያውኑም ብዙ ገንዘብ እንዲከፈል ዝግጅት አደረገ። ስብሰባዎቹን ወደምናካሂድበት ስፍራ ተመለሰ፤ እግዚአብሔርም በገዛ ነፍሱ ውስጥ በድንቅ ሁኔታ ባረከው። እንደዚህ ያለ በረከት የተቀበለ የሚመስል ሰው ካገኘሁ ብዙ ጊዜ ሆኖኛል።

ከጥቂት ዓመታት በፊት በሰሜን እንግሊዝ አንዲት ሴት ወደ አንዱ ስብሰባ መጣች፤ ስለ ነፍሷም እጅግ የተጨነቀች ትመስል ነበር። ለተወሰነ ጊዜ ሰላም ማግኘት ያልቻለች መሰለች። እውነቱ ግን ለመናዘዝ ፈቃደኛ ያልሆነችበትን አንድ ነገር ትሸፍን ነበር። በመጨረሻም ሸክሙ እጅግ ከበደባት፤ ከአገልጋዮቹ ለአንዱም እንዲህ አለች፦ «ለመጸለይ በጕልበቴ በተንበረከክሁ ቍጥር ጥቂት የወይን ጠጅ ጠርሙሶች ወደ አእምሮዬ ይመጣሉ።» ከዓመታት በፊት የቤት ኃላፊ ሆና ስትሠራ የአሠሪዋ የሆኑ ጥቂት የወይን ጠጅ ጠርሙሶች ወስዳ እንደ ነበረ ተገለጠ። አገልጋዩም፦ «ካሣ የማትከፍዪው ለምንድር ነው?» አላት። ሴቲቱ ሰውየው እንደ ሞተ፣ ደግሞም የወይኑ ዋጋ ምን ያህል እንደ ሆነ እንደማታውቅ መለሰች። «ካሣ ልትከፍዪላቸው የምትችዪ በሕይወት ያሉ ወራሾች አሉ?» እርሷም በተወሰነ ርቀት ላይ የሚኖር አንድ ልጅ እንዳለ ተናገረች፤ ነገር ግን ይህ እጅግ የሚያዋርድ ነገር እንደሚሆን ስላሰበች ለተወሰነ ጊዜ ወደ ኋላ አለች። በመጨረሻ በማንኛውም ዋጋ ንጹሕ ኅሊና ሊኖራት እንደሚገባ ተሰማት፤ ስለዚህ ባቡር ተሳፍራ የአሠሪዋ ልጅ ወደሚኖርበት ስፍራ ሄደች። አምስት ፓውንድ ይዛ ሄደች፤ የወይኑ ዋጋ በትክክል ምን ያህል እንደ ነበረ አታውቅም፤ ይህ ግን በምንም ሁኔታ ይሸፍነዋል። ሰውየው ገንዘቡን እንደማይፈልገው ተናገረ፤ እርሷ ግን፦ «እኔም አልፈልገውም፤ ለረጅም ጊዜ ኪሴን አቃጥሎኛል» ብላ መለሰች። ስለዚህ ግማሹን ተቀብሎ ለአንድ የበጎ አድራጎት ዓላማ ለመስጠት ተስማማ። ከዚያም ተመለሰች፤ ካየኋቸው ሰዎች ሁሉ እጅግ ደስተኛ ከሆኑት አንዷ እንደ ነበረች ይመስለኛል። በሥጋ እንደ ሆነች ወይም ከሥጋ ውጭ እንደ ሆነች ማወቅ እንዳልቻለች ተናገረች—እንዲህ ያለ በረከት ወደ ነፍሷ መጥቶ ነበር።

በሕይወታችን ውስጥ መቃናት የሚያስፈልገው አንድ ነገር ሊኖር ይችላል፤ ምናልባት ከሃያ ዓመት በፊት የሆነና የእግዚአብሔር መንፈስ ወደ አእምሮአችን እስኪያመጣው ድረስ የተረሳ ነገር። ካሣ ለመክፈል ፈቃደኞች ካልሆንን እግዚአብሔር ታላቅ በረከት እንዲሰጠን ልንጠብቅ አንችልም። ብዙዎቹ ጸሎቶቻችን የማይመለሱበት ምክንያት ምናልባት ይህ ሊሆን ይችላል።

ፍጹም መንጻት

«ከኃጢአት ሁሉ መንጻት የሚሻ፣
ወደ እግዚአብሔር ቅዱስ መሠዊያ ያምጣ
ሕይወቱን ሁሉ—ደስታውን፣ እንባውን፣
ተስፋውን፣ ፍቅሩን፣ ኃይሉን፣ ዓመታቱን፣
ፈቃዱንና የሚወደውን ነገር ሁሉ!

«ይህን ሁሉን የሚጠርግ መሥዋዕት ያድርግ—
እግዚአብሔርን ይምረጥ፤ ነቀፋንና ኀፍረትን ይድፈር፤
በዐውሎ ነፋስም ሆነ በነበልባል በድፍረት ይቁም
የቤዛነትን ዋጋ ስለ ከፈለው ስለ እርሱ፤
ከዚያም ይታመን (ለማመን አይታገል)፤
እየታመነም ይጠብቅ፣ አይጠራጠር፣ ይልቁንም ይጸልይ
በገዛ ጊዜው እንዲህ እንዲለው፦
‹እምነትህ አድኖሃል፤ አሁን ተቀበል።›

«የእርሱ ጊዜ ነፍስ ሁሉን ስታመጣ ነው፤
ሁሉ በመሠዊያው ላይ ሲቀመጥ፤
ትዕቢትና ራስን መካብ ሲገደሉ፤
ከክርስቶስም ጋር ተሰቅለን
አቅመ ቢሶች ሆነን በቃሉ ላይ ስንወድቅና ስንተኛ፤
ለቃሉ ታማኝ ሆነን ሲሰማን
የሚያነጻው ዳሰሳ፣ የመንፈስ ማኅተም፣
እርሱም እንደሚቀድስ ስናውቅ ነው።»

ኤ. ቲ. አሊስ።