ፊደል ይገድላል

በዚህ ሕመም ወቅት ጤና በነበረኝ ጊዜ ካደረግሁት ይበልጥ ሕይወቴን ከዘላለም አንጻር በቅርበት እንድመረምር ተደረግሁ። በዚህ ምርመራ፣ እንደ ሰው፣ እንደ ክርስቲያን አገልጋይና እንደ ቤተ ክርስቲያን ሹም ለባልንጀሮቼ ያለብኝን ግዴታ ከመፈጸም አንጻር በገዛ ሕሊናዬ ፊት ተቀባይነት አገኘሁ፤ ከቤዛዬና ከመድኃኒቴ ጋር በተያያዘ ግን ውጤቱ ሌላ ነበር። የመለስኩት ምስጋናና የፍቅር መታዘዝ፣ ከሕፃንነቴ ጀምሮ እስከ እርጅናዬ ድረስ በሕይወት ውጣ ውረዶች ውስጥ ስለ ተቤዠኝ፣ ስለ ጠበቀኝና ስለ ደገፈኝ ካለብኝ ዕዳ ጋር ፈጽሞ አይመጣጠንም። አስቀድሞ ለወደደኝና ብዙ ላደረገልኝ ለእርሱ ያለኝ የፍቅሬ ቅዝቃዜ አጥለቀለቀኝ፤ ግራም አጋባኝ፤ የማልገባ መሆኔንም የሚያሟላው ደግሞ፣ የተሰጠኝን ጸጋ እንደ ግዴታዬና እንደ መብቴ መጠን ለማሳደግ ቸል ማለቴ ብቻ ሳይሆን፣ ባለማሳደጌም ምክንያት በሚያስጨንቅ ሐሳብና በድካም ተሞልቼ ሳለሁ ከቀደመው ቅናቴና ፍቅሬ ወርጄ ነበር። ኀፍረት ተከናነብሁ፤ ራሴን አዋረድሁ፤ ምሕረትን ለመንሁ፤ ለመጣጣርና ራሴን ያለ አንዳች ገደብ ለጌታ ለመስጠትም ቃል ኪዳኔን አደስሁ።—ቢሾፕ ማክኬንድሪ

የሚገድል ስብከት በአስተምህሮ ትክክለኛ ሊሆን ይችላል፤ ብዙ ጊዜም ነው—በቀኖና ትክክለኛ፣ ፈጽሞ የማይደፈር ትክክለኛ። ትክክለኛ አስተምህሮን እንወዳለን። መልካም ነው። ከሁሉ የሚበልጥ ነው። ንጹሕና ጥርት ያለ የእግዚአብሔር ቃል ትምህርት ነው፤ እውነት ከስሕተት ጋር ባደረገው ትግል ያገኛቸው ድሎች ናቸው፤ እምነት በቅንነት ወይም በግዴለሽነት የሚመጣውን የተሳሳተ እምነትና አለማመን አጥፊ ጎርፍ ለመከላከል የገነባቸው ግድቦች ናቸው፤ ነገር ግን እንደ ክሪስታል ጥርት ያለና የጠነከረ፣ ተጠራጣሪና ተዋጊ የሆነ ትክክለኛ አስተምህሮ በሚገባ የተቀረጸ፣ በሚገባ የተሰየመና በሚገባ የተጠና ፊደል፣ የሚገድል ፊደል ብቻ ሊሆን ይችላል። እንደ ሞተ ትክክለኛ አስተምህሮ የሞተ ምንም ነገር የለም፤ ለማሰላሰል፣ ለማሰብ፣ ለማጥናትም ሆነ ለመጸለይ እጅግ የሞተ ነው።

የሚገድል ስብከት ማስተዋልና የመርሆች ጥልቅ ግንዛቤ ሊኖረው፣ በጣዕሙ ምሁራዊና ተቺ ሊሆን፣ የፊደሉን አመጣጥና ሰዋስው እያንዳንዱን ጥቃቅን ዝርዝር ሊያውቅ፣ ፊደሉን ወደ ፍጹም ቅርጹ ሊከረክመውና ፕላቶና ሲሴሮ እንደሚብራሩ ሊያብራራው፣ ጠበቃ የመከራከሪያ ጽሑፉን ለማዘጋጀት ወይም ጉዳዩን ለመከላከል መጻሕፍቱን እንደሚያጠና ሊያጠናው ይችላል፤ ሆኖም እንደ ውርጭ፣ እንደሚገድል ውርጭ ሊሆን ይችላል። የፊደል ስብከት አንደበተ ርቱዕ፣ በቅኔና በንግግር ጥበብ የተለበጠ፣ በጸሎት የተረጨ፣ በስሜት ቀስቃሽነት የተቀመመ፣ በብልኅነትም የበራ ሊሆን ይችላል፤ ሆኖም እነዚህ ሁሉ ግዙፍ ወይም ጨዋ የሆኑ ውድ ጌጦች፣ አስከሬኑን በሣጥን ውስጥ የሚከብቡ ብርቅና ውብ አበቦች ብቻ ሊሆኑ ይችላሉ። የሚገድል ስብከት ምሁርነት የሌለው፣ በምንም አዲስ ሐሳብ ወይም ስሜት ያልተለየ፣ ጣዕም በሌላቸው ጥቅል ሐሳቦች ወይም ባዶ ዝርዝሮች የለበሰ፣ ዘይቤው ያልተስተካከለና ዝርክርክ የሆነ፣ የእልፍኝም ሆነ የጥናት ክፍል መዓዛ የሌለው፣ በሐሳብም፣ በአገላለጽም፣ በጸሎትም ያልተዋበ ሊሆን ይችላል። በእንዲህ ያለ ስብከት ሥር ጥፋቱ ምንኛ ሰፊና ፍጹም ነው! መንፈሳዊው ሞት ምንኛ ጥልቅ ነው!

ይህ የፊደል ስብከት የሚመለከተው የነገሮችን ውጫዊ ገጽታና ጥላ እንጂ ነገሮቹን ራሳቸውን አይደለም። ወደ ውስጠኛው ክፍል አይዘልቅም። የእግዚአብሔርን ቃል የተሰወረ ሕይወት በጥልቀት አያስተውልም፤ አጥብቆም አይጨብጠውም። ለውጫዊው ታማኝ ነው፤ ውጫዊው ግን ፍሬውን ለማግኘት ሊሰበርና ሊዘለቅ የሚገባው ቅርፊት ነው። ፊደሉ ሰዎችን እንዲስብና በዘመኑ ተወዳጅ እንዲሆን ተደርጎ ሊለብስ ይችላል፤ ነገር ግን መሳቡ ወደ እግዚአብሔር አይደለም፤ ተወዳጅነቱም ለሰማይ አይደለም። ውድቀቱ በሰባኪው ላይ ነው። እግዚአብሔር አልሠራውም። ሸክላ በሸክላ ሠሪ እጅ እንዳለ በእግዚአብሔር እጅ ውስጥ ሆኖ አያውቅም። በስብከቱ፣ በሐሳቡና በአጨራረሱ፣ በሚስበውና በሚያስደንቀው ኃይሉ ተጠምዷል፤ የእግዚአብሔር ጥልቅ ነገሮች ግን በእርሱ ፈጽሞ አልተፈለጉም፣ አልተጠኑም፣ አልተመረመሩም፣ በተሞክሮም አልታወቁም። «በረጅምና ከፍ ባለ ዙፋን» ፊት ፈጽሞ ቆሞ አያውቅም፤ የሱራፌልን ዝማሬ ፈጽሞ አልሰማም፤ ራእዩን አላየም፤ የዚያን አስፈሪ ቅድስና ግፊት አልተሰማውም፤ በድካምና በበደል ስሜት ተይዞ ራሱን ፈጽሞ በመተውና በተስፋ መቍረጥ አልጮኸም፤ ከእግዚአብሔርም መሠዊያ በተወሰደው ፍም ሕይወቱ አልታደሰም፤ ልቡም አልተነካም፣ አልነጻም፣ አልነደደም። አገልግሎቱ ሰዎችን ወደ ራሱ፣ ወደ ቤተ ክርስቲያን፣ ወደ ሥርዓትና ወደ ልማድ ሊስብ ይችላል፤ ነገር ግን ወደ እግዚአብሔር የሚሆን እውነተኛ መሳብ የለም፤ ጣፋጭ፣ ቅዱስና መለኮታዊ ኅብረትም አልተገኘም። ቤተ ክርስቲያን በሥዕል አጊጣለች እንጂ አልታነጸችም፤ ደስ ተሰኝታለች እንጂ አልተቀደሰችም። ሕይወት ታፍኗል፤ በበጋው አየር ላይ ቅዝቃዜ ሰፍኗል፤ አፈሩ ደርቆ ጠንክሯል። የአምላካችን ከተማ የሙታን ከተማ ትሆናለች፤ ቤተ ክርስቲያንም ለውጊያ የተሰለፈ ሠራዊት ሳትሆን የመቃብር ስፍራ ትሆናለች። ምስጋናና ጸሎት ታፍነዋል፤ አምልኮ ሞቷል። ሰባኪውና ስብከቱ ቅድስናን ሳይሆን ኃጢአትን ረድተዋል፤ ሰማይን ሳይሆን ሲኦልን በሰው ሞልተዋል።

የሚገድል ስብከት ጸሎት የሌለበት ስብከት ነው። ያለ ጸሎት ሰባኪው ሞትን እንጂ ሕይወትን አይፈጥርም። በጸሎት ደካማ የሆነ ሰባኪ ሕይወትን በሚሰጡ ኃይሎችም ደካማ ነው። ጸሎትን በገዛ ባሕርዩ ውስጥ ጎልቶ የሚታይና እጅግ የሚያሸንፍ ክፍል ከመሆን ያገለለ ሰባኪ ስብከቱን ልዩ ከሆነው ሕይወት ሰጪ ኃይሉ ላጭቶታል። ሙያዊ ጸሎት አለ፤ ይኖራልም፤ ነገር ግን ሙያዊ ጸሎት ስብከቱን በገዳይ ሥራው ይረዳዋል። ሙያዊ ጸሎት ስብከትንም ጸሎትንም ያቀዘቅዛል፤ ይገድላልም። በጉባኤ ጸሎት ውስጥ የሚታየው አብዛኛው የላላ ትጋት፣ ስንፍናና አክብሮት የጎደለው አቋም የመጣው በመድረክ ላይ ካለው ሙያዊ ጸሎት ነው። በብዙ መድረኮች ላይ የሚደረጉት ጸሎቶች ረጅሞች፣ ከርእስ ወደ ርእስ የሚዘሉ፣ ደረቆችና ትርጉም የለሾች ናቸው። ቅባትም ልብም ሳይኖራቸው በአምልኮ ጸጋዎች ሁሉ ላይ እንደሚገድል ውርጭ ይወድቃሉ። ሞትን የሚያመጡ ጸሎቶች ናቸው። የአምልኮ ትጋት ቅሪት ሁሉ በእስትንፋሳቸው ሥር ጠፍቷል። ይበልጥ በሞቱ ቁጥር ይበልጥ ይረዝማሉ። ለአጭር ጸሎት፣ ለሕያው ጸሎት፣ ለእውነተኛ የልብ ጸሎት፣ በመንፈስ ቅዱስ ለሚደረግ ጸሎት—በመድረክ ላይ ቀጥተኛ፣ ግልጽ፣ የጋለ፣ ቀላልና ቅባት ያለበት ጸሎት—ልመና ማቅረብ ተገቢ ነው። እግዚአብሔር ጸሎት ብሎ በሚቆጥረው መንገድ ሰባኪዎችን እንዴት መጸለይ እንደሚገባቸው የሚያስተምር ትምህርት ቤት ከሥነ መለኮት ትምህርት ቤቶች ሁሉ ይልቅ ለእውነተኛ መንፈሳዊነት፣ ለእውነተኛ አምልኮና ለእውነተኛ ስብከት የበለጠ ይጠቅማል።

ቁም! ቆም በል! አስብ! የት ነን? ምን እያደረግን ነው? ለመግደል እንሰብካለን? ለመግደል እንጸልያለን? ወደ እግዚአብሔር መጸለይ! ወደ ታላቁ አምላክ፣ የዓለማት ሁሉ ፈጣሪ፣ የሰዎች ሁሉ ፈራጅ! ምንኛ አክብሮት! ምንኛ ቅንነት! ምንኛ ልባዊነት! በልብ ውስጥ ምንኛ እውነት ይፈለጋል! ምንኛ እውነተኞች ልንሆን ይገባናል! ምንኛ ከልብ! ወደ እግዚአብሔር መጸለይ የሰው እጅግ ክቡር ተግባር፣ እጅግ ከፍ ያለ ጥረቱ፣ ከሁሉ ይልቅ እውነተኛው ነገር ነው! የሚገድለውን የተረገመ ስብከትና የሚገድለውን ጸሎት ለዘላለም ጥለን እውነተኛውን ነገር፣ እጅግ ኃያሉን ነገር አናደርግምን?—በጸሎት የተሞላ ጸሎትን፣ ሕይወትን የሚፈጥር ስብከትን፤ እጅግ ታላቁን ኃይል በሰማይና በምድር ላይ አናመጣምን? ለሰውም ችግርና ምስኪንነት ከማያልቀውና ከተከፈተው የእግዚአብሔር ግምጃ ቤት አንቀዳምን?