መቅድም

ኤድዋርድ መኬንድሪ ባውንድስ የጸለየው ስለ ጸሎት ጥሩ አድርጎ ይጽፍ ዘንድ ጥሩ አድርጎ ለመጸለይ ብቻ አልነበረም። የጸለየው የዓለም ችግር በላዩ ላይ ስለ ነበረ ነው። ቸልተኛው ክርስቲያን አልፎ አልፎ እንኳ ሐሳብ በማይሰጣቸው ጉዳዮች ላይ፣ አስተሳሰባቸውና እምነታቸው ያነሰ ሰዎች ሁልጊዜ «የማይቻል» ለማለት በሚቸኩሉባቸው ዓላማዎችም ላይ ለረጅም ዓመታት ጸለየ። ዓመት በዓመት ብቻውን ከሚያሳልፋቸው የጸሎት ትጋቶቹ፣ በዘመናዊው የክርስትና ታሪክ ውስጥ ጥቂት ሰዎች ብቻ የተስተካከሉት ትምህርት ተገኘ። ስለ ጸሎት እጅግ ከፍ ባለ ሁኔታ የጻፈው፣ እርሱ ራሱ በጸሎት ልምምድ እጅግ ከፍ ያለ ስለ ነበረ ነው።

መተንፈስ ለእኛ ሥጋዊ እውነታ እንደ ሆነ ሁሉ፣ ጸሎትም ለባውንድስ እንዲሁ እውነታ ነበር። ሕያው ፍጥረት አተነፋፈሳችንን የሚገዛውንና ያለ ፈቃዳችን የሚሠራውን የነርቭ ሥርዓት ሕግ እንደሚከተል ሁሉ፣ እርሱም «ሳታቋርጡ ጸልዩ» የሚለውን ትእዛዝ ቃል በቃል ለማለት በሚያስደፍር ሁኔታ ተቀበለው።

የጸሎት መጻሕፍት — የጸሎት ሥርዓት መጻሕፍት ሳይሆኑ እውነተኛ የትምህርት መጻሕፍት — የዚህ የዕለት ተዕለት መንፈሳዊ ልምምድ ፍሬ ነበሩ። ከብዕሩ የወጡት ለሃይማኖታዊ ጋዜጦች የሚሆኑ አጫጭር ጽሑፎች አልነበሩም — ምንም እንኳ በዚያ መስክ ለዓመታት ልምድ የነበረው ቢሆንም — በራሪ ጽሑፎችም አልነበሩም፤ ፍሬውና ውጤቱ መጻሕፍት ነበሩ። ድህነት፣ አለመታወቅና ክብር ማጣት እንቅፋት ሆነውበት ነበር፤ ቢሆንም ድሉ ሙሉ በሙሉ እስከ ሞቱ ድረስ የተጠበቀ አልነበረም።

በ1907 ሁለት ትንንሽ እትሞችን ለዓለም ሰጠ። ከእነዚህ አንዱ በታላቋ ብሪታንያ በሰፊው ተሰራጨ። እስከ ሞተበት እስከ 1913 ድረስ ያሉት ዓመታት በማያቋርጥ ድካም የተሞሉ ነበሩ፤ የእጅ ጽሑፎችንም ስብስብ ትቶ ወደ እግዚአብሔር ቤት ሄደ። ደብዳቤዎቹ የአሁኑ አዘጋጅ እነዚህን ከተባረከው ብዕሩ የወጡትን ሥራዎች እንዲያሳትም የሚጠይቁ ናቸው።

የባውንድስ የእጅ ጽሑፎች እስከ ዛሬ ድረስ መጠበቃቸው በግልጽ የእግዚአብሔር አሠራር ነው። ለኅትመት የማዘጋጀቱ ሥራ ለዓመታት ጥረት የወሰደ የፍቅር ድካም ነበር።

እነዚህ መጻሕፍት በዕድሜ ልክ መንፈሳዊ ውኃ የሚቀዳባቸው የማይደርቁ ጕድጓዶች ናቸው። በንጋት ጨለማና በቀትር ሐሩር የተሠሩ፣ በልምምድ መቀጥቀጫ ብረት ላይ የተጠፈጠፉ፣ በመለኮታዊው ብርቱ ምት ድንቅ ቅርጽ የያዙ የተሰወሩ መዝገቦች ናቸው። እርሱ ሞቶም ሳለ እስከ አሁን የሚናገርባቸው ሕያዋን ድምፆች ናቸው። — ሲ. ሲ.

ከላይ ያለው መቅድም የተጻፈው የዶክተር ባውንድስ ቀናተኛ አድናቂ በነበረውና «የባውንድስ የመንፈሳዊ ሕይወት መጻሕፍትን» በማዘጋጀት ረገድ ላቀረባቸው ሐሳቦች ብዙ ውለታ ባለብን በክሎድ ቺልተን ጁኒየር ነው። ክሎድ ኤል. ቺልተንን ፌብሩዋሪ 18 ቀን 1929 ቀበርነው። የሚያንጸባርቅ ሙሉ የጦር ዕቃ የለበሱና የጀግና ጨዋነት የተላበሱ የእነዚህ ሁለት ታላላቅ የእግዚአብሔር ቅዱሳን መገናኘት እንዴት ያለ ይሆን!

ሆሜር ደብሊው ሆጅ።

ዊልክስ-ባሪ፣ ፔንስልቬንያ።