መግቢያ

---

ይህ መጽሐፍ ሊታተም መሆኑን የሰማ አንድ ወዳጄ፣ በዚህና ቀደም ሲል ስለዚሁ ጉዳይ በጻፍሁት ከክርስቶስ ጋር በጸሎት ትምህርት ቤት በተሰኘው መጽሐፍ መካከል ያለው ልዩነት ምን እንደ ሆነ ጠይቆኛል። ለዚያ ጥያቄ የምሰጠው መልስ ለዚህ መጽሐፍ ልሰጠው የምችለው ከሁሉ የተሻለ መግቢያ ሊሆን ይችላል።

የቀድሞው መጽሐፍ ያገኘው ተቀባይነት ሁሉ፣ ከይዘቱ አንጻር ሲታይ፣ ለሁለት ታላላቅ እውነቶች ከተሰጠው ትኩረት የተነሣ ነው ሊባል ይገባዋል። አንደኛው ጸሎት መልስ እንደሚያገኝ ያለው እርግጠኝነት ነበር። አንዳንዶች መለመንና መልስ መጠበቅ ከፍተኛው የጸሎት ዓይነት አይደለም የሚል አሳብ አላቸው። ከማንኛውም ልመና ውጭ ከእግዚአብሔር ጋር ያለ ኅብረት ከልመና ይበልጣል ይላሉ። በልመና ውስጥ የራስ ወዳድነትና የድርድር ነገር አለ፤ ማምለክ ከመለመን ይበልጣል ይላሉ። ለሌሎች ደግሞ ጸሎት እጅግ ብዙ ጊዜ መልስ አያገኝም የሚለው አሳብ ጎልቶ ስለሚታያቸው፣ በጸሎት አማካይነት ከሚገኙት ተጨባጭ ስጦታዎች ይልቅ ጸሎትን ከመለማመድ ስለሚገኘው መንፈሳዊ ጥቅም አብልጠው ያስባሉ። የጸሎት ትምህርት ቤት እነዚህ አመለካከቶች በትክክለኛ ስፍራቸው ሲያዙ በውስጣቸው ያለውን የእውነት መጠን እየተቀበለ፣ ጌታችን ስለ ጸሎት የምንፈልገውን የምናገኝበት መንገድ አድርጎ ዘወትር እንዴት እንደ ተናገረ፣ መልስ እንደምናገኝ የሚተማመን ተስፋንም በውስጣችን ለማነሣሣት በሚቻለው መንገድ ሁሉ እንዴት እንደሚጥር ያመለክታል። ሰው ወደ እግዚአብሔር አሳብ የሚገባበት ጸሎት የታደሰ ፈቃድን ንጉሣዊ ሥልጣን ሊገልጥ፣ ያለ ጸሎትም የማይሰጠውን ወደ ምድር ሊያወርድ መቻሉ፣ ሰው በእግዚአብሔር ልጅ አምሳል ለመሠራቱ ከሁሉ የላቀ ማስረጃ መሆኑን ለማሳየት ተመራሁ። ሰው ከእርሱ ጋር ወደ ኅብረት ለመግባት የተገባ ሆኖ ይገኛል፤ ይህም በስግደትና በአምልኮ ብቻ ሳይሆን፣ ፈቃዱ በእውነት ወደ ዓለም አገዛዝ ተወስዶ እግዚአብሔር ዘላለማዊ ዓላማውን የሚፈጽምበት አስተዋይ መተላለፊያ በመሆን ጭምር ነው። መጽሐፉ ክርስቶስ ዘወትር የሚሰብካቸውን ውድ እውነቶች ደግሞ ለመናገርና ለማጽናት ፈለገ፦ የጸሎት በረከት የምትወደውን ለምነህ ልትቀበል መቻልህ ነው፤ የጸሎት ከፍተኛው ልምምድና ክብሩ ደግሞ በጽናት ችክ ብሎ መለመን እግዚአብሔር በመጀመሪያ ሊሰጠው ያልቻለውንና ያልፈለገውን ሊያሸንፍና ሊያገኝ መቻሉ ነው።

ከዚህ እውነት ጋር የጌታን ቃሎች ስናጠና ጎልቶ የወጣ ሁለተኛ እውነት ነበረ። ለጸሎት መልስ ይህን ያህል በእርግጥ ተስፋ ከተሰጠ፣ ታዲያ ስፍር ቍጥር የሌላቸው መልስ ያላገኙ ጸሎቶች ለምን ኖሩ? ለሚለው ጥያቄ መልስ፣ ክርስቶስ መልሱ በአንዳንድ ሁኔታዎች ላይ የተመሠረተ እንደ ሆነ እንዳስተማረን አገኘን። ስለ እምነት፣ ስለ ጽናት፣ በስሙ ስለ መጸለይ፣ በእግዚአብሔር ፈቃድ ስለ መጸለይ ተናገረ። ነገር ግን እነዚህ ሁኔታዎች ሁሉ በአንድ ማዕከላዊ ሁኔታ ተጠቃለሉ፦ «በእኔ ብትኖሩ፣ የምትወዱትን ሁሉ ለምኑ ይሆንላችሁማል።» ብዙ የምትችለውን የእምነት ጸሎት የመጸለይ ኃይል በሕይወት ላይ የተመሠረተ እንደ ሆነ ግልጽ ሆነ። እነዚህ ተስፋዎች እውነት ሊሆኑለት የሚችሉት ቅርንጫፍ በወይን ግንድ ውስጥና ለወይን ግንዱ እንደሚኖር ፈጽሞ በክርስቶስ ውስጥና ለክርስቶስ ለመኖር ራሱን ለሰጠ ሰው ብቻ ነው። «በዚያን ቀን» አለ ክርስቶስ፣ የበዓለ ኀምሳን ቀን ማለቱ ነው፣ «በስሜ ትለምናላችሁ።» በክርስቶስ ስም የመለመን እውነተኛ ኃይል ሊታወቅ የሚችለው በመንፈስ ቅዱስ በተሞላ ሕይወት ብቻ ነው። ይህም ተራው የክርስትና ሕይወት እነዚህን ተስፋዎች የራሱ ሊያደርጋቸው አይችልም የሚለውን እውነት ወደ ማጉላት መራ። በኃይል ለመጸለይ ፈጽሞ ጤናማና ብርቱ የሆነ መንፈሳዊ ሕይወት ያስፈልጋል። ትምህርቱ በተፈጥሮው ፈጽሞ ራስን ለእግዚአብሔር የመለየት ሕይወት አስፈላጊ መሆኑን ወደ ማሳሰብ መራ። የክርስቶስ ድንቅ ተስፋዎች ለእኛ እውነት እንዲሆኑ ከተፈለገ ሊኖር የሚችለውና ሊኖር የሚገባው የተሻለው ሕይወት ምን እንደ ሆነ መጀመሪያ ያየው መጽሐፉን ሲያነብ እንደ ነበረ ከአንድ በላይ ሰው ነግሮኛል።

እነዚህን ሁለት እውነቶች በተመለከተ በዚህ መጽሐፍ ውስጥ ምንም ለውጥ የለም። እያንዳንዱ የተወደደ ክርስቲያን ወንድም የእግዚአብሔር ልጆች እንደ መሆናችን የመብታችንን እውነተኛነትና ክብር በትክክል እንዲገነዘብ ለመርዳት እነዚህን እውነቶች እጅግ በግልጽና በኃይል ማቅረብ ቢቻል ብቻ እመኛለሁ፦ «የምትወዱትን ሁሉ ለምኑ ይሆንላችሁማል።» ይህ መጽሐፍ የተገኘው ቀድሞ አሁን እንዳለኝ ያለ ግንዛቤ ያልነበረኝን ሁለት እውነቶች የማጽናት ፍላጎት ስላደረብኝ ነው።

አንደኛው፦ ክርስቶስ ጸሎት ቤተ ክርስቲያኑ ሥራዋን የምትሠራበት ታላቅ ኃይል እንዲሆን በእርግጥ ያሰበ መሆኑ፣ ጸሎትን ቸል ማለትም ቤተ ክርስቲያን በክርስቲያንም ሆነ በአሕዛብ አገሮች ባሉት ብዙኃን ላይ የበለጠ ኃይል ያልኖራት ዋነኛ ምክንያት መሆኑ ነው። በመጀመሪያው ምዕራፍ በዚህ ረገድ ያለኝ እምነት እንዴት እንደ ጠነከረና መጽሐፉ እንዲጻፍ ምክንያት የሆነው ምን እንደ ሆነ ገልጫለሁ። መጽሐፉ ስለ ራሴ፣ በአገልግሎት ስላሉት ወንድሞቼና ስለ እግዚአብሔር ሕዝብ ሁሉ የጉድለትና የኃጢአት ኑዛዜ እንዲሆን፣ በዚያው ጊዜም ነገሮች ሊለወጡ እንደሚችሉ፣ ክርስቶስም እርሱ እንደሚፈልገው እንድንጸልይ በመንፈሱ ሊያዘጋጀን እንደሚጠብቅ እንድናምን የሚያቀርብ ጥሪ እንዲሆን የታሰበ ነው። ይህ ጥሪ በእርግጥ ከቀድሞው መጽሐፍ ጋር በተያያዘ ወደ ተናገርሁት ይመልሰኛል፦ በመንፈስ የሆነ ሕይወት፣ በክርስቶስ የመኖር ሕይወት፣ በእጃችን ሊደረስበት ይችላል፤ በዚያም የጸሎት ኃይል—ለመጸለይ ያለው ኃይልም ሆነ መልሱን የማግኘት ኃይል—ቀድሞ ይቻላል ብለን ልናስበው በማንችለው መጠን እውን ሊሆን ይችላል። በጸሎት ሕይወት ውስጥ ያለ ማንኛውም ውድቀት፣ ክርስቶስ ያዘጋጀልንን ስፍራ በእውነት የመያዝ ማንኛውም ፍላጎት ወይም ተስፋ፣ በክርስትና ሕይወት ውስጥ ወደ ተገለጠው የጸጋ ትምህርት ሥር ራሱ ያደርሰናል። የጸሎት ሕይወት ወደ እውነተኛ ጤናማ ሁኔታ ሊመለስ የሚችለው በክርስቶስ ለመኖር ሕይወት ፈጽሞ ራስን በመስጠትና ለመንፈስ ሙሉ አመራርና ሕያው አድራጊነት በመገዛት ብቻ ነው። ይህን እንደምመኘው በዚህ መጽሐፍ ውስጥ ለማስቀመጥ የቻልሁት ምን ያህል ጥቂት እንደ ሆነ በጥልቅ ይሰማኛል። ደካሞችን የሚመርጥ እግዚአብሔር ለራሱ ክብር እንደሚጠቀምበት ጸልያለሁ፤ እታመናለሁም።

ላጸናው የፈለግሁት ሁለተኛው እውነት፦ ስለ ራሳችን ከምናቀርበው ጸሎት ተለይቶ ምልጃ በቤተ ክርስቲያንና በክርስትና ሕይወት ውስጥ ሊኖረው ስለሚገባው ስፍራ ያለን ግንዛቤ እጅግ ጥቂት መሆኑ ነው። በዙፋኑ ላይ ያለው ንጉሣችን በምልጃ ከፍተኛ ክብሩን ያገኛል፤ እኛም በእርሱ ከፍተኛ ክብራችንን እናገኛለን። በእርሱ አማካይነት የማዳን ሥራውን ይቀጥላል፤ ያለ እርሱም ምንም ማድረግ አይችልም፤ እኛም ሥራችንን መሥራት የምንችለው በእርሱ ብቻ ነው፤ ያለ እርሱም ምንም አይጠቅምም። በምልጃ እርሱ ለሌሎች የሚያካፍለውን መንፈስ ቅዱስንና መንፈሳዊ በረከትን ሁሉ ከአብ ዘወትር ይቀበላል፤ በምልጃ እኛም በራሳችን የእግዚአብሔርን መንፈስ ሙላት ለመቀበል፣ ለሌሎችም መንፈሳዊ በረከትን የማካፈል ኃይልን ለመቀበል ተጠርተናል። ቤተ ክርስቲያን በእውነት የመባረክ ኃይሏ በምልጃ ላይ የተመሠረተ ነው—ለሰዎች የሚወሰዱትን ሰማያዊ ስጦታዎች በመለመንና በመቀበል። ይህ እንዲህ ስለ ሆነ፣ በትምህርት ወይም በመንፈሳዊ ማስተዋል ጉድለት ምክንያት በራሳችን ትጋትና ጥረት፣ በዓለምና በሥጋ ተጽዕኖ ስንታመን፣ ከምንጸልየውም ይበልጥ ስንሠራ፣ የእግዚአብሔር መገኘትና ኃይል እንደምንመኘው በሥራችን ውስጥ አለመታየቱ አያስደንቅም።

እንደነዚህ ያሉ አሳቦች አማኞችን በዚህ ረገድ ስላላቸው ከፍተኛ መጠራት ለማንቃት፣ በእርሱም እንዲሳተፉ ለመርዳትና ለማሠልጠን ምን ሊደረግ እንደሚችል እንዳስብ መሩኝ። ስለዚህም ይህ መጽሐፍ ከቀድሞው የሚለየው የልምምድ ትምህርት ቤት ለመክፈት በመሞከሩና በታላቁ የምልጃ ሥራ በሥርዓት ተካፍለው የማያውቁትን ሁሉ እንዲጀምሩና ራሳቸውን ለእርሱ እንዲሰጡ በመጋበዙ ነው። ጸሎት ምን ማድረግ እንደሚችል ያወቁና በሚያስደንቅ ሁኔታ እየተለማመዱት ያሉ አሥር ሺዎች ሠራተኞች አሉ። ነገር ግን እጅግ ጥቂት በሆነ ጸሎት የሚሠሩ አሥር ሺዎች አሉ፤ እንዴትና የት እንደሚሠሩ ስለማያውቁ የማይሠሩ ደግሞ እንዲሁ ብዙ ናቸው፤ እነዚህ ሁሉ የሰማይን በረከቶች ወደ ምድር የሚያወርዱትን የአማላጆች ሠራዊት ለማብዛት ሊማረኩ ይችላሉ። ስለ እነርሱና እርዳታ እንደሚያስፈልጋቸው ስለሚሰማቸው ሁሉ ለአንድ ወር የሚቆይ የምልጃ ትምህርት ቤት የሚሆኑ ርዳታዎችንና ፍንጮችን አዘጋጅቻለሁ (አባሪውን ተመልከት)። መቀላቀል የሚፈልጉ ሁሉ ቢያንስ በቀን አሥር ደቂቃን ለይተው ለዚህ ሥራ በመስጠት እንዲጀምሩ ጠይቄአለሁ። ማድረግን የምንማረው በማድረግ ነው፤ የእግዚአብሔር መንፈስ እርዳታ የሚመጣው አጥብቀን ይዘን ስንጀምር ነው። የእግዚአብሔርን ጥሪ በየዕለቱ ስንሰማና ወዲያውኑ በተግባር ስናውለው፣ እኔም አማላጅ ነኝ የሚለው ንቃት በውስጣችን መኖር ይጀምራል፤ ይህን ሥራ በትክክል ልንሠራው ከፈለግን በክርስቶስ መኖርና በመንፈስ መሞላት እንደሚያስፈልገንም ይሰማናል። አማላጅ ለመሆን በቅንነት እንደ መሞከር የክርስትናን ሕይወት የሚፈትንና የሚያነቃቃ ምንም ነገር የለም። እግዚአብሔር የሚሰጠንን የክብር ስፍራ በፍጹም ልባችን ብንቀበል እኛም ሆንን ቤተ ክርስቲያን ምን ያህል እንደምንጠቀም ማሰብ ያዳግታል። የምልጃ ትምህርት ቤትን በተመለከተ፣ የመጀመሪያው ወር ትምህርት ውጤት እንዴት ማማለድ እንዳለብን ምን ያህል ጥቂት እንደምናውቅ የሚሰማንን ስሜት መቀስቀስ እንደሚሆን እርግጠኛ ነኝ። ሁለተኛውና ሦስተኛው ወር ደግሞ የአለማወቅንና ያለመብቃትን ስሜት ብቻ ያጠልቁት ይሆናል። ይህ የማይነገር በረከት ይሆናል። «እንዴት እንድንጸልይ እንደሚገባን አናውቅም» የሚለው ኑዛዜ «መንፈስ ራሱ በማይነገር መቃተት ይማልድልናል» ወደሚለው ተሞክሮ መግቢያ ነው—የአለማወቃችን ስሜት በውስጣችን በሚጸልየው መንፈስ ላይ እንድንደገፍ፣ በመንፈስ የመኖር አስፈላጊነትም እንዲሰማን ይመራናል።

ስለ ሥርዓታዊ የመጽሐፍ ቅዱስ ጥናት ብዙ ሰምተናል፤ በሺዎች በሺዎች ስለሚቈጠሩ የመጽሐፍ ቅዱስ ክፍሎችና የመጽሐፍ ቅዱስ ንባቦችም እግዚአብሔርን እናመሰግናለን። የእንደዚህ ያሉ ክፍሎች መሪዎች ሁሉ የጸሎት ክፍሎችን መክፈት ይችሉ እንደ ሆነ ይመልከቱ—ተማሪዎቻቸው በስውር እንዲጸልዩ እየረዱ፣ ከሁሉ በላይም የጸሎት ሰዎች እንዲሆኑ እያሠለጠኑ። አገልጋዮችም በዚህ ረገድ ምን ማድረግ እንደሚችሉ ራሳቸውን ይጠይቁ። በእግዚአብሔር ቃል ያለ እምነት የሚለምንን፣ የሚጠብቅንና መልሱን የሚጠባበቅን ምልጃ ያህል በየትም ስፍራ ሊለማመድና ፍጹም ሊሆን አይችልም። በመጽሐፍ ቅዱስ ሁሉ፣ በእያንዳንዱ ቅዱስ ሕይወት፣ በእግዚአብሔር በራሱ ልጅ ሕይወት፣ በእግዚአብሔር ቤተ ክርስቲያን ታሪክ ሁሉ፣ እግዚአብሔር ከሁሉ አስቀድሞ ጸሎትን የሚሰማ አምላክ ነው። የእግዚአብሔር ልጆች አምላካቸውን እንዲያውቁ ለመርዳት እንሞክር፤ የእግዚአብሔርንም አገልጋዮች ሁሉ በዚህ ማረጋገጫ እንዲደክሙ እናበረታታ፦ የሥራዬ ዋናውና እጅግ የተባረከው ክፍል ለሌሎች ላመጣው የምችለውን ከአባቴ መለመንና መቀበል ነው።

እንግዲህ ይህ መጽሐፍ የያዘው ነገር የቀድሞውን መጽሐፍ ሁለት ታላላቅ ትምህርቶች ማረጋገጫና ወደ ተግባር እንድናውላቸው የቀረበ ጥሪ ብቻ እንደ ሆነ በቀላሉ ይገባል። «የምትወዱትን ሁሉ ለምኑ ይሆንላችሁማል»፤ «የጸለያችሁትን የለመናችሁትንም ሁሉ እንዳገኛችሁት እመኑ»፦ እነዚህ ታላላቅ የጸሎት ተስፋዎች ቤተ ክርስቲያን ለሥራዋ ከተሰጣት የኃይል መጐናጸፊያ ክፍል እንደ መሆናቸው ቃል በቃልና በእውነት እውነት እንደ ሆኑ ሊወሰዱ ይገባል። «በእኔ ብትኖሩ ቃሎቼም በእናንተ ቢኖሩ»፤ «በዚያን ቀን በስሜ ትለምናላችሁ»፦ እነዚህ ታላላቅ የጸሎት ሁኔታዎች ሁሉን አቀፍና የማይለወጡ ናቸው። በክርስቶስ የሚኖርና በመንፈስ የተሞላ ሕይወት፣ ለወይኑ ግንድ ሥራ እንደ ቅርንጫፍ ፈጽሞ ራሱን የሰጠ ሕይወት፣ እነዚህን ተስፋዎች የራሱ ለማድረግና ብዙ የምትችለውን፣ እጅግ ኃይል የምታደርገውን ጸሎት ለመጸለይ ኃይል አለው። ጌታ ሆይ፥ እንጸልይ ዘንድ አስተምረን።

አንድሪው መሪ።

ዌሊንግተን፣ ሴፕቴምበር 1 ቀን 1897።

ለተጨማሪ ጸሎት የቀረበ ልመና