እጅግ ኃይል የምታደርግ ጸሎት ምሥጢር

«የጸለያችሁትን የለመናችሁትንም ሁሉ እንዳገኛችሁት እመኑ፥ ይሆንላችሁማል።»—ማርቆስ 11:24።

በዚህ ስለ ጸሎት የጌታችን የኢየሱስ ትምህርት ማጠቃለያ አለን። በጸሎት የቸልተኝነታችንን ኃጢአት እንድናምን፥ ምክንያቶቹንም እንድናገኝ፥ ፈጽሞ እንደምንድን ተስፋ እንድናደርግ ልብ እንዲሰጠን እንደዚያ ትምህርት በጥንቃቄ መጠናትና ከዚያም በእምነት መቀበል የሚረዳን ምንም ነገር የለም። ወደ ብፁዕ ጌታችን አሳብ በፍጹም ልባችን በገባን ቍጥር፥ እርሱ ስለ ጸሎት እንዳሰበው በቀላሉ ልናስብ ራሳችንን ባዘጋጀን ቍጥር ቃሎቹ ሕያዋን ዘሮች እንደሚሆኑ ይበልጥ የተረጋገጠ ይሆናል። ያድጋሉ፥ በውስጣችንም ፍሬያቸውን ያፈራሉ፤ ይህም ፍሬ በውስጣቸው ካለው መለኮታዊ እውነት ጋር ፍጹም የሚስማማ ሕይወትና አኗኗር ነው። እንግዲህ ይህን እናምን፦ ሕያው የእግዚአብሔር ቃል የሆነው ክርስቶስ በቃሎቹ መለኮታዊ ሕያው የሚያደርግ ኃይልን ይሰጣል፤ ይህም ኃይል ቃሎቹ የሚሉትን ያመጣል፥ እርሱ የሚጠይቀውን በውስጣችን ይሠራል፥ ለሚፈልገውም ሁሉ በእውነት ያዘጋጃል፥ ያስችላልም። ስለ ጸሎት የሰጠውን ትምህርት፥ በአንተ በሚኖረው በመንፈስ ቅዱሱ አማካይነት በማንነትህና በጠባይህ ውስጥ ሊሠራው ስላለው ነገር የተሰጠ የተወሰነ ተስፋ አድርገህ መመልከትን ተማር።

ጌታችን የእውነተኛ ጸሎትን አምስት ምልክቶች ወይም መሠረታዊ ክፍሎች ይሰጠናል። በመጀመሪያ የልብ ምኞት መኖር አለበት፤ ከዚያም ያ ምኞት በጸሎት መገለጡ፤ ከዚሁ ጋር ጸሎቱን ወደ እግዚአብሔር የሚያደርሰው እምነት፤ በዚያ እምነትም የእግዚአብሔርን መልስ መቀበል፤ ከዚያም የተመኘነውን በረከት በተግባር ማግኘት ይመጣል። እያንዳንዳችን በእምነት መጸለይን ልንማርበት የምንወደውን አንድ የተወሰነ ልመና ብንይዝ አሳባችን የተወሰነ እንዲሆን ሊረዳን ይችላል። ወይም፥ ምናልባት ከዚህ የተሻለ፥ ሁላችንም ተባብረን ትኩረታችንን ሲይዝ የቆየውን ያንኑ አንድ ነገር ልንይዝ እንችላለን። ስለ ጸሎት ውድቀት ስንናገር ቆይተናል፤ ታዲያ «የልመና ጸጋን» የምኞታችንና የልመናችን ጉዳይ አድርገን ለምን አንይዝም? እንዲህም ለምን አንልም፦ አምላኬ ከእኔ በሚጠብቀው ዓይነትና መጠን ለመጸለይ የሚያስችለኝን ኃይል በእምነት ልለምንና ልቀበል እፈልጋለሁ? ይህን በረከት እንዴት እንደምንለምን እንደሚያስተምረን በመተማመን የጌታችንን ቃሎች እናሰላስል።

1. «የጸለያችሁትን የለመናችሁትንም ሁሉ።»—ምኞት መላውን የሕያዋን ሰዎች ዓለም የሚያንቀሳቅስ፥ የእያንዳንዱንም አካሄድ የሚመራ ስውር ኃይል ነው። ስለዚህም ምኞት የጸሎት ነፍስ ነው፤ ያልበቃ ወይም ያልተሳካ ጸሎት ምክንያቱም በአብዛኛው የሚገኘው በምኞት ማጣት ወይም መድከም ነው። አንዳንዶች ይህን ሊጠራጠሩ ይችላሉ፤ የሚለምኑትን እጅግ አጥብቀው እንደ ተመኙ እርግጠኞች ናቸው። ነገር ግን ምኞታቸው እግዚአብሔር እንደሚወደው፥ የእነዚህ በረከቶች ሰማያዊ ዋጋ እንደሚጠይቀው በእውነት በፍጹም ልብ የሆነ እንደ ነበረ ቢያስቡ፥ ለውድቀታቸው ምክንያቱ በእርግጥ የምኞት ማጣት እንደ ነበረ ሊያዩ ይችላሉ። ስለ እግዚአብሔር እውነት የሆነው ስለ እያንዳንዱ በረከቱም እውነት ነው፤ በረከቱ ይበልጥ መንፈሳዊ በሆነ ቍጥር ደግሞ ይበልጥ እውነት ነው፦ «ትፈልጉኛላችሁ፤ በፍጹም ልባችሁም በፈለጋችሁኝ ጊዜ ታገኙኛላችሁ» (ኤርምያስ 29:13)። በአሳ ዘመን ስለ ነበረው ስለ ይሁዳ፦ «በፍጹም ፈቃዳቸው ፈለጉት» ተብሎ ተጽፎአል (2ኛ ዜና መዋዕል 15:15)። አንድ ክርስቲያን ለመንፈሳዊ በረከቶች ብዙ ጊዜ እጅግ የጋለ ምኞት ሊኖረው ይችላል። ነገር ግን ከእነዚህ ጎን ለጎን በዕለት ሕይወቱ በፍላጎቱና በፍቅሩ ውስጥ ሰፊ ቦታ የያዙ ሌሎች ምኞቶች አሉ። መንፈሳዊዎቹ ምኞቶች ሁሉን የሚውጡ አይደሉም። ጸሎቱ ስላልተሰማ ይደነቃል። ነገሩ እግዚአብሔር መላውን ልብ መፈለጉ ብቻ ነው። «ጌታ አምላካችን አንድ ጌታ ነው፥ ... አንተም በፍጹም ልብህ ... ጌታ አምላክህን ውደድ።» ሕጉ የማይለወጥ ነው፤ እግዚአብሔር ራሱን ፈጽመው ለእርሱ ለሚሰጡ፥ በፍጹም ልባቸው ለሆኑት ራሱን ያቀርባል፥ አሳልፎም ይሰጣል። ሁልጊዜ እንደ ልባችን ምኞት ይሰጠናል፤ ነገር ግን እኛ እንደምናስበው ሳይሆን እርሱ እንደሚያየው ነው። ከራሱና ከመገኘቱ ይልቅ ልባችንን የያዙ፥ ከእኛ ጋር ይበልጥ የተዋሐዱ ሌሎች ምኞቶች ቢኖሩ፥ እነዚህ እንዲፈጸሙ ይፈቅዳል፤ በጸሎት ሰዓት የሚይዙን ምኞቶች ግን ሊሰጡ አይችሉም።

የምልጃን ስጦታ፥ በትክክል ለመጸለይ ጸጋንና ኃይልን እንመኛለን። ልባችን ከሌሎች ምኞቶች ተስቦ መውጣት አለበት፤ ራሳችንን ፈጽመን ለዚህ ለአንዱ መስጠት አለብን። ስለ መንግሥቱ በምልጃ ፈጽመን ለመኖር ፈቃደኞች መሆን አለብን። በዚህ ጸጋ ብፅዕናና አስፈላጊነት ላይ ዓይናችንን በማተኮር፥ እግዚአብሔር እንደሚሰጠን እርግጠኛ መሆኑን በማሰብ፥ ስለሚጠፋው ዓለም ስንል ራሳችንን ለእርሱ አሳልፈን በመስጠት ምኞት ሊበረታ፥ የተመኘነውንም በረከት ወደ መያዝ የመጀመሪያው እርምጃ ሊወሰድ ይችላል። እርሱ የሚያገናኘንን አምላክ እንደምንፈልግ የጸሎትን ጸጋ «በፍጹም ፈቃዳችን» እንፈልግ፤ «የሚፈሩትን ፈቃድ ያደርጋል» በሚለው ተስፋ ልንታመን እንችላለን። «በፍጹም ልቤ እሻዋለሁ» ልንለው አንፍራ።

2. «የጸለያችሁትን የለመናችሁትንም ሁሉ።»—የልብ ምኞት የከንፈር ቃል መሆን አለበት። ጌታችን ኢየሱስ ምሕረትን ለማግኘት ወደ እርሱ የጮኹትን ከአንድ ጊዜ በላይ፦ «ምን ላደርግልህ ትወዳለህ?» ብሎ ጠየቃቸው። የሚፈልጉትን እንዲናገሩ ፈለገ። መናገሩ መላ ማንነታቸውን ለተግባር አነሣሣ፥ ከእርሱ ጋር አገናኛቸው፥ መጠባበቃቸውንም ቀሰቀሰ። መጸለይ ማለት ወደ እግዚአብሔር ፊት መግባት፥ ትኩረቱን መጠየቅና ማግኘት፥ ስለ አንድ ልመና ከእርሱ ጋር በግልጥ መነጋገር፥ ፍላጎታችንን ለታማኝነቱ አደራ ሰጥቶ እዚያው መተው ነው፤ ይህን በማድረጋችንም የምንፈልገውን ነገር በሚገባ እንገነዘባለን።

በልባቸው ብርቱ ምኞቶችን ብዙ ጊዜ የሚሸከሙ፥ ነገር ግን ግልጥና የተወሰነ፥ ደጋግሞም በሚቀርብ ጸሎት ወደ እግዚአብሔር የማያመጡአቸው አንዳንዶች አሉ። እምነታቸውን ለማበርታት ወደ ቃሉና ወደ ተስፋዎቹ የሚሄዱ፥ ነገር ግን ነፍስ ነገሩ በእግዚአብሔር እጅ መሰጠቱን እንድታረጋግጥ ለሚረዳው ለዚያ ቀጥተኛ የእግዚአብሔር ልመና በቂ ቦታ የማይሰጡ ሌሎች አሉ። ሌሎች ደግሞ እጅግ ብዙ ልመናዎችንና ምኞቶችን ይዘው በጸሎት ስለሚመጡ እግዚአብሔር እንዲያደርግላቸው በእውነት የሚጠብቁት ምን እንደ ሆነ ራሳቸው እንኳ ለመናገር ያስቸግራቸዋል። በጸሎት ታማኝ የመሆንንና በትክክል የመጸለይን ኃይል፥ ይህን ታላቅ ስጦታ ከእግዚአብሔር ልታገኝ ብትወድ፥ ስለ እርሱ ራስህን በጸሎት በማለማመድ ጀምር። ስለ እርሱ ለራስህና ለእግዚአብሔር እንዲህ በል፦ «እነሆ፥ የለመንሁት፥ እስክቀበለውም ድረስ እየለመንሁ ያለሁት አንድ ነገር አለ። ቃላት ሊያደርጉት በሚችሉት መጠን ግልጥና ቀጥተኛ አድርጌ፦ ‹አባቴ ሆይ! የጸሎትንና የምልጃን ጸጋ በእውነት እመኛለሁ፥ በእውነት ከአንተ እለምናለሁ፥ ከአንተም እጠብቃለሁ› እላለሁ።»

3. «የጸለያችሁትን የለመናችሁትንም ሁሉ እንዳገኛችሁት እመኑ።»—እግዚአብሔርን ልናውቅ፥ ወይም ኢየሱስ ክርስቶስን ልንቀበል፥ ወይም የክርስቲያንን ሕይወት ልንኖር የምንችለው በእምነት ብቻ እንደ ሆነ፥ እንዲሁ እምነት የጸሎት ሕይወትና ኃይል ነው። ደስታና ኃይል በረከትም ወደሚገኝበት የምልጃ ሕይወት ልንገባ ከሆነ፥ ስለ ጸሎት ጸጋ የምንጸልየው ጸሎት መልስ እንዲያገኝ ከሆነ፥ እምነት ምን እንደ ሆነ እንደ ገና መማር፥ ከቶ እንዳልኖርነውና እንዳልጸለይነውም በእምነት መኖርና መጸለይ መጀመር አለብን።

እምነት የማየት ተቃራኒ ነው፤ ሁለቱም እርስ በርሳቸው ይቃረናሉ። «በማየት ሳይሆን በእምነት እንመላለሳለንና።» የማይታየው ፈጽሞ ሊይዘን፥ ልብና ሕይወት ጸሎትም በእምነት ሊሞሉ ከሆነ፥ ከሚታየው መራቅና እርሱን መካድ ሊኖር ይገባል። ንጹሕ ወይም ተገቢ የሆነውን በተቻለ መጠን ብዙ ለመደሰት የሚሻ፥ ለዕለት ሕይወት ጥሪዎችና ተግባራት የመጀመሪያውን ስፍራ የሚሰጥ መንፈስ ከብርቱ እምነትና ከመንፈሳዊው ዓለም ጋር ካለ የቅርብ ኅብረት ጋር አይስማማም። «እኛ የሚታየውን አንመለከትም»—አዎንታዊው፦ «የማይታየውን እንጂ» የሚለው ለእኛ ተፈጥሯዊ እንዲሆን ከተፈለገ አሉታዊው ወገን አጽንኦት ሊሰጠው ያስፈልጋል። በጸሎት ጊዜ እምነት በማይታየው ዓለም በመኖራችን ላይ ይመሠረታል።

ይህ እምነት በተለይ ከእግዚአብሔር ጋር የተያያዘ ነው። የእምነታችን ማጣት ታላቁ ምክንያት እግዚአብሔርን አለማወቃችንና ከእርሱ ጋር ኅብረት አለማድረጋችን ነው። ኢየሱስ ተራሮችን ስለ ማፍለስ በተናገረ ጊዜ፦ «በእግዚአብሔር እመኑ» አለ። አለማመን የማይቻል የሚሆነው ነፍስ እግዚአብሔርን ስታውቅ፥ በኃይሉ በፍቅሩና በታማኝነቱ ስትጠመድ፥ ከራስዋና ከዓለም ፈጽማ ወጥታ የእግዚአብሔር ብርሃን በእርስዋ ላይ እንዲበራ ስትፈቅድ ነው። ከጸሎት መልስ ጋር የተያያዙ ምሥጢሮችና ችግሮች ሁሉ፥ በአእምሮ ልንፈታቸው የምንችለው ምንም ያህል ትንሽ ቢሆን፥ በሚሰግድ እርግጠኝነት ይዋጣሉ፦ «ይህ አምላክ አምላካችን ነው። ይባርከናል። በእርግጥ ጸሎትን ይመልሳል። የምለምነውንም የመጸለይ ጸጋ ሊሰጠኝ ደስ ይለዋል።» (ማስታወሻ ሐ።)

4. «የጸለያችሁትን የለመናችሁትንም ሁሉ እንዳገኛችሁት እመኑ»፥ አሁን በምትጸልይበት ጊዜ።—እምነት መልሱ በምድር ላይ ከመገኘቱ ወይም ከመሰማቱ በፊት በሰማይ በእግዚአብሔር እንደ ተሰጠ አድርጎ መቀበል አለበት። ይህ ነጥብ ችግር ይፈጥራል፤ ቢሆንም የእምነት ጸሎት ዋነኛ ባሕርይ፥ እውነተኛ ምሥጢሩ ነው። ልትረዳው ሞክር። መንፈሳዊ ነገሮች በመንፈሳዊ መንገድ ብቻ ሊረዱ ወይም ሊወሰዱ ይችላሉ። ለጸሎትህ የእግዚአብሔር መልስ የሆነው መንፈሳዊና ሰማያዊ በረከት ከእርሱ ምንም ከመሰማትህ በፊት በመንፈሳዊ መንገድ ሊታወቅና ሊቀበል ይገባዋል። ይህን የሚያደርገው እምነት ነው። መልስን ብቻ ሳይሆን ከሁሉ አስቀድሞ መልስን የሚሰጠውን አምላክ የምትፈልግ ነፍስ ከእርሱ የለመነችውን እንዳገኘች የምታውቅበትን ኃይል ትቀበላለች። እንደ ፈቃዱና እንደ ተስፋዎቹ እንደ ለመነች፥ ልመናውንም ሊሰጣት ወደ እርሱ ራሱ እንደ ቀረበችና እንዳገኘችው ካወቀች፥ እንዳገኘች በእርግጥ ታምናለች። «የምንለምነውንም ሁሉ እንዲሰማልን ብናውቅ ከእርሱ የለመነውን ልመና እንደ ተቀበልን እናውቃለን።»

እንደዚህ እምነት ልብን የሚመረምር ምንም ነገር የለም፦ «እንዳገኛችሁት እመኑ።» ለማመን ስንጣጣር፥ እንደማንችልም ስናገኝ፥ የሚያደናቅፈው ምን እንዳለ እንድናገኝ ይመራናል። ምንም የማያስቀር፥ ምንም እንዲያስቀረውም የማይፈቅድ፥ ነገር ግን ዓይኑንና ልቡን በእግዚአብሔር ብቻ ላይ አድርጎ ጌታችን የሚያዝዘውን፥ «እንዳገኘ» እስኪያምን ድረስ ለማረፍ እንቢ የሚል ሰው ብፁዕ ነው። ያዕቆብ እስራኤል የሚሆንበት፥ የሚያሸንፍ ጸሎት ኃይልም ከሰው ድካምና ተስፋ መቍረጥ የሚወለድበት ስፍራ ይህ ነው። እዚህ ላይ እንደ ተሰማ እስኪያውቅና እንዳገኘ እስኪያምን ድረስ የማያርፍ፥ የማይሄድ፥ ተስፋም የማይቈርጥ፥ የሚጸናና ሁልጊዜም ችክ ብሎ የሚለምን ጸሎት እውነተኛ አስፈላጊነት ይመጣል።

«የጸጋንና የልመናን መንፈስ» ትለምናለህን? በብርቱ ምኞት ስትለምነው፥ ጸሎትን በሚሰማ በእግዚአብሔርም ስታምን፥ ወደ ፊት ለመግፋትና ሕይወትህ በእርግጥ ሊለወጥ እንደሚችል ለማመን አትፍራ፤ ሃይማኖታዊም ይሁኑ አይሁኑ በተግባሮቹ ግፊት ጸሎትን የሚያደናቅፈው ዓለም ሊሸነፍ እንደሚችል፥ እግዚአብሔርም የልብህን ምኞት፥ አብ ልጁ እንዲያደርግ በሚወደው መጠንና መንፈስ ለመጸለይ ጸጋን እንደሚሰጥህ እመን። «እንዳገኛችሁት እመኑ።»

5. «የጸለያችሁትን የለመናችሁትንም ሁሉ እንዳገኛችሁት እመኑ፥ ይሆንላችሁማል።»—ከእግዚአብሔር በእምነት መቀበል፥ መልሱ እንደ ተሰጠ በፍጹምና በሚያመሰግን እርግጠኝነት በእምነት መቀበል፥ የለመንነውን ስጦታ በተግባር ማየት ወይም በውስጥ መያዝ ማለት የግድ አይደለም። አንዳንድ ጊዜ ብዙ፥ እንዲያውም ረጅም ጊዜ ሊያልፍ ይችላል። በሌሎች ሁኔታዎች የሚያምነው ለማኝ የተቀበለውን ወዲያውኑ በእውነት መደሰት ሊጀምር ይችላል። እምነትና ትዕግሥት የሚያስፈልጉን በተለይ በመጀመሪያው ሁኔታ ነው፤ እምነት የተሰጠውንና የተቀበልነውን መልስ በማረጋገጥ ደስ ለመሰኘት፥ ምንም ባይሰማ እንኳ በዚያ መልስ ላይ ተመሥርቶ መሥራት ለመጀመር፤ ትዕግሥት ደግሞ ለጊዜው መኖሩን የሚያሳይ የሚሰማ ማስረጃ ባይኖር ለመጠበቅ። በዚህ ልንታመን እንችላለን፦ ይሆንላችሁማል፥ በእውነተኛ ደስታ።

ይህን ለታማኝ ምልጃ ኃይል፥ በዙሪያችን ላሉ ነፍሳት አጥብቆና በጽናት ለመጸለይ ጸጋን ለማግኘት በምናቀርበው ጸሎት ላይ ብንተገብረው፥ እንደምንቀበል ባመንን መጠን በእርግጥ እንደምንቀበል፥ ስለዚህም እምነት ከውድቀት ሁሉ ተለይቶ በተመለሰ ጸሎት እርግጠኝነት ደስ ሊለው እንደሚችል የሚያረጋግጠውን መለኮታዊ ዋስትና አጥብቀን መያዝን እንማር። ስለ እርሱ እግዚአብሔርን ባመሰገንነው መጠን ልምምዱ ቶሎ ይመጣል። ከዚህ ቀደም ካደረግነው ይበልጥ በጽናትና በእምነት ለመጸለይ ጸጋ እንደሚሰጠን በመተማመን ስለ ሌሎች ወዲያውኑ መጸለይ ልንጀምር እንችላለን። በጸሎት የተለየ መስፋትን ወይም ኃይልን ባናገኝ ይህ ሊያደናቅፈን ወይም ተስፋ ሊያስቈርጠን አይገባም። ከስሜት ተለይተን መንፈሳዊና መለኮታዊ ስጦታን በእምነት ተቀብለናል፤ በዚያ እምነት በምንም ሳንጠራጠር ልንጸልይ ይገባናል። መንፈስ ቅዱስ ለጥቂት ጊዜ በውስጣችን ራሱን ይሰውር ይሆናል፤ በማይነገር መቃተት ቢሆን እንኳ በእኛ ውስጥ እንዲጸልይ በእርሱ ልንታመን እንችላለን፤ በጊዜውም መገኘቱንና ኃይሉን እናስተውላለን። ምኞትና ጸሎት እምነትም፥ ስጦታውንም በእምነት መቀበል በእርግጥ ካለ፥ የፈለግነው በረከት መገለጥና ልምምድ ደግሞ ይኖራል።

የተወደድህ ወንድሜ ሆይ! ሕይወትህ ከማያቋርጥ ራስን መኰነን ነጻ እንዲሆን፥ ለልመናህም መልስ የመንፈሱ ኃይል እንዲወርድ፥ እንዲህ ለመጸለይ እግዚአብሔር እንዲያስችልህ በእውነት ትመኛለህን? ና፥ ከእግዚአብሔር ለምነው። ተንበርከክና በአንዲት የተወሰነ ዓረፍተ ነገር ስለ እርሱ ጸልይ። ይህን ካደረግህ በኋላ መልስ በሚሰጠው በእግዚአብሔር እያመንህ በእምነት ተንበርክከህ ቆይ። የጸለይኸውን አሁን እንደምትቀበል እመን፤ እንዳገኘህ እመን። ይህን ማድረግ ቢያስቸግርህ ተንበርክከህ ቆይ፥ በራሱ ቃል ብርታት እንደምታደርገውም ተናገር። ጊዜና ትግል ጥርጣሬም ቢያስከፍልህ አትፍራ፤ በእግሩ ሥር ሆነህ ወደ ፊቱ ቀና ብለህ ስትመለከት እምነት ይመጣል። «እንዳገኛችሁት እመኑ»፤ በትእዛዙ መልሱን ለመጠየቅ ትደፍራለህ። ደካማ ቢሆን እንኳ በዚያ እምነት አዲስ የጸሎት ሕይወት ጀምር፤ ብርታቱም ይህ አንድ አሳብ ይሁን፦ «በጸሎትና በምልጃ ታማኝ እንድትሆን ደረጃ በደረጃ የሚያዘጋጅህን ጸጋ በክርስቶስ ለምነሃል፥ ተቀብለሃልም። ይህን አጥብቀህ በቀላሉ በያዝህና መንፈስ ቅዱስ በአንተ እንዲሠራው በጠበቅህ መጠን፥ ይሆንላችሁማል የሚለው ቃል ይበልጥ በእርግጥና በሙላት እውነት ይሆንልሃል። መልሱን የሰጠው እግዚአብሔር ራሱ በአንተ ውስጥ ይሠራዋል።»

ለተጨማሪ ጸሎት የቀረበ ልመና