ለጥቁር ሕዝብ

ለደኅንነታችሁ በአእምሮዬ ኃላፊነት ስለ ተሰማኝ በፍቅራዊ ርኅራኄ እናገራችኋለሁ፤ እኔም ባሪያ ነበርሁ፤ እንደ ማናችሁም ነፃነትን እናፍቅ ነበር፤ ቢሆንም የባርነት እስራት እጅግ ብርቱ ስለ ነበር ለመፈታቴ ምንም መንገድ አልታየም፤ ሆኖም አንዳንድ ጊዜ መንገድ ይከፈትለታል የሚል ተስፋ በልቤ ይነሣ ነበር፤ አእምሮዬም የእግዚአብሔር ፍቅር ስሜት በምሕረት በጎበኘው ጊዜ እነዚህ ተስፋዎች ጨመሩ፤ እርሱም ለመፈታቴ መንገድ እንደሚያዘጋጅ መተማመን ተነሣ፤ በትዕግሥት መጠበቅ አስፈላጊ ስለ ነበረም አንዳንድ ጊዜ ይህ ጸጋ ተሰጠኝ፤ በሌላ ጊዜ ግን እጅግ ትዕግሥት አጣሁ። በዚያን ጊዜ የነፃነት ተስፋ ፈጽሞ ሊጠፋ ተቃረበ፤ እኔም በጨለማና በጭንቀት ውስጥ ነበርሁ።

ይህን ልምዴን የምነግራችሁ ፊታችሁ ባለው ተስፋ አስቆራጭ ሁኔታ ልባችሁ እንዳይዝል፣ እንዲሁም ሁኔታችሁን በሚያየው በእግዚአብሔር እንድትታመኑ ነው፤ አባትም ለልጆቹ እንደሚራራ እንዲሁ እግዚአብሔር ለሚወዱት ይራራል፤ ልባችሁም እግዚአብሔርን ለማገልገል ሲያዘነብል፣ ጌቶቻችሁና እመቤቶቻችሁ ለሚባሉት፣ እንዲሁም ለምትኖሩበት ቤተሰብ ሁሉ ፍቅራዊ አክብሮት ይሰማችኋል። ይህንን እነርሱ ያዩታል፤ ነፃነታችሁንም ለማፋጠን ይረዳል፤ በተለይም ርኅራኄ ያላቸው ጌቶች ካሏችሁ፤ እነርሱ ሌላ ዓይነት ቢሆኑ ግን፣ የእግዚአብሔር ሞገስና ፍቅር በልባችሁ ይኖራል፤ ይህንንም ከማናቸውም ነገር በላይ ዋጋ ትሰጡታላችሁ፤ ልትገኙበት በምትችሉት እጅግ የከፋ ሁኔታ ውስጥ መጽናኛ ይሆናችኋል፤ ማንም ጌታ ሊነጥቃችሁ አይችልም። ሕይወትም አጭርና የማይታመን ስለ ሆነ፣ በዚህ ዓለም የመኖራችን ዋና ዓላማም ለተሻለ ዓለም መዘጋጀት ስለ ሆነ፣ ከማናቸውም ነገር በላይ ይህን እንድታስቡ እወዳለሁ፤ ያን ጊዜ የእግዚአብሔር ልጆች የሚደሰቱበትን ያን ነፃነት ታያላችሁ፤ የሁኔታችሁም መከራ ከሕይወታችሁ

ጋር ቢያበቃ፣ እግዚአብሔር ከቀለም ሁሉ ለሚወዱት ሰዎች ወዳዘጋጀው ነፃነት ትገባላችሁ። በዚያ እጅግ ጨካኝ የሆነው ጌታ ኃይል እንኳ ያበቃል፤ ኀዘንና ፍርሃትም ሁሉ ይታበሳል።

ነፃነት ለተሰጣችሁ ለእናንተ — ነፃ ላወጧችሁ ርኅሩኃን ጌቶች ያላችሁን ምስጋና አካሄዳችሁ ይግለጽ፤ ከማንም በደረሰባችሁ ማናቸውም መጥፎ አያያዝ ምክንያት ቂም ወይም ክፉ አሳብ በልባችሁ አይደር። ይህን ብታደርጉ ከበደል ንጹሕ አድርጎ በማይቆጥራችሁ በእግዚአብሔር ላይ ትተላለፋላችሁ። እርሱ ይህን የተወደደው ሕዝቡ እስራኤል እንኳ እንዲያደርግ አልፈቀደም፤ ታዲያ ለእኛ ይፈቅድልናል ብላችሁ ታስባላችሁን? ብዙ ነጮች ለእኛ መልካም በእግዚአብሔር እጅ መሣሪያዎች ሆነዋል፤ በምርኮ ይዘውን የነበሩት እንኳ አሁን በትጋትና በቅንዓት ጉዳያችንን ይሟገታሉ፤ ነገር ግን እጅግ ብዙዎች ከተቀበሉት መልካም ነገር ይልቅ ስለ ደረሰባቸው ክፉ ነገር እንደሚያስቡ፣ የወዳጆቻቸውንም ምክር ከመቀበል ይልቅ በግዴለሽነት ከእርሱ እንደሚመለሱ ስናገር አዝናለሁ። የቀለማችንን ሰዎች ለመርዳት ብዙ ነገር የሚወሰነው በእኛ ላይ ነው — ብዙዎች ከሚያውቁት በላይ። ሰነፎችና ሥራ ፈቶች ብንሆን፣ የነፃነት ጠላቶች ይህን ነፃ መሆን የሌለብን ምክንያት አድርገው ይሟገቱበታል፤ በባርነት ሁኔታ ብንኖር ይሻለናል፣ ነፃነታችንን መስጠትም ይጎዳናል ይላሉ፤ እንዲህ ባለው አካሄድም የጭቆናን እስራት እናጠነክራለን፤ ከእኛ ይበልጥ የሚገባቸውን ብዙዎችንም በባርነት እናቆያለን። የነፃነትን ጉዳይ ወደ ፊት ለማራመድ ያለብንን ግዴታ እንድታስቡ እለምናችኋለሁ። ባሪያው የሚጠጣው ጽዋ ምን ያህል መራራ እንደ ሆነ የምናውቅ እኛ፣ አሁንም በባርነት ላሉት ምንኛ ሊሰማን ይገባል! የቀለማችንን ጠላቶች እጅ ለማጠንከር ለምንጫወተው ሚና ወዳጆቻችንስ እንኳ ይቅር ይሉናልን — እግዚአብሔርስ ይቅር ይለናልን?