መጥቼ ከአንተ ጋር እኖራለሁ፤ ከቶም አልተውህም

ብዙዎች የሚያማርሩባቸውን ትግሎች፣ ችግሮችና ውድቀቶች ሁሉ፣ ትንሽ ልጅ እንኳ ሊረዳው በሚችል ቀላል ቃል የተዘመረ መዝሙርንም ሳስብ፣ የክርስቲያን ሕይወት ምስጢር ምንድር ነው? ብዬ እጠይቃለሁ። ከዚያም እንዲህ የሚል አሳብ ወደ እኔ ይመጣል፦ ያንን ክቡር፣ ሰማያዊና መለኮታዊ ጌታ ኢየሱስን ይዤ ለእነዚህ ነፍሳት በማሳየት በክብሩ እንዲያዩት ማድረግ ይሰጠኝ ዘንድ ተስፋ ለማድረግ እደፍራለሁን? በእውነትም ወደ ልብ የሚመጣና በታማኝነት «መጥቼ ከአንተ ጋር እኖራለሁ፤ ከቶም አልተውህም?» ብሎ ተስፋ የሚሰጥ መለኮታዊና ሁሉን የሚችል ክርስቶስ እንዳለ ያዩ ዘንድ ዓይኖቻቸውን መክፈት ይሰጠኝ ይሆንን?

አይደለም፤ ቃሌ ይህን ማድረግ አይችልም። ነገር ግን ከዚያ በኋላ እንዲህ አሰብሁ፦ ጌታዬ ኢየሱስ እንደ ቀላል አገልጋይ ሊጠቀምብኝ ይችላል፤ እንደነዚህ ያሉትን ደካሞች በእጃቸው ይዤ እንዳበረታታቸውና እንድረዳቸው፣ እንዲህም እንዲሉ እንዳግዛቸው፦ ኦ፣ ኑ፣ ኑ፣ ኑ ወደ ኢየሱስ ፊት፤ እርሱንም በትዕግሥት ጠብቁ፤ እርሱም ራሱን ይገልጥላችኋል። እግዚአብሔር ክቡር ቃሉን ይጠቀምበት ዘንድ እጸልያለሁ። ነገሩ በቀላሉ የጌታ ኢየሱስ መገኘት ነው።

የክርስቲያን ብርታትና ደስታ ምስጢር ይህ ነው። ኢየሱስ በምድር ላይ በነበረ ጊዜ በሥጋ ከደቀ መዛሙርቱ ጋር እንደ ነበረ ታውቃለህ። ቀኑን ሙሉ አብረው ይመላለሱ ነበር፤ ማታም ወደ አንድ ቤት ይገቡ ነበር፤ አንዳንድ ጊዜም አብረው ይተኙ፣ አብረውም ይበሉና ይጠጡ ነበር። ሁልጊዜ አብረው ነበሩ። የደቀ መዛሙርቱ ማሠልጠኛ ትምህርት ቤት የኢየሱስ መገኘት ነበረ። ለሦስት ረጅም ዓመታት በዚያ አስደናቂ የፍቅር የቅርብ ኅብረት ከእርሱ ጋር ተሳስረው ነበር፤ በዚያም ኅብረት ክርስቶስን ማወቅን ተማሩ፤ ክርስቶስም አስተማራቸው፣ ገሠጻቸውም፤ በኋላም ለሚቀበሉት ነገር አዘጋጃቸው። አሁንም ሊሄድ ሲል እንዲህ ይላቸዋል፦ «እነሆም እኔ እስከ ዓለም ፍጻሜ ድረስ ሁልጊዜ ከእናንተ ጋር ነኝ።» ማቴዎስ 28:20።

እንዴት ያለ የተስፋ ቃል ነው! ክርስቶስ በታንኳው ውስጥ ከጴጥሮስ ጋር በእውነት እንደ ነበረ፣ ክርስቶስ ከዮሐንስ ጋር በማዕድ እንደ ተቀመጠ፣ እንዲሁ በእውነት ክርስቶስ ከእኔ ጋር ሊሆን ይችላል። እንዲያውም ከዚያ በበለጠ እውነት፤ እነርሱ ክርስቶስን ያገኙት በሥጋ ነበር፤ እርሱም ለእነርሱ ሰው፣ ከእነርሱ የተለየ አንድ ግለሰብ ነበረ፤ እኔ ግን የከበረውን ክርስቶስ በእግዚአብሔር ዙፋን ኃይል፣ ሁሉን የሚችለውን ክርስቶስ፣ በሁሉ ስፍራ የሚገኘውን ክርስቶስ ማግኘት እችላለሁ።

እንዴት ያለ የተስፋ ቃል ነው! ይህ እንዴት ሊሆን ይችላል? ብለህ ትጠይቀኛለህ። መልሴም ይህ ነው፦ ክርስቶስ አምላክ ስለ ሆነ፣ ክርስቶስም ሰው ከሆነ በኋላ ወደ ዙፋኑና ወደ እግዚአብሔር ሕይወት ስለ ወጣ ነው። አሁንም ያ አፍቃሪና የተወጋ ልብ ያለው ቡሩክ ክርስቶስ ኢየሱስ፤ በምድር ላይ የኖረው ያ ቡሩክ ኢየሱስ ክርስቶስ፤ ወደ እግዚአብሔር ክብር የከበረው ያው ክርስቶስ፣ በእኔ ውስጥ ሊኖርና ዘመኔን ሁሉ ከእኔ ጋር ሊሆን ይችላል።

«በንግድ ሥራ ለተጠመደ ሰው፣ በትልቅና አስቸጋሪ ቤተሰብ መካከል ላለች ሴት፣ በጭንቀት ለተሞላ ድሀ ሰው ይህ በእርግጥ ይቻላልን? ይቻላልን? ሁልጊዜ ስለ ኢየሱስ እያሰብሁ መኖር እችላለሁን?» ትላለህ። እግዚአብሔር ይመስገን፣ ሁልጊዜ ስለ እርሱ ማሰብ አያስፈልግህም። የባንክ ሥራ አስኪያጅ ልትሆን ትችላለህ፤ የምትሠራውንም ሥራ ለመፈጸም ሙሉ ትኩረትህ ሊያስፈልግ ይችላል።

ነገር ግን እግዚአብሔር ይመስገን፤ እኔ ስለ ሥራዬ ማሰብ ሲገባኝ ኢየሱስ ስለ እኔ ያስባል፤ ገብቶም ኃላፊነቴን ይወስዳል።

ያ የሦስት ወር ሕፃን በእናቱ እቅፍ ተኝቶ ያለ ረዳት በዚያ ይተኛል፤ እናቱን በቅጡ አያውቃትም፣ ስለ እርስዋም አያስብም፤ እናቲቱ ግን ስለ ልጁ ታስባለች። ይህም የፍቅር ቡሩክ ምስጢር ነው፤ አምላክና ሰው የሆነው ኢየሱስ በፍቅሩ ታላቅነት ወደ እኔ ሊገባ ይጠብቃል፤ ልቤንም በያዘ ጊዜ በእነዚያ መለኮታዊ ክንዶቹ ያቅፈኛል፤ እንዲህም ይለኛል፦ «ልጄ ሆይ፣ እኔ ታማኙ፣ እኔ ኃያሉ ከአንተ ጋር እኖራለሁ፤ እከታተልሃለሁ፤ በዘመንህም ሁሉ እጠብቅሃለሁ።»

ደስተኛ ክርስቲያን፣ ቅዱስ ክርስቲያንና ጠቃሚ ክርስቲያን እሆን ዘንድ ወደ ልቤ እንደሚገባ ይነግረኛል። አንተም እንዲህ ትላለህ፦ ኦ! ይህን ማመን ብችል! ክርስቶስ ሁልጊዜ፣ በየሰዓቱና በየቅጽበቱ ከእኔ ጋር ሆኖ ኃላፊነቴን ወስዶ ሲጠብቀኝ ማግኘት እንደሚቻል ማሰብ ብችል!

ወንድሜ ሆይ፥ እኅቴ ሆይ፥ ለአንተ ያለኝ መልእክት ቃል በቃል ይህ ነው። ኢየሱስ ለደቀ መዛሙርቱ «ሁልጊዜ ከእናንተ ጋር ነኝ» ባለ ጊዜ፣ በመለኮታዊው በሁሉ ስፍራ የመገኘት ሙላት፣ በመለኮታዊው ፍቅር ሙላት ማለቱ ነበር፤ ዛሬ ማታም ራሱን ለአንተ ሊገልጥ ይናፍቃል።

አሁንም ለአንድ አፍታ አስብ፤ የኢየሱስ መገኘት ሁልጊዜ የሚኖርበት ሕይወት እንዴት ያለ ቡሩክ ሕይወት ይሆናል! የሰላምና የደስታ ምስጢር ይህ አይደለምን? በየቀኑና ቀኑን ሙሉ ኢየሱስ ሲከታተለኝና ሁልጊዜ ሲጠብቀኝ ወደሚሰማኝ ወደዚያ ቡሩክ ሁኔታ መድረስ ብችል (ልብ ሁሉ የሚለው ይህ ነው)፣ ኦ፣ «እርሱ የሚያስብልኝ ከሆነ ምንም ጭንቀት የለብኝም፤ እርሱ የሚያቀርብልኝ ከሆነ ምንም ፍርሃት የለብኝም» በሚለው አሳብ እንዴት ያለ ሰላም ይኖረኛል! ልብህ ይህ እውነት ለመሆን እጅግ መልካም ነው፣ ለአንተ ለመሆንም እጅግ ክቡር ነው ይላል። ቢሆንም እጅግ ቡሩክ መሆን እንዳለበት ትቀበላለህ።

አንተ የምትፈራ፣ አንተ የምትስት፣ አንተ የምትጨነቅ ሆይ፣ የእግዚአብሔርን የተስፋ ቃል አመጣልሃለሁ፤ ለእኔም ለአንተም ነው። ኢየሱስ ያደርገዋል፤ እንደ አምላክነቱ ይችላል፤ ኢየሱስም እንደ ተሰቀለው በፍጹም ሰላም ሊጠብቅህ ፈቃደኛ ነው፣ ይናፍቃልም። ይህ አስደናቂ እውነት ነው፤ ሊነገር የማይቻል የደስታም ምስጢር ነው። ይህም ደግሞ የቅድስና ምስጢር ነው።

በውስጥ በሚኖር ኃጢአት ፈንታ፣ በውስጥ የሚኖር ክርስቶስ ኃጢአትን ሲያሸንፍ፤ በውስጥ በሚኖር ኃጢአት ፈንታ፣ የቡሩኩ የእግዚአብሔር ልጅ ሕይወትና ብርሃን ፍቅርም በውስጥ ሲኖር። እርሱ የቅድስና ምስጢር ነው። «ከእግዚአብሔር ጥበብና ጽድቅ ቅድስናም የሆነልን ክርስቶስ ኢየሱስ» 1ኛ ቆሮንቶስ 1:30። ቅድስና የሆነልን ክርስቶስ ራሱ መሆኑን አስታውስ። ክርስቶስ ወደ እኔ ገብቶ መላ ማንነቴን፣ ተፈጥሮዬንና አሳቤን፣ ስሜቴንና ፈቃዴን ሲይዝ፣ ሁሉንም ሲገዛ። ቅዱስ የሚያደርገኝ ይህ ነው። ስለ ቅድስና እንናገራለን፤ ግን ቅድስና ምን እንደ ሆነ ታውቃለህን? ያለህ ቅድስና ከክርስቶስ ባለህ መጠን ልክ ነው፤ «የሚቀድሰውም የሚቀደሱትም ሁሉም ከአንድ ናቸውና።» (ዕብራውያን 2:11) ተብሎ ተጽፎአልና፤ ክርስቶስም የእግዚአብሔርን ሕይወት ወደ እኔ በማምጣት ይቀድሳል።

በመሳፍንት 6:34 «የእግዚአብሔር መንፈስ ጌዴዎንን ለበሰው» ብለን እናነባለን። ነገር ግን በአዲስ ኪዳን ውስጥ እንዲሁ አስደናቂ የሆነ ጥቅስ እንዳለ ታውቃለህ፤ በዚያም «ጌታን ኢየሱስ ክርስቶስን ልበሱት» (ሮሜ 13:14) ብለን እናነባለን፤ ይህም ክርስቶስ ኢየሱስን ልበስ ማለት ነው። ይህስ ምን ማለት ነው? ከእኔ ውጭ በሆነ የጽድቅ መቆጠር ብቻ ማለት አይደለም፤ ነገር ግን የሕያው ክርስቶስን ሕያው ባሕርይ፣ የሕያው ክርስቶስን ሕያው ፍቅር መልበስ ማለት ነው። ጌታ ኢየሱስን ልበስ።

ኦ! ይህ እንዴት ይሆናል? የምለብሰው እርሱ መላ ማንነቴን እንደሚሸፍን ልብስ መሆኑን ካላመንሁና ካላስተዋልሁ ይህን ማድረግ አልችልም። «እነሆ፥ ሁልጊዜ ከእናንተ ጋር ነኝ» ያለውን ሕያው ክርስቶስን መልበስ አለብኝ። ማቴዎስ 28:20።

ክርስቶስ ሊያለብስህ የሚወደውን የዚያን የብርሃን መጎናጸፊያ እጥፋቶች ወደ ራስህ አጥብቀህ ሳብ።

ብቻ ና፣ ክርስቶስ ከአንተ ጋር፣ በላይህና በውስጥህ እንዳለ እወቅ። ኦ፣ ልበሰው! የእርሱን ባሕርያት አንዱን ከሌላው በኋላ ስትመለከት፣ «በክርስቶስ ኢየሱስ የነበረ ይህ አሳብ በእናንተ ዘንድ ደግሞ ይሁን» (ፊልጵስዩስ 2:5) የሚለውን የእግዚአብሔርን ቃል ስትሰማ፣ ቃሉም እርሱ እስከ ሞት ድረስ የታዘዘ እንደ ነበረ ሲነግርህ፣ አንተም እንዲህ ብለህ ትመልሳለህ፦ የታዘዘው ክርስቶስ፣ ሕይወቱ ሁሉ መታዘዝ የነበረው ክርስቶስ፣ የተቀበልሁትና የለበስሁት ያ ክርስቶስ ነው። እርሱ ሕይወቴ ይሆናል፤ እንደ ኢየሱስም «አባቴ፥ ፈቃድህ ትሁን፤ ፈቃድህን ላደርግ መጥቼአለሁ» ብዬ በሹክሹክታ መናገርን እስክማር ድረስ መታዘዙ በእኔ ላይ ያርፋል። ዮሐንስ 6:38።

ይህም ደግሞ በምስክርነትና በሥራ የሚገኝ ተጽዕኖ ምስጢር ነው። መታዘዝ ለምን እንዲህ ከበደ? ለምንስ ብዙ ጊዜ ኃጢአት እሠራለሁ? ሰዎች «ኦ፣ ፈጽሞ የአንተ ለመሆን» ብለው ይዘምራሉ፤ ከልባቸውም ይዘምሩታል። ታዲያ እንዴት እንደ ገና የማይታዘዙ ይሆናሉ? አለመታዘዝ ከየት ይመጣል?

መልሱም ይኸው ነው። የራቀውን ክርስቶስ ለመታዘዝ ስለምሞክር ነው፤ ስለዚህም ትእዛዞቹ በኃይል አይመጡም። በእግዚአብሔር ቃል ውስጥ የማገኘውን ተመልከት። እግዚአብሔር ማንኛውንም ሰው ለአገልግሎቱ ሊልክ በፈለገ ጊዜ፣ አስቀድሞ ተገናኘው፣ ተነጋገረውም፤ ደጋግሞም አበረታታው። እግዚአብሔር ለአብርሃም ሰባት ወይም ስምንት ጊዜ ተገለጠለት፤ አንዱን ትእዛዝ ከሌላው በኋላ ሰጠው፤ እንዲህም አብርሃም ፍጹም አድርጎ ሊታዘዘው ተማረ። እግዚአብሔር ለኢያሱና ለጌዴዎን ተገለጠላቸው፤ እነርሱም ታዘዙ።

ታዲያ እኛ ለምን አንታዘዝም? ከኢየሱስ ጋር ያለን ይህ የቅርብ ኅብረት እጅግ ጥቂት ስለ ሆነ ነው።

የክርስቶስን መገኘት በየቀኑ፣ በየሰዓቱ፣ በየደቂቃው ከእኛ ጋር የማግኘትን ይህን ቡሩክ ሰማያዊ ምስጢር ብናውቅ፣ መታዘዝ እንዴት ያለ ደስታ በሆነ ነበር! «ጌታዬ ኢየሱስ ከእኔ ጋርና በዙሪያዬ ነው» በሚል በዚህ ንቃት እየተመላለስን ሳንታዘዘው ልንኖር አንችልም ነበር! ኦ፣ መናፈቅ ጀምረህ፦ የሚያስፈልገኝ ይህ ነው፣ ሁልጊዜ የሚኖረው የኢየሱስ መገኘት! አትልምን? ላለመታዘዝ የሚጠነቀቁ፣ ወደ እሁድና ወደ ሳምንቱ ቀናት ተግባራቸው በታላቅ ታማኝነት የሚመጡ፣ ለጸጋና ለበረከት የሚጸልዩ አንዳንድ ክርስቲያኖች አሉ፤ ነገር ግን በረከታቸውና ኃይላቸው ጥቂት እንደ ሆነ፣ ኃይላቸው እጅግ ጥቂት እንደ ሆነ ያማርራሉ! ለምን? በልባቸው ውስጥ ሕያው የሆነው ኢየሱስ በበቂ መጠን ስለሌለ ነው።

አንዳንድ ጊዜ ይህን ከሁሉ የላቀ ከባድ እውነት አድርጌ አስበዋለሁ። በአገልጋዮችና በሚናገሩ ሌሎች ሰዎች መካከል ታላቅ የስጦታ ልዩነት አለ፤ ነገር ግን ይህን አረጋግጣለሁ፦ የሰው ስጦታ የእውነተኛ ኃይሉ መለኪያ አይደለም። ይህንም አረጋግጣለሁ፦ አንተም እኔም ልናየው የማንችለውን እግዚአብሔር ያያል።

አንዳንድ ጊዜ ሰዎች ከዚህ ትንሽ ይሰማቸዋል፤ ነገር ግን አንድ ሰው እንደ ስሜት ወይም እንደ ምኞት ወይም እንደ አሳብ ሳይሆን በእውነት የኢየሱስን መንፈስና መገኘት በራሱ ላይ በያዘ መጠን፣ ከእርሱ የማይታይ ጸጥ ያለ ተጽዕኖ ይወጣል። ያ ስውር ተጽዕኖ የኢየሱስ ቅዱስ መገኘት ነው። «እነሆ፥ ሁልጊዜ ከእናንተ ጋር ነኝ።» ማቴዎስ 28:20። አሁንም የተናገርሁት ይህ ነገር እንዴት የሚወደድ፣ ለእርሱ መኖርስ እንዴት ቡሩክ እንደ ሆነ ለማመልከት ብቻ በቂ ከሆነ፣ በብዙ ሰዎች ልብ ለሚነሣው ጥያቄ አሁን መልስ ልስጥህ። አንድ ሰው እንዲህ ሲል እሰማለሁ፦ «ይህን ቡሩክ ዘወትር የሚኖር የኢየሱስ መገኘት እንዴት ላገኘው እችላለሁ? ካገኘሁትስ በኋላ ሁልጊዜ እንዴት ልጠብቀው እችላለሁ? ንገረኝ። ይህ ካለኝ ሁሉ ያለኝ ይመስለኛል።

ጌታ ኢየሱስ ወደ እኔ እጅግ ቀርቦአል። ሊያሰናክለኝ ከሚችል ነገር ሁሉ ፊቴን ለመመለስ ሞክሬአለሁ፤ ጌታዬም እጅግ ቅርብ ሆኖልኛል። ነገር ግን ሁልጊዜ ከእኔ ጋር እንደሚሆን እንዴት ላውቅ እችላለሁ?» ጌታን «ኦ፣ ቡሩክ ጌታዬ ክርስቶስ ሆይ፣ ምን ላድርግ? የማይጓደለውን መገኘትህን እንዴት ልደሰትበት እችላለሁ?» ብለህ ብትጠይቀው፣ የመጀመሪያው መልሱ «እመን ብቻ። ብዙ ጊዜ ተናግሬዋለሁ፤ አንተም በከፊል ብቻ ተረድተኸዋል፤ ነገር ግን እንደ ገና እለዋለሁ፦ ልጄ ሆይ፣ እመን ብቻ» የሚል ይሆናል። በእምነት ነው።

አንዳንድ ጊዜ ስለ እምነት እንደ መታመን እንናገራለን፤ እምነት መታመን እንደ ሆነ ለሰዎች መንገርም እጅግ የሚረዳ ነገር ነው፤ ነገር ግን ሰዎች አንዳንድ ጊዜ እንደሚሉት ከመታመን በቀር ሌላ ምንም አይደለም ቢሉ፣ ነገሩ እንደዚያ አይደለም። እምነት ከመታመን እጅግ የሰፋ ቃል ነው። የማይታየውን፣ የማይታየውን አምላክ ማወቅን የምማረውና እርሱን የማየው በእምነት ነው። እምነት የማይታየውንና ሰማያዊውን የማይበት መንፈሳዊ ዓይኔ ነው። ብዙ ጊዜ በእግዚአብሔር ለመታመን እጅግ ትጥራለህ፣ ትወድቃለህም። ለምን? አስቀድመህ እግዚአብሔርን ለማየት ጊዜ ስላልወሰድህ ነው። ሳትገናኘውና ሳታውቀው በእግዚአብሔር እንዴት ፈጽመህ ልትታመን ትችላለህ? «ከየት ልጀምር?» ብለህ ትጠይቃለህ። አስቀድመህ በማመን፣ በጸጥ ያለ የአምልኮ ሁኔታ በዚህ አምላክ ፊት ራስህን በማቅረብ፣ የታላቅነቱና የመገኘቱ ስሜት በአንተ ላይ እንዲመጣ በመለመን መጀመር አለብህ። ልብህ በቅዱስ መገኘቱ እንዲሸፈን ልትለምነው ይገባሃል። ሁሉን የሚችልና ሁሉን የሚወድ፣ ሊነገር በማይቻል ፍቅር የሚወድ አምላክ መገኘትን በልብህ ለመረዳት መፈለግ አለብህ።

ዓለምን የፈጠረው ያው ኃይል፣ ኢየሱስን ከሙታን ያስነሣው ያው ኃይል በዚህች ቅጽበት በልብህ ውስጥ እየሠራ እንደ ሆነ ይሰማህ ዘንድ፣ ሁሉን የሚችል አምላክ እንደ ሆነ ልታመልከው ጊዜ ውሰድ።

ስለማናምነው አንለማመደውም። ለማመን ጊዜ መውሰድ አለብን። ኢየሱስ እንዲህ ይላል፦ «ኦ፣ ልጄ ሆይ፣ ለዓለም ዓይንህን ጨፍን፤ እነዚህንም ስለ ሃይማኖት ያሉ አሳቦች ሁሉ ከልብህ አውጣ፤ በእግዚአብሔር ራሱም ማመን ጀምር።» የሃይማኖት መግለጫው የመጀመሪያ አንቀጽ ይህ ነው፦ «በእግዚአብሔር አምናለሁ።»

በማመን ይህን ክቡር አምላክ ለመቀበል ልቤን እከፍታለሁ፤ እሰግዳለሁ፣ አመልካለሁም። ከዚያም ይህን ሳምን ቀና ብዬ በዙፋኑ ላይ ያለውን በግ አያለሁ፤ የእግዚአብሔር ሁሉን የሚችል ኃይል መገኘቱን ለልቤ የመግለጥ ዓላማ ይዞ በኢየሱስ ውስጥ እንዳለ አምናለሁ። በዙፋኑ ላይ ለምን ሁለት ሆኑ? እግዚአብሔር ብቻውን አይበቃምን? የእግዚአብሔር በግ ለአንተና ለእኔ ጥቅም በዙፋኑ ላይ ነው፤ በዙፋኑ ላይ ያለው በግ እኔን ለመያዝ እንደ አምላክ ኃይል ያለው ክርስቶስ ራሱ ነው። ኦ፣ ያንን መረዳት ማግኘት አትችልም ብለህ አታስብ። ደግሞም አሁን ብቻ በእጅህ እንደሚገኝ አድርገህ አታስበው፤ ነገር ግን የእምነትን ልማድ አዳብር። «ኢየሱስ ሆይ፣ በክብርህ አምናለሁ፤ ሁሉን በመቻልህ አምናለሁ፤ በውስጤ በሚሠራው ኃይልህ አምናለሁ። በመለኮታዊ ኃይል ራሱን በሚገልጠው፣ ከእኔ ጋር ባለው ሕያውና አፍቃሪ መገኘትህ አምናለሁ።»

በስሜቶች ወይም በልምምዶች አትጠመድ። በቀላሉ ታምነህ «እርሱ ሁሉ ለእኔ እንደ ሆነ እርግጠኛ ነኝ» ማለት እጅግ ቀላልና የማይከብድ ሆኖ ታገኘዋለህ። ለጊዜው ራስህን አስወግድ፤ ስለ ራስህ አታስብ፣ አትናገርም፤ ነገር ግን ኢየሱስ ምን እንደ ሆነ አስብ። ከዚያም ሁልጊዜ ማመን እንዳለብህ አስታውስ። አንዳንድ ጊዜ እግዚአብሔር ሕዝቡ ከጠዋት እስከ ማታ እንዲያምኑ ምን ያህል እንደሚፈልግ ለመናገር ቃል ያጣሁ ይመስለኛል። እያንዳንዱ እስትንፋስ ማመን ብቻ ሊሆን ይገባዋል። አዎን፣ በእውነት እውነት ነው፤ ጌታ ኢየሱስ ከጠዋት እስከ ማታ ማመን ብቻ እንድንሆን ይወዳል፤ አንተም ይህን በሕይወትህ ዋና ነገር ማድረግ መጀመር አለብህ።

ጠዋት ስትነቃ ልብህ በዚህ ነገር በታላቅ እምነት ይውጣ፤ በሌሊት ሰዓታትም ይህ አሳብ ከአንተ ጋር ይሁን፦ አዳኜ ኢየሱስ በዙሪያዬና በአጠገቤ ነው፤ ቀና ብለህም «ሁልጊዜ በአንተ ልታመን እፈልጋለሁ» ማለት ትችላለህ። መታመን ምን እንደ ሆነ ታውቃለህ። መታመን እጅግ ጣፋጭ ነው። አሁንስ በኢየሱስ፣ በዚህ መገኘት፣ በዚህ በሚጠብቅ መገኘት ልትታመን አትችልምን? በሰማይ ስለ አንተ ይኖራል። በደሙ ምልክት ተደርጎብሃል፤ ይወድሃልም፤ «ንጉሤ፣ ንጉሤ፣ እርሱ ዘመኔን ሁሉ ከእኔ ጋር ነው» ማለት አትችልምን? ኦ፣ የራሱን የተስፋ ቃሎች እንዲፈጽም በኢየሱስ ታመን። እያመንን ወደ እርሱ መጥተን «ቡሩክ መምህሬ ሆይ፣ ሌላ ነገር አለን?» ብንለው ክርስቶስ የሚሰጠው ሁለተኛ መልስ ያለ ይመስለኛል። መልሱን የምሰማ ይመስለኛል፦ «ልጄ ሆይ፣ ሁልጊዜ ታዘዝ።»

በዚህ አንድ ቃል ውስጥ ያለውን ትምህርት ማስተዋልን አትሳት። ታዘዝ የሚለውን ቃልና መታዘዝን በግልጽ ይዛችሁ ለራሳችሁ እንዲህ ማለትን ተማሩ፦ «አሁን መታዘዝ አለብኝ፤ በእግዚአብሔርም ጸጋ በሁሉ ነገር ልታዘዝ ቆርጫለሁ።»

በቅርቡ በኬፕ በተደረገው ኤግዚቢሽናችን፣ ጠቅላይ ሚኒስትራችን ሚስተር ሮድስ የመግቢያውን ክፍያ በኪሱ የያዘ መስሎት ወደ በሩ ሄደ። ወደ በሩ በደረሰ ጊዜ ግን በቂ ገንዘብ እንዳልያዘ አወቀ፤ በር ጠባቂውንም «እኔ ሚስተር ሮድስ ነኝ፤ አስገባኝ፤ እኔ ኃላፊነቱን እወስዳለሁ፤ አንተ አትጎዳም» አለው። ሰውየው ግን «ጌታዬ፣ ምንም ማድረግ አልችልም፤ ትእዛዝ ተሰጥቶኛል» አለ፤ ሚስተር ሮድስንም ሊያስገባው እምቢ አለ። ሚስተር ሮድስ ከአንድ ወዳጁ ተበድሮ ከከፈለ በኋላ ነበር በሩን ማለፍ የቻለው። በኋላም በራት ግብዣ ላይ ሚስተር ሮድስ ስለዚህ ተናግሮ አንድ ሰው እንደዚያ ትእዛዙን አጥብቆ ሲይዝ ማየት እውነተኛ ደስታ እንደ ሆነ ገለጸ። ነገሩ ይኸው ነው። ሰውየው ትእዛዝ ነበረው፤ ያም ለእርሱ በቂ ነበር፤ ወደ በሩ የመጣ ሁሉ ከመግባቱ በፊት ክፍያውን መክፈል ነበረበት። የእግዚአብሔር ልጆች እንደ ወታደሮች ሊሆኑና «መታዘዝ አለብኝ» ለማለት ዝግጁ ሊሆኑ ይገባቸዋል።

ኦ! ይህን አሳብ በልባችን መያዝ፦ «ኢየሱስ ሆይ፣ አንተን መታዘዝ እወዳለሁ።» ከአዳኙ ጋር የግል የቅርብ ኅብረት ሊኖር ይገባል፤ ከዚያም የግል አገልግሎትና የታማኝነት ደስታ ይመጣል። በድካምና በደካማነት፣ በፍርሃትም ሁሉ ለመታዘዝ ዝግጁ ነህን? «አዎን፣ ጌታ ኢየሱስ ሆይ፣ እታዘዛለሁ» ማለት ትችላለህን? እንደዚያ ከሆነ ራስህን ፈጽመህ ስጥ። ከዚያም ስሜትህ እንዲህ ይሆናል፦ «ኢየሱስ ሊሰማው አይወድም ብዬ የማስበውን አንድ ቃል አልናገርም። የራሴ የሆነ አመለካከት አይኖረኝም፤ ነገር ግን ሕይወቴ ሁሉ ለአብ በነበረው የመታዘዙ ንጽሕናና ለእኔ ባለው ራሱን በሚሠዋ ፍቅሩ ሊሸፈን ነው። ክርስቶስ ሕይወቴን ሁሉ፣ ልቤን ሁሉ፣ ባሕርዬን ሁሉ እንዲይዝ እፈልጋለሁ። ክርስቶስን መምሰልና መታዘዝ እፈልጋለሁ።» ራስህን ለዚህ አፍቃሪ መታዘዝ ስጥ።

ሦስተኛው አሳብ ይህ ነው፦ «መምህሬ፣ ቡሩክ አዳኝ ሆይ፣ ሁሉን ንገረኝ፤ አምናለሁ፣ እታዘዛለሁ፣ ወደፊትም እታዘዛለሁ። ዘወትር በሚኖረው መገኘትህ ለመደሰት የሚያስፈልገኝ ሌላ ነገር አለን?» ብል፣ ይህን መልስ እሰማለሁ፦ «ልጄ ሆይ፣ በየቀኑ ከእኔ ጋር የቅርብ ኅብረት ይኑርህ።»

አሃ፣ ለመታዘዝና ለማመን የሚሞክሩ የብዙዎች ስሕተት ይህ ነው፤ በራሳቸው ብርታት ያደርጉታል፤ ጌታ ኢየሱስ በልባቸው ሊነግሥ ከሆነ በየቀኑ ከእርሱ ጋር የቅርብ ኅብረት ሊኖራቸው እንደሚገባ አያውቁም። እርሱ የሚፈልገውን ሁሉ ማድረግ አትችልም፤ ኢየሱስ ግን ያደርግልሃል።

በዚህ የሚወድቁ ብዙ ክርስቲያኖች አሉ፤ በዚህም ምክንያት ከኢየሱስ ጋር ኅብረት ማድረግ ምን እንደ ሆነ አያስተውሉም። ይህን በልብህ ላሳስብ ልሞክር፦ እግዚአብሔር አፍቃሪና ሕያው አዳኝ ሰጥቶሃል፤ ካልተገናኘኸውስ እንዴት ሊባርክህ ይችላል? የወዳጅነት ደስታ በቅርብ ኅብረት ውስጥ ይገኛል፤ ኢየሱስም በእኔ ላይ ተጽዕኖ ለማሳደር፣ ስለ ራሱ ሊነግረኝ፣ ሊያስተምረኝ፣ መንፈሱን እፍ ሊልብኝ፣ አዲስ ሕይወትና ደስታ ብርታትም ሊሰጠኝ ጊዜ ያገኝ ዘንድ ይህን በየቀኑ ይለምናል።

አስታውስም፤ ከኢየሱስ ጋር የቅርብ ኅብረት ማለት በጓዳህ ውስጥ ግማሽ ሰዓት ወይም አንድ ሰዓት ማለት አይደለም። አንድ ሰው መጽሐፍ ቅዱሱን ወይም ማብራሪያውን በጥንቃቄ ሊያጠና ይችላል፤ በምዕራፉ ውስጥ ያሉትን ተዛማጅ ክፍሎች ሁሉ ሊያመሳክር ይችላል፤ ከጓዳው ሲወጣም ስለ ጉዳዩ ሁሉ ሊነግርህ ይችል ይሆናል፤ ሆኖም በዚያ ጠዋት ኢየሱስን ፈጽሞ አልተገናኘውም። ለአምስት ወይም ለአሥር ደቂቃ ጸልየሃል፣ ኢየሱስን ግን ፈጽሞ አልተገናኘኸውም። ስለዚህ መጽሐፍ ቅዱስ እጅግ ክቡር፣ ማንበቡም እጅግ ቡሩክና አስፈላጊ ቢሆንም፣ ጸሎትና መጽሐፍ ቅዱስ ማንበብ ከኢየሱስ ጋር ኅብረት እንዳልሆኑ ልናስታውስ ይገባናል።

በየጠዋቱ የሚያስፈልገን ኢየሱስን መገናኘትና እንዲህ ማለት ነው፦ «ጌታ ሆይ፣ ቀኑ እንደ ገና ይኸው፤ እኔም በራሴ እንደ ቀድሞው ሁሉ ደካማ ነኝ፤ ና፣ በዚህች ጠዋት በራስህ መግበኝ፤ ለነፍሴም ተናገር።» ኦ፣ ወዳጆች ሆይ፣ ቆማችሁ እንድትኖሩ የሚያደርጋችሁ እምነታችሁ አይደለም፤ ነገር ግን በየቀኑ በኅብረት፣ በአምልኮና በፍቅር የምትገናኙት ሕያው ኢየሱስ ነው። ምንም ያህል ቀዝቃዛና እምነት የለሽ ቢሰማህ በፊቱ ጠብቅ። በፊቱ ጠብቀህ እንዲህ በል፦ «ጌታ ሆይ፣ ምንም ረዳት የሌለኝ ብሆን አምናለሁ፤ የሰጠኸኝን የተስፋ ቃል እንደምታደርግልኝ በዚህ ቡሩክ እርግጠኝነት አርፋለሁ።»

መምህሬን እንደ ገና እጠይቀዋለሁ፦ «ጌታ ኢየሱስ ሆይ፣ ይህ ብቻ ነውን?» መልሱም፦ «አይደለም፣ ልጄ ሆይ፤ አንድ ተጨማሪ ነገር አለኝ» የሚል ነው። «ምንድር ነው? እንዳምን፣ እንድታዘዝ፣ በአጠገብህም እንድኖር ነግረኸኛል፤ ከዚህ በላይ ምን ትፈልጋለህ?» «ልጄ ሆይ፣ ለእኔ ሥራ። አስታውስ፣ ለአገልግሎቴ ዋጅቼሃለሁ፤ በሰዎች ፊት እየመሰከርህልኝ ወደ ዓለም የሚወጣ ምስክር እንዲኖረኝ ዋጅቼሃለሁ።» ኦ፣ ሀብትህን አትሰውር፤ ኢየሱስ ከአንተ ጋር ከሆነ ልትሰውረው እንደምትችልም አታስብ።

ከሁለት ነገሮች አንዱ ይሆናል፦ ወይ ሁሉን መተው አለብህ፣ ወይ ደግሞ ወደ ውጭ መውጣት አለበት።

ከሚስተር ሙዲ ስብሰባዎች በአንዱ በኋላ ሁላችንም የምናውቃቸውን መዝሙሮች ስትዘምር ስለ ተገኘችው ትንሽ ልጅ ምናልባት ሰምተህ ይሆናል። የልጅቱ ወላጆች በማኅበረሰቡ ዘንድ ከፍ ያለ ቦታ የነበራቸው ሰዎች ነበሩ፤ እነዚያንም መዝሙሮች በእንግዳ መቀበያ ክፍል ውስጥ ስትዘምር እናትዋ ከለከለቻት። አንድ ቀን «ኦ፣ ኢየሱስ ስለሚወደኝ እጅግ ደስ ብሎኛል» የሚለውን መዝሙር ስትዘምር እናትዋ «ልጄ ሆይ፣ ከከለከልሁሽ በኋላ ይህን የምትዘምሪው እንዴት ነው?» አለቻት። እርስዋም «ኦ፣ እናቴ ሆይ፣ ልገታው አልችልም፤ በራሱ ይወጣል» ብላ መለሰች። ኢየሱስ ክርስቶስ በልብ ውስጥ ካለ ወደ ውጭ መውጣቱ አይቀርም።

አስታውስ፣ እርሱን መመስከር ግዴታችን ብቻ አይደለም፤ ግዴታችን ነው፣ ነገር ግን ከዚያ የበለጠ ነገር ነው።

ይህን ባታደርግ፣ ባሕርይህን፣ ስምህንና ሁለንተናህን ለኢየሱስ እንዳልሰጠህ የሚያመለክት ብቻ ነው። ለእርሱ ሳትሰጥ የምትይዘው ነገር አለ። ኢየሱስን በዓለም፣ በቤትህና በየትኛውም ስፍራ መመስከር አለብህ። የጌታን ትእዛዝ ታውቃለህ፦ «ወደ ዓለም ሁሉ ሂዱ ወንጌልንም ለፍጥረት ሁሉ ስበኩ።» «እነሆም እኔ ከእናንተ ጋር ነኝ»፤ ይህም «ማንም ለእኔ ሊሠራ ይችላል፤ እኔም ከእርሱ ጋር እሆናለሁ» ማለት ነው። ለአገልጋዩ፣ ለሚስዮናዊውና ለኢየሱስ ለሚሠራ ለእያንዳንዱ አማኝ ይህ እውነት ነው። የኢየሱስ መገኘት ለእርሱ ከሚሠራ ሥራ ጋር በቅርብ የተያያዘ ነው። «ይህን ከዚህ በፊት አስቤው አላውቅም። የእሁድ አገልግሎቴ አለኝ፤ በሳምንቱ ውስጥ ግን ለእርሱ ምንም ሥራ አልሠራም» ትላለህ።

ይህ ሁኔታ እንዲቀጥል እየፈቀድህ የኢየሱስ መገኘት ሊኖርህ አይችልም። ሳምንቱን ሙሉ የኢየሱስ መገኘት ኖሮህ ለእርሱ ምንም ሳታደርግ ልትኖር ትችላለህ ብዬ አላምንም፤ ስለዚህ ምክሬ ይህ ነው፦ ለሚገባው ለእርሱ ሥራ፤ በረከቱና መገኘቱ በሥራው ውስጥ ይገኛሉ። በዚህ በሚጠፋ ዓለም ውስጥ ለክርስቶስ መሥራት ቡሩክ መብት ነው። ኦ፣ ልባችን ብዙ ጊዜ እንዲህ ቀዝቅዞና ተዘግቶ የሚሰማው፣ ብዙዎቻችንም «ለክርስቶስ ሥራ እንደ ተጠራሁ አይሰማኝም» የምንለው ለምንድር ነው? ለጌታ አገልግሎት ራስህን ለመስጠት ፈቃደኛ ሁን፤ እርሱም ራሱን ይገልጥልሃል።

ክርስቶስ ከአስደናቂው የተስፋ ቃሉ ጋር ይመጣል፤ የሚናገረውንም ለአማኞች ሁሉ ይናገራል፦ «እነሆ፥ ሁልጊዜ ከእናንተ ጋር ነኝ፤ ይህ የተስፋ ቃሌ ነው፤ በኃይሌ ማድረግ የምችለው ይህ ነው፤ በታማኝነት ልፈጽመው ቃል የምገባው ይህ ነው፤ ትቀበለዋለህን? ‹ነፍስ ሆይ፣ ራሴን ለአንተ እሰጣለሁ።›» ወደ እርሱ ለመጡት ለእያንዳንዳቸው ክርስቶስ እንዲህ ይላል፦ «በየቀኑ በየሰዓቱ ፈጽሞና ሙሉ በሙሉ የአንተ ልሆን፣ በየቅጽበቱ ከአንተ ጋርና በአንተ ውስጥ ልሆን፣ ልባርክህና ልደግፍህ፣ በየቅጽበቱም የመገኘቴን ንቃት ልሰጥህ ራሴን ለአንተ እሰጣለሁ፤ ፈጽሞ፣ ፈጽሞ፣ ፈጽሞ የአንተ እሆናለሁ።» አሁንስ ሌላው ወገን ምንድር ነው? እርሱ እኔ ፈጽሞ የእርሱ እንድሆን ይፈልጋል። «ፈጽሞ ለእግዚአብሔር» የሚለውን አሁን መሪ ቃልህ አድርገህ ለመያዝ ዝግጁ ነህን?

እግዚአብሔር ሆይ፣ ከሕይወቴ እንድታበራ መገኘትህን በልቤ እፍ በል። «ፈጽሞ ለእግዚአብሔር»፣ ይህ መሪ ቃላችን ይሁን። ኑ፣ በእግሩ ፊት በግንባራችን እንደፋ። ከኒያሳላንድ የመጣው ሚስዮናዊያችን፣ የአገሩ ተወላጅ ክርስቲያኖች ወደ ኢየሱስ በሚመጡበት ጊዜ በጸሎት እንደማይቆሙ፣ እንደማይንበረከኩም፣ ነገር ግን ግንባራቸውን መሬት አስነክተው በምድር ላይ እንደሚደፉ፣ በዚያም ተደፍተው በታላቅ ድምፅ ወደ እግዚአብሔር እንደሚጮኹ ማየቱ ብዙ ጊዜ ልቡን እንደ ነካው ይናገራል።

አንዳንድ ጊዜ እኛም ራሳችን ይህን ብናደርግ ብዬ እመኛለሁ፤ ነገር ግን ማድረግ አያስፈልገንም። በመንፈስ እናድርገው፤ የዘላለሙ የእግዚአብሔር ልጅ ወደ ልባችን መጥቶአልና። ልትቀበለውና በዚያ ልትጠብቀው፣ ክብርን ልትሰጠውና እንደ ፈቃዱ እንዲያደርግ ልትፈቅድለት ነውን? አሁን ና፤ «በፍጹም ልቤ እፈልግሃለሁ፤ ፈጽሜ የአንተ ነኝ» በል።

ፈጽሞ እንዲይዝህ ራስህን ሙሉ በሙሉ ለእርሱ አሳልፈህ ስጥ። እርሱ ይይዝሃል፤ ይዞህም ይኖራል።

አሁን ና። ኢየሱስ በቅዱሳኑ አምልኮ ደስ ይለዋል። ኢየሱስ «እነሆም እኔ እስከ ዓለም ፍጻሜ ድረስ ሁልጊዜ ከእናንተ ጋር ነኝ» ማለቱን ብቻ ብናስታውስና ብናከብረው፣ ሕይወታችን ሁሉ አንድ ቀጣይ የአምልኮ ተግባርና የፍቅርና የደስታ ሥራ ሊሆን ይችላል። ማቴዎስ 28:20።