ምዕራፍ 6 · 5 ደቂቃ ንባብ · 6 ደቂቃ ማዳመጥ
የአንዲት ወጣት ልጃገረድ ጕዞ
መልአኩ ከጎበኛትና መልእክቱን ካመጣላት በኋላ የማርያም አእምሮ በብዙ አሳብ ተሞላ፤ ልብዋም ሞልቶ ነበር። ዕድሜዋ ከአሥራ ስድስት ዓመት ያልበለጠ፥ ምናልባትም አሥራ አምስት ብቻ የሆነ ወጣት ልጃገረድ ነበረች፤ ከዚህ በላይ ብትሆን ኖሮ ቀድሞ ታግብታ ነበርና። በዚያች አገር ሴቶች ልጆች ሁሉ ማለት ይቻላል አሥራ ስድስት ዓመት እንደ ሞላቸው ያገባሉ፤ ሳያገቡ የሚቀሩት እጅግ ጥቂቶች ናቸው።
ማርያም ስለ ተነገሩአት ስለነዚህ ድንቅ ነገሮች ሁሉ ከአንድ ሰው ጋር መነጋገር እንዳለባት ተሰማት። ልብዋን በሙሉ ልትከፍትላት የምትችለው እናትዋ ናት ብለን እናስብ ይሆናል፤ ነገር ግን እናትዋ በሕይወት እንደ ነበረች እርግጠኞች አይደለንም። ደግሞስ አንዲት ወጣት ልጃገረድ ለእናትዋ እንኳ ለመንገር የምታመነታውን የልብዋን ጥልቅ ነገር አንዳንድ ጊዜ ለምትወዳት አያትዋ ወይም ወዳጅዋ ለሆነች ለሌላ አሮጊት ልትነግር እንደምትችል እውነት አይደለምን?
አያትዋ ያልሆነች፥ ነገር ግን በዕድሜዋና በደግነትዋ አያት የምትመስል አንዲት ሴት ታሰበቻት። አሳብዋ በሩቅ በደቡብ ወደምትኖረው ወደ ኤልሳቤጥ ዞረ። ታውቃላችሁ፥ መልአኩ ኤልሳቤጥም ልጅ እንደምትወልድ ነግሮአት ነበር፤ ምናልባትም እርስዋ ከሌሎች ሴቶች ሁሉ ይልቅ የማርያምን ስሜት ልትረዳ ትችል ይሆናል።
ኤልሳቤጥ የማርያም ዘመድ ነበረች። በቅዱስ ሉቃስ ወንጌል የማርያም ዘመድ ተብላ ተጠርታለች፤ ምናልባት የቅርብ ሳይሆኑ የሩቅ ዘመዶች ነበሩ። ማርያም ኤልሳቤጥ ጥበበኛና ደግ እንደ ሆነች፥ እንደምትወዳትም፥ በዕድሜዋም ምክር ልትሰጣት እንደምትችል ታውቅ ነበር። ማርያም ኤልሳቤጥን ልትጎበኝና መልአኩ ስለ ነገራት ነገር ልብዋን ሙሉ በሙሉ ልትከፍትላት ቈረጠች። ከናዝሬት እስከ ኤልሳቤጥ ቤት ያለው ርቀት ረጅም ነበር፤ በቀጥታ መስመር ከሰማንያ ማይል በላይ ነበር፤ ነገር ግን ከገሊላ የሚመጡ መንገደኞች ከአገሩ ሰሜን ወደ ደቡብ ሲሄዱ ብዙ ጊዜ በሚከተሉት መንገድ ከዚያ እጅግ ይርቅ ነበር።
መልአኩ ከጎበኛት በኋላ ብዙም ሳይቆይ ማርያም ቤትዋን ትታ ወደ ደቡብ ጕዞዋን ጀመረች። አንዲት ወጣት ልጃገረድ ይህን የሚያህል ረጅም ጕዞ ብቻዋን ልታደርግ እንደማትችል የታወቀ ነው። ነገር ግን ከገሊላ ወደ ኢየሩሳሌም የሚሄዱ ሲራራ ነጋዴዎች ወይም የመንገደኞች ቡድኖች ሁልጊዜ ነበሩ፤ ማርያምም ከእነዚያ ቡድኖች ከአንዱ ጋር ትጓዝ ነበር። ወታደር በፈረስ፥ የጦር አለቃ በሠረገላው፥ ዓረብም በግመሉ ይሄዱ ነበር፤ ነገር ግን በዚያ ዘመን አብዛኞቹ ሰዎች በረጅም ጕዞም እንኳ በእግር ይሄዱ ነበር። ሴት ግን አይሁድ ለጕዞ አብልጠው በሚመርጡት በአህያ ላይ ትቀመጥ ነበር።
ማርያም በየዓመቱ በዚያች ከተማ ከሚከበሩት ታላላቅ በዓላት አንዱን ለማክበር ወደ ኢየሩሳሌም ከሚጓዙ ሲራራ ነጋዴዎች ወይም ቡድን ጋር ልብዋ እየመታ በናዝሬት ያለውን ቤትዋን ትታ ስትሄድ ልናስባት እንችላለን። ከሁሉ የቀረበው መንገዳቸው በተራሮች ላይ ነበር፤ ነገር ግን ሻካራና ድንጋያማ ነበር፤ ከሞላ ጎደል መንገዱ ሁሉ አንዱን ተራራ መውጣት፥ ሌላውን መውረድ፥ ሦስተኛውንም መዞር ነበር። ከዚህም በላይ ይህ መንገድ በገሊላና በይሁዳ መካከል ባለው በሳምራውያን አገር ያሳልፋቸው ነበር፤ በአይሁድና በሳምራውያን መካከል የነበረው ጥላቻም ብርቱ ስለ ነበር የአይሁድ ቡድን በአገራቸው ማለፍ ደኅንነት የለውም ማለት ይቻላል። ትልቅ ቡድን ሌሊት በአንድ የእንግዶች ማረፊያ ማደር ያስፈልገው ነበር፤ ሳምራውያንም ወደ ኢየሩሳሌም ለሚሄዱት ብዙ ጊዜ ማረፊያዎቻቸውን ይዘጉባቸው ነበር።
ከናዝሬት የሚጓዙበት መስመር በመንደራቸው ደቡብ ያለውን ገደላማ ኮረብታ አልፎ፥ ብዙ ሰው የሄደበትን መንገድ ተከትሎ ወደ ምሥራቅ እስከ ዮርዳኖስ ወንዝ መውረድ ነበር። በዚያም ሮማውያን የሠሩትን፥ በሁለቱም ወገን ተራሮች ያሉበትን፥ በዮርዳኖስ ሸለቆ ቀጥ ብሎ የሚወርድ እጅግ ጥሩ መንገድ ያገኛሉ። ይህን መንገድ ስድሳ ማይል ያህል ተከትለው ኢያሪኮ ይደርሳሉ። በዚያ ለጥቂት ቀናት ያርፉ ይሆናል፤ ከዚያም ተራሮቹን አቋርጦ ወደ ኢየሩሳሌም የሚወጣውን ዳገታማ መንገድ ይወጣሉ። ይህ የኢያሪኮ መንገድ የወንበዴዎች መደበቂያ ነበር፤ ማንም ብቻውን በእርሱ መጓዝ ፈጽሞ ደኅንነት አልነበረውም። ነገር ግን ብዙ ወንዶች ባሉበት በትልቅ ቡድን፥ ብዙ ጊዜም ከወታደሮች ጠባቂ ጋር ሲሄዱ መንገደኞቹ መፍራት አያስፈልጋቸውም ነበር። ከናዝሬት ከወጡ በኋላ በአንድ ሳምንት ወይም በአሥር ቀን በቀላሉ ኢየሩሳሌም ይደርሳሉ፤ ቢቸኩሉም ጕዞውን በአምስት ቀን ሊጨርሱ ይችላሉ።
በኢየሩሳሌም ማርያም ከአንዲት ወዳጅዋ ዘንድ ታርፍ ይሆናል። በአገሩ ያሉ ቤተሰቦች ሁሉ በየዓመቱ ሦስት ጊዜ የሚከበሩትን ታላላቅ በዓላት ሲያከብሩ የሚያርፉባቸው ወዳጆች በኢየሩሳሌም ነበሩአቸው፤ የኢየሩሳሌም ነዋሪዎችም ዓመት በዓመት ቤቶቻቸውን ለእነዚያው ቤተሰቦች ይከፍቱ ነበር። ከበዓሉ በኋላ ማርያም ወደ ኬብሮንና በአጠገቧ ወዳሉት መንደሮች የሚመለስ ሌላ የመንገደኞች ቡድን አግኝታ፥ የቀረውን ሀያ ማይል ያህል ጕዞዋን ከዚህ ቡድን ጋር ትጓዝ ይሆናል። የማርያም ጕዞ ከናዝሬት እስከ ኬብሮን በአጠቃላይ መቶ ሀያ ማይል የሚጠጋ ነበር። በመንገዱ ሁሉ ብዙ ሰዎች አብረዋት ቢሆኑም በመንፈስ ብቻዋን ነበረች፤ አእምሮዋንና ልብዋን ስለ ከበዱት ታላላቅ አሳቦች ለማንም መናገር አልቻለችምና።
በመጨረሻ ረጅሙ ጕዞዋ ተፈጸመ። በዘካርያስ ቤት ደጅ ቆመች፤ ወዲያውም በኤልሳቤጥ እቅፍ ውስጥ ገባች። እግዚአብሔር በሆነ ድንቅ መንገድ በማርያም ላይ የሆነውን ሁሉ ለኤልሳቤጥ አሳውቆአት ነበር። በታላቅ ድምፅም እንዲህ አለች፦
«አንቺ ከሴቶች መካከል የተባረክሽ፥ እጅግ የተባረክሽ ነሽ! ከአንቺ የሚወለደው ልጅም በሰዎች መካከል የተባረከ ይሆናል! የጌታዬ እናት ወደ ቤቴ ስትመጣ ዛሬ የተሰጠኝ ክብር በእውነት ታላቅ ነው! የመልአኩን ቃል ያመነች ብፅዕት ናት፤ ያ ቃል በእርግጥ ይፈጸማልና!»
በዚያን ጊዜ ለረጅም ጊዜ ታፍኖ የቆየው የማርያም ስሜት በዝማሬ ፈነዳ። የዚህች ወጣት ሴት ነፍስ ንጹሕ፥ ርኅሩኅና ለእግዚአብሔር ያደረች ብቻ ሳትሆን አሳቡ በቅኔ የሚቀረጽ የባለ ቅኔ ነፍስ ነበረች። ማርያም የታወቀ መዝሙር ተናገረች፥ ዘመረችም። አንድ ሰው ጻፈው፤ ወንጌሉን የጻፈው ቅዱስ ሉቃስም ቅጂውን አግኝቶ ለዓለም ሰጠው። ሰው ሁሉ ሊያነበው ይገባል። እዚህ እናቀርበዋለን።
የማርያም መዝሙር
ነፍሴ ጌታን ታከብረዋለች፥
መንፈሴም በአምላኬ በመድኃኒቴ ሐሴት ታደርጋለች፤
የባሪያይቱን ውርደት ተመልክቶአልና።
እነሆም፥ ከዛሬ ጀምሮ ትውልድ ሁሉ ብፅዕት ይሉኛል፤
ብርቱ የሆነ እርሱ በእኔ ታላቅ ሥራ አድርጎአልና፤
ስሙም ቅዱስ ነው።
ምሕረቱም ለሚፈሩት
እስከ ትውልድና ትውልድ ይኖራል።
በክንዱ ኃይል አድርጎአል፤
ትዕቢተኞችን በልባቸው አሳብ በትኖአል፤
ገዥዎችን ከዙፋናቸው አዋርዶአል፤
ትሑታንንም ከፍ አድርጎአል፤
የተራቡትን በበጎ ነገር አጥግቦአል፤
ባለ ጠጎችንም ባዶአቸውን ሰዶአቸዋል።
እስራኤልን ብላቴናውን ረድቶአል፤
ምሕረቱን ያስብ ዘንድ፥
ለአባቶቻችን እንደ ተናገረ፥
ለአብርሃምና ለዘሩ ለዘላለም።
ማርያም በዚያ ጸጥ ባለ ቤት ከኤልሳቤጥ ጋር ሦስት ወር ተቀመጠች፤ ሁለቱም በቅርቡ እናቶች የሚሆኑት አሮጊቲቱና ወጣቲቱ ሴት ዕለት ዕለት አብረው ይጫወቱ ነበር። ምናልባት በዚህ ጊዜ ሰዎች ወደ ኢየሩሳሌም ወደ ሌላ በዓል ይሄዱ ነበር፤ ማርያምም ወደ ገሊላ የሚመለሱ የተሳላሚዎች ቡድን እንደ ገና አገኘች፤ ይህ ለአምልኮ ወደ ኢየሩሳሌም ለሚሄዱ ሰዎች የሚሰጥ ስም ነበርና። በኤልሳቤጥ ዘንድ ባደረገችው ጉብኝት በመንፈስ ተጽናንታና በርትታ ወደ ቤትዋ ተመለሰች።
ማርያም ኤልሳቤጥን ስትጎበኝ ሳለ ወይም ወደ ቤትዋ ከተመለሰች በኋላ ብዙም ሳይቆይ የታጨላት ባልዋ ዮሴፍ ሊያገባት ይገባው እንደ ሆነ በልቡ መጠራጠር ጀመረ። በፊትዋ ላይ እንግዳ ገጽታ ነበረ፤ ለእርሱ ልትነግረው የማትችለው አሳብ በአእምሮዋ እንዳለ አየ። እጅግ ይወዳት ነበር፤ አብረው ደስተኞች ይሆኑ እንደ ሆነ ራሱን በኀዘን ጠየቀ።
ነገር ግን አንድ ሌሊት ዮሴፍ ተኝቶ ሳለ ሕልም አየ። በሕልሙም አንድ መልአክ በአጠገቡ ቆሞ አየ። መልአኩም እንዲህ አለው፦
«የዳዊት ልጅ ዮሴፍ ሆይ፥ ማርያምን ሚስትህ አድርገህ ለመውሰድ አትፍራ። ወንድ ልጅ ትወልዳለች፤ ሕዝቡን ከኃጢአታቸው የሚያድናቸው እርሱ ነውና ስሙን ኢየሱስ ትለዋለህ።»
ኢየሱስ የሚለው ቃል በዚያ ሕዝብ ቋንቋ «መድኃኒት» ማለት ነው፤ ኢየሱስ ኃጢአታችንን ሊያስወግድ ስለ መጣ ብዙ ጊዜ «መድኃኒታችን» ተብሎ ይጠራል።
ከዚህ መልእክት በኋላ ዮሴፍ ከእንግዲህ አላመነታም። መልአኩ እንዳዘዘው አደረገ። ማርያምን አገባ፤ የአናጢነት ሙያውን ይሠራበት የነበረው ሱቅ ወዳለበት ወደ ራሱ ቤትም ወሰዳት።