ምዕራፍ 103 · 4 ደቂቃ ንባብ · 5 ደቂቃ ማዳመጥ
በባሕሩ ዳር የተደረገው ቍርስ
ኢየሱስ ከመሞቱ በፊት በነበረው ሌሊት፥ በእራት ላይ ለዐሥራ ሁለቱ ደቀ መዛሙርት «ከሙታን ከተነሣሁ በኋላ ወደ ገሊላ እቀድማችኋለሁ» ብሏቸው ነበር። ከመቃብሩም ከተነሣ በኋላ ሴቶቹን «ሂዱና በገሊላ ባለው ተራራ ላይ እንደማገኛቸው ለደቀ መዛሙርቴ ንገሩ» አላቸው። ይህ ተራራ በገሊላ ባሕር አጠገብ ያለው ቁርን ሐጢን ነበር፤ በዚያም ባለፈው ዓመት ታላቁን «የተራራውን ስብከት» ሰብኮ ነበር።
ኢየሱስ በዚህ በገሊላ ተራራ ላይ ለሚያምኑበት ሁሉ ራሱን እንደሚገልጥ የተነገረው ቃል የኢየሱስን ተከታዮች ከአገሩ ሁሉ ወደ ገሊላና ወደዚህ ተራራ እንዲሄዱ አደረጋቸው። በዚያ ስፍራ አጠገብም ኢየሱስን ሳያዩ ለአያሌ ቀናት ጠበቁ።
አንድ ቀን ጠዋት ከኢየሱስ ዐሥራ አንዱ ደቀ መዛሙርት ሰባቱ በገሊላ ባሕር ዳር ነበሩ። እነዚህ ሰባት ሰዎች ስምዖን ጴጥሮስ፥ ያዕቆብና ዮሐንስ፥ ቶማስ፥ ናትናኤል (እርሱም «የቶልማይ ልጅ» ማለት የሆነው በርተሎሜዎስ ተብሎ ይጠራ ነበር)፥ እንዲሁም ስማቸው ያልተነገረ ሌሎች ሁለት ደቀ መዛሙርት ነበሩ።
በባሕሩ ዳር ቆመው ሳሉ ጴጥሮስ የቀድሞውን የዓሣ አጥማጅነት ሥራውን ናፈቀና ሌሎቹን እንዲህ አላቸው፦
«ዓሣ ላጠምድ እሄዳለሁ።»
ኢየሱስ እስኪመጣ ድረስ ሲጠብቁ ጥቂት ሥራ ቢሠሩ መልካም እንደ ሆነ አሰበ። ሌሎቹ ስድስቱ ሰዎችም፦
«እኛም ከአንተ ጋር እንሄዳለን» አሉ።
በታንኳው ወጡ፥ ሌሊቱንም ሁሉ ሲያጠምዱ አደሩ፤ ነገር ግን ምንም አልያዙም። በማግሥቱ ጠዋት ገና ሲነጋ አንድ ሰው በባሕሩ ዳር ቆሞ አዩ።
ያ ሰው «ልጆች ሆይ፥ አንዳች ያዛችሁን?» ብሎ ጠራቸው።
«የለም» ብለው መለሱለት።
እንግዳውም «መረቡን በታንኳው በስተ ቀኝ በኩል ጣሉት፤ ዓሣም ታገኛላችሁ» አለ።
ሰውየው እንዳላቸው መረቡን ጣሉ፤ ወዲያውም በትልልቅ ዓሣ ተሞላ፤ እጅግ ከመሙላቱ የተነሣ መጀመሪያ ሊጎትቱት አልቻሉም። ያን ጊዜ ኢየሱስ ይወደው የነበረው ደቀ መዝሙር ዮሐንስ ጴጥሮስን እንዲህ አለው፦
«ጌታችን ነው!»
ስምዖን ጴጥሮስ በባሕሩ ዳር ያለው ሰው ጌታ ኢየሱስ መሆኑን በሰማ ጊዜ ልብሱን ለበሰ፤ ሲሠራ አውልቆት ነበርና። ወደ ዳር ለመዋኘትም ወደ ውኃው ዘለለ። ሌሎቹ ደቀ መዛሙርት በዓሣ የተሞላውን መረብ እየጎተቱ በትንሽ ታንኳ ወደ ዳር መጡ፤ ከምድሩ የራቁት መቶ ያርድ ያህል ብቻ ነበርና።
ወደ ዳርም በወጡ ጊዜ የፍም እሳት ሲነድ፥ በላዩም ዓሣ ሲበስል፥ በአጠገቡም እንጀራ አዩ። ኢየሱስም፦
«ካጠመዳችሁት ዓሣ አምጡ» አለ።
ጴጥሮስ ወደ ታንኳው ሄዶ በትልልቅ ዓሣ የተሞላውን መረብ ወደ ምድር ጎተተው። በኋላም ቈጠሩት፤ መቶ ሃምሳ ሦስት ሆነው አገኙት፤ ይህን ያህል ብዙ ቢሆኑም መረቡ የትም አልተቀደደም ነበር። ኢየሱስም፦
«ኑ ቍርስ ብሉ» አላቸው።
በእሳቱ አጠገብ በባሕሩ ዳር ተቀመጡ፤ ኢየሱስም እንጀራውን፥ የተጠበሰውንም ዓሣ አዞረላቸው። ኢየሱስ ከሙታን ከተነሣ በኋላ ለደቀ መዛሙርቱ ሲገለጥ ይህ ሦስተኛ ጊዜው ነበር፤ ቀደም ብሎ በኢየሩሳሌም በሁለት የእሑድ ምሽቶች ተገልጦላቸው ነበርና። በአጠቃላይም ይህ ኢየሱስ ከሙታን ከተነሣ በኋላ የታየበት ሰባተኛው ጊዜ ነበር።
ቍርሳቸውን ከበሉ በኋላ ገና አብረው ተቀምጠው ሳሉ ኢየሱስ ስምዖን ጴጥሮስን እንዲህ አለው፦
«የዮና ልጅ ስምዖን ሆይ፥ ከእነዚህ ይልቅ ትወደኛለህን?»
ጴጥሮስም «መምህር ሆይ፥ ወዳጅህ እንደ ሆንሁ አንተ ታውቃለህ» ብሎ መለሰ።
ኢየሱስም «እንግዲያስ ግልገሎቼን አሰማራ» አለ።
ጥቂት ዝም ካሉ በኋላ ኢየሱስ ደግሞ ሁለተኛ ጊዜ ጴጥሮስን፦
«የዮና ልጅ ስምዖን ሆይ፥ ትወደኛለህን?» ብሎ ጠየቀው።
እርሱም «አዎን መምህር ሆይ፥ ወዳጅህ እንደ ሆንሁ አንተ ታውቃለህ» ብሎ መለሰ።
ኢየሱስም «እንግዲያስ ለበጎቼ እረኛ ሁን» አለ።
ከዚያም ሦስተኛ ጊዜ ኢየሱስ እንዲህ ብሎ ጠየቀው፦
«የዮና ልጅ ስምዖን ሆይ፥ ወዳጄ ነህን?»
ጴጥሮስ ሦስተኛው ጥያቄ «ትወደኛለህን?» ሳይሆን «ወዳጄ ነህን?» በመሆኑ አዘነ፤ እንዲህም ብሎ መለሰ፦
«መምህር ሆይ፥ አንተ ሁሉን ታውቃለህ! ወዳጅህ እንደ ሆንሁ አንተ ታውቃለህ!»
ኢየሱስም «እንግዲያስ በጎቼን አሰማራ» አለ፤ ቀጥሎም እንዲህ አለ፦ «እውነት እልሃለሁ፥ ጐበዝ በነበርህ ጊዜ በገዛ እጅህ መቀነትህን ታጠቅህ፥ ወደምትወደውም ትሄድ ነበር። ስትሸመግል ግን እጆችህን ትዘረጋለህ፤ ሌላውም መቀነት ያስታጥቅሃል፥ ወደማትወደውም ይወስድሃል።»
ከዚያም ኢየሱስ «ተከተለኝ» ብሎ ጨመረ።
ጴጥሮስ ጌታው በተመረመረበት ሌሊት ኢየሱስን እንደማያውቀው ወይም ደቀ መዝሙሩ እንዳልሆነ ሦስት ጊዜ እንደ ካደ፥ እንዲሁ አሁን ኢየሱስ በሁሉም ፊት ወዳጁ መሆኑን ሦስት ጊዜ እንዲናገር ፈለገ። ይህንንም ሦስት ጊዜ በተናገረ ጊዜ ጌታ፥ ከብዙ ጊዜ በፊት በገሊላ ባሕር ዳር እንዳለው፥ «ተከተለኝ» አለው። እንዲሁ ስምዖን ጴጥሮስ በኢየሱስ ደቀ መዛሙርት መካከል የቀድሞ ስፍራውን እንደ ገና ተሰጠው።
ኢየሱስ ጴጥሮስን እጆቹን ስለ መዘርጋትና ወደማይወደው ስፍራ ስለ መወሰዱ የነገረው፥ ጴጥሮስ ስለ ክርስቶስ ብሎ በምን ዓይነት ሞት እንደሚሞት አስቀድሞ የተነገረ ትንቢት ነበር። ከዚያ ጊዜ በኋላ አርባ ዓመት ያህል ቈይቶ ጴጥሮስ ሽማግሌ በሆነ ጊዜ፥ በሮም እንደ ኢየሱስ በመስቀል ተሰቅሎ ተገደለ። በመስቀሉ ላይ ሊቸነከር በቀረበ ጊዜ፥ እንደ እርሱ ጌታውን የካደ ሰው ኢየሱስ በሞተበት ዓይነት ሞት ሊሞት እንደማይገባው ለወታደሮቹ ነገራቸው ይባላል፤ መስቀሉንም ራሱ ወደ ምድር ዝቅ ብሎ እንዲተክሉት ለመናቸው፤ ጴጥሮስም እንዲሁ ሞተ።
ወደዚያ በገሊላ ባሕር ዳር ወደ ተደረገው ቍርስ ስንመለስ፥ ኢየሱስ እነዚያን ቃሎች ለጴጥሮስ ከተናገረ በኋላ ጴጥሮስ በአጠገቡ ቆሞ የነበረውን ዮሐንስን ተመለከተ። ጴጥሮስና ዮሐንስ በባሕርያቸው እጅግ የተለያዩ ቢሆኑም እርስ በርሳቸው እጅግ ይዋደዱ ነበር። በኢየሱስና በደቀ መዛሙርቱ ታሪክ፥ በኋላም በመጡት ዘመናት፥ ጴጥሮስና ዮሐንስ ሁልጊዜ ማለት ይቻላል አብረው እንደ ነበሩ እናገኛለን። ጴጥሮስ ዮሐንስን አይቶ ኢየሱስን እንዲህ አለው፦
«መምህር ሆይ፥ ስለ እኔ ነግረኸኛል፤ አሁን ደግሞ ይህ ሰው ምን እንደሚያደርግ ንገረኝ።»
ኢየሱስ ግን ጴጥሮስን እንዲህ አለው፦
«ወደ ምድር እስክመለስ ድረስ እርሱ እንዲቈይ ብፈቅድ አንተን ምን ይመለከትሃል? አንተ እንዳልሁህ ተከተለኝ።»
ኢየሱስ ይወደው የነበረው ደቀ መዝሙር ዮሐንስ ከዚያ ቀን በኋላ ብዙ ዘመን ኖረ። ሌሎቹ የኢየሱስ ዐሥራ ሁለቱ ደቀ መዛሙርት ሁሉ ከሞቱ በኋላ—ከእነርሱም አብዛኞቹ በክርስቶስ ጠላቶች ተገድለዋል—ዮሐንስ ገና በሕይወት ነበር። ከእነዚህም የኢየሱስ ቃሎች የተነሣ ብዙዎች ዮሐንስ አይሞትም ብለው አሰቡ። ኢየሱስ ግን ዮሐንስ አይሞትም አላለም። ያለው፥ እርሱ ኢየሱስ እንደ ገና እስኪመጣ ድረስ ዮሐንስ በሕይወት እንዲኖር ቢፈቅድ ጉዳዩ የጌታ ነው እንጂ የጴጥሮስ አይደለም ማለት ብቻ ነበር።