መንፈስ ቅዱስን መቀበል

ሐዋርያው ጳውሎስ ወደ ኤፌሶን በመጣ ጊዜ አሥራ ሁለት የክርስቶስ ደቀ መዛሙርት ያሉበትን አንድ ትንሽ ጉባኤ አገኘ። በእነዚህ አሥራ ሁለት ደቀ መዛሙርት ዘንድ ጳውሎስን ያላስደሰተው አንድ ነገር ነበረ። ምን እንደ ሆነ አልተነገረንም። ምናልባት በክርስቶስ ለእነርሱ ወደ ተዘጋጀው የበረከት ሙላት በእውነት በገቡ ክርስቲያኖች ሁሉ ዘንድ ሊገኝ ይገባዋል ብሎ ሰው የሚጠብቀውን ያን የተትረፈረፈ ደስታ በእነርሱ ዘንድ ስላላገኘ ይሆናል። ወይም ደግሞ ጳውሎስን ያስጨነቀው ቍጥራቸው አሥራ ሁለት ብቻ መሆኑ ይሆናል፤ እነዚህ አሥራ ሁለቱ መሆን የሚገባቸውን ቢሆኑ ኖሮ እስከዚያ ጊዜ ድረስ ቍጥራቸው ከአሥራ ሁለት በእርግጥ ይበልጥ ነበር ብሎ አስቦ ይሆናል። ጳውሎስን ያላስደሰተው ነገር ምንም ይሁን ምን፣ ወዲያውኑ፦ «ባመናችሁ ጊዜ መንፈስ ቅዱስን ተቀበላችሁን?» (የሐዋርያት ሥራ 19:2) ብሎ በመጠየቅ በቀጥታ ወደ ችግሩ ሥር ደረሰ። መንፈስ ቅዱስን እንዳልተቀበሉ፣ እንዲያውም መንፈስ ቅዱስ መሰጠቱን እንኳ እንዳላወቁ ወዲያው ታወቀ። ከዚያም ጳውሎስ መንፈስ ቅዱስ እንደ ተሰጠ ነገራቸው፤ በዚያው ስፍራና በዚያው ሰዓት መንፈስ ቅዱስን ለመቀበል ምን ማድረግ እንዳለባቸውም በትክክል አሳያቸው፤ ያ ስብሰባ ሳይፈጸምም መንፈስ ቅዱስ በእነርሱ ላይ መጣ። ከዚያን ቀን ጀምሮ በኤፌሶን ያለው ሁኔታ ፈጽሞ ተለወጠ። ወዲያውም ከተማይቱን ሁሉ ያናወጠ ታላቅ መነቃቃት ተነሣ፤ «እንዲህም የጌታ ቃል በኃይል ያድግና ያሸንፍ ነበር።» (የሐዋርያት ሥራ 19:20)። ጳውሎስ በኤፌሶን ላሉት ለእነዚያ አዲስ ደቀ መዛሙርት ያቀረበው ጥያቄ በየስፍራው ላሉ አዲስ ደቀ መዛሙርት ሁሉ ሊቀርብ ይገባዋል፦ «መንፈስ ቅዱስን ተቀበላችሁን?» መንፈስ ቅዱስን መቀበል በገዛ ልባችን ውስጥ ለሚኖረው ደስታ፣ በኃጢአት ላይ ለሚገኘው ድል፣ በጸሎት ለሚገኘው ኃይልና ፍሬ ለሚያፈራ አገልግሎት ታላቁ ምሥጢር ነው።

ኢየሱስን በእውነት የተቀበለ ሰው ሁሉ በአንድ መልኩ መንፈስ ቅዱስ በእርሱ ውስጥ ማደሩ የግድ ነው፤ ነገር ግን በብዙ አማኞች ውስጥ መንፈስ ቅዱስ ቢያድርም፣ የሚያድረው ከንቃተ ኅሊናቸው በስተ ጀርባ፣ በማንነታቸው ውስጥ ራቅ ብሎ በተሰወረ መቅደስ ውስጥ ነው። ጳውሎስ በጥያቄው ባሰበው መንገድ መንፈስ ቅዱስን መቀበል ግን ከዚህ ፈጽሞ የተለየ፣ ከዚህም እጅግ የሚበልጥ ነገር ነው። ይኸውም መንፈስ ቅዱስን እንደ ተቀበለ በተሞክሮ እስኪያውቅ ድረስ መንፈስ ቅዱስን መቀበል ነው፤ በዓለም ከቶ ካወቅነው ደስታ ሁሉ በተለየ ደስታ ልባችንን እንደሚሞላ እስኪሰማን ድረስ መንፈስ ቅዱስን መቀበል ነው፤ ሕይወታችንን እስኪገዛና የመንፈስን ፍሬ — ፍቅርን፣ ደስታን፣ ሰላምን፣ ትዕግሥትን፣ ቸርነትን፣ በጎነትን፣ እምነትን፣ የዋህነትን፣ ራስን መግዛትን — እየጨመረ በሚሄድ መጠን በውስጣችን እስኪያፈራ ድረስ መንፈስ ቅዱስን መቀበል ነው፤ ከራሳችን ባልሆነ መንገድ ልባችንን ወደ ጸሎት እንደሚስብ እስኪሰማን ድረስ መንፈስ ቅዱስን መቀበል ነው፤ ስለ ክርስቶስ ስንመሰክር፣ ከሰዎች ጋር በግል ስንነጋገርና ክርስቶስን እንዲቀበሉ ልንመራቸው ስንሞክር፣ ወይም የሰንበት ትምህርት ቤት ክፍል ስናስተምር፣ ወይም በሕዝብ ፊት ስንናገር፣ ወይም ሌላ ማንኛውንም የጌታን ሥራ ስንሠራ እርዳታውን እስኪሰማን ድረስ መንፈስ ቅዱስን መቀበል ነው። አንተስ መንፈስ ቅዱስን ተቀብለሃልን? ካልተቀበልህ፣ እንዴት ልትቀበል እንደምትችል ልንገርህ።

1. መንፈስ ቅዱስን ለመቀበል ከሁሉ አስቀድሞ፣ እግዚአብሔር ኃጢአታችንን ሁሉ ይቅር የሚልበትና የሚምረን ብቸኛውና ሙሉ በሙሉ በቂ የሆነው መሠረት ክርስቶስ ስለ እኛ በመስቀል ላይ የሞተው ሞት እንደ ሆነ አምኖ በእርሱ ላይ ማረፍ ያስፈልጋል።

2. መንፈስ ቅዱስን ለመቀበል የምናውቀውን ኃጢአት ሁሉ ማስወገድ አለብን። ወደ ሰማያዊ አባታችን ሄደን ፈጽሞ እንዲመረምረን፣ በሕይወታችንም ውስጥ — በውጭውም ሆነ በውስጡ ሕይወታችን — በፊቱ ስሕተት የሆነውን ማንኛውንም ነገር ወደ ብርሃን እንዲያወጣ ልንለምነው ይገባናል፤ እርሱን የማያስደስተውን አንዳች ነገር ወደ ብርሃን ቢያወጣም፣ ምንም ያህል የምንወደው ቢሆን ልናስወግደው ይገባናል። መንፈስ ቅዱስን ለመቀበል ኃጢአትን ሁሉ ፈጽሞ መካድና መተው ያስፈልጋል።

3. በሦስተኛ ደረጃ፣ መንፈስ ቅዱስን ለመቀበል ክርስቶስን በዓለም ፊት በግልጽ መመስከር ያስፈልጋል። መንፈስ ቅዱስ የሚሰጠው በስውር ደቀ መዛሙርት ለመሆን ለሚሞክሩ ሳይሆን፣ ክርስቶስን ለሚታዘዙና በዓለም ፊት በይፋ ለሚመሰክሩለት ነው።

4. በአራተኛ ደረጃ፣ መንፈስ ቅዱስን ለመቀበል ሕይወታችንን ያለ አንዳች ገደብ ለእግዚአብሔር መስጠት ያስፈልጋል። ወደ እርሱ ሄደህ እንዲህ ማለት አለብህ፦ «ሰማያዊ አባት ሆይ፣ እነሆኝ። በዋጋ ገዝተኸኛል። እኔ የአንተ ገንዘብ ነኝ። የራሴን ፈቃድ ለማድረግ፣ የራሴን ሕይወት ለመምራት፣ በራሴ መንገድ ለመሄድ ያለኝን መብት ሁሉ እተዋለሁ። ራሴን ያለ ምንም ገደብ ለአንተ አሳልፌ እሰጣለሁ—ማንነቴን ሁሉ ያለኝንም ሁሉ። ወደ ወደድኸው ስፍራ ላከኝ፣ እንደ ወደድኸው ተጠቀምብኝ፣ የወደድኸውን አድርግብኝ—እኔ የአንተ ነኝ።» ከእግዚአብሔር አንዳች ነገር ብንከለክል፣ ምንም ያህል ትንሽ ቢመስል፣ ያ ሁሉን ያበላሻል። ሁሉን ለእግዚአብሔር ብንሰጥ ግን እግዚአብሔር ያለውን ሁሉ ይሰጠናል። ራሳቸውን ያለ ገደብ ለእግዚአብሔር ከመስጠት ወደ ኋላ የሚሉ አንዳንዶች አሉ፤ ነገር ግን ራስን ያለ ገደብ ለእግዚአብሔር መስጠት ማለት በቀላሉ ራስን ወሰን ለሌለው ፍቅር ያለ ገደብ መስጠት ማለት ነው። ራስህን ለአብ ስጥ፤ ፍቅሩ ከማንኛውም ምድራዊ አባት ይልቅ ጥበበኛ ብቻ ሳይሆን ከማንኛውም ምድራዊ እናት ይልቅ ርኅሩኅ ለሆነው አብ ስጥ።

5. መንፈስ ቅዱስን ለመቀበል መንፈስ ቅዱስን ለይቶ በግልጽ መለመን ያስፈልጋል። ጌታችን ኢየሱስ በሉቃስ 11:13 እንዲህ ይላል፦ «እንኪያስ እናንተ ክፉዎች ስትሆኑ ለልጆቻችሁ መልካም ስጦታ መስጠት ካወቃችሁ፥ በሰማይ ያለው አባት ለሚለምኑት እንዴት አብልጦ መንፈስ ቅዱስን ይሰጣቸው?» እግዚአብሔር መንፈስ ቅዱስን እንዲሰጥህ ብቻ ለምነው፤ እሰጣለሁ ብሎአልና እንደሚሰጥህም ጠብቅ።

6. በመጨረሻም፣ መንፈስ ቅዱስን ለመቀበል እምነት ያስፈልጋል፤ ይኸውም እግዚአብሔርን በቃሉ መሠረት በቀላሉ ማመን ነው። የእግዚአብሔር ቃል ተስፋ ምንም ያህል እርግጠኛ ቢሆን፣ በግላችን የምንደሰትበት ስናምን ብቻ ነው። ጌታችን ኢየሱስ እንዲህ ይላል፦ «የጸለያችሁትን የለመናችሁትንም ሁሉ እንዳገኛችሁት እመኑ፥ ይሆንላችሁማል።» (ማርቆስ 11:24)። ስለ መንፈስ ቅዱስ ስትጸልይ እንደ እግዚአብሔር ፈቃድ የሆነውን ነገር ለምነሃል፤ ስለዚህ ጸሎትህ እንደ ተሰማ፣ ከእርሱ የለመንኸውንም እንዳገኘህ ልታውቅ ትችላለህ (1ኛ ዮሐንስ 5:14-15)። ምንም የተለየ ስሜት ላይሰማህ ይችላል፤ ነገር ግን ወደ እግዚአብሔር ተስፋ እንጂ ወደ ስሜትህ አትመልከት። ጸሎቱ እንደ ተሰማ እመን፤ እግዚአብሔር መንፈስ ቅዱስን እንደ ሰጠህ እመን፤ ከዚያም በእግዚአብሔር ቃል ተስፋ ብቻ ተደግፈህ በቀላል እምነት የተቀበልኸውን በኋላ በእውነተኛ ተሞክሮ ታገኘዋለህ።

ብዙ ጊዜ ብቻህን ገለል ብለህ ተንበርክከህ ወደ መንፈስ ቅዱስ ቀና ብለህ መመልከትና የሕይወትህን አመራር ሁሉ እንደ ገና በእጁ ላይ ማኖር መልካም ነው። የሐሳብህን አመራር፣ የምናብህን አመራር፣ የፍቅርህን አመራር፣ የምኞትህን አመራር፣ የጉጉትህን አመራር፣ የምርጫህን አመራር፣ የዓላማህን አመራር፣ የቃልህን አመራር፣ የተግባርህን አመራር፣ የሁሉንም ነገር አመራር እንዲወስድ ለምነው፤ እንደሚያደርገውም ብቻ ጠብቅ። በክርስትና ሕይወት የድል ምሥጢሩ ሁሉ በውስጥህ የሚያድረው መንፈስ ቅዱስ በሕይወትህ አካሄድ ሁሉ ላይ ማንም የማይቃወመው ሙሉ መብት እንዲኖረው መፍቀድ ነው።