ወደ ኢየሱስ መመልከት

በፊታችን ያለውን ሩጫ በትዕግሥት ልንሮጥ ከፈለግን ዘወትር ወደ ኢየሱስ መመልከት አለብን (ዕብራውያን 12:1-3)። ለዘላቂ ደስታና ለድል ከሆኑት ምሥጢሮች ሁሉ እጅግ ቀላል ከሆኑትና ደግሞም እጅግ ኃያል ከሆኑት አንዱ ኢየሱስን ከዓይናችን ፈጽሞ አለማጣት ነው።

1. ከሁሉ አስቀድሞ፣ በእግዚአብሔር ፊት ተቀባይነት የምናገኝበት መሠረት አድርገን ዘወትር ወደ ኢየሱስ መመልከት አለብን። ሰይጣን ኃጢአታችንንና ውድቀታችንን እያነሣ ተስፋ ሊያስቈርጠን፣ በዚህም የእግዚአብሔር ልጆች እንዳልሆንን ወይም እንዳልዳንን ሊያሳምነን ደጋግሞ ይሞክራል። ዘወትር ኃጢአታችንን እንድንመለከትና በእርሱ ላይ እንድንብሰለሰል ማድረግ ከቻለ፣ ብዙም ሳይቆይ ተስፋ ያስቈርጠናል፤ ተስፋ መቍረጥ ደግሞ ውድቀት ማለት ነው። ነገር ግን እግዚአብሔር የሚመለከተውን — ከቶ የሠራነውን ኃጢአት ሁሉ ፈጽሞ ያስተሰረየውን፣ በእኛ ፋንታ የሆነውን የኢየሱስ ክርስቶስን ሞት — ዘወትር ብንመለከት፣ ከኃጢአታችን ታላቅነት የተነሣ ከቶ ተስፋ አንቈርጥም። ኃጢአታችን ታላቅ፣ እጅግም ታላቅ ቢሆን፣ ሁሉም እንደ ተሰረየለት እናያለን። ሰይጣን ከኃጢአታችን አንዱን ባነሣ ቍጥር፣ ኢየሱስ ክርስቶስ በእኛ ፋንታ እርግማን ሆኖ ከእርግማኑ እንደ ዋጀን እናያለን (ገላትያ 3:13)። በራሳችን ዓመፅ የሞላብን ብንሆንም፣ ክርስቶስ በእኛ ፋንታ ኃጢአት ስለ ተደረገ በእርሱ የእግዚአብሔር ጽድቅ እንደ ሆንን እናያለን (2ኛ ቆሮንቶስ 5:21)። ሰይጣን የሚወቅሰን ኃጢአት ሁሉ እንደ ተሸከመና ለዘላለም እንደ ተወገደ እናያለን (1ኛ ጴጥሮስ 2:24፤ ኢሳይያስ 53:6)። እንዲህም ብለን ዘወትር መዘመር እንችላለን፦

«ኢየሱስ ዕዳዬን ከፈለ፣ ያለብኝን ዕዳ ሁሉ፤ ኃጢአት ደማቅ ቀይ እድፍ ትቶብኝ ነበር፣ እርሱ ግን እንደ በረዶ አነጻው።»

በቀድሞም ይሁን አሁን በሠራኸው በማንኛውም ኃጢአት በዚች ሰዓት የምትጨነቅ ከሆንህ፣ በመስቀል ላይ ያለውን ኢየሱስን ብቻ ተመልከት፤ ያስጨነቀህ ይህ ኃጢአት በእርሱ ላይ እንደ ተጫነ እግዚአብሔር ስለ እርሱ የሚነግርህን እመን (ኢሳይያስ 53:6)። ኃጢአቱ ሙሉ በሙሉ ስለ ተፈጸመ እግዚአብሔርን አመስግን፤ በአንተ ፋንታ ለተሸከመው ለኢየሱስ በምስጋና ተሞላ፤ ከእንግዲህም ስለ እርሱ አትጨነቅ። እግዚአብሔር ወሰን በሌለው ፍቅሩ የደመሰሰውን ኃጢአት እያሰቡ መብሰልሰል ለእግዚአብሔር የሚደረግ የከፋ ውለታ ቢስነት ነው። በመስቀል ላይ ያለውን ክርስቶስን ዘወትር ተመልከት፤ ሁልጊዜም በእግዚአብሔር ሞገስ የፀሐይ ብርሃን ውስጥ ተመላለስ። ይህ የእግዚአብሔር ሞገስ ታላቅ ዋጋ ተከፍሎበት ተገዝቶልሃል። ምስጋና ዘወትር እንድታምንበትና በብርሃኑ እንድትመላለስ ይጠይቅብሃል።

2. በሁለተኛ ደረጃ፣ በሰማይና በምድር ሥልጣን ሁሉ ያለውን፣ በየዕለቱና በየሰዓቱም ሊጠብቀን የሚችለውን ከሙታን የተነሣውን አዳኛችንን ኢየሱስን ዘወትር መመልከት አለብን። በዚች ሰዓት አንዳች ክፉ ነገር እንድታደርግ ተፈትነሃልን? እንደዚያ ከሆነ፣ ኢየሱስ ከሙታን እንደ ተነሣ አስብ፤ በዚች ሰዓት በክብር በእግዚአብሔር ቀኝ ሕያው ሆኖ እንዳለ አስብ፤ በሰማይና በምድር ሥልጣን ሁሉ እንዳለው፣ ስለዚህም አሁኑኑ ድልን ሊሰጥህ እንደሚችል አስብ። ኢየሱስ በዚች ሰዓት «ፈጽሞ» ሊያድንህ ኃይል እንዳለው እግዚአብሔር በቃሉ የሚነግርህን እመን (ዕብራውያን 7:25)። አሁን በከበበህ በዚህ ኃጢአት ላይ ድልን ሊሰጥህ ኃይል እንዳለው እመን። ድልን እንዲሰጥህ ለምነው፤ እንደሚሰጥህም ጠብቅ። በዚህ መንገድ ድልን ለማግኘት ወደ ተነሣው ክርስቶስ በመመልከት በየዕለቱ፣ በየሰዓቱ፣ በየቅጽበቱ በኃጢአት ላይ ድል ልታገኝ ትችላለህ። «ከሙታን የተነሣውን … ኢየሱስ ክርስቶስን አስብ» (2ኛ ጢሞቴዎስ 2:8)።

እግዚአብሔር እያንዳንዳችንን በድል ወደ ሚኖር ሕይወት ጠርቶናል፤ የዚህ የድል ሕይወት ምሥጢርም ድልን ለማግኘት ዘወትር ወደ ተነሣው ክርስቶስ መመልከት ነው። ወደ ተሰቀለው ክርስቶስ በመመልከት ይቅርታን እናገኛለን፤ በሰላምም እንኖራለን። ወደ ተነሣው ክርስቶስ በመመልከት በኃጢአት ኃይል ላይ የአሁኑን ድል እናገኛለን። የተነሣውን ክርስቶስን ከዓይንህ አጥተህ ለፈተና ተሸንፈህ ከሆነ፣ ኃጢአትህን ተናዘዝ፤ እግዚአብሔርም ስለ ተናገረ ይቅር እንደ ተባለልህ እወቅ (1ኛ ዮሐንስ 1:9)፤ አሁን ድልን እንዲሰጥህ እንደ ገና ወደ ተነሣው ወደ ኢየሱስ ተመልከት፤ ወደ እርሱም መመልከትህን አታቋርጥ።

3. በሦስተኛ ደረጃ፣ በዕለት ተዕለት አካሄዳችን ልንከተለው የሚገባን እርሱ እንደ ሆነ ዘወትር ወደ ኢየሱስ መመልከት አለብን። ጌታችን ኢየሱስ ለቀደሙት ደቀ መዛሙርቱ እንደ ተናገረ ዛሬም ደቀ መዛሙርቱ ለሆንነው ለእኛ «ተከተለኝ» ይለናል። የእውነተኛ ክርስቲያናዊ አካሄድ ምሥጢር ሁሉ «ተከተለኝ» በምትለው በዚህች አንዲት ቃል ሊጠቃለል ይችላል። «በእርሱ እኖራለሁ የሚል እርሱ እንደ ተመላለሰ ራሱ ደግሞ ሊመላለስ ይገባዋል» (1ኛ ዮሐንስ 2:6)። በክርስትና ሕይወት ለሚመጣው ውድቀት በጣም የተለመዱ ከሆኑት ምክንያቶች አንዱ እጅግ የምናደንቀውን አንድን መልካም ሰው ለመከተል መሞከር ነው። ምንም ያህል መልካም ቢሆኑ ያለ ስጋት ሊከተሉት የሚቻል ወንድም ሆነ ሴት የለም። ማንኛውንም ወንድ ወይም ሴት ብንከተል፣ መሳታችን አይቀርም። በዚህ ምድር ላይ ፍጹም የሆነ ሰው ከአንዱ በቀር ከቶ አልተገኘም — እርሱም ሰው የሆነው ክርስቶስ ኢየሱስ ነው። ሌላ ማንንም ሰው ለመከተል ብንሞክር ከመልካም ባሕርዩ ይልቅ ስሕተቱን መቅዳታችን የበለጠ እርግጥ ነው። መሪህ አድርገህ ኢየሱስን፣ ኢየሱስን ብቻ ተመልከት።

በማንኛውም ጊዜ ምን ማድረግ እንዳለብህ ግራ ቢገባህ፣ ኢየሱስ ቢሆን ምን ያደርግ ነበር? የሚለውን ጥያቄ ብቻ ጠይቅ። ኢየሱስ ምን እንደሚያደርግ በመንፈስ ቅዱሱ እንዲያሳይህ እግዚአብሔርን ለምን። ኢየሱስ በእርግጥ ያደረገውን ለማወቅ መጽሐፍ ቅዱስህን አጥና፤ ኢየሱስንም ተከተል። ሌላ ማንም ኢየሱስን የሚከተል ባይመስልም እንኳ፣ አንተ መከተልህን እርግጠኛ ሁን። ሌሎች ኢየሱስን ስለማይከተሉ እነርሱን በመንቀፍ ጊዜህንና ሐሳብህን አታባክን። አንተ ራስህ እርሱን እንድትከተል ተጠንቀቅ። ሌሎች ኢየሱስን ስላልተከተሉ እነርሱን በመንቀፍ ጊዜህን ስታባክን፣ ኢየሱስ ዘወትር፦ «ምን አግዶህ? አንተ ተከተለኝ» ይልሃል (ዮሐንስ 21:22)። ለአንተ የሚቀርበው ጥያቄ ኢየሱስን መከተል ለሌሎች ሰዎች ምን ሊጠይቅባቸው ይችላል የሚለው አይደለም። ጥያቄው ኢየሱስን መከተል ለአንተ ምን ማለት ነው የሚለው ነው።

በእውነት ቀላሉ ሕይወት ይህ ነው፤ ኢየሱስን በቀላሉ የመከተል ሕይወት። ብዙ ግራ የሚያጋቡ ጥያቄዎች ይመጡብሃል፤ ነገር ግን በነገር ሁሉ ኢየሱስን ለመከተል በፍጹም ልብህ ብትወስን፣ እጅግ ግራ የሚያጋባው ጥያቄ እንኳ ብዙም ሳይቆይ እንደ ቀን ብርሃን ግልጽ ይሆናል። ሰይጣን ዘወትር፦ «እገሌ የተባለ መልካም ሰው ይህን ያደርጋል» ብሎ በጆሮህ ሊያንሾካሽክ ዝግጁ ነው፤ አንተ ግን፦ «ይህ ወይም ያ ሰው ቢያደርግ ወይም ባያደርግ ለእኔ ምንም አይደለም። ለእኔ ያለው ብቸኛ ጥያቄ ኢየሱስ ቢሆን ምን ያደርግ ነበር? የሚለው ነው» ብለህ መመለስ ብቻ ይበቃሃል። ኢየሱስን በቀላሉ በመከተል በሚኖር በዚህ ሕይወት ውስጥ አስደናቂ ነጻነት አለ። ይህ መንገድ ቀጥና ግልጽ ነው። የሌሎችን አካሄድ እያየ የራሱን አካሄድ ለመቅረጽ የሚሞክር ሰው መንገድ ግን ጠመዝማዛ፣ ውጣ ውረድና ወጥመድ የሞላበት ነው። ዘወትር ወደ ኢየሱስ ተመልከት። እርሱ ወደሚመራህ በመታመን ተከተል። ይህ እስከ ቀትር ድረስ እየጨመረ የሚበራው የጻድቃን መንገድ ነው (ምሳሌ 4:18)። እርሱ የዓለም ብርሃን ነው፤ የሚከተለው ሁሉ በጨለማ አይመላለስም፤ ነገር ግን በመንገዱ ሁሉ የሕይወት ብርሃን ይሆንለታል (ዮሐንስ 8:12)።

---