የመዳን ዋስትና

አንድ ሰው በክርስቲያናዊ አገልግሎት የተሟላ ደስታና ኃይል እንዲኖረው ከፈለገ፣ ኃጢአቱ ይቅር እንደ ተባለለት፣ የእግዚአብሔር ልጅ እንደ ሆነና የዘላለም ሕይወት እንዳለው ማወቅ አለበት። የዘላለም ሕይወት እንዳለው ማወቅ የአማኙ መብት ነው። ዮሐንስ በ1ኛ ዮሐንስ 5:13 እንዲህ ይላል፦ «የዘላለም ሕይወት እንዳላችሁ ታውቁ ዘንድ በእግዚአብሔር ልጅ ስም ለምታምኑ ይህን ጽፌላችኋለሁ።» ዮሐንስ ይህን የመጀመሪያ መልእክቱን የጻፈው በእግዚአብሔር ልጅ ስም የሚያምን ማንኛውም ሰው የዘላለም ሕይወት እንዳለው እንዲያውቅ ለሚል ግልጽ ዓላማ ነው።

ማንም ሰው ሞቶ በእግዚአብሔር የፍርድ ወንበር ፊት እስኪቆም ድረስ የዘላለም ሕይወት እንዳለው ሊያውቅ አይችልም የሚሉን ሰዎች አሉ፤ እግዚአብሔር ራሱ ግን ልናውቅ እንደምንችል ይነግረናል። አማኝ የዘላለም ሕይወት እንዳለው ሊያውቅ መቻሉን መካድ የመጀመሪያይቱ የዮሐንስ መልእክት በከንቱ ተጽፋለች ማለት ነው፤ እውነተኛው ጸሐፊዋ የሆነውን መንፈስ ቅዱስን መስደብም ነው። ደግሞም ጳውሎስ በሐዋርያት ሥራ 13:39 እንዲህ ይነግረናል፦ «የሚያምን ሁሉ በእርሱ (ማለትም በክርስቶስ) ከነገር ሁሉ ይጸድቃል።» ስለዚህ በኢየሱስ የሚያምን ሁሉ ከነገር ሁሉ እንደ ጸደቀ ሊያውቅ ይችላል። የእግዚአብሔር ቃል እንዲህ ስለሚል ሊያውቀው ይችላል። ደግሞም ዮሐንስ በዮሐንስ 1:12 እንዲህ ይነግረናል፦ «ለተቀበሉት ሁሉ ግን (ማለትም ኢየሱስ ክርስቶስን)፥ በስሙ ለሚያምኑት ለእነርሱ የእግዚአብሔር ልጆች ይሆኑ ዘንድ ሥልጣንን ሰጣቸው።» ኢየሱስን የሚቀበል ሁሉ የእግዚአብሔር ልጅ እንደሚሆን የሚገልጽ ግልጽና የማያሻማ አዋጅ ይኸውና። ስለዚህ በኢየሱስ የሚያምን ሁሉ የእግዚአብሔር ልጅ መሆኑን ሊያውቅ ይችላል። ከሁሉ በላይ እርግጠኛ በሆነው መሠረት ላይ ሆኖ ሊያውቀው ይችላል፤ ማለትም የእግዚአብሔር ቃል የእግዚአብሔር ልጅ መሆኑን ስለሚያረጋግጥ ነው።

ነገር ግን አንድ ሰው የዘላለም ሕይወት እንዳለው እንዴት ሊያውቅ ይችላል? ከሁሉ በሚበልጠው የእውቀት መሠረት ሊያውቀው ይችላል፤ ይኸውም በመጽሐፍ ቅዱስ በተሰጠው በእግዚአብሔር በራሱ ምስክርነት ነው። የመጽሐፍ ቅዱስ ምስክርነት የእግዚአብሔር ምስክርነት ነው። መጻሕፍት የሚሉት ነገር ፍጹም እርግጥ ነው። መጻሕፍት የሚሉትን እግዚአብሔር ይላል። እንግዲህ በዮሐንስ 3:36 መጻሕፍት እንዲህ ይላሉ፦ «በልጁ የሚያምን የዘላለም ሕይወት አለው።» ማንኛችንም በልጁ የምናምን ወይም የማናምን መሆናችንን፣ ይኸውም እርሱን ወደ መቀበል የሚመራን በክርስቶስ ላይ ያለ እውነተኛ እምነት ያለን መሆኑን ልናውቅ እንችላለን። ይህ በክርስቶስ ላይ ያለ እምነት ካለን፣ የዘላለም ሕይወት እንዳለን፣ ኃጢአታችን ይቅር እንደ ተባለልንና የእግዚአብሔር ልጆች እንደ ሆንን የእግዚአብሔር የራሱ የተጻፈ ምስክርነት አለን። ይቅር እንደ ተባልን ሊሰማን ይችላል፤ ላይሰማንም ይችላል፤ ይህ ግን ምንም ለውጥ አያመጣም። ጥያቄው የሚሰማን ምን እንደ ሆነ ሳይሆን እግዚአብሔር የሚለው ምን እንደ ሆነ ነው። የእግዚአብሔር ቃል ሁልጊዜ ሊታመን ይገባዋል። የራሳችን ስሜት ግን ብዙ ጊዜ ሊጠረጠር ይገባዋል። ይቅር እንደ ተባሉ ስለማይሰማቸው፣ ወይም የዘላለም ሕይወት እንዳላቸው ስለማይሰማቸው፣ ወይም እንደ ዳኑ ስለማይሰማቸው፣ ኃጢአታቸው ይቅር መባሉን፣ የዘላለም ሕይወት እንዳላቸውና እንደ ዳኑ የሚጠራጠሩ ብዙዎች አሉ። ስላልተሰማህ ብቻ ልትጠራጠረው የሚገባበት ምክንያት የለም።

እስር ተፈርዶብህ ሳለ ወዳጆችህ ምሕረት አስገኝተውልሃል እንበል። ምሕረት እንደ ተደረገልህ የሚያውጀው ሕጋዊ ሰነድ ይመጣልሃል። ታነበዋለህ፤ ሕጋዊው ሰነድ ስለሚል ምሕረት እንደ ተደረገልህ ታውቃለህ፤ ነገር ግን የምሥራቹ እጅግ መልካምና ድንገተኛ ከመሆኑ የተነሣ ደንግጠሃል። ምሕረት እንደ ተደረገልህ ገና አልተገነዘብኸውም። አንድ ሰው መጥቶ «ምሕረት ተደርጎልሃልን?» ይልሃል። ምን ትመልሳለህ? «አዎን፣ ምሕረት ተደርጎልኛል» ትላለህ። ከዚያም «ምሕረት እንደ ተደረገልህ ይሰማሃልን?» ብሎ ይጠይቅሃል። አንተም «አይ፣ ምሕረት እንደ ተደረገልኝ አይሰማኝም። ነገሩ እጅግ ድንገተኛ ነው፤ እጅግ አስደናቂ ነው፤ ልገነዘበው አልቻልሁም» ብለህ ትመልሳለህ። እርሱም «ታዲያ ካልተሰማህ ምሕረት እንደ ተደረገልህ እንዴት ልታውቅ ትችላለህ?» ይልሃል። አንተም ሰነዱን ዘርግተህ «ይህ እንዲህ ይላል» ትለዋለህ። ሰነዱን ደጋግመህ አንብበህ ካመንኸው በኋላ፣ ሰነዱ ስለሚል ምሕረት እንደ ተደረገልህ የምታውቅበት ብቻ ሳይሆን የሚሰማህም ጊዜ ይመጣል። እንግዲህ መጽሐፍ ቅዱስ በኢየሱስ የሚያምን ሁሉ እንደ ጸደቀ፣ በልጁ የሚያምን ሁሉ የዘላለም ሕይወት እንዳለው፣ ኢየሱስንም የሚቀበል ሁሉ የእግዚአብሔር ልጅ እንደ ሆነ የሚያውጅ ሥልጣን ያለው የእግዚአብሔር ሰነድ ነው። ማንም ኃጢአትህ ሁሉ ይቅር ተብሎልህ እንደ ሆነ ቢጠይቅህ «አዎን፣ እግዚአብሔር ስለሚል ይቅር እንደ ተባለልኝ አውቃለሁ» ብለህ መልስ። የእግዚአብሔር ልጅ መሆንህን ታውቅ እንደ ሆነ ቢጠይቁህ «አዎን፣ እግዚአብሔር ስለሚል የእግዚአብሔር ልጅ መሆኔን አውቃለሁ» ብለህ መልስ። የዘላለም ሕይወት እንዳለህ ቢጠይቁህ «አዎን፣ እግዚአብሔር ስለሚል የዘላለም ሕይወት እንዳለኝ አውቃለሁ። እግዚአብሔር ‹በልጁ የሚያምን የዘላለም ሕይወት አለው› ይላል። በልጁ እንደማምን አውቃለሁ፤ ስለዚህ የዘላለም ሕይወት እንዳለኝ አውቃለሁ — እግዚአብሔር ስለሚል» ብለህ መልስ። ምናልባት ገና አይሰማህ ይሆናል፤ ነገር ግን እግዚአብሔር በተናገረው ቃል ላይ ማሰላሰልህንና እግዚአብሔር የሚለውን ማመንህን ብትቀጥል፣ የሚሰማህ ጊዜ ይመጣል።

በእግዚአብሔር ልጅ የሚያምን ሰው የዘላለም ሕይወት እንዳለው ቢጠራጠር እግዚአብሔርን ሐሰተኛ ማድረጉ ነው። «በእግዚአብሔር ልጅ የሚያምን በነፍሱ ምስክር አለው፤ በእግዚአብሔር የማያምን እግዚአብሔር ስለ ልጁ የመሰከረውን ምስክር ስላላመነ ሐሰተኛ አድርጎታል እግዚአብሔርም የዘላለምን ሕይወት እንደ ሰጠን ይህም ሕይወት በልጁ እንዳለ ምስክሩ ይህ ነው ልጁ ያለው ሕይወት አለው፤ የእግዚአብሔር ልጅ የሌለው ሕይወት የለውም» (1ኛ ዮሐንስ 5:10-12)። እግዚአብሔር የዘላለምን ሕይወት እንደ ሰጠን፣ ይህም ሕይወት በልጁ እንዳለ፣ ልጁም ያለው ሕይወት እንዳለው የመሰከረውን የእግዚአብሔርን ምስክርነት የማያምን ሁሉ እግዚአብሔርን ሐሰተኛ ያደርገዋል።

አንዳንድ ጊዜ «አንድ ሰው እንደ ዳነ አውቃለሁ ወይም የዘላለም ሕይወት እንዳለኝ አውቃለሁ ማለቱ ድፍረት ነው» ይባላል። ነገር ግን እግዚአብሔርን ማመን ድፍረት ነውን? ይልቁንስ እግዚአብሔርን አለማመንና እግዚአብሔርን ሐሰተኛ ማድረግ ድፍረት አይደለምን? በእግዚአብሔር ልጅ የምታምን ሆነህ ሳለህ የዘላለም ሕይወት እንዳለህ ብትጠራጠር፣ እግዚአብሔርን ሐሰተኛ ታደርገዋለህ። ኢየሱስ ኃጢአተኛ የነበረችውን ሴት «ኃጢአትሽ ተሰርዮልሻል» ባላት ጊዜ (ሉቃስ 7:48)፣ ወጥታ «ኃጢአቴ ሁሉ ይቅር እንደ ተባለልኝ አውቃለሁ» ማለቷ ድፍረት ነበርን? ይልቁንስ ኃጢአቷ ሁሉ ይቅር እንደ ተባለላት ለአንዲት ቅጽበት እንኳ ብትጠራጠር ኖሮ ድፍረት አይሆንባትም ነበርን? ኢየሱስ ኃጢአቷ ይቅር እንደ ተባለ ተናግሮ ነበር። እርሷ ብትጠራጠር ኖሮ ኢየሱስን ሐሰተኛ ማድረጓ በሆነ ነበር። ታዲያ እግዚአብሔር ለሚያምን ሁሉ በተጻፈው ምስክርነቱ «ከነገር ሁሉ ጸድቀሃል» (የሐዋርያት ሥራ 13:39)፣ «የዘላለም ሕይወት አለህ» (ዮሐንስ 3:36፤ 1ኛ ዮሐንስ 5:13) እያለ፣ ዛሬ ያለ አማኝ «ኃጢአቴ ሁሉ ይቅር ተብሎልኛል፤ የዘላለም ሕይወት አለኝ» ቢል ይህ ከዚያ የበለጠ ድፍረት ይሆናልን?

ከሁሉ አስቀድመህ በእግዚአብሔር ልጅ ስም በእውነት እንደምታምን፣ ኢየሱስንም በእውነት እንደ ተቀበልኸው እርግጠኛ ሁን። ይህን እርግጠኛ ከሆንህ ኃጢአትህ ሁሉ ይቅር እንደ ተባለልህ ለአንዲት ቅጽበት እንኳ ፈጽሞ አትጠራጠር፤ የእግዚአብሔር ልጅ መሆንህን ለአንዲት ቅጽበት እንኳ ፈጽሞ አትጠራጠር፤ የዘላለም ሕይወት እንዳለህ ለአንዲት ቅጽበት እንኳ ፈጽሞ አትጠራጠር። ሰይጣን መጥቶ «ኃጢአትህ ይቅር አልተባለም» ብሎ በሹክሹክታ ቢነግርህ፣ ሰይጣንን ወደ እግዚአብሔር ቃል አመልክተህ «እግዚአብሔር ኃጢአቴ ይቅር እንደ ተባለ ይላል፤ ይቅር እንደ ተባለልኝም አውቃለሁ» በለው። ሰይጣን «እንግዲህ ምናልባት በእርሱ አታምን ይሆናል» ብሎ በሹክሹክታ ቢነግርህ፣ «እንግዲያውስ ከዚህ በፊት አምኜ ባላውቅ እንኳ አሁን አምናለሁ» በለው። ከዚያም ኃጢአትህ ይቅር እንደ ተባለልህ፣ የእግዚአብሔር ልጅ መሆንህንና የዘላለም ሕይወት እንዳለህ እያወቅህ ደስ እያለህ ውጣ።

በእግዚአብሔር ልጅ ስም በእውነት ሳያምኑ፣ ኢየሱስንም በእውነት ሳይቀበሉ የዘላለም ሕይወት እንዳላቸው እናውቃለን የሚሉ ብዙ ሰዎች መኖራቸው አያጠራጥርም። ይህ እውነተኛ ዋስትና አይደለም። ሊዋሽ በማይችለው በእግዚአብሔር ቃል ውስጥ ጽኑ መሠረት የለውም። የመዳን ዋስትና ማግኘት ከፈለግን በመጀመሪያ መዳን አለብን። ብዙዎች እንደ ዳኑ ዋስትና የሌላቸው ስላልዳኑ ነው። ዋስትና ሊኖራቸውም አይገባም። በመጀመሪያ የሚያስፈልጋቸው መዳን ነው። ነገር ግን በመጀመሪያው ምዕራፍ በተገለጸው መንገድ ኢየሱስን ተቀብለኸው ከሆነ፣ ድነሃል! የእግዚአብሔር ልጅ ነህ፤ ኃጢአትህ ይቅር ተብሎልሃል። እመነው፤ እወቀው፤ በእርሱም ደስ ይበልህ።

አንድ ጊዜ ከወሰንኸው በኋላ ጸንቶ ይኑር። ፈጽሞ አትጠራጠረው። ልትሳሳት ትችላለህ፤ ልትሰናከል ትችላለህ፤ ልትወድቅም ትችላለህ፤ ብትወድቅ እንኳ ኢየሱስን በእውነት ተቀብለኸው ከሆነ፣ ኃጢአትህ ይቅር እንደ ተባለልህ እወቅ፤ ከወደቅህበትም ተነሥተህ በአንተና በእግዚአብሔር መካከል አንዳች ነገር እንደሌለ በሚያውቅ በደስታ የተሞላ ዋስትና ወደ ፊት ቀጥል።