ስደት

እያንዳንዱ እውነተኛ ክርስቲያን በክርስትና ሕይወቱ ብዙም ሳይገፋ ከሚገጥሙት ተስፋ አስቆራጭ ነገሮች አንዱ ስደት ነው። እግዚአብሔር በቃሉ፦ «በእውነትም በክርስቶስ ኢየሱስ እግዚአብሔርን እየመሰሉ ሊኖሩ የሚወዱ ሁሉ ይሰደዳሉ» (2ኛ ጢሞቴዎስ 3:12) ብሎ ይነግረናል። ፈጥኖም ይሁን ዘግይቶ ራሱን ፈጽሞ ለእግዚአብሔር የሚሰጥና ኢየሱስ ክርስቶስን በሁሉ ነገር ለመከተል የሚፈልግ ሰው ሁሉ ይህ ቃል እውነት መሆኑን ያገኘዋል። የምንኖረው እግዚአብሔርን በሚጠላ ዓለምና አቋምን በሚያላላ ዘመን ውስጥ ነው። በዘመናችን ዓለም ለእግዚአብሔር ያለው ጥላቻ የተሸፈነ ነው። በኢየሱስ ክርስቶስ ዘመን በፍልስጤም እንደ ተገለጠው በአገራችን አይገለጥም፤ ነገር ግን ዓለም ዛሬም እንደ ቀድሞው ሁሉ እግዚአብሔርን ይጠላል፤ ለክርስቶስ ታማኝ የሆነውንም ሰው ይጠላል። ላያስረው ወይም ላይገድለው ይችላል፤ በሆነ መንገድ ግን ያሳድደዋል። ለኢየሱስ ክርስቶስ ታማኝ ተከታይ ስደት የማይቀር ነው። ብዙ ወጣት ክርስቲያኖች ስደት ሲገጥማቸው ይደነቃሉ፣ ተስፋም ይቆርጣሉ፤ ጥቂት የማይባሉትም ወደ ኋላ ይመለሳሉ። ብዙዎች ለጥቂት ቀናት በመልካም የሚሮጡ ይመስላሉ፤ ነገር ግን ኢየሱስ እንደ ተናገረላቸው ሰዎች ይሆናሉ፦ «ለጊዜውም ነው እንጂ በእነርሱ ሥር የላቸውም፥ ኋላም በቃሉ ምክንያት መከራ ወይም ስደት በሆነ ጊዜ ወዲያው ይሰናከላሉ» (ማርቆስ 4:17)። ተስፋ ሰጪ ይመስሉ የነበሩ ብዙ የክርስትና ሕይወቶች በዚህ መንገድ ሲያበቁ አይቻለሁ። ነገር ግን ስደት በትክክል ከተቀበልነው ለክርስትና ሕይወት እንቅፋት መሆኑ ቀርቶ ረዳት ይሆናል።

በምትሰደድበት ጊዜ ተስፋ አትቁረጥ። ስደቱ የቱንም ያህል ብርቱና ከባድ ቢሆን ስለ እርሱ አመስግን። ኢየሱስ እንዲህ ይላል፦ «ስለ ጽድቅ የሚሰደዱ ብፁዓን ናቸው፥ መንግሥተ ሰማያት የእነርሱ ናትና። ሲነቅፉአችሁና ሲያሳድዱአችሁ በእኔም ምክንያት ክፉውን ሁሉ በውሸት ሲናገሩባችሁ ብፁዓን ናችሁ። ዋጋችሁ በሰማያት ታላቅ ነውና ደስ ይበላችሁ፥ ሐሴትም አድርጉ፤ ከእናንተ በፊት የነበሩትን ነቢያትን እንዲሁ አሳድደዋቸዋልና» (ማቴዎስ 5:10-12)። ስለ ክርስቶስና ስለ እውነት መሰደድ ታላቅ መብት ነው። ጴጥሮስ ይህን ተረድቶ በዘመኑ ለነበሩት ክርስቲያኖች እንዲህ ብሎ ጻፈ፦ «ወዳጆች ሆይ፥ በእናንተ መካከል እንደ እሳት ሊፈትናችሁ ስለሚሆነው መከራ ድንቅ ነገር እንደ መጣባችሁ አትደነቁ፤ ነገር ግን ክብሩ ሲገለጥ ደግሞ ሐሤት እያደረጋችሁ ደስ እንዲላችሁ፥ በክርስቶስ መከራ በምትካፈሉበት ልክ ደስ ይበላችሁ። ስለ ክርስቶስ ስም ብትነቀፉ የክብር መንፈስ የእግዚአብሔር መንፈስ በእናንተ ላይ ያርፋልና ብፁዓን ናችሁ» (1ኛ ጴጥሮስ 4:12-14)። ስደቱ በእርግጥ ስለ ክርስቶስ እንጂ በአንተ እንግዳ ጠባይ ወይም በእልኸኝነትህ ምክንያት እንዳልሆነ እርግጠኛ ሁን። እልኸኞችና ነጭናጮች በመሆናቸው የሌሎችን ቅሬታ በራሳቸው ላይ የሚያመጡ፣ ከዚያም ስለ ክርስቶስና ስለ ጽድቅ እየተሰደዱ እንደ ሆነ ራሳቸውን የሚያታልሉ ብዙዎች አሉ። ለሌሎች አመለካከት አሳቢ ሁን፤ ለሌሎችም አካሄድ አሳቢ ሁን። አመለካከትህን ባልተገባ መንገድ በሌሎች ላይ እንዳትጭን፣ ወይም ሕሊናህን ለሌሎች ሰዎች የሕይወት ሕግ እንዳታደርግ ተጠንቀቅ። ነገር ግን ከመርህ ቅንጣት ታህል እንኳ ፈቀቅ አትበል። እውነት ነው ብለህ ለምታምነው ቁም። በፍቅር አድርገው፤ ነገር ግን በማንኛውም ዋጋ አድርገው። ስለ እምነትህና ስለ መርህህ በመቆምህ ብትጠላ፣ ብትሰደብ፣ በዚህም ምክንያት ማንኛውም ዓይነት ግፍ ቢደርስብህ አትዘን፤ ይልቁንም ደስ ይበልህ። ክፉ ስለሚናገሩብህ ሰዎች ክፉ አትናገር፤ እንዲህ ተብሎ ተጽፏልና፦ «ክርስቶስ ደግሞ ፍለጋውን እንድትከተሉ ምሳሌ ትቶላችሁ ስለ እናንተ መከራን ተቀብሎአልና። … ሲሰድቡት መልሶ አልተሳደበም መከራንም ሲቀበል አልዛተም፥ ነገር ግን በጽድቅ ለሚፈርደው ራሱን አሳልፎ ሰጠ» (1ኛ ጴጥሮስ 2:21፣ 23)።

በዚህ ነጥብ ላይ ብዙ ክርስቲያኖች ይሳሳታሉ። ለእውነት በታማኝነት ይቆማሉ፤ ነገር ግን ስለ እውነት የሚመጣባቸውን ስደት በክፋት ይቀበላሉ፤ ይመረራሉ፤ ከራሳቸው በቀር ሁሉን መኰነን ይጀምራሉ። ስደትን በዚህ መንገድ መሸከም በረከት የለውም። ስደት በየዋህነት፣ በፍቅርና በእርጋታ ሊሸከም ይገባዋል። ስለ ራስህ ስደት አታውራ። በእርሱ ደስ ይበልህ። ስለ እርሱ እግዚአብሔርን አመስግን፤ እግዚአብሔርንም መታዘዝህን ቀጥል። የሚያሳድዱህንም መውደድና ስለ እነርሱ መጸለይ አትርሳ (ማቴዎስ 5:44)።

በማንኛውም ጊዜ ስደቱ ልትሸከመው ከምትችለው በላይ የከበደ መስሎ ከታየህ ዋጋው ምን ያህል የበዛ እንደ ሆነ አስብ፦ «ብንጸና፥ ከእርሱ ጋር ደግሞ እንነግሣለን፤ ብንክደው፥ እርሱ ደግሞ ይክደናል» (2ኛ ጢሞቴዎስ 2:12)። ሰው ሁሉ በብዙ መከራ ወደ እግዚአብሔር መንግሥት መግባት አለበት (የሐዋርያት ሥራ 14:22)፤ ነገር ግን በዚህ ምክንያት ወደ ኋላ አትመለስ። የስደት እሳት የቱንም ያህል ቢነድ፦ «ለእኛም ይገለጥ ዘንድ ካለው ክብር ጋር ቢመዛዘን የአሁኑ ዘመን ሥቃይ ምንም እንዳይደለ አስባለሁ» የሚለውን ሁልጊዜ አስብ (ሮሜ 8:18)። ደግሞም ቀላሉ መከራህ ለጊዜው ብቻ እንደ ሆነና «ከመጠን ይልቅ የሚበልጥ የዘላለም ክብር ብዛት» እንደሚያደርግልህ አስብ (2ኛ ቆሮንቶስ 4:17)። የሚታዩት ለጊዜው ናቸው፤ የማይታዩት ግን የዘላለም ናቸውና የማይታዩትን እንጂ የሚታዩትን አትመልከት (2ኛ ቆሮንቶስ 4:18)። ሐዋርያት እስከ እስራትና እስከ ግርፋት ድረስ በተሰደዱ ጊዜ፣ ያንን አስከፊ ቅጣት ካዘዘባቸው ሸንጎ ፊት ስለ ኢየሱስ ስም ይናቁ ዘንድ የተገባቸው ሆነው በመቈጠራቸው ደስ እያላቸው ወጡ፤ ዕለት ዕለትም በመቅደስና በየቤቱ ኢየሱስ ክርስቶስን ማስተማርንና መስበክን አልተዉም (የሐዋርያት ሥራ 5:40-42)።

አንዳንድ ጊዜ ከሌሎች ይልቅ አንተ የበለጠ የምትሰደድ ሊመስልህ ይችላል፤ ነገር ግን ሌሎች ምን መታገሥ እንዳለባቸው አታውቅም። እውነትም ቢሆን—ከማንም ይልቅ አንተ ብትሰደድ—ማጉረምረም ሳይሆን እንዲህ ያለውን ክብር ስለ ሰጠህ እግዚአብሔርን በትሕትና ማመስገን ይገባሃል። ዓይኖችህን በኢየሱስ ላይ አድርግ፦ «የእምነታችን ራስና ፈጻሚ የሆነው ኢየሱስ በፊቱ ስላለው ደስታ ነውርን ንቆ በመስቀል ታገሠ፥ በእግዚአብሔርም ዙፋን ቀኝ ተቀምጦአል። በነፍሳችሁ ዝላችሁ እንዳትደክሙ፥ ከኃጢአተኞች በደረሰበት እንዲህ ባለ መቃወም የጸናውን አስቡ» (ዕብራውያን 12:2፣ 3)። በአንድ ወቅት በባርነት ዘመን አዳኙን ካገኘ አንድ ጥቁር አረጋዊ ሰው ጋር እነጋገር ነበር። ጨካኙ ጌታው ለክርስቶስ ባለው ታማኝነት ምክንያት ደጋግሞ አስገረፈው፤ እርሱ ግን፦ «አዳኜ በእኔ ፋንታ በመስቀል ላይ ሲሞት ብቻ አሰብሁ፤ ስለ እርሱም ስደትን በመቀበሌ ደስ አለኝ» አለኝ።