በክርስቶስ ቅዱሳን
ቅድስናና መካከለኛነት

ምዕራፍ 10 · 7 ደቂቃ ንባብ · 8 ደቂቃ ማዳመጥ

ቅድስናና መካከለኛነት


ዘጠነኛ ቀን።

«ከጥሩ ወርቅም ቅጠል ሥራ፥ በእርሱም ላይ ለእግዚአብሔር ቅዱስ ብለህ ቅረጽበት። በአሮንም ግንባር ላይ ይሆናል፤ አሮንም የእስራኤል ልጆች በቅዱሳት ስጦታዎቻቸው ሁሉ የሚቀድሱትን የቅዱሳት ነገሮች ኃጢአት ይሸከማል፤ በእግዚአብሔርም ፊት የተወደዱ ይሆኑ ዘንድ ሁልጊዜ በግንባሩ ላይ ይሆናል።»—ዘጸአት 28፥36, 38።

የእግዚአብሔር ቤት የቅድስናው ማደሪያ፥ ራሱንም የሚገልጥበት ስፍራ ይሆን ዘንድ ነበረ፤ ያለ ፍርሃትና ያለ መንቀጥቀጥ የማይቀረብ ቅዱስ ሆኖ፥ ደግሞም የቅድስናው ተካፋዮች ሊሆኑ የሚወዱትን ሁሉ ወደ ራሱ የሚስብ ቀዳሽ ሆኖ። የቅዱሱና የቀዳሹ ህላዌው መገለጥ ማእከል በሊቀ ካህናቱ አካል ይገኛል፤ እርሱ እግዚአብሔርን በሰው ዘንድ፥ ሰውንም በእግዚአብሔር ዘንድ በመወከል ድርብ ሥራ ነበረው። የምልክትና የጥላ ሥርዓት ሊያቀርበውና ሊገልጠው እስከ ቻለ ድረስ፥ እርሱ በሰው መልክ የተገለጠ መለኮታዊ ቅድስና፥ እንደ መለኮታዊ ስጦታም የተሰጠ ሰብአዊ ቅድስና መገለጫ ነበረ። በእርሱ እግዚአብሔር ሕዝቡን ሊቀድስና ሊባርክ ቀረበ። በእርሱ ሕዝቡ ወደ እግዚአብሔር እጅግ ቀረቡ። ሆኖም ወደ ቅድስተ ቅዱሳን ሊገባ የሚችልበት የስርየት ቀን ራሱ ሰው ምን ያህል ቅዱስ እንዳልሆነ፥ በእግዚአብሔርም ፊት ለመኖር ምን ያህል እንደማይገባው የሚያሳይ ማስረጃ ብቻ ነበረ። በራሱ የእስራኤል ቅድስና ማጣት ማስረጃ ቢሆንም፥ የሚመጣው መድኃኒት፥ የተባረከው ጌታችን ኢየሱስ ምሳሌና ሥዕል ነበረ፤ ወደ ፊት የእግዚአብሔር ቅድስና የሕዝቡ ዕድል ፈንታ የሚሆንበትን መንገድ የሚያሳይ ድንቅ መግለጫ ነበረ።

ሊቀ ካህናቱ ክርስቶስን መቀደሳችን አድርጎ ከሚያሳይባቸው ብዙ ነገሮች መካከል በግንባሩ ላይ ካደረገው ከቅዱሱ አክሊል ይልቅ ብዙ ትርጉም ያለውና የሚያምር ምናልባት የለም። በእርሱ ዘንድ ያለው ነገር ሁሉ ቅዱስ ይሆን ዘንድ ነበረ። ልብሶቹ ቅዱሳት ልብሶች ነበሩ። ነገር ግን ይህ ቅድስና ሙሉ መገለጡን የሚያገኝበት አንድ ነገር ነበረ። በግንባሩ ላይ። ለእግዚአብሔር ቅዱስ የሚል ቃል የተቀረጸበትን የወርቅ ቅጠል ሁልጊዜ ያደርግ ዘንድ ነበረ። በዚያም ሰው ሁሉ የሕልውናው ዓላማ ሁሉ፥ የሚኖርለት አንድ ነገር፥ የመለኮታዊ ቅድስና መገለጫና ተሸካሚ መሆን፥ የእግዚአብሔር ቅድስና በሕዝቡ ላይ በበረከት የሚፈስስበት የተመረጠ መሆን እንደ ሆነ ያነብ ዘንድ ነበረ።

የቅዱሱ አክሊል በረከት የሚሠራበት መንገድ እጅግ የሚያስደንቅ ነበረ። ለእግዚአብሔር ቅዱስ የሚለውን በግንባሩ በመሸከሙ፥ እንደምናነበው፥ «የእስራኤል ልጆች የሚቀድሱትን የቅዱሳት ነገሮች ኃጢአት ይሸከም ዘንድ፥ በእግዚአብሔርም ፊት የተወደዱ ይሆኑ ዘንድ» ነበረ። ለኃጢአት ሁሉ መሥዋዕት ወይም የማስተስረያ መንገድ ተዘጋጅቶ ነበረ። ነገር ግን በመሥዋዕቱና በአምልኮው ራሱ ላይ የሚጣበቀው ኃጢአትስ? «እነሆ፥ በልብ ውስጥ እውነትን ወደድህ።» አምላኪው ንስሐው፥ እምነቱ፥ ፍቅሩ፥ መታዘዙ፥ ራሱን መቀደሱ ሁሉ ያልተፈጸመና የረከሰ መሆኑን በማወቁ ምን ያህል በሕመም ሊጨነቅ ይችል ነበር! ለዚህም ለአምላኪው ችግር እግዚአብሔር አዘጋጅቶ ነበረ። የሊቀ ካህናቱ ቅድስና የቅዱሳት ነገሮቹን ኃጢአትና ርኩሰት ሸፈነ። ቅዱሱ አክሊል የሊቀ ካህናቱ ቅድስና አምላኪውን የተወደደ እንደሚያደርገው የእግዚአብሔር ዋስትና ነበረ። እርሱ ቅዱስ ባይሆን፥ ከወንድሞቹ መካከል ቅዱስ የሆነ፥ ስለ እርሱም ደግሞ የሚጠቅም፥ ሊታመንበትም የሚችል ቅድስና ያለው አንድ ነበረ። በደም መርጨቱ ማስተስረያን እንዲያደርግ ብቻ ሳይሆን፥ በአካሉም እርሱንና ስጦታዎቹን እጅግ የተወደዱ የሚያደርግ ቅድስናን እንዲያስገኝለት ወደ ሊቀ ካህናቱ ሊመለከት ይችል ነበረ። የራሱን ቅድስና ማጣት እያወቀ፥ በመካከለኛ፥ ከራሱ በቀር በሌላው ቅድስና፥ እግዚአብሔር ባዘጋጀው ካህን ደስ ሊለው ይችል ነበረ።

በቅድስና መንገድ አንድ እርምጃ ወደ ፊት የሚመራን እጅግ የከበረ ትምህርት በዚህ የለንምን? እግዚአብሔር እንዴት ይቀድሳል? ለሚለው ጥያቄያችን መለኮታዊ መልስ አለን፤ መለኮታዊ ቅድስና ያርፍበት ዘንድ በመረጠው፥ ቅድስናውም ለእኛ፥ ለወንድሞቹ፥ ለገዛ ሥጋው ብልቶች፥ በሆነ ሰው በኩል ነው። የቅዱሳት ነገሮቻችን ኃጢአት እንኳ እስኪጠፋ ድረስ ኃይል ባለው ቅድስና በኩል ነው፤ ፈጽመን ደስ የምናሰኝ እንደ ሆንን በመተማመን ወደ ቅዱሱ ፊት ልንገባ እንችላለን።


ብዙ በትጋት ቅድስናን የሚፈልጉ ሰዎች የሚያስፈልጋቸው ይህ ትምህርት አይደለምን? ቃሉ ስለ ተባረከው ማስተስረያና ስላመጣው ፍጹም ይቅርታ የሚያስተምረውን ሁሉ ያውቃሉ። በአብ ድንቅ ፍቅርና ስለ እነርሱ ሊያደርግ ባዘጋጀው ያምናሉ። ሆኖም አብ መጥተው በረከቱን እንዲቀበሉ የሚጠብቅባቸውን የሕፃን የዋህነት፥ የእምነትን መተማመን፥ በፍቅር መታዘዝንና የተባረከ ራስን መስጠትን ሲሰሙ ልባቸው በፍርሃት ይዝላል። በረከቱ ሁሉ ከአቅማቸው በላይ እንደ ሆነ ይመስላቸዋል። ቅዱሱ እጅግ ይቀርባል ቢባል ምን ይጠቅማል? ቅድስና ማጣታቸው ራሱን የሚያቀርብላቸውን ሕልውና ለመጠየቅም ሆነ ለመያዝ የማይችሉ ያደርጋቸዋል። እስቲ ቅዱሱ በዚህ የሚቀድስበትን መንገዱን፥ ለቅድስናው ኅብረትም የሚያዘጋጅበትን እንዴት እንደሚገልጥ ተመልከቱ። በመካከለኛነት በሚቆመው በመረጠው በኩል በእርሱ ለሚመጡ ሁሉ የሚበቃ ቅድስና ተዘጋጅቶና ተከማችቶ አለ። ለመጸለይ ወይም ለማምለክ ስሰግድ፥ እግዚአብሔርም ሊጠይቀው መብት ካለው ትሕትና፥ ትጋትና እምነት ገና ምን ያህል እንደሚጎድለኝ ሲሰማኝ፥ በቅድስናው ወዳለው ሊቀ ካህናት፥ በግንባሩ ላይ ወዳለው ቅዱስ አክሊል ቀና ብዬ ልመለከት፥ የቅዱሳት ነገሮቼም ኃጢአት እንደ ተሸከመና እንደ ተወገደ ላምን እችላለሁ። በጉድለቴና በማይገባኝ ሁሉ ሆኜ ጸሎቴ የተወደደ፥ መልካም መዓዛ እንደ ሆነ በእርግጥ ላውቅ እችላለሁ። ስለ ቀባው ሲል ፈገግ ብሎ ሲመለከተኝ ለማየት ወደ ቅዱሱ ቀና ብዬ ልመለከት እችላለሁ። «በእግዚአብሔርም ፊት የተወደዱ ይሆኑ ዘንድ ቅዱሱ አክሊል ሁልጊዜ በግንባሩ ላይ ይሆናል።» ይህ የተባረከው የምትክነት እውነት ነው—አንዱ ስለ ሁሉ—የመካከለኛነትም እውነት ነው፤ እኛን የሚቀድስበት የእግዚአብሔር መንገድ ነው። የሚያመልከው እስራኤላዊ መሥዋዕት በሌላው ቅድስና ምክንያት ቅዱስና የተወደደ ነው።

የብሉይ ኪዳን ጥላ የአዲስ ኪዳንን እውነት ከጸጋውና ከእውነቱ ሙላት ጋር ፈጽሞ በበቂ ሊገልጠው አይችልም። ጥናታችንን ስንቀጥል፥ በእርሱ ስለ ሆንን መቀደሳችን የሆነው የኢየሱስ ቅድስና የተቈጠረልን ብቻ ሳይሆን የተሰጠንም እንደ ሆነ እናገኛለን፤ የለበስነው አዲሱ ሰው በእውነተኛ ቅድስና የተፈጠረ ነው። ቅዱሳን ተብለን የተቈጠርን ብቻ አይደለንም፤ ቅዱሳን ነን፥ በክርስቶስ ኢየሱስ አዲስ ቅዱስ ባሕርይ ተቀብለናል። «የሚቀድሰውም የሚቀደሱትም ሁሉ ከአንድ ናቸው፤ ስለዚህም ምክንያት ወንድሞች ብሎ ሊጠራቸው አያፍርም።» አዲሱንና ቅዱሱን ባሕርይ፥ ከእርሱም ጋር በኢየሱስ ባለው ቅድስና ሁሉ መብትና ድርሻ የሰጠን ከእግዚአብሔር ቅዱስ ከኢየሱስ ጋር ያለን ሕያው አንድነት ነው። ስለዚህ ምን ያህል ቅዱሳን እንዳልሆንን ባወቅን ቍጥር፥ እኛና ስጦታዎቻችን እጅግ የተወደድን እንደ ሆንን ሙሉ መተማመን እንድንደሰት ወደ ኢየሱስ ቅድስና መሸፈኛ በታች መምጣት ብቻ ይበቃናል። የእምነታችን ድካም፥ ለእግዚአብሔር ክብር ባለን ምኞት ያለው ጉድለት፥ በፍቅራችን ወይም በቅንዓታችን ያለው እጦት ምንም ያህል ታላቅ ቢሆን፥ ኢየሱስን በግንባሩ ላይ ለእግዚአብሔር ቅዱስ የሚለውን አድርጎ ስናየው፥ የሙሉ ደስታንና የፍጹም መቀበልን መለኮታዊ ፈገግታ ለመቀበል ፊታችንን ቀና እናደርጋለን።

እግዚአብሔር የሚቀድስበት መንገድ ይህ ነው። እንዳየነው በቅዱሱ ስፍራ ብቻ ሳይሆን በቅዱሳን ሰዎችም ደግሞ ከማእከል ይጀምራል፤ ከዚያም ዘወትር እየሰፋ በሚሄድ ክበብ ይቀድሳል። ይህም መለኮታዊ ዘዴ በስኬት እንደሚጠናቀቅ እርግጠኞች ልንሆን እንችላለን። በቃሉ ውስጥ ምን ያህል እንደሚፈጸም የሚያሳይ እጅግ አስደናቂ ምሳሌ እናገኛለን። በቅዱሱ አክሊል ላይ ያሉትን ቃላት በብሉይ ኪዳን መጨረሻ ላይ እንደ ገና እናገኛቸዋለን። በእግዚአብሔር ቀን «በፈረሶች ሻኵራዎች ላይ። ለእግዚአብሔር ቅዱስ የሚል ይጻፋል።» የሊቀ ካህናቱ መፈክር በዚያን ጊዜ የዕለት ኑሮ መለያ ቃል ይሆናል፤ የውበትም ሆነ የአገልግሎት ዕቃ ሁሉ ደግሞ ቅዱስ ይሆናል፤ ከራስ እስከ ልብሱ ዘርፍ ድረስ ይዘረጋል። የቅዱሳት ነገሮቻችንን ኃጢአት ለመሸፈን ባለው ኃይሉ የኢየሱስን ቅድስና በመረዳት እንጀምር፤ እንፈትነው፥ ከእንግዲህም የማይገባን መሆናችን ወደ ኋላ እንዲያስቀረን ወይም እንድንጠራጠር እንዲያደርገን አንፍቀድለት፤ በክርስቶስ ለእግዚአብሔር ቅዱሳን ስለ ሆንን እኛና ቅዱሳት ነገሮቻችን የተወደድን እንደ ሆንን እንመን፤ በዚህ የመወደድ ንቃት እንኑር፥ ወደ ቅዱሱም ኅብረት እንግባ። ወደ ኢየሱስ ቅድስና ስንገባና በእርሱ ስንኖር፥ እርሱ ወደ እኛ ይገባል በእኛም ይኖራል። ይይዘናል፥ ድል የሚያደርግ ኃይሉንም በኑሮአችን ሁሉ ያሰራጫል፤ በእኛም ደግሞ የእኛ በሆነው ነገር ሁሉ ላይ ለእግዚአብሔር ቅዱስ የሚለው ቃል እስኪያበራ ድረስ ይሠራል። የእግዚአብሔር የቅድስና መንገድ ቅድስናው ኃይሉን ያሳይ ዘንድ ዘወትር ከማእከል፥ በዚህ ከታደሰው ባሕርያችን ማእከል፥ በሕልውናችን ዙሪያ ሁሉ እንደሚሄድ እንደ ገና እናገኛለን። እርሱ የቅዱሳት ነገሮቻችንን ኃጢአት ሲያስወግድ በኢየሱስ ቅድስና መሸፈኛ በታች ብቻ እንኑር፤ እኛንና ኑሮአችንን ለእግዚአብሔር ቅዱስ ያደርጋል።

እኔ ቅዱስ ነኝና ቅዱሳን ሁኑ።

አምላኬና አባቴ ሆይ! በክርስቶስ ቅዱሳን ብለህ ከጠራሃቸው ጋር መንገድህና ጸጋህ ምን እንደ ሆነ ስለዚህ ድንቅ መገለጥ ነፍሴ ትባርክሃለች። አቤቱ፥ ልባችን ዘወትር አንተ ዘንድ መወደዳችንን በደረስንበት ልክ እንደ ወሰነው፥ ጉድለታችንንም ማወቃችን ኵነኔን እንዳመጣ አንተ ታውቃለህ። በሚቀድሰን በእርሱ ቅድስና ውስጥ ኃጢአታችንን ለመሸፈንና የፍጹም መወደድን መተማመን ለመስጠት መለኮታዊ ወሰን የሌለው ኃይል እንዳለ እጅግ ጥቂት አውቀን ነበር። የተባረክህ አባት ሆይ! የተባረከውን የኢየሱስን ቅዱስ አክሊል፥ ድንቅና እጅግ የተባረከ ቃሉንም፥ ለእግዚአብሔር ቅዱስ የሚለውን፥ ለማየት ዓይኖቻችንን፥ ለማስተዋልም ልባችንን ክፈት።

ጸሎታችን በእግዚአብሔር ፈቃድ ወይም ለክብሩ፥ ወይም በእውነት በኢየሱስ ስም መሆኑን እጅግ ጥቂት ስለምናውቅ ልባችን ሲፈርድብን፥ እጅግ ቅዱስ አባት ሆይ፥ አሁንም ከአንተ ዘንድ ያለን ፈገግታ ምን ያህል የሚያበራ፥ አቀባበሉም ምን ያህል ከልብ እንደ ሆነ በመንፈስህ ታሳየን ዘንድ ፍቀድ። በሊቀ ካህናታችን ቅድስና እንድንመጣ፥ ወደ ቅድስናህም እንድንገባ አስተምረን፥ እርሱ እስኪይዘን፥ ሕልውናችንንም ሁሉ እስኪሞላ፥ በእኛ ያለውም ሁሉ ለእግዚአብሔር ቅዱስ እስኪሆን ድረስ። አሜን።

1. ቅድስና በራሴ ላይ ላየው ወይም ላደንቀው የምችለው ነገር አይደለም፤ ራሴን በኢየሱስ ቅድስና መሸፈን፥ ራሴንም በእርሱ ማጣት ነው። ይህ በአሮንና በቅዱሱ አክሊል እንዴት በድንቅ ተመስሎአል። የኢየሱስን ቅድስና ይበልጥ ባየሁና በተረዳሁ ቍጥር፥ በራሴ ቅድስናን ማየቴና መፈለጌ ያንሳል።

2. እርሱ ይቀድሰኛል፤ ጠባዮቼና ዝንባሌዎቼ ይታደሳሉ፤ ልቤና አእምሮዬ ይነጻሉ ይቀደሳሉም፤ ቅድስና አዲስ ባሕርይ ይሆናል፤ ሆኖም ሁልጊዜ የሚያዋርድ ነገር ግን በደስታ የተሞላ ንቃት ይኖራል፤ እኔ አይደለሁም፤ ክርስቶስ ግን በእኔ ይኖራል።

3. በሌላው ቅድስና፥ በኢየሱስ ቅድስና፥ ማለትም በእግዚአብሔር ቅድስና፥ ቅዱስ መሆን ምን እንደ ሆነ መንፈስ ቅዱስ ይገልጥልን ዘንድ በእግዚአብሔር ፊት እጅግ ዝቅ ብለንና ልባችን ለስልሶ እንኑር።

4. ይህን በአእምሮ ለመያዝ እጅግ አትጨነቅ ወይም አትድከም። ብቻ እመነው፥ ሁሉንም ያቃናልህ ዘንድ በየዋህነትና በመታመን ወደ ኢየሱስ ተመልከት።

5. በክርስቶስ ቅዱሳን። በሕፃን እምነት የክርስቶስን ቅድስና በእግዚአብሔር ፊት መሸፈኛዬ አድርጌ እንደ ገና እወስዳለሁ። በፍቅር መታዘዝ ወደ ፈቃዴና ወደ ኑሮዬ እወስደዋለሁ። ኢየሱስን እታመናለሁ እከተለውማለሁ፤ ይህ የቅድስና መንገድ ነው።

6. ከገነት ጀምሮ በቃሉ ያገኘናቸውን ትምህርቶች ብንሰበስብ፥ በእኛ ያሉ የቅድስና ክፍሎች እነዚህ እንደ ሆኑ እናያለን፤ እያንዳንዳቸውም ከእግዚአብሔር ቅድስና ልዩ ገጽታ ጋር ይስማማሉ፤ ጥልቅ ዕረፍት (ምዕ. 3)፥ ትሑት አክብሮት (ምዕ. 4)፥ ፍጹም ራስን መስጠት (ምዕ. 5)፥ በደስታ ማምለክ (ምዕ. 6)፥ የዋህ መታዘዝ (ምዕ. 7)። እነዚህ ሁሉ ለመለኮታዊ ማደር (ምዕ. 8) ያዘጋጃሉ፤ ይህንንም ደግሞ በራሱ ላይ የቅድስና አክሊል ባለው በኢየሱስ በመኖር እናገኘዋለን።

ጨርሰዋል፦ ቅድስናና መካከለኛነት

ቀዳሚ ቀጣይ