የእግዚአብሔር የተስፋ ቃሎች

የተስፋ ቃሎች ክቡርነት

የእግዚአብሔር የተስፋ ቃሎች ለአማኙ የማያልቅ የሀብት ማዕድን ናቸው። የተሰወሩ ጅማቶቻቸውን መርምሮ ማግኘትና በተሸሸገው መዝገባቸው ራሱን ማበልጸግ ቢያውቅ ምንኛ ደስተኛ ነው! እነርሱ ለማጥቃትም ለመከላከልም የሚሆኑ ልዩ ልዩ የጦር ዕቃዎች የተሞሉበት የጦር መሣሪያ ግምጃ ቤት ናቸው። ወደዚያ ቅዱስ የጦር ግምጃ ቤት መግባትን፣ የደረት ጥሩሩንና የራስ ቍሩን መልበስን፣ እጁንም በጦሩና በሰይፉ ላይ መጫንን የተማረ ብፁዕ ነው። እነርሱ አማኙ ልዩ ልዩ የሚያበረቱ መድኃኒቶችንና የተባረኩ ፈውሶችን የሚያገኝባቸው የሕክምና ቤት ናቸው፤ በዚያም ለቍስል ሁሉ ቅባት፣ ለዝለት ሁሉ የሚያበረታ መጠጥ፣ ለደዌ ሁሉ ፈውስ አይታጣም። በሰማያዊው የመድኃኒት ጥበብ የተካነ፣ የእግዚአብሔርን የተስፋ ቃሎች የመፈወስ ኃይል እንዴት እንደሚጨብጥ የሚያውቅ ብፁዕ ነው። የተስፋ ቃሎች ለክርስቲያኑ የምግብ ማከማቻ ናቸው። ዮሴፍ በግብፅ እንደ ሠራቸው ጎተራዎች፣ ወይም መናው እንደ ተጠበቀበት የወርቅ መሶብ ናቸው። የተስፋ ቃሎችን አምስቱን የገብስ እንጀራና ዓሣዎች ወስዶ አምስት ሺህ ፍላጎቶቹ ሁሉ እስኪሟሉለት ድረስ የሚቈርሳቸው፣ ከዚያም የተረፈውን ቍርስራሽ በመሶብ ሞልቶ መሰብሰብ የሚችል ብፁዕ ነው። የተስፋ ቃሎች ለክርስቲያኑ የነጻነቱ ማግና ካርታ ናቸው፤ የሰማያዊ ርስቱም የባለቤትነት ሰነዶች ናቸው። እነርሱን በሚገባ ማንበብና ሁሉንም የራሱ አድርጎ መጥራት የሚያውቅ ደስተኛ ነው። አዎን፣ እነርሱ የክርስቲያኑ የዘውድ ሀብቶች የሚጠበቁበት የዕንቍ ክፍል ናቸው። የንጉሣዊ ክብር ዕቃዎቹ የእርሱ ናቸው፤ ዛሬ በስውር ያደንቃቸዋል፤ ከዚህም በኋላ በገነት በግልጥ ይለብሳቸዋል። ጽኑውን ግምጃ ቤት የሚከፍተውን የብር ቍልፍ እንደ ያዘ ንጉሥ ከአሁኑ መብት ተሰጥቶታል፤ አሁንም እንኳ በትረ መንግሥቱን ሊጨብጥ፣ ዘውዱን ሊደፋ፣ የንጉሠ ነገሥቱንም መጐናጸፊያ በትከሻው ላይ ሊያደርግ ይችላል። ኦ፣ ታማኝ የሆነው፣ ቃል ኪዳኑንም የሚጠብቀው የአምላካችን የተስፋ ቃሎች በቃል ሊነገር በማይቻል መጠን ምንኛ ባለጠጎች ናቸው! ከተናጋሪዎች ሁሉ የበረታውን አንደበት ብንታደል፣ ያም አንደበት ከመሠዊያው በተወሰደ የእሳት ፍም ቢዳሰስ እንኳ፣ ለእግዚአብሔር እጅግ ታላቅና ክቡር የተስፋ ቃሎች የሚገባውን ምስጋና አንድ አሥረኛውን እንኳ ሊናገር አይችልም። ይልቁንም ወደ ዕረፍት የገቡት፣ አንደበታቸውም ከኪሩቤልና ከሱራፌል ከፍ ያለና ሐሴት የሞላበት ንግግር ጋር የተቃኘ እነርሱ እንኳ፣ በእግዚአብሔር ግምጃ ቤት ውስጥ የተከማቸውን የማይመረመረውን የክርስቶስን ባለጠግነት—የጸጋውን ቃል ኪዳን የተስፋ ቃሎች—ከፍታውንና ጥልቀቱን፣ ርዝመቱንና ስፋቱን ፈጽሞ ሊናገሩት አይችሉም።

እርሱ ራሱ ብሎአልና

ሐዋርያት እንደ መምህራቸው ሁልጊዜ ቃልን ከመጻሕፍት ለመጥቀስ እጅግ የተዘጋጁ ነበሩ። በመንፈስ መሪነት የሚናገሩ ሰዎች እንደ መሆናቸው ሁልጊዜ አዲስ ቃላትን ሊጠቀሙ ይችሉ ነበር፤ ነገር ግን ቀድሞ የመለኮታዊ ሥልጣን ማኅተም የታተመባቸውን የጥንት ቃላት መጥቀስን መረጡ (በዚህም ለእኛ ምሳሌ ናቸው)፦ «እርሱ ራሱ ብሎአልና»። እኛም እንዲሁ እናድርግ፤ የአገልጋዮች ቃል ጣፋጭ ሊሆን ቢችልም የእግዚአብሔር ቃል ግን ይበልጥ ጣፋጭ ነውና፤ አዲስ አሳብም የአዲስነት ውበት ሊኖረው ቢችልም፣ የጥንቱ የእግዚአብሔር ቃል ግን እንደ ጥንታዊና ክቡር ሳንቲሞች ድምፅም ክብደትም ዋጋም አለው፤ ልንጠቀምበት በምንፈልግበትም ቀን ጐድሎ አይገኝም። «እርሱ ራሱ ብሎአልና» የሚለው ቃል ጥርጣሬንና ፍርሃትን ከማባረሩም በላይ ለጸጋዎቻችን ሁሉ ምግብ ይሰጣል። ሐዋርያው እንድንረካ ሊያደርገን ሲፈልግ፦ «ያላችሁም ይብቃችሁ፤ እርሱ ራሱ ብሎአልና» ይላል፤ ደፋሮችና ብርቱዎች ሊያደርገን ሲፈልግ ደግሞ እንዲህ አጽንቶ ይናገራል፦ «እርሱ ራሱ። አልለቅህም ከቶም አልተውህም ብሎአልና»። ስለዚህ እኛ በድፍረት፦ «ጌታ ይረዳኛልና አልፈራም፤ ሰው ምን ያደርገኛል?» እንላለን። ሐዋርያው ጳውሎስ እምነትን ሊመግብ ሲፈልግ፣ ከመጻሕፍት በአብርሃም፣ በይስሐቅ፣ በያዕቆብ፣ በሙሴ፣ በጌዴዎን፣ በባርቅና በዮፍታሔ ምሳሌዎች በመመገብ ያደርገዋል። ሌላው ሐዋርያ በትዕግሥት ትምህርት ሊያረጋጋን ሲፈልግ፦ «ኢዮብ እንደ ታገሠ ሰምታችኋል» ይላል፤ ሊያነቃቃ የሚፈልገው የጸሎት ትጋታችንን ከሆነ ደግሞ፦ «ኤልያስ እንደ እኛ የሆነ ሰው ነበረ»፤ ጸለየም፣ አሸነፈም ይላል። «እርሱ ራሱ ብሎአልና» ለጸጋ ሁሉ የሚያለመልም ምግብ፣ ለኃጢአትም ሁሉ የሚገድል ቍርጥ ምት ነው። ለመልካሙ ነገር ምግብ፣ ለክፉውም ነገር መርዝ እነሆ በዚህ አለህ። እንግዲያስ መጻሕፍትን መርምር፤ እንዲህ በማድረግ በመለኮታዊው ሕይወት ጤናማ፣ ብርቱና ጠንካራ ሆነህ ታድጋለህና።

ነገር ግን በማንበብ ከመመርመርና በማስታወስ ከማከማቸት በተጨማሪ፣ በልምምድ ልንፈትናቸው ይገባናል፤ አንድ የተስፋ ቃል እውነት መሆኑ በተረጋገጠ ቍጥር ምልክት ልናደርግበትና እኛም እንደ ጥንቱ ሰው፦ «ቃልህ ሕያው አድርጎኛልና ይህች በመከራዬ መጽናኛዬ ናት» ማለት እንደምንችል ልናስተውል ይገባናል። ኢሳይያስ፦ «እግዚአብሔርን ተስፋ አድርግ» አለ፤ ቀጥሎም፦ «ደግሞ እላለሁ፥ እግዚአብሔርን ተስፋ አድርግ» ብሎ ጨመረ፤ የራሱ ልምምድ የእግዚአብሔርን ድምፅ ለሰሚዎቹ መልሶ እንዲያስተጋባ ያደረገው ይመስል። የተስፋውን ቃል ፈትን፤ የእግዚአብሔርን የገንዘብ ኖት ወደ ባንኩ መስኮት ውሰደው፤ ይመነዘር እንደ ሆነም ተመልከት። መከራህን ለማንሣት እርሱ ያዘጋጀውን መፈንቀያ ጨብጠው፤ እውነተኛ ኃይል ያለው እንደ ሆነም ሞክረው። ይህን መለኮታዊ እንጨት በሕይወትህ ማራ መራራ ውኃ ውስጥ ጣለው፤ እንዴት እንደሚያጣፍጠውም ተማር። ይህን ጨው ወስደህ በደፈረሰው ውኃ ውስጥ ጣለው፤ ጥንት በነቢዩ ኤልሳዕ እንደ ተፈወሰው ውኃ ጣፋጭ ይሆን እንደ ሆነም ተመልከት። «እግዚአብሔር ቸር እንደ ሆነ ቅመሱ እዩም … ለሚፈሩት ጕድለት የለባቸውምና።»

የማያልቁ የተስፋ ቃሎች

የእግዚአብሔር የተስፋ ቃሎች ሲፈጸሙ አያልቁም፤ አንድ ጊዜ ከተፈጸሙ በኋላም እንደ ቀድሞው ጸንተው ይቆማሉ፤ ዳግመኛ መፈጸማቸውንም ልንጠብቅ እንችላለን። የሰው ተስፋዎች በጥሩነታቸው እንኳ ለጊዜው ብቻ የሚበቃ ውኃ እንደሚይዝ የውኃ ጕድጓድ ናቸው፤ የእግዚአብሔር የተስፋ ቃሎች ግን ፈጽሞ እንደማይጐድል፣ ሁልጊዜም ሞልቶ እንደሚፈስስ ምንጭ ናቸው፤ ስለዚህ የያዙ የሚመስሉትን ሙሉ መጠን ከእነርሱ ልትቀዳ ትችላለህ፤ እነርሱም እንደ ቀድሞው ሞልተው ይኖራሉ።

የተስፋ ቃሎችን ማግኘት

እግዚአብሔር አንዳንድ ጊዜ መከራ በሕዝቡ ላይ ሊመጣ ሲል አዲስ የተስፋ ቃሎችን «በእምነት» ይሰጣቸዋል። ከኤልያስ ጋር እንዲሁ ነበረ። እግዚአብሔር፦ «ወደ ኮራት ፈፋ ሂድ፤ እነሆ፥ በዚያ ይመግቡህ ዘንድ ቍራዎችን አዝዣለሁ» አለው። ይህም በራቡ መጀመሪያ ነበረ። በዚያም ተቀመጠ፤ እግዚአብሔርም የተስፋ ቃሉን ፈጸመ፤ ኤልያስ በእምነት አግኝቶት ነበርና። በእምነት እየሠራና አሁንም በእግዚአብሔር ላይ እየተደገፈ በኮራት ይቀመጣል፤ የዚህም እምነት ውጤት ሆኖ እግዚአብሔር አዲስ የተስፋ ቃል ይሰጠዋል፦ «ተነሥተህ ወደ ሰራፕታ ሂድ—በዚያ ትመግብህ ዘንድ አንዲት መበለት ሴት አዝዣለሁ።» የመጀመሪያውን የተስፋ ቃል የተቀበለው እምነት የሁለተኛውን ክብር አገኘ። ከእኛም ጋር እንዲሁ ነው። ትንሽ የተስፋ ቃል ተሰጥቶን እስከ አሁን ድረስ መፈጸሙን ካየን፣ በእርሱ ከኖርንና የነፍሳችን መደገፊያና ምርኵዝ ካደረግነው፣ በእርግጥ እግዚአብሔር ሌላና ይበልጥ ታላቅ የሆነ ይሰጠናል። እንዲሁም ከተስፋ ቃል ወደ ተስፋ ቃል እየገሰገስን ስንሄድ፣ የተስፋ ቃሎች ያዕቆብ ያየው፣ ጫፉ ወደ ሰማይ የሚደርሰው የመሰላሉ ደረጃዎች ሆነው እናገኛቸዋለን። ያለህን የተስፋ ቃል ብትጠራጠርና ባትታመንበት፣ እግዚአብሔር ለነፍስህ የሚገልጠውን እንዲያበዛልህ ልትጠብቅ አትችልም። ትናንት በልብህ ላይ ስለ ተቀመጠው የተስፋ ቃል ብትፈራና ባታምን፣ ነገ አዲስ አይሰጥህም። ነገር ግን እግዚአብሔር አስቀድሞ በሰጠህ ላይ በየዋህ እምነት ተመሥርተህ ሥራ፤ ከኃይል ወደ ኃይል ትሄዳለህ፤ በጸጋ ላይ ጸጋን፣ በተስፋ ቃል ላይም ተስፋ ቃልን ትቀበላለህ። የእግዚአብሔር መንፈስ፣ ከሰማይ የመጣ መልአክ የነገረህ ያህል በብርቱ ኃይል ወደ ልብህ የሚደርስ የተስፋ ቃል በነፍስህ ውስጥ በሹክሹክታ ይናገራል፤ አንተም ቀድሞ ልትደርስባቸው ያልቻልኻቸውን የተስፋ ቃሎች «በእምነት» ታገኛለህ።

የተስፋ ቃሎችና ትእዛዛት

የተስፋ ቃሎች እንዲፈጸሙልህ ብትወድድ፣ ከተስፋ ቃሉ ጋር የተያያዘውን ትእዛዝ መፈጸምህን ተጠንቀቅ። የሙሴን ምሳሌ ተከተል። ሙሴ የእስራኤል ሕዝብ ለዓለም በረከት እንዲሆኑ የተስፋ ቃል እንደ ተሰጣቸው ያውቅ ነበር፤ ነገር ግን ያን ለማግኘት ራሱን መካድ አስፈላጊ ነበረ፤ ስለዚህ «የፈርዖን የልጅ ልጅ እንዳይባል በእምነት እምቢ አለ፤ ለጊዜው በኃጢአት ከሚገኝ ደስታ ይልቅ ከእግዚአብሔር ሕዝብ ጋር መከራ መቀበልን መረጠ»። የተስፋ ቃሉ ራስህን እንድትክድ ቢያዝህ፣ ራስህን ሳትክድ ልታገኘው አትችልም። ራስህን ካድ፤ መፈጸሙንም ታገኛለህ። ወይም የተስፋ ቃሉ ድፍረትን ይጠይቃል እንበል—ደፋር ሁን። ወይስ የተስፋ ቃሉ መታዘዝን ይጠይቃልን?—ታዛዥ ሁን። ረዓብ የእምነቷ መፈተኛ ስለ ነበረ ቀዩን ፈትል በመስኮቷ እንዴት እንደ ሰቀለች አስታውስ። አንተም እንዲሁ አድርግ። ክርስቶስ የነገረህን ሁሉ አድርግ። ትንሽ ቢመስልም ምንም ትእዛዝ ቸል አትበል። ጌታህ የሚነግርህን ምንም ሳትጠይቅ አድርግ፤ የጌታውን ትእዛዝ የሚጠራጠር አገልጋይ መጥፎ አገልጋይ ነውና። አንተም እንደ ኢትዮጵያዊው ጃንደረባ ከታዘዝህ በኋላ ደስ ብሎህ መንገድህን እንደምትሄድ ጥርጥር የለውም። ወይስ የተስፋ ቃሉ ስለ ምድሪቱ «መልካም ወሬ» ለሚያወሩ የተሰጠ ነውን? የተስፋ ቃሉን ያገኙት ካሌብና ኢያሱ ሁለቱ ብቻ እንደ ነበሩ አስታውስ፤ እግዚአብሔርን ያከበሩት እነርሱ ብቻ ነበሩና። አንተም እንዲሁ እግዚአብሔርን አክብር። የሚያላግጥ ዓለም አምላክህ መልካምና እውነተኛ እንደ ሆነ የምትሰጠውን የማይለወጥ ምስክርነትህን ይስማ። መቃተትህና ማጕረምረምህ ሰዎች ጨካኝ ጌታ እንዳለህ፣ አገልጋዮቹም ደስታ፣ መጽናናትና ሐሴት እንደሌላቸው እንዲጠረጥሩ አያድርጋቸው። የምታገለግለው እርሱ የግብፅ አስገባሪ አለመሆኑ ይታወቅ፤ ቀንበሩ ልዝብ ነው፤ አገልግሎቱ ደስታ፣ ዋጋውም ሊነገር የማይቻል ነው። «የሚያከብሩኝን አከብራለሁ።» ትእዛዛቱን ለመፈጸም ተጠንቀቅ፤ እግዚአብሔርም የተስፋ ቃሎቹን ይፈጽምልሃል።